Etthu heeni muntthuneyaanyu opaka weera nwereke omusoma Biblya mahiku ootheene?

Mwaha woowaatteliwa ni miteko soovara, neereke onnooxupani omutthara programa anyu omusoma Biblya mahiku ootheene? (Yeh. 1:8) Wakhala weera eyo enneereya ni nyuwo mweerereke otthara miruku iya:

• Mpake etthu enrowa owuupuxerakani. Mmwaativari alaarme mutelefoonini mwanyu weera awuupuxerekeni omusoma Biblya.

• Mmuhiyeke Biblya nipuro noowooneya. Wakhala weera munanvarihela muteko Biblya oowimprimiriwa, mmuheleke nipuro nenno ninrowa wookhaviherani omoonaka mahiku ootheene. — Ola. 11:18.

• Mwiiweleleke masu ookravariwa a mBiblyani. Mwiiweleleke masu awo vaavo munvaraanyu miteko sanyu nihiku ti nihiku. Maaye oneeriwa Tara, ori pioneira onvara ohiyu, ohimme ha, “Wiiwelela masu ookravariwa a mBiblyani vaavo kinvaraaka miteko sa vaate, onnaakikhavihera omusoma Biblya mahiku ootheene.”

• Muhikhulumuwe. Wakhala weera yoheereya etthu mootutuxera ewootxeelihani otthara eprograma anyu ya omusoma Biblya, musomeke iveersu vakhaani muhinaaye okona. Naari musomaka iveersu vakhaani mahiku ootheene, eyo enimookhaviherani vantxipale. — 1 Ped. 2:2.