Namakeya ahu Mutokweene Yesu onnaniiwexexa nnene

1-2. (a) Mwaha wa heeni Yehova omuruminhaawe Mwanawe owa elapo ya vathi? (b) Etthu heeni ninrowaahu woona mwa yoosoma ene yeela? (Aheberi 5:7-9)

MWA iyaakha 2.000 sivinre, Yehova aamurumiha Mwanawe owa elapo ya vathi. Mwaha wa heeni? Nthowa nimoha, waari waavuluxa atthu mwa yoottheka ni okhwa ni omalamaliha itthu soonanara Satana okumihenraawe. (Yoh. 3:16; 1 Yoh. 3:8) Yehova tho, aasuwela weera ekumi ya Yesu ntoko mutthu wammureherera weera akhale Namakeya Mutokweene ooreera, onniiwexexa, onoona ovoreya wahu ni onnimorela ikharari. Yesu opatxenre okwanihera muritti owo apatisiwakaru, eyaakha ya 29 Kristu awiiyeene.a

² Mwa yoosoma ene yeela, nnoorowa woona moota ekumi ya Yesu elapo ya vathi emureherenraaya weera akhale Namakeya Mutokweene onniiwexexa. Ti wootthuneya wiiwexexa moota Yesu “amalelihiwaiye” weera akwanihere muritti owo. Mwa mukhalelo ene yoola, onookhala wookhweya wa hiyo omwaattamela Yehova, nnaamweera ikwaha ikina nikhulumuwaka mwaha wa soottheka sahu. — Mmusome Aheberi 5:7-9.

MWANA OOSIVELEYA A MULUKU AAWA ELAPO YA VATHI

3-4. Matxentxo heeni matokweene Yesu aavirinhaawe emaara aaraawe valaponi?

³ Antxipale a hiyo, noopaka matxentxo a mweekumini. Mwa ntakihero, othaama nipuro naanisivela vantxipale, naahiyaka amusi ahu ni asinthamwene ahu. Matxentxo ala pooti okhala ooxupa. Mene khaavo mutthu ovirinhe matxentxo matokweene ntoko Yesu aavirinhaawe. Owo aari nlaika noopatxera ni nootepa otthuneya na wiirimu. Yesu aarukureriwa ni nsivelo na Yehova ni ikwaha sootheene annahakalala okhala ‘moono woolopwana’ wa Muluku. (Nsal. 16:11; Mir. 8:30) Nnaamweera vareene hiiho, Afilipi 2:7 ohimme weera Yesu aari oolikanneene ‘ohiya itthu sootheene aaraaweno’ ahiyaka muritti awe wa wiirimu weera akhale vamoha ni atthu oohimalela elapo ya vathi.

⁴ Nkuupuwelani moota ekumi ya Yesu yaaraaya mwa iyaakha sawe soopatxera elapo ya vathi. Emusi ya Yesu yaari yoothoiwa. Noosuwela eyo mwaha wooweera asitithi awe yaavanhe ipomba piili ntoko makeya, Yesu ayariwakaru. (Onam. 12:8; Luka 2:24) Mwene Herodi asuwelakaru oyariwa wa Yesu, owo aaheerera omwiiva. Weera evuluxe ekumi ya Yesu, emusi awe yaatthawela wExipitu weera yaakhala iwo mpuwa mwa etempu vakhaani. (Math. 2:13, 15) Ekumi eyo yaari yoovirikana vantxipale ni ele Yesu aaraaweno wiirimu!

5. Etthu heeni Yesu onnaawe emaara aaraawe elapo ya vathi, ni moota heeni eyo emureherenraaya weera akhale Namakeya Mutokweene onniiwexexa? (Nwehe efootu.)

⁵ Vaavo aaraawe valaponi, Yesu annoona ohaawa waakhumelela mapuro ootheene. Mwekhaikhai, owo aahaayeleela atthu aasivelaawe, onooneya weera mpaka owo aahaayeleela atithi awe Yosefe. Mpuwa wa muteko awe woolaleera, Yesu aakumanano anamakokho, atthu yahoona, oorakala ni asitiithi yaahaawa mwaha woowaayeleela anamwane aya. Ni Yesu annaamorela ikharari atthu awo. (Math. 9:2, 6; 15:30; 20:34; Mar. 1:40, 41; Luka 7:13) Ekhaikhai weera Yesu annoona ohaawa wa atthu emaara aaraawe wiirimu. Mene vano, ntoko mutthu aari elapo ya vathi, owo annoona ohaawa wa atthu wa mukhalelo woovirikana. (Yes. 53:4) Itthu Yesu aavirinhaawe areene elapo ya vathi, saamukhavihera wiiwexexa miyuupuwelo, onyoonyiheya ni woona ovoreya wa atthu. Ni ntoko mutthu ori poothe, owo-tho annakhulumuwa, oxupeya, ni annariipiwa murima.

YESU ANNAIHELA NIPURO NA ATTHU

6. Matakihero Yesaya ovarihenlaawe muteko, ennixuttiha eheeni woohima sa wiihela nipuro na atthu akina ni omoriwa ikharari wa Yesu? (Yesaya 42:3)

⁶ Mpuwa mwa muteko awe woolaleera,Yesu aahoonihera omoriwa ikharari vaavo aawoonaawe atthu ehasuliwaka. Mwaha woopaka eyo, owo aakwanihera eprofesiya yeeyo Yehova anvanhaawe moorwela mwa profeta Yesaya. Mwa soolepa sa Eheberi, atthu eri nnene ni oolipa ikwaha ikina ennalikanxeriwa ni ejardim enheleliwa erino miri mitoko-toko ni soolipa. (Nsal. 92:13 [92:12, Tradução do Novo Mundo]; Yes. 61:3; Yer. 31:12) Mene ale eri ohaawa ni enhasuliwa, ennalikanxeriwa ni muthala woowintakiwa ni ntthampo nihanle vakhaani otxipha, naari neere, itthu soohivareleya muteko. (Mmusome Yesaya 42:3; Math. 12:20) Uupuxeriwaka, Yesaya aalepa masu a matakihero yaawo yoonihera weera Yesu aamwaasivela ni waamorela ikharari atthu yaale yaahaapwatthiwa, ni yahaavahiwa mwiitti ni atthu akina.

7-8. Moota heeni Yesu okwanihenraawe eprofesiya ya Yesaya?

⁷ Matheyo ohoonihera weera Yesu ookwanihera eprofesiya ya Yesaya yeeyo ehimme weera: “Khanrowa wintakasa muthala wokhoromana nari otxipiha ntthampo nlanle.” Miiriira mikina sa Yesu saahaakhavihera atthu yaahasuliwa, ni apaale yiisoona okhala ntoko ntthampo nlanle. Mwa ntakihero, ekwaha emoha Yesu amphwanya mulopwana mmoha aasareñye makokho. Neereke mulopwana ola, aakhalano yooweherera ya olamihiwa ni otthikela okhala vamoha ni amusi awe ni asinthamwene awe? (Luka 5:12, 13) Yesu tho aamusuwela mulopwana mmoha ahaaiwa ni ahaawera wuuluma. Nkuupuwelani moota mulopwana owo aisonelaawe vaavo aawehaawe atthu akina etthekulaka moohakalala, mene owo ahinwera wiivoleihera? (Mar. 7:32, 33) Mene khaiyene ti seiya paahi Yesu apankaawe.

⁸ Mahiku a Yesu, ayuda antxipale yaaroromela weera atthu yaavoreiwa ni oorakala yaahasuliwa mwaha wa soottheka saya naari mwaha wa soottheka sa asipapaya. (Yoh. 9:2) Mwaha wa yoororomela eyo yoowootha, atthu ale yaahaawa nlelo yaannathanyiwa ni atthu akina ni awo yaanniisoona ohikhalano mwiitti. Akwaniheraka eprofesiya ya Yesaya, Yesu aahaalamiha atthu awo ni aawoonihera weera Muluku aanaapwattha. Osuwela eyo enanroromeiha eheeni?

9. Moovarihana ni Aheberi 4:15, 16 moota heeni ninsuwelaahu weera Namakeya ahu Mutokweene mweekhaikhai onnawiiwexexa atthu oohimalela?

⁹ Mmusome Aheberi 4:15, 16. Hiyo pooti ororomela weera ikwaha sootheene Yesu onoorowa wiihela nipuro nahu. Eyo entthuna ohima eheeni? Masu a eekereku etaphuleliwe ntoko “wiiwexexa” eri va Aheberi entaphulela oriipiwa murima vantxipale ni woona ovoreya wa atthu akina. (Mulikanxere ni Aheberi 10:34, vaavo masu ene yaala a ekereku ataphulelinwaaya ntoko ‘ohaawa vamoha.’) Vaavo ninsomaahu miiriira sa Yesu mBiblyani, ninnoona weera owo annaamorela ikharari vantxipale atthu. Owo khaapaka eyo moonyesereriwa. Mweekhaikhai, owo aanaapwattha atthu ni aatthuna waakhavihera. Mwa ntakihero, vaavo aamulaminhaawe mulopwana aarinono makokho, owo anwera opaka eyo amurakamenleene, mene owo aalakela omutava mutthu owo. Ni onooneya weera eyo yaari ekwaha yoopatxera mulopwana ole aatavinwaawe ni mutthu sivinreene iyaakha sintxipale! Muupuwele-tho vaavo Yesu aamulaminhaawe mulopwana ahaaiwa. Mooreera murima owo aamukuxera mulopwana ole nipuro noomaaleleya ni yahaakhanlevo atthu. Opwaha mwa yeeyo, vaavo nfarisi ahaamurerenlaawe murima muthiyana aattharunwe yoowo aarapinhe inaani sa Yesu ni maithori awe ni anuumiha ni maihi awe, Yesu aamwaakiha. (Math. 8:3; Mar. 7:33; Luka 7:44) Yesu khaasepa atthu yaale yaavoreiwa ni yaapanke soottheka itokweene. Mweekhaikhai, owo aatthuna weera atthu eroweke wa yoowo ni owo annawoonihera nsivelo aaraaweno naawo. Hiyo nroromeleke weera Yesu onnavirelela wiihela nipuro nahu.

NIMUTAKIHAKE NAMAKEYA AHU MUTOKWEENE OLELO

10. Etthu heeni nintthuneyaahu ovarela muteko olelo weera naakhavihere ale ehiniiwa ni ehinoona? (Nwehe-tho efootu.)

¹⁰ Ntoko atthareli a Yesu, hiyo ninniilipihera weera nimutakihe owo nooniheraka nsivelo, niihelaka nipuro na atthu akina ni nimoriwaka ikharari. (1 Ped. 2:21; 3:8) Ekhaikhai weera khaninwera waalamiha ale ehiniiwa naari ale ehinoona, mene hiyo pooti waakhavihera atthu awo mwa mukhalelo wa omunepani. Mwa ntakihero, ipublikasau sahu seiyo simmuuluma Biblya olelo, sinnaphwanyeya mwa muulumo ookwanaka 100 a nuulumo na matata. Ni ale ehinoona nnene, sookhala ipublikasau sa ebraille a moolumo ookwanaka 60, ni-tho nookhalano masu ookravariwa a iviidiyu sahu a muulumo ookwanaka 100. Sootheene iyo sinnapakiwa weera saakhavihereke ale ehiniiwa ni ehinoona weera ekhale asinthamwene a Yehova ni Mwanawe Yesu.

11. Moota heeni mareherero a Yehova enooniheraaya omoriwa ikharari wa atthu ootheene hiihaale ntoko Yesu? (Miteko 2:5-7, 33) (Nwehe-tho efootu.)

¹¹ Mareeherero a Yehova enniilipihera waakhavihera atthu a makhalelo ootheene. Muupuwele weera avinyererihiwakaru, Yesu aamwaramwaxa munepa awe wootteela wa atthu ootheene yaathukumanne ofestani ya Pentekoste weera ewere wiiwa mitthenka sooreera ‘ni nuulumo naya.’ (Musome Miteko 2:5-7, 33.) Ehooleliwaka ni Yesu, mareherero a Yehova ennakumihera ipublikasau simmuuluma Biblya a muulumo oopwahaka 1.000, muulumo makina a yaawo enuulummwa ni atthu vakhaani. Mwa ntakihero, muulumo makina a atthu a wAmeríndio enuulummwa ni atthu vakhaani a wAmerica do Norte ni oSul. Nnamweera vareene hiiho, sinnaphwanyeya ipublikasau simpwaha 160 ni muulumo ene yaawo weera atthu ootheene enuuluma muulumo awo ekhaleno eparakha yoowiiwa mitthenka sooreera. Ipublikasau sahu-tho sinnaphwanyeya muulumo Romani oopwahaka 20. Ni atthu antxipale enuuluma muulumo awo ennanvarela Yehova.

12. Etthu heeni ekina mareherero a Yehova enaapakelaaya atthu olelo?

¹² Ohiya waakhavihera atthu wiiwa mitthenka sooreera, mareherero a Yehova ennaakhavihera ale enviriha erisa ya ephattu. Weera yeereye eyo, imiliyawu sintxipale sa Ananmoona a Yehova enniivaherera wera yaakhavihera ale enviriha erisa ya ephattu. Mareherero-tho a Yehova ennareherera mapuro weera atthu ethukumanekemo weera exuttereke woohima sa nsivelo na Muluku ni weera emukokhoreleke.

NAMAKEYA AHU MUTOKWEENE ONIMOOKHAVIHERANI

13. Mwa mikhalelo heeni mikina Yesu onnikhaviheraawe?

¹³ Yesu, ntoko mukukhuli ahu ooreera, onnapwattha soohaawela sa omunepani sa mutthu ti mutthu a hiyo. (Yoh. 10:14; Aef. 4:7) Ikwaha ikina, makhalelo ahu a ekumi pooti oneeriha wiisoona okhala ntoko ntthampo nenno ninhalela otxipha naari ntoko muthala woowintakiwa. Apaale hiyo pooti wiisoona okhala ookhulumuwa mwaha wa eretta etokweene nraahuno, yoottheka nipankaahu, naari mwaha wa onyoonyihana ni munna naari murokora. Mwaha wa ovoreya ni onyoonyiheya ninvirihaahu, hiyo pooti woona okhala wooxupa owehexexa yooweherera ahu ya muhoolo. Muupuweleke weera Yesu onnoona itthu munviriha anyu ni owo onniiwexexa miyuupuwelo sanyu soowiixera. Mwaha wa omoriwa ikharari ni wiihela nipuro nanyu, owo onnoomorelani ikharari ni ontthuna opaka etthu weera ookhavihereni. Mwa ntakihero, Owo pooti ovarihela muteko munepa awe wootteela weera oovaheeni ikuru vaavo munkhulumuwa anyu. (Yoh. 16:7; Tito 3:6) Opwaha mwa yeeyo, Yesu tho pooti waavarihela muteko ‘atthu eri soovaha’, naari neere, asitokweene a mmulokoni, ni asinna ni asirokora akina weera yoolipiheni ni yookhavihereni nyuwo. — Aef. 4:8.

14. Etthu heeni nintthuneya ahu opaka vaavo ninkhulumuwaahu?

¹⁴ Wakhala weera nyuwo mookhulumuwa, muupuweleke weera Yesu Namakeya ahu Mutokweene, ni muupuwele etthu entaphulelaaya eyo wa nyuwo. Muupuweleke weera Yehova oomurumiha Mwanawe owa elapo ya vathi, ohiya paahi weera avahe ekumi awe ntoko nlivo, mene weera amukhavihere Yesu wiiwexexa nnene sene maxupo aatthu oohimalela envirihaaya. Vaavo ninkhulumuwaahu mwaha wa soottheka sahu, Yesu ori oolikaneene weera anikhavikhere “ehuhu yophwanela.” — Aheb. 4:15, 16.

15. Etthu heeni yaamukhavihenre muuna mmoha otthikele mmulokoni?

¹⁵ Yesu tho onnaweettiha atthu eniilipihera owaasa ni waakhavihera ale emuhinye Yehova. (Math. 18:12, 13) Moone ele yeerenye ni Stefano.b Sivirakaru iyaakha 12, akumihinweene mmulokoni owo aalakela woonela mithukumano. Owo ohimme ha: “Khaiyene waari wookhwya wa miyo, mene miyo kaatthuna weerela eparte emusi yoosivelaya ya Yehova veeli. Asitokweene a mmulokoni yaathukumana ni miyo ni yaakihiya okhala ootaphuwa. Ikwaha ikina miyo kannariipiwa murima mwaha wooweera kaamuhiya Yehova. Mene asinna yaakuupuxera weera Yehova ni Yesu yaatthuna weera kivileleke. Vaavo kaatthikiherinwaaka mmulokoni, muloko wootheene waakaakhela miyo ni emusi aka mwa nsivelo. Muhoolo mwaya, amwaaraka yaapatxera omusoma Biblya, ni olelo nnanvarela Yehova vamoha ntoko emusi.” Namakeya ahu Mutokweene a nsivelo onnahakalala vantxipale vaavo onwoonaawe atthu enttharuwa ekhaviheriwaka weera etthikele mmulokoni!

16. Mwaha wa heeni nyuwo munxukurelaanyu mwaha wookhalano Namakeya Mutokweene onniiwexexa?

¹⁶ Mpuwa mwa ekumi awe valaponi, Yesu aahaakhavihera atthu antxipale yaahaawela nikhavihero mwa etempu yoophwanelela. Olelo nroromeleke weera owo onoorowa onikhavihera. Ni moohipisa, elapo enyowani, owo onoorowa waakhavihera atthu oohimalela weera ekhale oomalela ni otaphuwa mwa yoottheka ni ohimalela. Ninnamuxukurela Yehova, Muluku ahu yoowo oosareya nsivelo ni oomoriwa ikharari, onivanhe Namakeya ahu mutokweene onniiwexexa Mwanawe, Yesu!