‘ Nvireleleke okhalano wiiraana omoharu onkumiheriwa ni munepa wootteela’
MURUMMWA Paulo aawooperera makristawu a wEfeso weera evireleleke ‘ovilelana mukina ni mukhwaawe mwa nsivelo, evirelelaka okhalano wiiraana omoharu onkumiheriwa ni munepa wootteela mwa nlutte na murettele.’ — Aef. 4:2, 3.
‘Wiiraana’ nraahuno ti wa ‘munepa wootteela.’ Eyo entaphulela weera wiiraana iwo onkumiheriwa ni ikuru sa Muluku. Menento, ntoko Paulo ohimmaawe, wiiraana wahu ontthuneya weera ovireleleke. Ni ataani? Mweekhaikhai mukristu ori poothe ontthuneya weera apakeke ele onweraawe weera ‘avireleleke okhalano wiiraana omoharu onkumiheriwa ni munepa wootteela.’
Weera nlikanxere nkaamuupuwelani mutthu onoovahani ekaaro enyowani. Taani aarowa okhalano muritti wookosoopa ekaaro eyo? Waakhula ti wookhweya. Nyuwo khamwaarowa onvaha mathowa ole oovanheni ekaaro wakhala weera yoonanara mwaha wooweera khamukosompe nnene.
Mwa mukhalelo mmoharu, nnaamweera mukhalelo ahu woowiiraana ntoko makristu ereene etthu nivahiwaahu ni Muluku, mutthu ti mutthu a hiyo ookhalano muritti wookhaliha wiiraana iwo. Wakhala weera hiyo khanniiwanana ni munna naari murokora, onnatthuneya wiikoha ha: ‘Neereke kinnapaka ele kinweraaka weera kikhalihe murettele mmulokoni kirehereraka mwaha owo?’
‘MWIILIPIHEREKE VANTXIPALE’ WEERA MUKHALIHE WIIRAANA
Ntoko murummwa Paulo ohimmaawe, ikwaha ikina ninnatthuneya wiilipihera vantxipale weera nivirelele okhaliha wiiraana omoharu wa munepa woottela. Hiyo ninnatthuneya opaka eyo otepaxa wene vaavo munna naari murokora onninyoonyihaawe. Weera mukhalihe wiiraana, neereke nyuwo ontthuneya ikwaha sootheene wuuluma ni mutthu owo? Ohiya ikwaha sootheene. Mwiikoheke ha, ‘Wakhala weera kinoopaka eyo neereke kinookumihera wiiraana naari kinrowa waatxeerera maxupo?’ ikwaha ikina etthu yooreera opaka ohiya mwaha owo naari olevelela. — Mir. 19:11; Mar. 11:25.
Mwiikoheke ha, ‘Wakhala weera kinoopaka eyo neereke kinookumihera wiiraana naari kinrowa waatxeerera maxupo?’
Ntoko hiihaale murummwa Paulo olempaawe, nivireleleke “[ovilelana] mukina ni mukhw’awe mosivelanani.” (Aef. 4:2) Ereferensia emoha enhima weera masu ala pooti otaphuleliwa ntoko “owaakhela moota awo eraaya.” Eyo entaphulela weera hiyo noosuwela weera asinna ennattheka, hiiho ntoko hiyo nraahu anamattheka. Ekhaikhai weera hiyo ninniilipihera owara “omutthu [onyowani].” (Aef. 4:23, 24) Menento khaavo a hiyo onrowa opaka eyo moomalela. (Arom. 3:23) Wakhala weera nnimwaakhulela ekhaikhai eyo, onookhala wookhweya wa hiyo ovilelana mukina ni mukhwaawe, nilevelelanaka ni hiiho ‘nivirelelaka okhalano wiiraana omoharu onkumiheriwa ni munepa wootteela.’
Vaavo ninvirelelaahu oreherera itthu ninnyoonyihiwaahu, naari nipakaka eyo vamurimani vahu, nnoovirelela okhalano “nlutte na murettele.” Masu eekereku etaphulelinwe ntoko “nlutte na murettele” eri va Aefeso 4:3 ennataphuleliwa ntoko ‘olupaanyiwa’ va Akolosi 2:19. Itthu sinlupaanya tisoolipa ni pooti olupaanya nikhuva ni nikhuva nikhwaaya. Mwa mukhalelo mmoharu, murettele ni nsivelo nraahuno ni asinna, ninnanikhavihera ovirelela okhala vakhiviru naawo, nnaamweera ikwaha ikina nihisiveliwaka ni ele empakaaya.
Mwa yeeyo, wakhala weera munna ooninyoonyiha, naari ooniveeha, mwiilipihere ompixera murima ohiya omuthoriha moohireerela. (Akol. 3:12) Okhala weera hiyo na atthu oohimalela, apaale nyuwo-tho pooti weeraka mootoko omunyoonyiha mutthu. Wuupuwelela eyo enimookhaviherani opaka eparte anyu weera ‘nvirelele okhalano wiiraana omoharu onkumiheriwa ni munepa wootteela.’