Makoho empakiwa ni ale ensoma irevista sahu

‘Muupuwelo’ heeni moohipisa va Yehova onrowaawe ohela vamurimani va anamalamulela?

Uulumaka woohima sa mapatxerero a maxupo matokweene, Apokalise 17:16, 17 ohimme ha: “Ni manyaka mulokó wònnawe ni tho enama ele, ti yala anarwa wittana ni muthiyana òraruxiwa ni enemukhalihe mileperu ni pwitipwiti, ni enekhure ithayi sawe ni enemuhise mmoroni. Khweli Muluku òhàvaha yawo [muupuwelo] mmurimani mwaya, wera epanke okhwela wawe, anyi, epanke okhwela wawe omosaru, eyo tiyo, evahe omwen’aya enama ele.” Khalayi irevista sahu saahima weera ‘muupuwelo’ Yehova onrowaawe ohela vamurimani va anamalamulela onyaanyiwa wa ittiini soowootha.

Mene ninnatthuneya otxentxa wiiwexexa nno. ‘Muupuwelo’ Yehova onrowaawe ohela vamurimani va anamalamulela ori “[ovaha] omwen’aya enama ele.” Weera niiwexexe moota eprofesiya ela enrowaaya okwanela, nrowe naakhule makoho enttharelana.

Taani enhimmwa mpuwa mwa eprofesiya ela? ‘Muthiyana namararuwa’ yoowo oniitthaniwa “Babilonia mutokwene,” owo onthoonyera ittiini soowootha sa elapo yootheene. ‘Enama yooxeera’ enthoonyera Nações Unidas. Eyo epakinwe eyaakha ya 1919 ni yoolakela ya okhaliha murettele elapo yootheene. Ni khalayi yiitthaniwa Liga das Nações nto vano oniitthaniwa Organização das Nações Unidas. (Apok. 17:3-5) “Manyaka mulokó” enaathoonyera anamalamulela ootheene enkhavihera enama.

Ovarihana heeni okhanle eriyari ya muthiyana namararuwa ni enama yooxeera? Muthiyana namararuwa ‘akilaathenleene’ enama yooxeera. Eyo entaphulela weera owo onnakhavihera ni onneerera ohoolela enama.

Etthu heeni enrowa weereya ni muthiyana namararuwa? Enama ni manyaka muloko enoorowa wiittana ni muthiyana namararuwa ni enookuxa mihakhu sawe ni owonihera otheene moota owo oraawe oowaali. Awo anoorowa opaka yootthuna ya Yehova emunyaanyaka muthiyana owo moomalela. (Apok. 17:1; 18:8) Iwo onrowa okhala omala wa ittiini soowootha. Menento ehinaaye weereya eyo, Yehova onimweeriha ikuvernu opaka etthu ehitonko weereya ovinyera khalayi.

Eheeni Yehova onrowaawe oweeriha anamalamulela opaka? Owo onoorowa ohela vamurimani va anamalamulela ‘muupuwelo awe,’ naari neere, weera anamalamulela ‘evahe owera waya ni omwene aya [enama yooxera],’ yeeyo eri Nações Unidas. (Apok. 17:13) Nkuupuwelani etthu entaphulelaaya eyo. Neereke anamalamulela enrowa othanla mwaneene aya ovaha owera waya ni olamulela waya enama? Hooye! Eprofesiya enoonihera weera Muluku tonrowa oweeriha opaka eyo. (Mir. 21:1; mulikanxere ni Yesaya 44:28.) Ni neereke matxentxo awo enrowa weereyaka vakhaani-vakhaani? Hooye! Awo enrowa weereya moowaakuveya. Muhoolo mwaya enama enoorowa ovarihela muteko owera enrowa aya waakhela weera epake yootthuna ya Yehova enyaanyaka khuluwi ittiini sootheene soowootha.

Vanonto, niweherereke eheeni? Nihiweherereke wiiwa inotisiya sihimaka weera anamalamulela vakhaani-vakhaani ennamukhavihera Nações Unidas. Etthu nintthuneyaahu oweherera tiila: mwa mukhalelo woowaakuveya ni mootutuxera, Yehova onimweeriha weera anamalamulela evaherere enama owera waya. Yeereya eyo hiyo nnoosuwela weera maxupo matokweene ehanle opatxera. Niwehereraka weereya eyo “nilipelele ni nikhale owiphima,” mwaha wooweera enookhumelela matxentxo moowaakuveya! — 1 Ates. 5:6.