Asinna oowuuluvala— Nyuwo tootthuneya wa Yehova

Apaale nyuwo-tho khamunwera opaka itthu sintxipale mwaapakanyu mureene mmiravo. Nnaamweera munvarenleene Yehova mwa iyaakha sintxipale, vaavo munlikanxeraanyu ele mwampakelaanyu Yehova khalayi ni ele munampakelaanyu vano, apaale munnakhulumuwa. Wakhala weera eyo enneereya ni nyuwo, etthu heeni enrowa wookhaviherani okhala oohaakalala?

ETTHU YEHOVA ONWEHERERAAWE WA NYUWO

Mwiikoheke ha, ‘Etthu heeni Yehova onwehereraawe wa miyo?’ Nyuwo pooti ophwanya nimaaliho ni masu eri va Olaleya 6:5, yaawo eneera: “Vetthwitthuni omutthune Yahvéh Muluku á ni murima’á wothene, ni munep’á wothene, ni ikuru sá sothene.”

Moovarihana ni eversu ela, Yehova onweherera weera munvareleke ni murima anyu wootheene, munepa anyu wootheene, ni ikuru sanyu sootheene. Mukhalelo ola pooti wookhavihera osepa wiilikanxera ni atthu akina naari olikanxera ele munpakaanyu viinaano ni ele mwaapakaanyu khalayi.

Muupuwele ela: Emaara mwaaraanyu mmiravo, etthu heeni mwanvahaanyu Yehova? Atthu antxipale a Yehova ennahima weera awo yanvaha ele yaaweeraaya. Wa nyuwo, eyo yaari etthu mwaaweraanyu opaka moovarihana ni makhalelo anyu etempu ene yeeyo. Etthu heeni muntthuneyaanyu onvaha Yehova vinaano va? Okhala weera makhalelo anyu aatxentxeya, nyuwo mumpaka ele munweraanyu moovarihana ni makhalelo anyu a viinaano. Wakhala weera nyuwo munnuupuwela haawo, munamoonelela weera munanvaha Yehova etthu emoharu mwanvahaanyu khalayi. Nyuwo mwannampakela Yehova ele mwaaweraanyu khalayi ni munoowera ompakela Yehova ele munweraanyu viinaano.

ETTHU MUXUTTENRAANYU MWEEKUMINI MWANYU POOTI WAAKHAVIHERA ATTHU AKINA

Ohiya wuupuwela paahiru etthu muhinweraanyu opaka, muupuweleke iparakha sintxipale muraanyuno weera mwaakhavihere akina ntoko mutthu oowuunnuwela. Mweekhaikhai, ntoko mukristu oowunnuwela, nyuwo pooti opaka itthu ikina vinaano mwahaaweraanyu opaka emaara mwaaraanyu mmiravo. Mwa ntakihero, nyuwo pooti opaka etthu ntoko:

Waaleela atthu akina sookumano sanyu. Muupuwelele ele Biblya onhimaawe mwa iversu sinttharelana:

Mwene Davidi: “Kàri mmiravo, vano kòhùluvala, nto nkitonke omòna naxariya òttuwaliwa nari osùlu awe ololihaka yotxa.” — Nsal. 37:25.

Yehoxuwa: “Òná, olelo miyo kinovolowa mukwaha anavolowaya atthu othene a velaponi. Mwàkhuleleke wi mwa sororomeliha sorera sothene seiye Yahvéh Muluku anyu òroromelihalaiyeni, nari emosaru khemorenle vathi, mene mòmaliheriwa sothene, anyi, nari emosaru khekhulumunwe.” — Yeh. 23:14.

Apaale nyuwo mootoko ohima masu enlikana ni ala. Davidi ni Yehoxuwa yaahima sooweereya saya. Okhala weera arumeyi ala oororomeleya a Yehova yaahima etthu yonnaaya ni yaiwalaaya mwa iyaakha sintxipale, masu awo yuulummaaya yaahaalipiha atthu akina.

Wakhala weera nyuwo monvarela Yehova mwa etempu yintxipale, Nyuwo pooti wuuluma mareeliho mphwannyaanyu mwaha woopaka eyo. Neereke nyuwo munnuupuwelela etthu yooreera woohima sa moota atthu a Yehova yaareelihinwaaya? Wakhala weera eyo yoheereya ni nyuwo, mukhale ootaphuwa waaleela atthu akina etthu ene yeeyo! Eyo pooti waamaaliha atthu akina ntoko yoomalinhaayani nyuwo, nto vaavo atthu akina enrowaaya wiiwaka itthu seereñye ni nyuwo vaavo manvarelaanyu Yehova, muroromeleke weera nyuwo munamwaalipiha awo. — Arom. 1:11, 12.

Mukhalelo mukina woowaalipiha akina ori woonela mithukumano Empa ya Omwene, waawereyaka vale. Opaka eyo, enoorowa woolipihani nyuwo vamoha ni asinna ni asirokora. Connie, ohimmwale woopatxerani, ohimme ha: “Woonela mithukumano onnakikhavihera ohikhulumuwa. Nkinkhulumuwa vaavo kinaakhelaaka nsivelo na asinna ni asirokora. Kinneerera waaxukurela atthu akina, kaavahaka ipresente ikhaanini. Miyo kinnailipihera ovirelela ovara miteko soomunepani vamoha ni asinna ni asirokora.”

YEHOVA ONNAVAHA MWIITTI MUTEKO ANYU WOOROROMELEYA

Aakhala matakihero mantxipale aatthu Yehova aasivelaawe nnaamweera yahaawera opaka ele yaatthunaaya. Moone yoowereya ya Simeyoni, mwIsraeli mmoha oowuuluvala, yoowo aari mukumi emaara Yesu aayarinwawe. Vavo Simeyoni aarowaawe otemplu, onooneya weera owo annawoona amiravo evaraka miteko sootthuneya otemplu iwo. Nankha Simeyoni? Pooti weeraka Simeyoni aanuupuwela weera khaavareleya muteko vantxipale wa Yehova mwaha wooweera khaawera onvarela Yehova ntoko amiravo ale. Mene Yehova anoona itthu moovirikana ni Simeyoni. Owo annamoona Simeyoni okhala mutthu “exariya ni [aamoova] Muluku,” ni aamureeliha anvahaka eparakha yoomoona Yesu areene mwaana. Yehova tho anvarihela muteko Simeyoni weera ahime weera Yesu aarowa okhala Mesiya! (Luka 2:25-35) Onooneya weera Yehova khaaweha ikuru sa weerutthuni sa Simeyoni, mene aaweha nroromelo nawe noolipa, “ni munepa wootteela waari ni yoowo.”

Nyuwo-tho pooti ororomela weera Yehova onnahela mwiitti muteko anyu woororomelaya, nnaamweera muhiweraka opaka itthu ikina. Vamaithoni vawe, owo ‘onweherera weera mutthu avaheke ele onweraawe, ohiya ele ohinweraawe’. — 2 Akor. 8:12.

Muupuwelelaka eyo, nwehexexeke ele munweraanyu opaka. Mwa ntakihero, mwa mikhalelo heeni sa muteko woolaleera munweraanyu naari ekhalaka etempu vakhaani? Neereke nyuwo pooti waalipiha asinna ni asirokora mwaalikarelaka naari nwinviarelaka mensagem? Opaka itthu ikhaanini sinoonihera nsivelo, pooti waalipiha asinna ni asirokora, otepaxa wene wakhala weera itthu iyo simpakiwa ni munna onanvarela Yehova mwa iyaakha sintxipale.

Akina ennaviriha maxupo a weerutthuni. Moone yooweereya ya wÁfrica Oriental eneera “Murokora anvarela muteko Biblya weera avuluxe ekumi ya muthiyana mmoha.”

Muupuweleke weera ntakihero nanyu na onvarela Yehova mwa iyaakha sintxipale ni ovirelela onvarela owo moororomeleya, ninnaalipiha atthu akina. Nyuwo, mwa ntakihero na ovilela, ni muroromeleke weera “Muluku kahi òhiloka mpaka ottuwala yopanka mwènranyu ni otthuna mwathonyenranyu nsina nawe, vavale mwàrumenlanyu Òttela ni munatepanyu wàrumela vanano tho.” — Aheb. 6:10.

NVIRERELEKE WAAKHAVIHERA ATTHU AKINA

Anamathola-thola anhima weera alopwana ni athiyana oowuuluvala enaakhavihera atthu akina ennakhalano ekumi yooreera ni muupuwelo wooreera ni ekumi aya ennaatxeerereya.

Ekhaikhai weera opaka itthu sooreera khonrowa omalamaliha maxupo ootheene a wuuluvala. Omwene wa Muluku paahi tonrowa omaliha maxupo otheene a wuuluvala, okhwa ni mukhalelo ahu woottheka nivanlaahu ni Adamu. — Arom. 5:12.

Nnaamweera vareene hiiho, muteko munanvarelaanyu Yehova, yoowo onhela mpuwa waakhavihera atthu akina omusuwela, onnalipiha yooweherera anyu ni pooti okhavihera ekumi anyu. Asinna oowuuluvala, musuweleke weera Yehova onnavaha mwiitti ele munampakelaanyu mmutekoni mwawe ni weera muloko onnavaha mwiitti ntakihero nanyu na nroromelo.