Ezekiyeli
31 Eyaakha ya namuloko nimosa, mweeri wa neeraru, nihiku noopacerya na mweeri owo, kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmuhimeerye Farawo mwene a wExiitu, ni muttitthi awe wa atthu,+ wiira:
‘Ti pani ori muulupale onlikana ni nyuwo?
3 Aahikhala mulopwana mmosa a wAsiiria, eyo piiyo, mwiri wa eseeturu ya oLiibano,
Yoowo iritta saya saari sooreera, saalikana ni iritta siniphwanyiha muuttutthi, woorakama,
Nave orakama waya waaniphiya mmeekuni.
4 Maasi yaahiiriha mwiri owo wunnuwa vanceene, maasi oowiixerya yaahiiriha mwiri owo okhala woorakama.
Mapuro aniphattuwa maasi, yaahirukurerya opuro waaliwe aya mwiri owo.
Nave maasi yaanikhuwari miri sootheene sa mmatta.
5 Tivonto, mwiri owo waari aya woorakama, ovikana miri sootheene sa mmatta.
Nave iritta saya saahaatta ni saahinnuwa,
Mwaha wa waatta wa maasi.
6 Axipalame ootheene a musulu, yaanipaka ipuru saya murittani-mmo,
Nave axinama ootheene a mutakhwani, yaanaatothola axaana aya vathi va iritta iyo,
Nave maloko ootheene oowaatta, yaanikhala vamuuttutthini vaya.
7 Owo aahinnuwa ni aahireera, onalikana ni iritta sawe,
Okhala wiira mitathaari sawe saanirowa mpakha mmaasini moowaatta.
8 Khuuvo mwiri mukina wa eseeturu ori muxarti ya Muluku,+ waakhanle oolikanyihiwa ni mwiri owo.
Khuuvo mwiri wa xuniiperu waarina iritta sinlikana ni iritta sa mwiri owo,
Khuuvo mwiri wa palaatanu waarina iritta ntoko iritta sa mwiri owo.
Khuuvo mwiri mukina muxarti ya Muluku, waakhanle oolikanyihiwa ni oreera waya.
9 Kaahireeriha ni makukhu oowaatta,
Nto miri sootheene sa wEedeni, exarti ya Muluku eekeekhai, saanikhalela nrima mwiri owo’.
10 “Etthu onihimya awe Pwiya Muulupalexa Yehova, tiila: ‘Okhala wiira mwiri owo ti woorakama ni makukhu awe anniphiya mmeekuni, nave onniisoona mwaha wa orakama wawe, 11 miyo kinonvahererya mmatatani mwa namalamulela oowerya a maloko.+ Tthiri owo onoomuhukhumu, nave miyo kinoomukhootta mwaha wa otakhala wawe. 12 Anamurwa, atthu ootepa otakhala a maloko, animwiikittha mwiri owo, nave anoohiya omiyaakoni. Nto makukhu awe anoomorela moothakoni mootheene, nave iritta sawe sinimuntakaseya mapuro ootheene aniphattuwa maasi a mulaponi.+ Atthu ootheene a mulaponi anookhuma vathi va muuttutthi awe, ni anoohiya mwiri owo. 13 Axipalame ootheene a musulu anrowa okhalaka mweexaani mwawe. Nave inama sootheene sa mutakhwani sinrowa okhalaka mwiirittani mwaya simonre.+ 14 Eyo enimwiiraneya wiira ohikhale mwiri ori waattamela maasi, onrowa okhala woorakama aahiiso onrowa ophiya mmeekuni, ni wiira ohikhale mwiri onikhuwariwa saana, onrowa okhala woorakama ovikana meeku awo. Tthiri iyo sinimwiiviwa, sinoomoroxeliwa vathi, nave sinoovithiwa ntoko aniirihiwa aya atthu ookhwa’.
15 “Etthu onihimya awe Pwiya Muulupalexa Yehova, tiila: ‘Nihiku kinrowa aka wiiriha mwiri owo okhuruwela Mmahiye,* kinoowiiriha atthu oriipiwa murima. Tivo, kinookhuneela maasi oowiixa nave kinoottiyela mapuro aniphattuwa maasi, wiira ahikhumeke maasi manceene. Kinimwiiriha oLiibano oriipela mwaha wa mwiri owo, nave miri sootheene sa mutakhwani sinoonyaala. 16 Kinimwiiriha maloko othukumela mwaha wa onyakula onrowa okhumelela okathi mwiri owo onrowa awe omora, okathi yoowo kinrowa aka wiiriha okhuruwela Mmahiye* vamosa ni atthu ootheene anikhuruwela mulittini.* Nave miri sootheene siri mulittini moowiixa sirina maasi, sinookurunuxiwa murima, eyo piiyo, miri sootheene sa wEedeni,+ miri sooreera ni sootepa oloka sa oLiibano. 17 Iyo sookhuruwela Mmahiye* vamosa nuuwo, weiwo ari aya ale yiiviwe ni espaata,*+ vamosa ni ale yaamukhaliherya* yaawo yaakhala vathi va muuttutthi awe, eriyari ya maloko’.+
18 “‘Miri xeeni sa wEedeni saalikana ni ovuwa wanyu ni wunnuwa wanyu?+ Masi nyuwo munoomoroxeliwa vathi ni miri sa wEedeni. Nyuwo munrowa wummaathi ni atthu oohinnuwihiwa, yaawo yiiviwe ni espaata. Ela ti etthu enrowa omwiiraneela Farawo ni muttitthi awe wootheene wa atthu ari wExiitu’. Pwiya Muulupalexa Yehova tonihimya”.