ONAMUKUTTHO

1 Yehova aahimwiihana Moise waattamela etenta* ya muthukumano,+ onamuleela wiira: 2 “Mwaaleele aisarayeli* wiira: “Akhala mutthu omphavela onvaha Yehova mukuttho wa inama sa vate, ohaana onvaha epooyi aahiiso epwittipwitthi wala epuri.+

3 “‘Akhala wiira yoovaha para opahiwa enivaha awe ti ya epooyi, eyo ehaana okhala yoolopwana ni yoohirakala.+ Owo ohaana onvaha Yehova epooyi eyo ni murima awe wootheene,+ vamukhora va etenta ya muthukumano. 4 Mutthu owo ohaana wiixaatherya ntata nawe vamuru va mwaamunama onrowa ovahiwa ntoko yoovaha para opahiwa. Nto onrowa oleveleliwa itampi sawe mwaha wa etthu eyo ovanhe awe.

5 “‘Epooyi eyo ehaana wiiviwa ohoolo wa Yehova. Anamwane a Aroni, yaawo ari anamukuttho,+ anrowa onvaha ephome eyo Muluku ni anrowa otathela mipantta sootheene sa altaari,+ yoowo ori waattamela vamukhora va etenta ya muthukumano. 6 Enama enrowa ovahiwa ntoko yoovaha para opahiwa, ehaana operiwa ni othikileliwa.+ 7 Anamwane a Aroni, yaawo ari anamukuttho, ahaana opattiha mooro valtaari+ ni ohela ikhuni vaikho-vo. 8 Awo animwaarumari ipetaaso sa mukuttho owo,+ vamosa ni muru ni ekortuura* ya enama eyo, vasulu va ikhuni siri vaikho va altaari. 9 Marupo ni metto saya sihaana orapihiwa. Namukuttho ohaana opaha itthu iyo sootheene valtaari. Eyo enrowa okhala yoovaha para opahiwa yoowunkhela enimusivela* Yehova.+

10 “‘Akhala wiira yoovaha eyo para opahiwa ekumihiwe munikotoni+ mwa ipwittipwitthi aahiiso ipuri, ehaana okhala enama yoolopwana ni yoohirakala.+ 11 Enama eyo ehaana ohitiwa moono woolopwana* wa altaari, ohoolo wa Yehova. Vano anamwane a Aroni, yaawo ari anamukuttho, anrowa otathela ephome ya enama eyo ipantte sootheene sa altaari owo.+ 12 Enama eyo ehaana othikileliwa ipetaaso sene. Vano namukuttho onrowa waarumari ipetaaso iyo vamosa ni muru ni ekortuura* aya, vasulu va ikhuni siri vaikho valtaari. 13 Marupo ni metto sihaana orapihiwa. Namukuttho ohaana onvaha itthu iyo Muluku, ni opaha valtaari. Eyo enrowa okhala yoovaha para opahiwa yoowunkhela enimusivela* Yehova.

14 “‘Masi, akhala wiira yoovaha para opahiwa enrowa awe onvaha Yehova ti ya axipalame, ohaana onvaha ipompa aahiiso masiya mihoro.*+ 15 Namukuttho onrowa ovahererya valtaari, ohaana wiikittha muru wa mwaapalame owo ni nikharu* nawe, ni ompaha valtaari. Masi ephome ya mwaapalame owo ohaana oyiiherya mpantta mmosa wa altaari. 16 Namukuttho owo ohaana okumiha ecoho-coho* ya mwaapalame owo, ni waasula mapururu awe. Itthu iya sihaana oriheliwa mpantta mmosa wa altaari, eyo piiyo, mpantta onikhuma nsuwa, weiwo oniyiiheriwa ettuurwa.*+ 17 Namukuttho omuthale mwaapalame owo eriyari ya mapupha, masi ohimukawanye ipantte piili. Ohaana ompaha vasulu va ikhuni siri vasulu va altaari. Eyo yoovaha para opahiwa yoowunkhela enimusivela* Yehova.

2 “‘Akhala mutthu oniphavela onvaha Yehova ipyo ntoko mukuttho,+ ohaana ovaha otthu wooreerexa,* wooheliwa makhura ni nsenso nootteela.*+ 2 Nuumala-vo, ohaana waavahererya anaawe Aroni, yaawo ari anamukuttho. Vano namukuttho onoohavula nikuphi nimosa na otthu owo wooheliwa makhura, vamosa ni nsenso nootheene nootteela.+ Opahe valtaari ntoko ethoonyeryo ya* yoovaha awe yootheene. Eyo enrowa okhala yoovaha yoopahiwa yoowunkhela enimusivela Yehova. 3 Etthu enrowa ohala wa yoovaha eyo ya ipyo, ti ya Aroni ni anaawe.+ Eyo eniirela mpantta yoovaha yoopahiwa yoowaarexa+ aavahiwe awe Yehova.

4 “‘Mwaavahaka itthu soowooxiwa nfornuni, sihaana okhala sa otthu wooreerexa, eyo piiyo, iphaawu soohiheliwa eferemento ni siheliwe makhura, seiyo sipakiwe ntoko anela, aahiiso iphaawu soophapateya soohiheliwa eferemento ni soottihiwe makhura.+

5 “‘Mwaavahaka etthu yoowooxiwa vaasateerani,+ ehaana okhala ya otthu wooreerexa, woohiheliwa eferemento ni wooheliwa makhura. 6 Ehaana okawanyiwa ipetaaso sene, ni muhele makhura vasulu vaya.+ Eyo yoovaha ya ipyo.

7 “‘Mwaavahaka etthu epakiwe mpanelani, ehaana okhala ya otthu wooreerexa, wooheliwa makhura. 8 Muhaana omuroihela Yehova yoovaha anyu ya ipyo, munvahereryaka namukuttho. Nto owo tonrowa oroiha waattamela valtaari. 9 Namukuttho owo onoohavula mpantta mmosa wa yoovaha eyo ya ipyo, ntoko ethoonyeryo ya* yoovaha yootheene.+ Nave ohaana opaha valtaari. Eyo ti yoovaha yoopahiwa yoowunkhela enimusivela Yehova.+ 10 Etthu enrowa ohala wa yoovaha eyo ya ipyo, ti ya Aroni ni anaawe. Eyo eniirela mpantta yoovaha yoopahiwa+ onivahiwa awe Yehova.

11 “‘Itthu sootheene muninvaha anyu Yehova, seiyo sipakiwe sirumeeliwaka ipyo, muhihele eferemento,+ okhala wiira khoneemereriwa onvaha Yehova etthu yoopahiwa eheliwe eferemento aahiiso oravo.

12 “‘Itthu iyo sihipahiwe valtaari ntoko mukuttho woowunkhela.+ Masi muhaana onvaha Yehova ntoko yoovaha ya ipyo soopacerya ohemphwa.

13 “‘Itthu sootheene sipakiwe sirumeeliwaka ipyo, seiyo munrowa anyu ovaha, muheleke maakha. Muhooceele ohela maakha, okhala wiira maakha awo anoowuupuxeryani nivarihano na Muluku. Itthu sootheene munivaha anyu, muheleke maakha.+

14 “‘Mwanvahaka Yehova ipyo soopacerya ohemphwa, munvaheke ipyo sa niinaano, sookhooliwa ni soowaarikiwa.+ 15 Muhaana ohela makhura ni nsenso nootteela. Eyo yoovaha ya ipyo. 16 Namukuttho onoopaha ipyo vakhaani sookhooliwa sooheliwa makhura, ntoko ethoonyeryo ya* yoovaha yootheene.+ Nave-tho, onoopaha nsenso nootheene nootteela, ntoko yoovaha yoopahiwa enivahiwa Yehova.

3 “‘Vakhala wiira mutthu onivaha epooyi yoolopwana aahiiso yoothiyana ntoko mukuttho wa opatthani,*+ mutthu owo ohaana onvaha Yehova epooyi yoohiwereiwa. 2 Mutthu owo ohaana wiixaatherya ntata nawe vamuru va mwaamunama owo. Nuumala-vo, mwaamunama owo onimwiiviwa waattamela vamukhora va etenta* ya muthukumano. Vano anamwane a Aroni, yaawo ari anamukuttho, anootathela ephome eyo ipantte sootheene sa altaari. 3 Owo ohaana oroiha wa Muluku ipantte sikina sa mukuttho wa opatthani, wiira onvahe yoovaha yoopahiwa Yehova.+ Ipantte sene tiiya: ekortuura+ eri mmirimani, ekortuura yootheene enirukurerya marupo, 4 ni isyo* piili saattamenle mmuthanani, vamosa ni ekortuura aya. Okathi sinikumiha aya isyo iyo,+ okumihe-tho ekortuura enimurukurerya hapa. 5 Anamwane a Aroni anookuxa ipantte iyo apwehe vasulu va yoovaha para opahiwa, yeeyo eri vasulu va ikhuni siri vaikho va altaari wiira avahe.+ Eyo yoovaha yoopahiwa yoowunkhela enimusivela* Yehova.+

6 “‘Akhala wiira mutthu owo oninvaha Yehova epwittipwitthi aahiiso epuri ntoko mukuttho wa opatthani, owo ohaana onvaha mwaamunama oolopwana aahiiso oothiyana ohiniwereiwa.+ 7 Akhala wiira oninvaha mwaapwittipwitthi oolopwana, weeso ohaana omuroiha ohoolo wa Yehova. 8 Ohaana wiixaatherya ntata nawe vamuru va mwaamunama owo. Nuumala-vo, mwaamunama owo onimwiiviwa ohoolo wa etenta ya muthukumano. Vano, anamwane a Aroni anootathela ephome ya mwaamunama owo ipantte sootheene sa altaari. 9 Owo ohaana omuroihela Muluku ekortuura ya mukuttho wa opatthani, wiira ovahiwe yoovaha yoopahiwa Yehova.+ Ohaana okumiha ekortuura yootheene ya mwiila, yeeyo eri waattamela muthana, ni ekortuura eri mmirimani, ni ekortuura yootheene enirukurerya marupo, 10 ni isyo piili saattamenle mmuthanani vamosa ni ekortuura aya. Okathi onikumiha awe isyo iyo,+ okumihe-tho ekortuura enimurukurerya hapa. 11 Nto, namukuttho onoopaha valtaari. Eyo eyoolya* yoopahiwa enivahiwa Yehova.+

12 “‘Akhala wiira onivaha epuri, weeso ohaana oroiha ohoolo wa Yehova. 13 Ohaana wiixaatherya ntata nawe vamuru va epuri eyo. Nuumala-vo, mwaamunama owo onimwiiviwa ohoolo wa etenta ya muthukumano. Vano, anaawe Aroni anootathela ephome ya mwaamunama owo ipantte sootheene sa altaari. 14 Epantte ya mukuttho awe onrowa awe opaha para Yehova ti ekortuura ya mmirimani, ekortuura yootheene enirukurerya marupo,+ 15 ni isyo piili saattamenle mmuthanani vamosa ni ekortuura aya. Okathi onikumiha awe isyo iyo, okumihe-tho ekortuura enimurukurerya hapa. 16 Nto namukuttho onoopaha valtaari. Eyo eyoolya* yoopahiwa yoowunkhela. Ekortuura yootheene ti ya Yehova.+

17 “‘Nlamulo na mahiku ootheene para nyuwo ni osuulu anyu, mapuro ootheene munrowa anyu okhalaka, tinla: Muhikhuureke ekortuura nnakhala muhilyeeke ephome’”.+

4 Yehova aahimuleela-tho Moise wiira: 2 “Mwaaleele aisarayeli wiira: ‘Akhala mutthu onipaka etampi ohilakenle,+ mwaha woovara etthu Yehova onihimya awe wiira ehivariwe, yiiriweke so:

3 “‘Vakhala wiira namukuttho oothanliwa,*+ oopaka etampi+ owiiriha atthu okhalana mulattu, ohaana onvaha Yehova epooyi yaamukhaani yoohiwereiwa, ntoko yoovaha para oleveleliwa etampi awe.+ 4 Owo onoomuroihela Yehova epooyi eyo yaamukhaani, waattamela vamukhora va etenta* ya muthukumano.+ Nuumala-vo, ohaana wiixaatherya ntata nawe vamuru va epooyi eyo. Nave ohaana wiiva epooyi eyo ohoolo wa Yehova.+ 5 Vano, namukuttho oothanliwa,+ onookuxa ephome vakhaani ya epooyi eyo, oroihe mutentani mwa muthukumano. 6 Namukuttho owo onoonaaniha ekatha awe mphomeni+ ikwaha 7, otathele vathi ikwaha 7,+ ohoolo wa Yehova. Ohaana opaka eyo ohoolo wa ekortiina eri nipuro noowaarya. 7 Nave-tho, namukuttho onoohela ephome vakhaani vamanyakani a altaari a nsenso noowunkhela,*+ yoowo ori ohoolo wa Yehova, mutentani mwa muthukumano. Vano, ephome enrowa ohala ya epooyi eyo, ohaana oyiiherya yootheene vathi va altaari a yoovaha para opahiwa,+ yeeyo eri waattamela vamukhora va etenta ya muthukumano.

8 “‘Nuumala-vo, ohaana okumiha ekortuura yootheene ya epooyi enivahiwa para oleveleliwa etampi, ohela muhina ekortuura ya mmirimani, ni ekortuura enirukurerya marupo, 9 ni isyo piili saattamenle mmuthanani vamosa ni ekortuura aya. Nave-tho okumihe ekortuura enimurukurerya hapa, ni okumihe isyo.+ 10 Ohaana okumiha itthu seiye saakumihiwe epooyi ya mukuttho wa opatthani.+ Nave, namukuttho owo ohaana opaha itthu iyo valtaari a yoovaha para opahiwa.

11 “‘Masi esapala* ya epooyi eyo ni ethayi aya, vamosa ni muru aya, metto saya, marupo aya ni mavi aya,+ 12 eyo piiyo, enama yootheene ehanle, namukuttho onooruma wiira ekuxiwe eroihiwe ota wa muttetthe, nipuro nooreera, nenno nniyiiheriwa ettuurwa.* Nuumala-vo, ohaana opaha ni mooro.+ Ehaana opahiwa nipuro nniyiiheriwa ettuurwa.

13 “‘Vano, akhala wiira atthu ootheene a Isarayeli anookhalana mulattu mwaha woowi ookhala mutthu opanke etampi voohilakela,+ masi atthu ootheene ahisuwela wiira yoopakiwa etthu Yehova aakhoottihenrye awe,+ 14 nto vano etampi eyo esuweliwa, atthu ootheene ahaana ovaha epooyi yaamukhaani wiira ekhale yoovaha para oleveleliwa etampi. Epooyi eyo ehaana oroihiwa ohoolo wa etenta ya muthukumano. 15 Nto, axitokweene a nloko ahaana wiixaatherya matata aya vamuru va epooyi eyo, ohoolo wa Yehova. Epooyi eyo enimwiiviwa ohoolo wa Yehova.

16 “‘Nuumala-vo, namukuttho oothanliwa onooroiha ephome vakhaani ya epooyi ele mutentani mwa muthukumano. 17 Namukuttho onoonaaniha ekatha awe mphomeni ikwaha 7, otathele vathi ikwaha 7, ohoolo wa Yehova. Ohaana opaka eyo ohoolo wa ekortiina.+ 18 Owo onoohela ephome vakhaani vamanyakani a altaari+ ori ohoolo wa Yehova, mutentani mwa muthukumano. Nave-tho, ephome enrowa ohala onooyiiherya vathi va altaari a yoovaha para opahiwa, yoowo ori waattamela vamukhora va etenta ya muthukumano.+ 19 Ohaana okumiha ekortuura yootheene ya epooyi eyo, wiira opahe valtaari.+ 20 Owo ohaana wiiriha epooyi eyo etthu emosa-ru iirihale awe epooyi ele yoopacerya, yeeyo yaavahiwe para oleveleliwa etampi. Ti siiso namukuttho onrowa awe opaka. Nto, yoovaha eyo enrowa awe ovaha, onoottipiha itampi sa atthu.+ Siiso, atthu awo anooleveleliwa. 21 Owo onooruma wiira ekuxiwe epooyi eyo eroihiwe ota wa muttetthe, apahe siisaale ntoko aapanhe awe epooyi yoopacerya.+ Eyo yoovaha para oleveleliwa etampi enivahiwa para mureerelo wa nloko nootheene.+

22 “‘Akhala mukhulupale+ onikhalana mulattu mwaha woopaka etampi voohilakela, opakaka etthu emosa Yehova Muluku awe onikhoottiha awe, 23 aahiiso asuwela wiira ootthekela nlamulo na Muluku, nto ohaana oruuha epuri yoolopwana yaamukhaani ni yoohiwereiwa wiira ovahe. 24 Ohaana wiixaatherya ntata nawe vamuru va epuri eyo yaamukhaani, ni onimwiiva ohoolo wa Yehova,+ nipuro nenle yaiviwa aya enama yaavahiwa aya yoovaha para opahiwa. Eyo yoovaha para oleveleliwa etampi. 25 Nto namukuttho onoonaaniha ekatha awe mphomeni mwa enama ya yoovaha para oleveleliwa etampi, ohele ephome eyo vamanyakani+ a altaari a yoovaha para opahiwa. Ephome enihala, onooyiiherya vathi va altaari owo a yoovaha para opahiwa.+ 26 Vano ekortuura yootheene ya enama eyo ohaana opaha valtaari, ntoko eniirihiwa aya ekortuura ya mukuttho wa opatthani.+ Namukuttho onoomureeriha mutthu owo wiira oleveleliwe itampi sawe. Nto owo onooleveleliwa.

27 “‘Akhala mutthu onikhalana mulattu mwaha woopaka etampi voohilakela, opakaka etthu Yehova onikhoottiha awe,+ 28 aahiiso asuwela wiira oopaka etampi, weeso ohaana oruuha epuri yoothiyana yaamukhaani ni yoohiwereiwa, wiira oliverye etampi awe. 29 Owo onimwiixaatherya ntata nawe vamuru va enama eyo ya yoovaha para oleveleliwa etampi, ni onimwiiva opuro yoole yaiviwa aya enama ya yoovaha para opahiwa.+ 30 Vano, namukuttho onoonaaniha ekatha awe mphomeni mwa mwaamunama owo, ohele ephome eyo vamanyakani a altaari a yoovaha para opahiwa. Nto ephome yootheene enrowa ohala, onooyiiherya vathi va altaari.+ 31 Owo onookumiha ekortuura yootheene+ ya enama eyo, siisaale enikumihiwa aya ekortuura ya enama ya mukuttho wa opatthani.+ Nave-tho, namukuttho onoopaha ekortuura eyo valtaari, ntoko etthu yoowunkhela enimusivela Yehova. Nuumala-vo, namukuttho onoomureeriha mutthu owo wiira oleveleliwe itampi sawe. Nto owo onooleveleliwa.

32 “‘Masi vakhala wiira yoovaha para oleveleliwa etampi mutthu owo enivaha awe ti ya epwittipwitthi, ohaana oruuha epwittipwitthi yaamukhaani yoothiyana ehiniwereiwa. 33 Onimwiixaatherya ntata nawe vamuru va enama ya yoovaha para oleveleliwa etampi, ni onimwiiva opuro yoole eniiviwa aya+ enama ya yoovaha para opahiwa. 34 Vano, namukuttho onoonaaniha ekatha awe mphomeni mwa enama eyo enivahiwa para oleveleliwa etampi, ohele ephome eyo vamanyakani a altaari a yoovaha para opahiwa.+ Nto ephome yootheene enrowa ohala, onooyiiherya vathi va altaari. 35 Owo onookumiha ekortuura yootheene ya enama eyo, siisaale enikumihiwa aya ekortuura ya epwittipwitthi yaamukhaani ya mukuttho wa opatthani. Nave, namukuttho onoopaha ekortuura eyo valtaari, vasulu va mikuttho sinipahiwa+ para Yehova. Nuumala-vo, namukuttho onoomureeriha mutthu owo mwaha wa etampi opanke awe. Nto owo onooleveleliwa.+

5 “‘Akhala mutthu omoonale mutthu mukina opakaka etampi aahiiso iiwale etthu eyo, nto khulattuliwa wiira okhale namoona,*+ masi owo ohinaphavela ohimya etthu oonale awe aahiiso osuwenle awe, onookhalana mulattu mwaha wa etampi eyo, ni onrowa waakhula.

2 “‘Akhala mutthu onivara etthu yoohiloka,* ekhale enama ya mutakhwani yoohiloka yookhwa, enama ya vate yoohiloka yookhwa, aahiiso enama ekina yaamukhaani*+ yoohiloka yookhwa, mutthu owo ohiinanariha ni ookhalana mulattu, hata ohisuwenle. 3 Akhala mutthu onivara etthu yoohiloka,+ eyo piiyo, etthu enimwiiriha okhala oohiloka, hata ohisuwenle, nto nuumala-vo onasuwela, owo ookhalana mulattu.

4 “‘Akhala mutthu onaakuvela olapha ohuupuwenle saana, onahimya wiira onoopaka khula etthu, ekhale yooreera aahiiso yootakhala, nto mutthu owo asuwela wiira oolapha ohuupuwenle saana, ookhalana mulattu.*+

5 “‘Akhala mutthu orina mulattu mwaha wa itampi iyo, owo ohaana ohimya+ etampi ene. 6 Ohiya-vo, mutthu owo ohaana omuruuhela Yehova yoovaha mwaha wa okhalana mulattu.+ Owo ohaana ovaha epwittipwitthi yaamukhaani yoothiyana aahiiso epuri yaamukhaani yoothiyana, wiira oleveleliwe etampi. Namukuttho onoomureeriha mutthu owo wiira oleveleliwe etampi awe.

7 “‘Masi, akhala wiira mutthu owo khorina musurukhu oniphiyerya othuma epwittipwitthi, ohaana omuruuhela Yehova masiya manli aahiiso ipompa piili mihoro,+ ntoko yoovaha mwaha wa okhalana mulattu. Mwaapalame mmosa onrowa okhala yoovaha para oleveleliwa etampi, mukina onrowa orumeeliwa ntoko yoovaha para opahiwa.+ 8 Mutthu owo ohaana omuroihela namukuttho. Vano namukuttho owo onrowa ompacerya toko onvaha mwaapalame mmosa a yoovaha para oleveleliwa etampi. Ohaana omuthikila exiko ni nikharu* nawe, masi khonrowa omukwasa muru. 9 Onootathela mpantta mmosa wa altaari ephome vakhaani ya mwaapalame owo onivahiwa para oleveleliwa etampi. Masi ephome enrowa ohala, onrowa oyiiherya vathi va altaari.+ Eyo yoovaha para oleveleliwa etampi. 10 Vano mwaapalame mukina, onrowa omwiiriha siisaale ntoko siniirihiwa aya+ yoovaha para opahiwa. Namukuttho onoomureeriha mutthu owo wiira oleveleliwe etampi opanke awe. Nto owo onooleveleliwa.+

11 “‘Vano, akhala wiira mutthu owo khorina masiya manli aahiiso ipompa piili mihoro, owo ohaana oruuha epantta ya namuloko ya eefa*+ ya otthu wooreerexa,* ntoko yoovaha para oleveleliwa etampi awe. Masi ohihele makhura nnakhala nsenso nootteela,* okhala wiira eyo yoovaha para oleveleliwa etampi. 12 Ohaana omuroihela namukuttho, nto namukuttho owo onoohavula nikuphi nimosa na otthu owo, ntoko ethoonyeryo ya* yoovaha awe yootheene. Nuumala-vo, onoopaha valtaari, vasulu va mikuttho soopahiwa onivahiwa Yehova. Ela yoovaha para oleveleliwa etampi. 13 Vano, namukuttho onoomureeriha mutthu owo wiira oleveleliwe etampi awe, wa itampi iye siromoliwe. Nto owo onooleveleliwa.+ Etthu enrowa ohala enrowa okhala ya namukuttho,+ siisaale eniirihiwa aya etthu enihala ni yoovaha ya ipyo’”.+

14 Yehova aahimuleela-tho Moise wiira: 15 “Akhala mutthu onittheka voohilakelela, otthekelaka itthu Yehova+ onoona awe okhala soowaarya, mutthu owo ohaana omuroihela Yehova epwittipwitthi yoolopwana yoohiwereiwa, ntoko yoovaha mwaha wa okhalana mulattu.+ Namukuttho onoohimya ixeekele* sa eparatha siniphwanelela epwittipwitthi eyo. Nto exeekele eyo ehaana otthariwa exeekele enirumeeliwa nipuro noowaarya.+ 16 Mutthu owo onooliverya etampi awe mwaha wootthekela itthu soowaarya. Nave onimuncererya epantte ya neethanu ya eperesu+ onrowa awe oliva. Ononvahererya namukuttho wiira namukuttho owo omureerihe orumeelaka epwittipwitthi yoolopwana ya yoovaha mwaha wa okhalana mulattu.+ Nto mutthu owo onooleveleliwa.+

17 “Akhala mutthu onittheka voohilakelela, opakaka itthu Yehova onikhoottiha awe, mutthu owo ookhalana mulattu nnaamwi ohisuwenle. Owo onimwaakhula mwaha wa etthu opanke awe.+ 18 Mutthu owo ohaana omuroihela namukuttho epwittipwitthi yoolopwana yoohiwereiwa, ntoko yoovaha mwaha wa okhalana mulattu.+ Eyo ehaana olikanelaka eperesu oleeliwe awe. Nuumala-vo, namukuttho onoomureeriha mutthu owo mwaha wa etthu yootakhala opanke awe voohilakela. Nto owo onooleveleliwa. 19 Okhala wiira mutthu owo ookhalana mulattu mwaha woowi oomutthekela Yehova, ohaana ovaha yoovaha mwaha wa okhalana mulattu”.

6 Yehova aahimuleela-tho Moise wiira: 2 “Akhala mutthu onimoototha mukhwaawe mwaha wa etthu aaroromeliwe awe,+ aahiiso onimwiiyerya mukhwaawe masi onahimya wiira khiiyale, mutthu owo oopaka etthu enooniherya wiira khoniroromeleya wa Yehova.+ Eyo etampi. 3 Akhala mutthu onittotta etthu erimenle, masi ohimuttikiherya mwaneene, ni onootha olaphaka wiira khopanke etampi, mutthu owo-tho oopaka etthu enooniherya wiira khoniroromeleya.+ Tivo, ohaana wiira so: 4 Vakhala wiira oopaka itthu iyo siromoliwe ni ookhalana mulattu, owo ohaana ohokoloxa etthu iiyale awe, aakhale awe, oothale awe wiira ophwanye, etthu aaroromeliwa awe, aahiiso etthu aattontte awe, 5 aahiiso etthu aalamphe awe oothaka. Ohaana ottikiha etthu eyo aahiiso oliva esisapo aya yoomalela,+ nave ohaana wuncererya epantte ya neethanu ya esisapo ya etthu eyo. Mutthu owo ohaana omuttikiherya mwaneene, nihiku nenle onrowa awe ophwanyaniwa mulattu. 6 Mutthu owo ohaana omuroihela Yehova epwittipwitthi yoolopwana yoohiwereiwa, para yoovaha mwaha wa okhalana mulattu. Esisapo ya enama eyo ehaana olikanaka ni ele ehimmwale ni namukuttho. Ohaana omuroihela namukuttho, wiira ekhale yoovaha mwaha wa okhalana mulattu.+ 7 Namukuttho ononvaha Yehova enama eyo wiira mutthu ole oreerihiwe. Nto mutthu ole onooleveleliwa khula etthu opanke awe, yeeyo emwiirinhe okhalana mulattu”.+

8 Yehova aahitthikela-tho olavula ni Moise, iiraka: 9 “Mmuleele Aroni ni anaawe wiira: ‘Nlamulo na yoovaha para opahiwa+ tinla: Yoovaha para opahiwa, ehaana okhala vaikho valtaari, ohiyu wootheene mpakha voosiisu. Nave, mooro ohittipheke valtaari-vo. 10 Namukuttho ohaana owara ikuwo sawe sa onamukuttho sa eliinyu,+ ni waawara akaputtula+ a* muhina a eliinyu. Nuumala-vo, onookhupa ettuurwa*+ ya yoovaha para opahiwa valtaari, opwehe waattamela valtaari-vo. 11 Nto onoorula malaya+ awe oware malaya makina. Vano onookuxa ettuurwa oroihe opuro wooreera ota wa muttetthe.+ 12 Mooro owo ohittipihiwe. Owo ohaana opattaka okathi wootheene valtaari. Khula voosiisu, namukuttho ohaana ohela ikhuni+ vaikho-vo, ni opweha-vo enama ya yoovaha para opahiwa. Nave-tho onoopahaka vaikho-vo+ ekortuura ya mikuttho sa opatthani. 13 Okathi wootheene ohaana opattaka mooro valtaari. Ohittipheke.

14 “‘Vano, nlamulo na yoovaha ya ipyo+ tinla: Nyuwo anamwane a Aroni, muhaana oroihaka yoovaha eyo valtaari, ohoolo wa Yehova. 15 Mmosa ohaana ohavula nikuphi nimosa na otthu wooreerexa* wa yoovaha eyo ya ipyo, ni makhura vakhaani ni nsenso nootheene nootteela,* seiyo siri yoovaha eyo ya ipyo. Nuumala-vo, ohaana opaha valtaari wiira yinkheleke. Eyo enrowa okhala ethoonyeryo ya* yoovaha yootheene para Yehova.+ 16 Aroni ni anaawe anookuxa otthu onrowa ohala wa yoovaha eyo,+ wiira epake iphaawu soohiheliwa eferemento. Vano anrowa okhuuraka iphaawu iyo nipuro noowaarya, mukintaali mwa etenta* ya muthukumano.+ 17 Iphaawu iyo sihiheliwe eferemento.+ Eyo epantte kinaavaha aka, ya soovaha soopahiwa+ kinivahiwa aka. Eyo etthu yoowaaryexa,+ siisaale ntoko yoovaha para oleveleliwa etampi ni yoovaha mwaha wa okhalana mulattu. 18 Anamwane axilopwana ootheene a nloko na Aroni, tanrowa okhuuraka.+ Eyo ti epantte kinaavahaka ya mikuttho soopahiwa+ kinivahiwa aka, miyo Yehova. Eyo enrowa okhala epantte aya mahiku ootheene. Khula etthu enrowa okwannya soovaha iyo, enrowa okhalihiwa yoowaarya’”.

19 Yehova aahilavula-tho ni Moise oriki: 20 “Yoovaha Aroni ni anaawe anrowa aya onvahaka Yehova nihiku Aroni onrowa awe othanliwa,+ tiila: Onrowa ovahaka epantta ya namuloko ya eefa*+ ya otthu wooreerexa, ntoko yoovaha ya ipyo,+ siisaale siniiraneya aya. Vano nimeya nimosa anrowa ovahaka voosiisu, nto nimeya nikina anrowa ovahaka nsuwa nikelaka-ru. 21 Otthu owo ohaana oheliwa makhura,+ nuumala-vo wooxiwe vaasateerani. Otakaahiwe saana ni makhura. Nto munvahe Yehova etthu eyo yooxiwe sirumeeliwaka ipyo, ntoko etthu yoowunkhela enimusivela. 22 Mwaana+ a Aroni, yoowo onrowa omuranttela ntoko namukuttho oothanliwa, nave-tho onoovaha mukuttho owo. Nla nlamulo na mahiku ootheene. Yoovaha yootheene ehaana opaheriwa Yehova. 23 Yoovaha ya ipyo, yeeyo enivahiwa para mureerelo wa namukuttho, ehaana ovahiwa yootheene. Ehilyiwe”.

24 Yehova aahimuleela-tho Moise wiira: 25 “Mmuleele Aroni ni anaawe wiira: ‘Nlamulo na yoovaha para oleveleliwa etampi,+ tinla: Enama enivahiwa wiira evahiwe yoovaha para oleveleliwa etampi ehaana wiiviwa+ ohoolo wa Yehova, opuro yoole eniiviwa aya enama ya yoovaha para opahiwa. Eyo etthu yoowaaryexa. 26 Nto namukuttho onrowa ovaha yoovaha para oleveleliwa etampi, onookhuura enama eyo.+ Ohaana okhuura nipuro noowaarya, mukintaali mwa etenta ya muthukumano.+

27 “‘Khula etthu enrowa okwannya yoovaha eyo, enrowa okhala yoowaarya. Nave mutthu yoole nlaya nawe ninrowa ottonyeriwa ephome eyo, nlaya nlo nihaana okatthiwa nipuro noowaarya. 28 Mwaapu wa oloko enrowa aya waapeiwa enama eyo, ohaana opwexakasiwa. Masi vakhala wiira yaapeiwale mpanelani ya ekoopiri, weeso epanela eyo ehaana okutthiwa ni orapihiwa ni maasi.

29 “‘Axilopwana yaale ari anamukuttho, tanrowa okhuuraka+ paahi. Eyo etthu yoowaaryexa.+ 30 Masi, akhala wiira ephome vakhaani ya mwaamunama onivahiwa ntoko yoovaha para oleveleliwa etampi ennikelihiwa mutentani mwa muthukumano, wiira mutthu owo oreerihiwe nipuro noowaarya,+ nto ohikhale mutthu onrowa okhuura enama eyo. Eyo ehaana opahiwa vaikho.

7 “‘Nlamulo na yoovaha mwaha wa okhalana mulattu+ tinla: Eyo etthu yoowaaryexa. 2 Awo ahaana wiiva enama ya yoovaha mwaha wa okhalana mulattu, nipuro nenne aniiva aya inama sa soovaha para opahiwa. Nto ephome+ ya mwaamunama owo, ehaana otatheliwa mipantta sootheene sa altaari.+ 3 Namukuttho* ohaana ovaha ekortuura+ yootheene ya enama eyo, ohela muhina ekortuura ya mwiila, ekortuura enrukurerya marupo, 4 isyo piili saattamenle mmuthanani, vamosa ni ekortuura aya. Okathi onikumiha awe isyo+ iyo, okumihe-tho ekortuura enimurukurerya hapa. 5 Nto namukuttho onoopaha itthu iyo valtaari ntoko yoovaha yoopahiwa enivahiwa Yehova.+ Eyo yoovaha mwaha wa okhalana mulattu. 6 Axilopwana yaale ari anamukuttho, tanrowa okhuuraka enama eyo.+ Ehaana okhuuriwaka opuro woowaarya. Eyo etthu yoowaaryexa.+ 7 Nlamulo na yoovaha para oleveleliwa etampi, nnoolikana ni nlamulo na yoovaha mwaha wa okhalana mulattu. Enama ya yoovaha eyo, ti ya namukuttho yoole onimureeriha mutthu owo onivaha.+

8 “‘Okathi namukuttho onivaha awe yoovaha para opahiwa para mutthu mukina, esapala+ ya yoovaha eyo, enrowa okhala yawawe.

9 “‘Yoovaha ya ipyo, yeeyo yooxiwe nfornuni aahiiso epakiwe mpanelani wala yooxiwe vaasateerani,+ ti yawawe+ namukuttho onivaha. 10 Masi yoovaha ya ipyo eheliwe makhura+ aahiiso ehiheliwe makhura,+ ovahiwe Aroni ni anaawe. Ootheene aya avahiwe voolikana.

11 “‘Nlamulo na mukuttho wa opatthani,+ yoowo mutthu okhanle awe onvaha Yehova, tinla: 12 Akhala wiira mutthu owo onivaha mukuttho wiira ooniherye oxukhurela,+ ohaana ovaha vamosa ni iphaawu soohiheliwa eferemento siheliwe makhura, seiyo sipakiwe ntoko anela, ni iphaawu soohiheliwa eferemento soophapateya ni soottihiwe makhura, ni iphaawu siri ntoko anela sipakiwe ni otthu wooreerexa,* wootakaaxeriwa saana ni makhura. 13 Nave-tho, okathi onivaha awe mikuttho sa opatthani sinooniherya oxukhurela wawe, ohaana ovaha iphaawu siri ntoko anela sooheliwa eferemento. 14 Wa yoovaha eyo, owo ohaana oruuha ephaawu emosa ya khula muthinto, ntoko epantta ereeriheliwe Yehova. Eyo enrowa okhala ya namukuttho yoole onrowa otathelaka valtaari ephome ya inama sa mikuttho sa opatthani.+ 15 Enama ya mukuttho wa opatthani enivahiwa wiira mutthu wooniherye oxukhurela, ehaana okhuuriwa nihiku nenno mutthu owo onivaha awe. Ehisukeriwe meelo.+

16 “‘Akhala wiira mukuttho onivaha awe oniphavela omutaphula natiri+ aahiiso yoovaha yoohikhanyereriwa,+ mukuttho owo ohaana okhuuriwa nihiku nenno mutthu owo onivaha awe. Vano mpantta onihala, pooti okhuuriwa mmeeloni mwaya. 17 Masi enama ya mukuttho owo enrowa ophiya nihiku na neeraru, ehaana opahiwa vaikho.+ 18 Akhala wiira mpantta mmosa wa enama eyo ya mukuttho wa opatthani enookhuuriwa nihiku na neeraru, ole onivaha khonrowa weemereriwa ni Muluku. Mukuttho owo, khonrowa ovareleya muteko. Eyo etthu yoonanara. Mutthu yoole onikhuura, onoovahiwa ehukhumu mwaha wa etthu yoohiloka+ opanke awe. 19 Enama enikwannya etthu yoohiloka, ehikhuuriwe. Enama eyo ehaana opahiwa vaikho. Masi enama yooloka, pooti okhuuriwa ni atthu yaale paahi areerihiwe.

20 “‘Masi mutthu yoole ohireerihiwe onikhuura enama ya mukuttho wa opatthani, yeeyo enivahiwa Yehova, mutthu owo+ ohaana wiiviwa. 21 Akhala mutthu onikwannya etthu yoohiloka, ekhale ya mutthu+ aahiiso enama+ yoohiloka wala yoopattuxiwa yoohiloka ni yoonanara,+ onakhuura enama ya mukuttho wa opatthani, yeeyo enivahiwa Yehova, mutthu owo ohaana wiiviwa’”.

22 Yehova aahilavula-tho ni Moise, iiraka: 23 “Mwaaleele aisarayeli wiira: ‘Muhikhuure ekortuura+ ya epooyi aahiiso ya epwittipwitthi yaamukhaani yoolopwana aahiiso ya epuri. 24 Ekortuura ya mwaamunama oowiikhwela ni ekortuura ya mwaamunama iiviwe ni enama ekina, pooti orumeela para itthu sikina. Masi muhikhala-khale mukhuuraka.+ 25 Mutthu yoole onikhuura ekortuura ya enama oniphavela awe onvaha Yehova, ohaana wiiviwa.

26 “‘Khula opuro munrowa anyu omaka, muhikhuure ephome,+ ekhale ya mwaapalame aahiiso mwaamunama. 27 Mutthu yoole onrowa okhuura ephome, ohaana wiiviwa’”.+

28 Yehova aahimuleela-tho Moise wiira: 29 “Mutthu yoole oninvaha Yehova mukuttho wa opatthani, ohaana oruuha mpantta wa mukuttho awe, ntoko yoovaha oniroiheliwa Yehova.+ 30 Owo ohaana oruuha ekortuura+ vamosa ni epeeto ya mwaamunama owo, okunxe ene mmatatani mwawe wiira epahiwe para Yehova. Nave ohaana weettiha itthu iyo oroihaka ohoolo ni ottuli, ntoko yoovaha eneettihiwa+ ohoolo wa Yehova. 31 Namukuttho onoopaha ekortuura eyo valtaari,+ masi epeeto enrowa okhala ya Aroni ni anaawe.+

32 “‘Wa mikuttho sanyu sa opatthani,+ muhaana onvaha namukuttho mwetto woolopwana wa ottuli, ntoko epantta ereeriheliwe Muluku. 33 Mwaana a Aroni, yoole onrowa onvaha Muluku ephome ya mikuttho sa opatthani ni ekortuura, tonrowa ohalana mwetto woolopwana wa ottuli.+ 34 Wa mikuttho sa opatthani aisarayeli anivaha aya, miyo kinninvaha namukuttho Aroni ni anaawe itthu iya: epeeto ya yoovaha eneettihiwa ni mwetto wooreerihiwa. Nla nlamulo na mahiku ootheene para aisarayeli.+

35 “‘Ola mpantta wa mikuttho saapaheriwa Yehova, seiyo yaavahiwa aya anamukuttho, eyo piiyo, Aroni ni anaawe, nihiku yaathanliwa aya okhala anamukuttho a Yehova.+ 36 Yehova ohaaruma aisarayeli wiira yaavaheke anamukuttho ipantte iyo, nihiku yaathanliwa aya.+ Nla nlamulo para osuulu aya wootheene, okhuma niinaano-va orowa ohoolo’”.

37 Nna nlamulo na yoovaha para opahiwa,+ yoovaha ya ipyo,+ yoovaha para oleveleliwa etampi,+ yoovaha mwaha wa okhalana mulattu,+ mikuttho sa okhalihiwa namukuttho,+ ni mikuttho sa opatthani,+ 38 siisaale ntoko Yehova aamurumme awe Moise vamwaako Sinayi,+ nihiku nenlo Yehova aarumme awe aisarayeli onvaha soovaha saya, moothakoni mwa oSinayi.+

8 Yehova aahitthikela-tho olavula ni Moise omuhimeeryaka wiira: 2 “Mmukuxe Aroni ni anaawe,+ mukuxe malaya aya+ a onamukuttho, ni makhura aniittheliwa atthu oothanliwa,+ ni epooyi ya yoovaha para oleveleliwa etampi, ni ipwittipwitthi piili soolopwana, ni esestu eri iphaawu soohiheliwa eferemento.+ 3 Nave, mwaathukumanye atthu a nloko nootheene, waattamela vamukhora va etenta* ya muthukumano”.

4 Vano Moise aahiira siisaale ntoko Yehova aamurumme awe. Nto nloko nootheene naahithukumana waattamela vamukhora va etenta ya muthukumano. 5 Moise aahaaleela atthu ootheene wiira: “Ela ti etthu Yehova onirumme awe opaka”. 6 Vano Moise aahimuleela Aroni ni anaawe wiira amwaattamele. Nuumala-vo, aahaarapiha* ni maasi.+ 7 Aahinwariha Aroni nlaya+ noorakama, ni aahinwariha musako.+ Aahinwariha-tho nlaya nihirina miyoono,+ ni aahinwariha eefodi,+ otthukwelela eefodi eyo ni musako+ wooxoriwa, wiira elipe. 8 Vano, aahinwariha murupa wa vapeeto,+ ohela mmurupani-mmo Urimi ni Tumimi.+ 9 Nuumala-vo, aahinwariha nleeso+ mmuru, ni aahihela ohoolo wa nleeso nlo elaamina yoowaarya ya eweero, eyo piiyo, esinaale yoowaarya yooniherya wiira Aroni aahiivahererya wa Muluku,+ siisaale ntoko Yehova aamurumme awe Moise.

10 Moise aahikuxa makhura aniittheliwa atthu oothanliwa, aahiitthela etapernaakulu ni itthu sootheene saari memmo,+ ni aahireeriha. 11 Nuumala-vo, aahitathela makhura vakhaani valtaari ikwaha 7. Nto aahimuhela makhura altaari owo ni itthu sootheene saarumeeliwa valtaari-vo, ni aahihela makhura epasiya ni metto saya, wiira oreerihe itthu iyo. 12 Wookiseryani, aahimwiitthela Aroni makhura ale vakhaani vamuru, wiira omureerihe.+

13 Vano, Moise aahiwiihana anamwane a Aroni wiira emwaattamele, aawariha malaya aya oorakama, ni aatthukwelela misako saya, aawariha* nleeso mmuru,+ siisaale ntoko Yehova aamurumme awe.

14 Nuumala-vo, Moise aahiruuha epooyi ya yoovaha para oleveleliwa etampi. Nto Aroni ni anaawe yaahiixaatherya matata aya vamuru va epooyi eyo ya yoovaha para oleveleliwa etampi.+ 15 Moise aahiiva epooyi eyo, ni aahinaaniha ekatha awe mphomeni+ mwa epooyi eyo, ottikitthela manyaka ootheene a altaari. Siiso, aahimureeriha altaari owo. Masi ephome yaahanle aahiyiiherya vathi va altaari. Tivo, aahimureeriha altaari owo wiira sivahiweke-vo mikuttho para oleveleliwa itampi. 16 Nuumala-vo, Moise aahikuxa ekortuura yootheene yaarukurerya marupo, ni ekortuura yaamurukurerya hapa, ni isyo piili, ni ekortuura yaari vamosa ni isyo iyo, khupaha valtaari.+ 17 Vano, ipantte sootheene saahanle sa epooyi eyo, eyo piiyo, esapala, enama, ni mavi, Moise aahipaha ota wa muttetthe,+ siisaale ntoko Yehova aamurumme awe.

18 Vano, aahiruuha epwittipwitthi yoolopwana ya yoovaha para opahiwa. Nto Aroni ni anaawe, yaahiixaatherya matata aya vamuru va epwittipwitthi eyo.+ 19 Moise aahiiva epwittipwitthi eyo, nto ephome aya aahitathela ipantte sootheene sa altaari. 20 Aahithikilela enama eyo ipetaaso sene, nto muru aya, ipetaaso saya, ni ekortuura aya, aahipaha. 21 Moise aahirapiha marupo ni metto sa epwittipwitthi eyo. Nuumala-vo, aahipaha epwittipwitthi yootheene valtaari. Eyo yaari yoovaha para opahiwa yoowunkhela saana. Yaari yoovaha yoopahiwa enivahiwa Yehova, siisaale ntoko Yehova aamurumme awe.

22 Nuumala-vo, aahiruuha epwittipwitthi yoolopwana ya nenli, eyo piiyo, epwittipwitthi yaavahiwa okathi yaathanliwa aya anamukuttho.+ Nto Aroni ni anaawe yaahiixaatherya matata aya vamuru+ va epwittipwitthi eyo. 23 Moise aahiiva epwittipwitthi eyo, aahihavula ephome vakhaani ottikitthela vathi va niyaru noolopwana na Aroni, ni ekatha yuulupale ya ntata noolopwana na Aroni, ni elipwi yuulupale ya nnawu noolopwana na Aroni. 24 Vano Moise aahiwiihana anamwane a Aroni, aahela ephome vakhaani vathi va maaru aya oolopwana, ni ikatha saya suulupale sa matata aya oolopwana ni ilipwi saya suulupale sa inawu saya soolopwana. Nto ephome yaahanle, Moise aahitathela ipantte sootheene sa altaari.+

25 Nuumala-vo, aahikuxa ekortuura ya epwittipwitthi eyo, eyo piiyo, mwiila wooneneva, ekortuura yootheene yaarukurerya marupo, ni ekortuura yaamurukurerya hapa, ni isyo soopiili vamosa ni ekortuura aya, ni mwetto woolopwana wa ottuli.+ 26 Musestuni mwaari iphaawu soohiheliwa eferemento, yeeyo yaari ohoolo wa Yehova, Moise aahikumiha ephaawu emosa yoohiheliwa eferemento yaari ntoko anela,+ ni ephaawu+ emosa yaari ntoko anela ni yoottihiwe makhura, ni ephaawu emosa yoophapateya. Nuumala-vo, aahipweha iphaawu iyo vasulu va ekortuura ele ni mwetto ole. 27 Vano aahihela itthu iyo sootheene mmatatani mwa Aroni ni mmatatani mwa anaawe Aroni. Nto awo yaahipacerya weettiha ohoolo wa Yehova, aroihaka ohoolo ni ottuli, ntoko yoovaha eneettihiwa. 28 Nuumala-vo, Moise aahikuxa itthu iyo mmatatani mwaya, opaha valtaari, vasulu va epwittipwitthi yoopacerya ya yoovaha para opahiwa. Itthu iyo saari mukuttho wa okhalihiwa namukuttho. Yaari yoovaha yoopahiwa yoowunkhela, yaamusivela Yehova.

29 Moise aahikuxa epeeto ya epwittipwitthi ele, oneettiha ohoolo wa Yehova,+ oroihaka ohoolo ni ottuli, ntoko yoovaha eneettihiwa. Epeeto ya epwittipwitthi ya okhalihiwa namukuttho aahivahiwa Moise, siisaale ntoko Yehova aamurumme awe Moise owo.+

30 Nuumala-vo, Moise aahikuxa makhura vakhaani aniittheliwa atthu oothanliwa,+ ni ephome vakhaani yaari valtaari, omutathela Aroni ni malaya awe, ni aatathela anaawe Aroni ni malaya aya. Siiso, Moise aahimureeriha Aroni ni malaya awe, ni aahaareeriha anaawe+ Aroni ni malaya aya.+

31 Vano, Moise aahimuleela Aroni ni anaawe wiira: “Mwaapeye+ enama waattamela vamukhora va etenta ya muthukumano, mukhuure vaavo vamosa ni ephaawu eri musestuni enirumeeliwa nihiku anithanliwa aya anamukuttho, siisaale ntoko kirummwale aka. Miyo kileeliwe so: ‘Aroni ni anaawe ahaana okhuura enama eyo’.+ 32 Enama ni iphaawu sihanle, mpahe vaikho.+ 33 Mahiku 7, muhirakamele vamukhora va etenta ya muthukumano, mpakha omaleliha mahiku munrowa anyu okhalihiwaka anamukuttho, okhala wiira anoovira mahiku 7 mukhalihiwaka anamukuttho.*+ 34 Etthu ela enipaka ahu olelo-va, Yehova tonrumme wiira muleveleliwe itampi sanyu.+ 35 Mahiku 7,+ othana ni ohiyu, muhaana okhalaka waattamela vamukhora va etenta ya muthukumano, ni ovaraka itthu sootheene Yehova+ oorummyaaweni. Siiso, khamunrowa wiiviwa. Ela ti etthu kirummwale aka”.

36 Aroni ni anaawe yaahipaka itthu sootheene Yehova aamulenle awe Moise.

9 Nihiku na neethanu neeraru,+ Moise aahimwiitthana Aroni ni anaawe ni makhulupale a nloko na Isarayeli. 2 Vano aahimuleela Aroni wiira: “Mukuxe epooyi yaamukhaani ya yoovaha para oleveleliwa etampi,+ ni epwittipwitthi emosa yoolopwana ya yoovaha para opahiwa, muroihe ohoolo wa Yehova. Inama iyo sikhale soohiwereiwa. 3 Masi mwaaleele aisarayeli wiira: ‘Mukuxe epuri ya yoovaha para oleveleliwa etampi, nave mmukuxe mwaaxaana a epooyi, ni mukuxe epwittipwitthi yoolopwana yaamukhaani ya yoovaha para opahiwa. Khula enama ekhale ya mwaakha mmosa, ni yoohiwereiwa. 4 Mukuxe-tho epooyi ni epwittipwitthi para mikuttho sa opatthani,+ wiira sivahiwe ohoolo wa Yehova. Nave-tho, mukuxe yoovaha ya ipyo+ yooheliwa makhura, okhala wiira Yehova onimookhumelelani olelo’”.+

5 Siiso, awo yaahikuxa itthu iyo Moise aarumme awe, aroiha ohoolo wa etenta* ya muthukumano. Nto nloko nootheene naahaattamela, neemela ohoolo wa Yehova. 6 Moise aahihimya wiira: “Ela ti etthu Yehova orumme awe wiira mpake, wiira ovuwa wa Yehova wookhumeleleni”.+ 7 Vano, Moise aahimuleela Aroni wiira: “Mwaattamele valtaari, nvahe yoovaha para oleveleliwa etampi+ ni yoovaha para opahiwa, wiira muleveleliwe itampi sanyu,+ ni itampi sa atthu a nloko nanyu.+ Nave mukuxe yoovaha ya atthu nvahe, wiira aleveleliwe itampi saya,+ ntoko siisaale Yehova orumme awe”.

8 Aroni aahimwaattamela altaari moowaakuveya, omwiiva mwaaxaana a epooyi ni onvaha para oleveleliwa etampi awe.+ 9 Nuumala-vo, anamwane a Aroni yaahimuruuhela ephome+ ya epooyi ele. Aroni aahinaaniha ekatha awe mphomeni-mme, ohela vamanyakani a altaari. Ephome yaahanle aahiyiiherya vathi va altaari.+ 10 Aroni aahipaha valtaari ekortuura ni isyo, ni ekortuura yaamurukurerya hapa, seiyo saari ntoko mukuttho para oleveleliwa etampi, siisaale Yehova aamurumme awe Moise.+ 11 Vano, enama ni esapala ya mwaamunama owo aahipaha ota wa muttetthe.+

12 Aroni aahiiva enama ya yoovaha para opahiwa, nto anaawe yaahinvahererya ephome ya enama eyo. Vano owo aahitathela ephome eyo mipantta sootheene sa altaari.+ 13 Awo yaahinvahererya ipetaaso sa enama ya yoovaha para opahiwa vamosa ni muru. Nto Aroni aahipaha valtaari. 14 Nave-tho, aahirapiha marupo ni metto sa enama eyo, opaha valtaari, vasulu va yoovaha para opahiwa.

15 Vano Aroni aahivaha yoovaha ya atthu. Woopaceryani, owo aahikuxa epuri ohita, ovaha wiira atthu aleveleliwe etampi aya. Owo aahivaha enama eyo siisaale ntoko anvanhe awe mwaaxaana a epooyi. 16 Aroni aahiruuha yoovaha para opahiwa, ovaha ottharaka malakiheryo a nlamulo.+

17 Nuumala-vo, aahivaha yoovaha ya ipyo.+ Owo aahihavula nikuphi nimosa na yoovaha eyo opaha valtaari, vaavo aavanhe awe yoovaha ya voosiisu para opahiwa.+

18 Nuumala-vo, Aroni aahihita epooyi ni ipwittipwitthi yoolopwana ya mukuttho wa opatthani, yeeyo yaavahiwa para mureerelo wa atthu. Anamwane a Aroni yaahinvahererya ephome ya enama eyo, nto Aroni aahitathela ephome eyo mipantta sootheene sa altaari.+ 19 Nto yaahikuxa ekortuura ya epooyi,+ ekortuura ya mwiila wa epwittipwitthi, ekortuura eri mmirimani, isyo, ni ekortuura enimurukurerya hapa.+ 20 Vano yaahipweha ekortuura eyo yootheene vapeeto va epooyi ni vapeeto va epwittipwitthi. Nuumala-vo, Aroni aahikuxa ekortuura yootheene opaha valtaari.+ 21 Masi ipeeto sa inama iye ni mwetto aya woolopwana wa ottuli, Aroni aahiroiha ohoolo wa Yehova, oneettiha oroihaka ohoolo ni ottuli, ntoko yoovaha eneettihiwa, siisaale ntoko Moise aamurumme awe.+

22 Nuumala-vo, Aroni aahirukunuwa onaaweha atthu, ovenxa matata awe onaareeliha.+ Vano aahikhuruwa opuro aavaha awe yoovaha para oleveleliwa etampi, yoovaha para opahiwa, ni mikuttho sa opatthani. 23 Wookiseryani, Moise ni Aroni yaahikela mutentani mwa muthukumano, ni yaahikhumela ota anaareeliha atthu.+

Vano ovuwa wa Yehova waahaakhumelela atthu ootheene.+ 24 Nave waahikhumelela mooro wa Yehova,+ opaha yoovaha para opahiwa ni ekortuura yaari valtaari. Okathi atthu ale ootheene yaawenhe aya etthu ele, yaahipacerya okhuwela, akokhora ni yuurama mpakha vathi.+

10 Nuuvira okathi, anamwane a Aroni, Nadabi ni Abihu,+ khula mmosa aahikuxa eparatho awe eniheliwa makhala a mooro, ohela-mo nsenso.*+ Nuumala-vo, awo yaahinvaha Yehova nsenso nno. Masi yaavanhe ahittharaka+ ele Muluku aarumme awe. 2 Nto, waahikhuma mooro wa Yehova waapaha.+ Siiso, yaahikhwa ohoolo wa Yehova.+ 3 Nuumala-vo, Moise aahimuleela Aroni wiira: “Yehova onihimya wiira: ‘Ale anikaattamela+ ahaana wuupuwela wiira miyo koowaarya, ni wiira kinrowa ovuwihiwa ni atthu ootheene’”. Siiso, Aroni khaakhunle etthu.

4 Vano, Moise aahimwiihana Mixayeli ni Elisafani, anaawe Uziyeli,+ yoowo ari tiiyu awe Aroni, onaaleela wiira: “Murwe-va, mwaakumihe axinninyu ala ohoolo wa nipuro noowaarya, mwaaroihe ota wa muttetthe”. 5 Awo yaahirwaasa, akuxa mirutthu sa alopwana ale, yaawo nlelo yaawanre malaya aya, aroiha ota wa muttetthe, siisaale ntoko Moise aarumme awe.

6 Nuumala-vo, Moise aahimwiihana Aroni ni anaawe akina, Eleyazari ni Itamari, aaleela wiira: “Muhihiye okhapelela ikharari sanyu nnakhala muhikhere malaya anyu,+ wiira muhikhwe, ni wiira Muluku ohinanariwe ni nloko nootheene na Isarayeli. Axinninyu a nloko nootheene na Isarayeli, anoowunlelaka ale Yehova owiivale awe ni mooro. 7 Muhikhumase vamukhora va etenta* ya muthukumano. Okhala wiira mwiira siiso munimookhwa, maana Yehova ohoothanlani”.+ Awo yaahiira ntoko Moise aarumme awe.

8 Yehova aahimuleela Aroni wiira: 9 “Okathi nyuwo ni aniinyu munikela anyu mutentani mwa muthukumano,+ muhiwurye eviinyu aahiiso etthu ekina yoohapala, wiira muhikhwe. Nla nlamulo na mahiku ootheene para nyuwo ni osuulu anyu. 10 Siiso, munoowerya ovirikanyiha etthu yoowaarya, ni etthu yoohaarya, etthu yoohiloka* ni etthu yooloka.+ 11 Nave-tho, munoowerya owiixuttiha aisarayeli malamulo ootheene Yehova olavunle awe omurumeelaka Moise”.+

12 Vano Moise aahimuleela Aroni ni anaawe yaahanle, Eleyazari ni Itamari, wiira: “Mukuxe epantte ehanle ya yoovaha ya ipyo, yeeyo yaavahiwe Yehova, mpake iphaawu soohiheliwa eferemento. Iphaawu iyo mukhuureke waattamela valtaari,+ okhala wiira eyo etthu yoowaaryexa.+ 13 Muhaana okhuura ephaawu eyo nipuro noowaarya,+ okhala wiira ela epantte ya soovaha sinooxeriwa Yehova, nvahiwe anyu nyuwo ni avahiwe aya aniinyu. Ela ti etthu kirummwale aka. 14 Nyuwo ni aniinyu axilopwana ni aniinyu axithiyana,+ munrowa okhuuraka epeeto ya enama enivahiwa para yoovaha eneettihiwa ni mwetto wooreerihiwa,+ nipuro nooreera. Iya ipantta sa mikuttho sa opatthani sa aisarayeli, nvahiwe anyu ni avahiwe aya aniinyu. 15 Vano, mwetto ni epeeto ya mwaamunama owo sinrowa oruuhiwa, vamosa ni ekortuura enrowa opahiwa. Ekortuura eyo enrowa okhala yoovaha eneettihiwa para Yehova. Epeeto ni mwetto wa enama eyo munrowa ovahiwaka nyuwo ni aniinyu mahiku ootheene,+ siisaale ntoko Yehova orumme awe”.

16 Moise aahikohererya epuri enivahiwa para yoovaha para oleveleliwa etampi,+ nto osuwela wiira yaahipahiwa. Tivo aahinanariwa ni Eleyazari ni Itamari, anaawe Aroni, yaawo yaahanle ari akumi. Owo aahaakoha wiira: 17 “Xeeni muhalaka ohikhuura enama ya yoovaha para oleveleliwa etampi nipuro noowaarya?+ Eyo etthu yoowaaryexa, nave-tho nyuwo moovahiwa muritti wiira mukuxe itampi sa aisarayeli. Siiso awo anooleveleliwa itampi saya ohoolo wa Yehova. 18 Moone wiira ephome ya enama evahiwe, kheroihiwe muhina mwa nipuro noowaarya.+ Nyuwo mwaahaana okhuura enama eyo nipuro noowaarya, siisaale ntoko kirummwale aka”. 19 Nto Aroni aahimwaakhula Moise iiraka: “Awosa anvaha Yehova+ yoovaha para oleveleliwa etampi ni yoovaha para opahiwa olelo. Hata vari siiso, sookikhumelela itthu iya. Nto vaakhanle wiira olelo kookhuura yoovaha para oleveleliwa etampi, niireke opaka eyo yammusivela Yehova?” 20 Okathi Moise aiwale awe moolumo awo, murima waahimukhurunuwa.

11 Yehova aahimuleela Moise ni Aroni oriki: 2 “Mwaaleele aisarayeli wiira: ‘Inama siri mulaponi mukhanle anyu ookhuura,+ tiiya: 3 Inama sootheene sirina itthottopwa* sookawanyeya eriyari masi sithaleyale mpakha ottuli, ni sintaphwela ikwaha piili* pooti okhuuriwa.

4 “‘Masi muhimukhuure mwaamunama onitaphwela paahi eyoolya awe aahiiso ohikawanyeyale itthottopwa. Mwaamunama oopacerya ti ekamelo. Nnaamwi etaphwelaka, masi itthottopwa saya khasikawanyeyale. Eyo ti yoohiloka* para nyuwo.+ 5 Nave-tho, muhikhuure epila,+ okhala wiira nnaamwi etaphwelaka eyoolya, masi khekawanyeyale itthottopwa. Eyo ti yoohiloka para nyuwo. 6 Nave muhimukhuure hukula,* okhala wiira hata otaphwelaka eyoolya, masi inawu sawe khisikawanyeyale eriyari. Owo toohiloka para nyuwo. 7 Nave muhikhuure ekuluwe,+ okhala wiira nnaamwi itthottopwa saya sikawanyeyale ene eriyari ni sithaleyale ene mpakha ottuli, masi eyo khenitaphwela. Ti yoohiloka para nyuwo. 8 Muhikhuure inama iyo aahiiso muhivare sakhwa. Iyo ti soohiloka para nyuwo.+

9 “‘Itthu sootheene siri mmaasini mukhanle anyu ookhuura, tiiya: Itthu sootheene sirina maapaliwe,* seiyo siri mmaasini a mphareya aahiiso a mmuro, pooti okhuura.+ 10 Soopattuxiwa sootheene sinikhala mphareya ni mmuro, ohela muhina axinama anceene yaawo anikhala poromosa, ahirina mapupha ni maapaliwe,* toohiloka para nyuwo. 11 Iyo itthu soohiloka para nyuwo, nave muhikhuure enama aya.+ 12 Itthu sootheene siri mmaasini, sihirina mapupha ni maapaliwe, ti soohiloka para nyuwo.

13 “‘Axipalame oohiloka, muhinireerela anyu waakhuura, taala: murumaasi,+ nivuku, namaattula-ikula,+ 14 ni mithinto sootheene sa ttiwi-ttiwi ooripa, 15 ni mithinto sootheene sa anakhuku, 16 ni mpisa, esiisi, enaka, ni mithinto sootheene sa xakukhu, 17 ni nikunkhuni, namame, kwetta-kwetta, 18 ni xawawe, xamukottha, khuruwele, 19 ni napiphi,* ni mithinto sootheene sa kotto-kottho, wilema ni nantuuthu. 20 Soopattuxiwa sootheene sirina mapupha,* seiyo sirina metto mixexe, ti soohiloka para nyuwo.

21 “‘Soopattuxiwa sirina mapupha, seiyo sirina metto mixexe, mukhuureke iye sirina metto miili soorakama sinituphana aya. 22 Mwa seiya, mukhuureke mithinto soovirikana sa isoope sinivava sirowaka mapuro oorakama, isoope sikina,+ ni ayiipo. 23 Soopattuxiwa sikina sirina mapupha ni metto mixexe, ti soohiloka para nyuwo. 24 Soopattuxiwa iya sinoowiirihani okhala oohiloka. Mutthu yoole onrowa okwannya soopattuxiwa iya soowiikhwela, onrowa okhala oohiloka mpakha nsuwa okela.+ 25 Mutthu yoole onrowa ottotta soopattuxiwa iya soowiikhwela, ohaana okattha malaya awe.+ Owo onrowa okhala oohiloka mpakha nsuwa okela.

26 “‘Khula enama erina itthottopwa sookawanyeya eriyari masi sihithaleyale mpakha ottuli, ni sihintaphwela, ti soohiloka para nyuwo. Ole onivara soopattuxiwa iyo, onrowa okhala oohiloka.+ 27 Khula enama ya metto mixexe erina itthottopwa soohikawanyeya, ti yoohiloka para nyuwo. Ole onrowa ovara inama iyo soowiikhwela, onrowa okhala oohiloka mpakha nsuwa okela. 28 Mutthu yoole onrowa ottotta soopattuxiwa iya soowiikhwela, ohaana okattha malaya awe.+ Owo onrowa okhala oohiloka mpakha nsuwa okela.+ Soopattuxiwa iyo ti soohiloka para nyuwo.

29 “‘Inama saamukhaani sineetta vathi siri soohiloka para nyuwo, tiiya: nahuwo, tthoro,+ ni mithinto sootheene sa anaakhwiitti, 30 nimara, naakhwiitti muulupale, naawookho,* naakhwiitti a mmihaavani, ni namanriya. 31 Inama iya saamukhaani ti soohiloka para nyuwo.+ Ole onrowa ovara inama iya soowiikhwela, onrowa okhala oohiloka mpakha nsuwa okela.+

32 “‘Etthu pi etthu enrowa omoreliwa ni inama iya okathi sinikhwa aya, enrowa okhala yoohiloka, ekhale etthu epakiwe ni matera, nikhale nlaya, ekhale esapala ya enama, aahiiso ekuwo ya esaakho. Khula etthu enirumeeliwa enrowa omoreliwa ni inama iyo, ehaana oruweiwa mmaasini. Eyo enrowa okhala yoohiloka mpakha nsuwa okela. Nuumala-vo, enrowa okhala yooloka. 33 Akhala wiira inama iyo sinimorela mwaapu wa oloko, mwaapu owo ohaana opwexiwa. Nto itthu saari mmwaapuni-mmo, sinrowa okhala soohiloka.+ 34 Khula eyoolya enrowa oyiihereya ni maasi anikhuma mwaapu owo, enrowa okhala yoohiloka. Nave khula etthu eniwuriwa enrowa okhala mmwaapuni-mmo, enrowa okhala yoohiloka. 35 Khula etthu enrowa omoreliwa ni inama iyo sookhwa, enrowa okhala yoohiloka. Itthu iyo sihaana opwexakasiwa, ekhale efornu aahiiso matthuwa. Iyo ti soohiloka, nave muhirumeele-tho. 36 Masi, akhala wiira inama iyo sinimorela mweehimeni aahiiso mutankini mwa maasi, ehime eyo ni etanki eyo sinrowa okhala sooloka. Nto ole onrowa ovara inama iyo sookhwa, onrowa okhala oohiloka. 37 Akhala wiira inama iyo sookhwa sinnimorela epyo enrowa waaliwa, epyo eyo enrowa okhala yooloka. 38 Masi akhala wiira epyo eyo ti yoonaana ni emoreliwa ni inama iyo sookhwa, epyo eyo enrowa okhala yoohiloka para nyuwo.

39 “‘Vano, akhala wiira enama enikhuuriwa enniikhwela, ole onikwannya enama eyo yookhwa, onrowa okhala oohiloka mpakha nsuwa okela.+ 40 Mutthu yoole onikhuura mpantta mmosa wa enama eyo yookhwa, ohaana okattha malaya awe, ni onrowa okhala oohiloka mpakha nsuwa okela.+ Mutthu yoole onrowa ottotta soopattuxiwa iya soowiikhwela, ohaana okattha malaya awe. Owo onrowa okhala oohiloka mpakha nsuwa okela. 41 Soopattuxiwa sootheene saamukhaani siri mulaponi, ti soohiloka.+ Soopattuxiwa iyo sihikhuuriweke. 42 Muhikhuure yoopattuxiwa eniipurula ni erukulu. Nnakhala muhikhuure yoopattuxiwa erina metto mixexe, aahiiso soopattuxiwa saamukhaani siri mulaponi sirina metto sinceene, okhala wiira ti soohiloka.+ 43 Muhiikhalihe oohiloka mwaha wa okhuura soopattuxiwa iya saamukhaani. Nave muhiinanarihe ni muhikhale oohiloka mwaha wa itthu iyo.+ 44 Miyo ka Yehova, Muluku anyu.+ Mwiireerihe ni mukhale oowaarya,+ okhala wiira miyo koowaarya.+ Tivonto, muhiikhalihe oohiloka mwaha wa soopattuxiwa iyo saamukhaani sineetta mulaponi. 45 Miyo ka Yehova, kookuminheni elapo ya wExiitu wiira kooniherye wiira ka Muluku anyu.+ Mukhaleke oowaarya,+ okhala wiira miyo koowaarya.+

46 “‘Nna nlamulo nnaahimya axinama, nnihimya soopattuxiwa sinivava, ni soopattuxiwa sootheene siri mmaasini, ni soopattuxiwa sootheene saamukhaani siri mulaponi, 47 wiira vakhale ovirikana eriyari ya etthu yoohiloka ni etthu yooloka, ni soopattuxiwa sikhanle ookhuuriwaka ni soopattuxiwa sikhanle oohikhuuriwaka’”.+

12 Yehova aahimuleela-tho Moise oriki: 2 “Mwaaleele aisarayeli wiira: ‘Akhala wiira muthiyana onoorupala, khimuyara mwaana mwaamulopwana, muthiyana owo onookhala oohiloka* mahiku 7, ntoko mahiku yaale onikhala awe mmweerini.+ 3 Nihiku na neethanu neeraru, mwaana owo ohaana winnuwihiwa.+ 4 Muthiyana owo nlelo onookhala oohiloka vamaithoni va Muluku mahiku 33, mwaha wa ephome eyiiheiye okathi wooyara ni nuumala oyara. Owo ohivare etthu yoowaarya, nnakhala ohikele nipuro noowaarya, mpakha omaleliha mahiku a wiireeriha wawe.

5 “‘Akhala wiira onimuyara mwaana mwaamuthiyana, owo onookhala oohiloka mahiku 14, ntoko mahiku yaale onikhala awe mmweerini. Muthiyana owo nlelo onookhala oohiloka vamaithoni va Muluku mahiku 66, mwaha wa ephome eyiiheiye okathi wooyara ni nuumala oyara. 6 Amaleliha mahiku a wiireeriha wawe, mwaha woomuyara mwaana mwaamulopwana aahiiso mwaamuthiyana, ohaana omuroihela namukuttho epwittipwitthi emosa yoolopwana ya eyaakha emosa, vamukhora va etenta* ya muthukumano, okuxaka yoovaha para opahiwa,+ vamosa ni epompa emosa aahiiso nsiya nimosa, ni yoovaha para oleveleliwa etampi. 7 Namukuttho onrowa onvahererya Yehova yoovaha eyo, wiira muthiyana owo oleveleliwe itampi sawe, ni wiira okhale ooloka vamaithoni va Muluku mwaha wa ephome eyiiheyale okathi wooyara ni nuumala oyara. 8 Masi akhala wiira muthiyana owo khorina ipwittipwitthi, ohaana ovaha masiya manli aahiiso ipompa piili mihoro.+ Emosa enrowa okhala yoovaha para opahiwa, ekina enrowa okhala yoovaha para oleveleliwa etampi. Namukuttho onoovaha itthu iyo wiira muthiyana owo oleveleliwe etampi awe. Nto muthiyana owo onrowa okhala ooloka’”.

13 Yehova aahimuleela-tho Moise ni Aroni, wiira: 2 “Akhala wiira nrapala na mutthu nihiipa nipuro nimosa, ni akhalana nikhwatta, aahiiso nlepa, nenno ninkhala ntoko makokho*+ vanrapalani vawe, ohaana orowa wa namukuttho Aroni, aahiiso wa mwaana mmosa-mmosa a Aroni ori namukuttho.+ 3 Namukuttho onoovarerya nikhwatta nlo vanrapalani. Akhala wiira manri ari vanikhwattani-vo tootteela, nave nikhwatta nno nihiixa, weeso awo makokho. Namukuttho onrowa onvarerya mutthu owo, ni onoomuhimya okhala oohiloka. 4 Akhala wiira nikhwatta nno ti nootteela, masi khaniixale ni ikharari saya khahiyo sootteela, namukuttho onrowa onvalaanya mutthu owo ni atthu akina, mpakha mahiku 7.+ 5 Nihiku na neethanu nenli, namukuttho onrowa onvarerya. Akhala wiira nikhwatta nno niri siisaale ntoko naari aya ni khanimwarenle mapuro makina a erutthu, namukuttho ononvalaanya mutthu owo ni atthu akina, mpakha mahiku makina 7.

6 “Nihiku na neethanu nenli, namukuttho onrowa onvarerya-tho. Akhala wiira nikhwatta nno noovukuwa ni khanimwarenle mapuro makina a erutthu, namukuttho onrowa omuhimya mutthu owo okhala ooloka.+ Nlo naari nikhwatta naamukhaani. Mutthu owo ohaana okattha malaya awe ni onookhala ooloka. 7 Nuumala namukuttho omuhimya mutthu ole okhala ooloka, masi nikhwatta nle khomutthikela ni khomwareela erutthu awe, mutthu owo ohaana otthikela* wa namukuttho. 8 Namukuttho onrowa ovarerya nikhwatta nlo. Akhala wiira nikhwatta nno noomwareela erutthu awe, namukuttho onrowa omuhimya mutthu owo okhala oohiloka. Awo makokho.+

9 “Akhala mutthu orina makokho, ohaana oroihiwa wa namukuttho. 10 Nto namukuttho onrowa onvarerya mutthu owo.+ Akhala wiira opuro owo wiipale ti wootteela, ni manri ari vaavo tootteela, nave nookhala nikhwatta,+ 11 weeso makokho awo ampacenrye khalai. Namukuttho onoomuhimya mutthu owo okhala oohiloka. Nto khompirisari onvalaanya mutthu owo ni atthu akina,+ wiira otthikele ovareriwa, maana mutthu owo toohiloka. 12 Akhala wiira makokho aamukhala mutthu owo erutthu yootheene, nto namukuttho onaweha wiira mutthu owo oosareya makokho, okhuma mmuru mpakha mmettoni, 13 nave namukuttho anvarerya, onaweha wiira makokho aamukhala mutthu ole erutthu yootheene, vano namukuttho onrowa omuhimya muretta ole okhala ooloka. Okhala wiira erutthu awe yootheene ti yootteela, nto mutthu owo tooloka.* 14 Masi nakhumelela nikhwatta, mutthu owo onrowa okhala oohiloka. 15 Okathi namukuttho onrowa awe oweha nikhwatta nno, onrowa omuhimya mutthu owo okhala oohiloka.+ Nikhwatta nlo ti noohiloka. Awo makokho.+ 16 Masi nikhwatta nlo natthikela okhala nootteela, owo ohaana orowa wa namukuttho. 17 Vano namukuttho onrowa onvarerya.+ Aweha wiira nikhwatta nlo nootteela, onrowa omuhimya muretta owo okhala ooloka. Mutthu owo tooloka.

18 “Akhala mutthu onikhalana ethuku, nto ethuku eyo evola, 19 masi nipuro nno niipa ni vatteela-vo, aahiiso wakhumelela nlepa nootteela ni nooxeerya, mutthu owo ohaana orowa wa namukuttho. 20 Namukuttho onrowa ovarerya nlepa nno.+ Akhala wiira nlepa nlo nihiixa ni manri aya aatteela, weeso awo makokho. Namukuttho onrowa onvarerya mutthu owo ni omuhimya okhala oohiloka. Eyo eretta ya makokho, yeeyo ekhumelenle nipuro naari ethuku. 21 Masi akhala wiira namukuttho onoovarerya nlepa nno, oweha wiira manri awo khattenle ni nlepa nlo khaniixale, ni noopacerya ovukuwa, namukuttho onrowa onvalaanya mutthu owo ni atthu akina, mpakha mahiku 7.+ 22 Nto akhala wiira nlepa nlo noomwareela erutthu yootheene, namukuttho onrowa omuhimya mutthu owo okhala oohiloka. Awo makokho. 23 Masi akhala wiira nlepa nno khaninnuwale, eyo piiyo, khanimwarenle erutthu yootheene, weeso eyo ethuku paahi yiipale. Namukuttho onrowa omuhimya mutthu owo okhala ooloka.+

24 “Aahiiso akhala wiira mutthu orimoovya ni mooro, nto enooneya ethayi, nave opuro owo nikhumelela nlepa nooxeerya ni nootteela aahiiso nootteela paahi, 25 namukuttho onrowa ovarerya nlepa nlo. Akhala wiira manri vanlepani-vo tootteela, nave nlepa nno nihiixa, awo makokho akhumelenle nipuro nno oviiye awe. Namukuttho onrowa omuhimya mutthu owo okhala oohiloka. Eyo eretta ya makokho. 26 Masi akhala wiira namukuttho onoovarerya nlepa nlo, oweha wiira manri awo khattenle ni nlepa nlo khiniixale, ni noopacerya ovukuwa, nto namukuttho onrowa onvalaanya mutthu owo ni atthu akina, mpakha mahiku 7.+ 27 Nihiku na neethanu nenli, namukuttho onrowa onvarerya. Akhala wiira nlepa nno noomwareela mapuro makina a erutthu, namukuttho onrowa omuhimya mutthu owo okhala oohiloka. Eyo eretta ya makokho. 28 Masi akhala wiira nlepa nlo khininnuwale, eyo piiyo, khinimwarenle mapuro makina a erutthu, ni noopacerya ovukuwa, weeso mutthu owo orimwiipa paahi mwaha wa ovya. Namukuttho onrowa omuhimya okhala ooloka, maana orimwiipa paahi.

29 “Akhala wiira mulopwana aahiiso muthiyana onnikhalana nikhwatta vamuru aahiiso veereruni, 30 namukuttho ohaana ovarerya nikhwatta nno.+ Aweha wiira nikhwatta nlo nihiixa ni ikharari aahiiso manri a mutthu owo sirina ekoore ya ncano ni khisaattale, namukuttho onrowa omuhimya mutthu owo okhala oohiloka. Nlo nikhwatta nri vamuru aahiiso veereruni. Awo makokho ari mmuru aahiiso veereruni. 31 Masi akhala wiira namukuttho onoona wiira nikhwatta nlo khaniixale ni ikharari sawe aahiiso manri awe khariipale, owo ohaana onvalaanya mutthu owo ni atthu akina, mpakha mahiku 7.+ 32 Nihiku na neethanu nenli, namukuttho onrowa ovarerya nikhwatta nlo. Aweha wiira nikhwatta nlo khanimwarenle mapuro makina a erutthu, ni ikharari aahiiso manri khahiyo a ekoore ya ncano, nave opuro owo ori nikhwatta khiwiixaale, 33 mutthu owo ohaana omettha ikharari sawe aahiiso ereru awe. Masi opuro owo ori nikhwatta ohaana ohiiwa siiso. Nto namukuttho onrowa onvalaanya mutthu owo oniwereiwa ni atthu akina, mpakha mahiku 7.

34 Nihiku na neethanu nenli, namukuttho ohaana ovarerya-tho nikhwatta nlo. Akhala wiira nikhwatta nlo nri vamuru aahiiso veereruni khinimwarenle mapuro makina a erutthu, ni khiniixale, namukuttho onrowa omuhimya mutthu owo okhala ooloka. Mutthu owo ohaana okattha malaya awe. Nuumala-vo, onookhala ooloka. 35 Akhala wiira nikhwatta nlo nnoomwareela erutthu yootheene, nuumala namukuttho omuhimya mutthu owo okhala ooloka, 36 namukuttho ohaana onvarerya mutthu owo. Akhala wiira nikhwatta nlo noomwareela erutthu yootheene, namukuttho khompirisari oweha akhala wiira ikharari aahiiso manri ta ekoore ya ncano. Mutthu owo toohiloka. 37 Masi akhala wiira namukuttho ononvarerya mutthu owo, oona wiira nikhwatta nlo khanimwarenle erutthu yootheene, ni ikharari aahiiso manri ari opuro owo tooriipa, weeso nikhwatta nlo noovola. Mutthu owo tooloka, nave namukuttho onrowa omuhimya okhala ooloka.+

38 “Akhala mulopwana aahiiso muthiyana animukhumelela malepa ootteela mweerutthuni mwawe, 39 namukuttho ohaana ovarerya malepa awo.+ Akhala wiira malepa awo tootteela ni ooriipa, mutthu owo orooneeniwa paahi. Owo tooloka.

40 “Akhala wiira mulopwana sinnimmora ikharari sawe onakhalana ntari, owo tooloka. 41 Akhala wiira ikharari sawe sinimora vatthomela onakhalana ntari vaavo, owo tooloka. 42 Masi akhala wiira nnookhumelela nikhwatta nootteela ni nooxeerya vantarini-vo aahiiso vatthomela vawe, awo makokho akhumelenle vantarini-vo aahiiso vatthomela. 43 Namukuttho ohaana onvarerya mulopwana owo. Akhala wiira nikhwatta nlo nri vamuru, opuro ori ntari aahiiso vatthomela ti nootteela ni nooxeerya, nave ninkhala ntoko makokho, 44 mutthu owo ookhalana makokho. Owo toohiloka. Namukuttho ohaana omuhimya okhala oohiloka, mwaha wa eretta eri vamuru vawe. 45 Mutthu yoole orina eretta ya makokho, malaya awe ahaana okheriwa, ikharari sawe sikhale soohilokiheriwa ni ohaana okhuneela eyano awe.* Nto okhuweleke iiraka: ‘Miyo nkilonke, miyo nkilonke!’ 46 Owo onrowa okhala oohiloka mahiku ootheene orina awe eretta eyo. Okhala wiira toohiloka, ohaana ovalaanyiwa ni atthu akina. Nto onrowa okhalaka ota wa muttetthe.+

47 “Akhala wiira makokho aananariha malaya, akhale malaya oothererya aahiiso a eliinyu, 48 okhale opuro woottotthiwa aahiiso wootthaviwa wa eliinyu wala ekuwo yoothererya, aahiiso esapala wala etthu ekina epakiwe ni esapala, 49 nave malepa a ekoore ya ncano ni ooripelela aahiiso ooxeerya yakhumelela vamalayani-vo, ni vasapalani, ni etthu yoottotthiwa, ni etthu yootthaviwa, wala etthu ekina epakiwe ni esapala, nto awo makokho. Ahaana wooniheriwa namukuttho. 50 Namukuttho onrowa ovarerya malepa awo, ni onrowa ovalaanya itthu iyo siranve makokho, mpakha mahiku 7.+ 51 Nihiku na neethanu nenli, namukuttho onrowa ovarerya malepa awo. Aweha wiira malepa awo aamwareela vamalayani, ni aamwaareela etthu yoottotthiwa, ni etthu yootthaviwa, aahiiso vasapalani (ohicalelaka muteko onivareliwa esapala eyo), awo makokho oowoopiha. Nto, etthu eyo enanarihiwe ti yoohiloka.+ 52 Owo ohaana opaha malaya awo, aahiiso opuro ottotthiwe aahiiso otthaviwe wa ekuwo yoothererya wala wa eliinyu, aahiiso etthu ekina epakiwe ni esapala, yeeyo erina nlepa nlo. Awo makokho oowoopiha. Malaya awo ahaana opahiwa.

53 “Masi akhala wiira namukuttho onoovarerya malepa awo, oona wiira khamwarenle vamalayani aahiiso opuro ottotthiwe wala otthaviwe, aahiiso etthu ekina epakiwe ni esapala, 54 namukuttho onrowa oruma wiira itthu iyo sikatthiwe. Nave, onrowa ovalaanya mpakha mahiku makina 7. 55 Nuumala okatthiwa saana itthu iye sinanarihiwe, namukuttho onrowa ovarerya. Aweha wiira nlepa nlo khaniturukeiye, etthu eyo ti yoohiloka, hata nlepa nlo nihimwarenle mapuro makina. Nyuwo muhaana opaha, okhala wiira etthu eyo yoohononiwa ni makokho muhina aahiiso ota.

56 “Masi akhala wiira namukuttho onoovarerya nlepa nlo, oweha wiira noopacerya omala-mala nuumala okatthiwa saana, owo onookumiha mpantta owo onanarihiwe wa ekuwo, wa esapala, wa etthu ettotthiwe aahiiso etthaviwe. 57 Akhala wiira malepa awo annikhumelela mpantta mukina wa nlaya, ni wa opuro ottotthiwe aahiiso otthaviwe, wala khula etthu epakiwe ni esapala, weeso malepa awo annimwara-mwareya. Nyuwo muhaana opaha+ etthu eyo enanarihiwe. 58 Masi vakhala wiira etthu ele ekatthiwe, eyo piiyo, nlaya, ni etthu yoottotthiwa wala yootthaviwa, aahiiso khula etthu epakiwe ni esapala, kherina-tho nlepa, etthu eyo ehaana otthikela-tho okatthiwa ekwaha ya nenli. Nuumala-vo, eyo enrowa okhala yooloka.

59 “Nla nlamulo na eretta ya makokho enanarinhe nlaya noothererya aahiiso na eliinyu, wala opuro woottotthiwa aahiiso wootthaviwa wa ekuwo, wala khula etthu epakiwe ni esapala, wiira namukuttho osuweleke ohimya wiira etthu eyo ti yooloka aahiiso ti yoohiloka.

14 Yehova aahilavula-tho ni Moise, iiraka: 2 “Nla nlamulo para mutthu orina makokho, nihiku ninrowa awe ohimmwa okhala ooloka, okathi oniroihiwa awe wa namukuttho.+ 3 Namukuttho onookhuma mmuttettheni wiira anvarerye mutthu owo. Akhala wiira makokho ammalela, 4 namukuttho onrowa omuruma mutthu owo wiira aaruuhe axipalame anli akumi ni ooloka, ni matera a eseeturu, ni ekuwo yooxeerya, ni makukhu a mwiri oniihaniwa isopo, wiira mutthu owo oreerihiwe.+ 5 Namukuttho onooruma wiira mwaapalame mmosa iiviwe vasulu va mwaapu wa oloko orina maasi, yaawo arikiwe muro onivira. 6 Masi namukuttho owo ohaana omukuxa mwaapalame mukumi, ni matera a eseeturu, ni ekuwo yooxeerya ni mutathi oniihaniwa isopo. Nuumala-vo, omuruweye mwaapalame owo vamosa ni itthu iyo sootheene, mphomeni mwa mwaapalame ole iiviwe vasulu va mwaapu orina maasi arikiwe muro onivira. 7 Vano namukuttho onrowa omutathela ephome ikwaha 7 mutthu owo oniireeriha makokho. Nto onrowa omuhimya okhala ooloka. Nuumala-vo, onrowa omutaphula mwaapalame owo mukumi mutakhwani.+

8 “Mutthu owo oniireeriha ohaana okattha malaya awe, omettha ikharari sawe ni manri awe erutthu yootheene, ni ohaana orapa. Siiso, onookhala ooloka. Nuumala-vo, pooti okela mmuttettheni, masi ohaana okhala ota wa etenta awe, mpakha mahiku 7. 9 Nihiku na neethanu nenli, owo ohaana omettha ikharari sawe sootheene, ni ereru awe ni iyaaphi* sawe. Nuumala-vo, ohaana omettha manri ootheene a erutthu awe, ni okattha malaya awe ni orapa. Siiso, onookhala ooloka.

10 “Nihiku na neethanu neeraru, owo ohaana okuxa ipwittipwitthi piili soolopwana soohiwereiwa, ni epwittipwitthi emosa yaamukhaani yoothiyana+ ya eyaakha emosa ehiniwereiwa. Nave, okuxe mipantta miraru sa namuloko sa eefa* ya otthu wooreera oheliwe* makhura, ntoko yoovaha ya ipyo,+ ni ekoopho emosa* ya makhura.+ 11 Nto namukuttho, yoowo onimuhimya mutthu owo okhala ooloka, ohaana omuroiha mutthu owo oniireeriha, vamosa ni soovaha sawe, ohoolo wa Yehova, vamukhora va etenta* ya muthukumano. 12 Namukuttho onrowa okuxa epwittipwitthi yoolopwana yaamukhaani, wiira ovahe ntoko yoovaha mwaha wa okhalana mulattu,+ vamosa ni ekoopho emosa* ya makhura. Nave onrowa weettiha itthu iya oroihaka ohoolo ni ottuli, ntoko yoovaha eneettihiwa ohoolo wa Yehova.+ 13 Nuumala-vo, owo onrowa ohita epwittipwitthi eyo nipuro noowaarya, opuro yoowo okhala wene oniiviwa aya+ enama ya yoovaha para oleveleliwa etampi ni yoovaha para opahiwa. Siisaale ntoko yoovaha para oleveleliwa etampi eri aya ya namukuttho, siiso-tho, yoovaha mwaha wa okhalana mulattu ti ya namukuttho.+ Eyo etthu yoowaaryexa.+

14 “Nuumala-vo, onoohavula ephome vakhaani ya yoovaha mwaha wa okhalana mulattu, ottikitthele vathi va niyaru noolopwana na mutthu owo oniireeriha, ni ottikitthele ekatha yuulupale ya ntata noolopwana na mutthu owo, ni elipwi yuulupale ya nnawu noolopwana. 15 Nave, namukuttho onookuxa makhura+ vakhaani ari mukoophoni, oyiiherye ntata nawe noothiyana. 16 Nuumala-vo, onrowa onaaniha ekatha awe ya ntata noolopwana mmakhurani ari ntata noothiyana, ikwaha 7. Nto onrowa otathelaka makhura awo ohoolo wa Yehova. 17 Vano makhura ahanle mmatatani mwawe, namukuttho onrowa ohela vathi va niyaru noolopwana na mutthu owo oniireeriha. Nave-tho onoohela ekatha yuulupale ya ntata noolopwana na mutthu owo ni elipwi yuulupale ya nnawu noolopwana. Ephome eyo, onrowa ohela opuro yoole ohenle awe ephome ya yoovaha mwaha wa okhalana mulattu. 18 Makhura anrowa ohala mmatatani mwa namukuttho, owo ohaana ohela vamuru va mutthu ole oniireeriha. Siiso, namukuttho onoomureeriha mutthu owo wiira oleveleliwe itampi sawe, ohoolo wa Yehova.+

19 “Namukuttho onrowa ovaha yoovaha para oleveleliwa etampi+ ni onrowa omureeriha mutthu owo oniireeriha wiira oleveleliwe etampi awe, nuumala-vo onimwiiva enama ya yoovaha para opahiwa. 20 Nave, namukuttho onrowa ovaha valtaari yoovaha para opahiwa ni yoovaha ya ipyo.+ Siiso, namukuttho onoomureeriha mutthu owo wiira oleveleliwe itampi sawe.+ Nto mutthu owo onookhala ooloka.+

21 “Masi, akhala wiira mutthu owo toohaawa ni khorina mireerelo sinceene, ohaana okuxa epwittipwitthi yaamukhaani yoolopwana ya yoovaha mwaha wa okhalana mulattu, ovahe wiira ekhale yoovaha eneettihiwa, wiira oleveleliwe itampi sawe. Nave-tho onoovaha mpantta wa namuloko wa eefa* wa otthu wooreera wooheliwa makhura,* ntoko yoovaha ya ipyo, ni ekoopho emosa ya makhura, 22 ni masiya manli aahiiso ipompa piili mihoro, ntoko vaniwerya awe. Mwaapalame mmosa, onrowa ovahiwa ntoko yoovaha para oleveleliwa etampi, nto mukina onrowa ovahiwa ntoko yoovaha para opahiwa.+ 23 Nihiku na neethanu neeraru,+ mutthu owo ohaana omuroihela itthu iyo namukuttho, wiira namukuttho owo omuhimye okhala ooloka ohoolo wa Yehova,+ vamukhora va etenta ya muthukumano.

24 “Namukuttho onrowa okuxa epwittipwitthi yaamukhaani yoolopwana ya yoovaha mwaha wa okhalana mulattu,+ ni ekoopho ya makhura. Nto namukuttho onrowa weettihaka itthu iya oroihaka ohoolo ni ottuli, ntoko yoovaha eneettihiwa ohoolo wa Yehova.+ 25 Vano, namukuttho onrowa ohita epwittipwitthi eyo ya yoovaha mwaha wa okhalana mulattu. Nto onoohavula ephome vakhaani ya yoovaha eyo, ottikitthele vathi va niyaru noolopwana na mutthu owo oniireeriha, ni ottikitthele ekatha yuulupale ya ntata noolopwana na mutthu owo, ni elipwi yuulupale ya nnawu noolopwana.+ 26 Namukuttho onrowa oyiiherya ephome vakhaani ntata nawe noothiyana.+ 27 Nuumala-vo, onrowa onaaniha ekatha awe ya ntata noolopwana mmakhurani ari ntata noothiyana, ikwaha 7. Nto onrowa otathelaka makhura awo ohoolo wa Yehova. 28 Vano makhura ari mmatatani mwawe, namukuttho onrowa ohela vathi va niyaru noolopwana na mutthu owo oniireeriha. Nave-tho onoohela ekatha yuulupale ya ntata noolopwana na mutthu owo ni elipwi yuulupale ya nnawu noolopwana. Ephome eyo onrowa ohela opuro yoole ohenle awe ephome ya yoovaha mwaha wa okhalana mulattu. 29 Makhura ari mmatatani mwa namukuttho, ohaana ohela vamuru va mutthu ole oniireeriha, wiira mutthu owo oleveleliwe itampi sawe, ohoolo wa Yehova.

30 “Namukuttho onrowa ovaha nsiya nimosa aahiiso epompa emosa muhoro, ntoko mutthu owo onireerihiwa oniwerya awe ovaha,+ 31 eyo piiyo, owenrye awe ophwanya. Itthu iyo sinrowa okhala ntoko yoovaha para oleveleliwa etampi. Nto, nsiya nikina aahiiso epompa ekina, onrowa ovaha wiira ekhale yoovaha para opahiwa,+ vamosa ni yoovaha ya ipyo. Siiso, namukuttho onoomureeriha mutthu owo, wiira oleveleliwe itampi sawe ohoolo wa Yehova.+

32 “Nla nlamulo para mutthu aarina eretta ya makokho, masi ahaarina mireerelo saaphiyerya wiira ohimmwe okhala ooloka”.

33 Yehova aahimuleela-tho Moise ni Aroni wiira: 34 “Okathi munikela anyu elapo ya oKanaani,+ yeeyo kinoovahaakani wiira ekhale yawinyu,+ nto miyo keemererya wiira empa emosa ya mulaponi mwanyu ekhumelele eretta ya makokho,+ 35 mwaneene empa eyo, ohaana orowa wa namukuttho ni omuleela wiira: ‘Owannyaka nookhala nlepa ninkhala mwa eretta ya makokho’. 36 Namukuttho onrowa oruma okumihiwa itthu sootheene siri mpaani-mmo ohinatthi ovarerya nlepa nno, wiira ohihimye itthu sootheene siri mpaani-mmo okhala soohiloka. Nuumala-vo, namukuttho onrowa ovarerya empa eyo. 37 Vano onoovarerya opuro owo ori nlepa. Akhala wiira exiri eyo yookhalana malepa ooripelela ni a ncano aahiiso ooxeerya, ni vanakhala wiira malepa awo ahiixa, 38 nto namukuttho onrowa okhumela ota, orume wiira ohikhale mutthu onrowa okela mpaani-mme, mpakha mahiku 7.+

39 “Nuumala-vo, namukuttho onootthika nihiku na neethanu nenli, wiira ovarerye empa eyo. Akhala wiira nlepa nno noomwareela ixiri sa empa eyo, 40 namukuttho onooruma wiira maluku arina nlepa avenxiwe ni ariheliwe ota wa muttetthe, opuro onriheliwa itthu soohiloka. 41 Namukuttho onooruma wiira empa eyo ewakiwe muhina. Nto etthaya yaarepokaraniwe aya ni yaarumeliwe wiira osirikiwe mpaani, eriheliwe ota wa muttetthe, opuro onriheliwa itthu soohiloka. 42 Vano awo anoorantteliha maluku ale yaakumihiwe ni maluku makina. Nave, namukuttho onooruma wiira empa eyo erepokariwe, ni esirikiwe mpaani.

43 “Masi, akhala wiira nlepa nno nookhumelela-tho empa eyo nuumala ovenxiwa maluku ni owakiwa ni otthikela orepokariwa, 44 namukuttho ohaana okela mpaani-mmo wiira ovarerye. Akhala wiira nlepa nno noomwareela empa eyo, awo makokho ootakhala.+ Empa eyo ti yoohiloka. 45 Namukuttho onooruma wiira empa eyo epwexakasiwe, eyo piiyo, maluku aya, ni ithaapwa saya, ni etthaya yaarepokaraniwe aya ni yaasirikaniwe aya. Nave onooruma wiira itthu iyo sariheliwe ota wa muttetthe, opuro onriheliwa itthu soohiloka.+ 46 Masi mutthu yoole onrowa okela mpaani-mmo mahiku akhoottihiwe okeliwa,+ onrowa okhala oohiloka mpakha vahalaka wiila.+ 47 Mutthu yoole onkela orupa empa eyo ohaana okattha malaya awe, nave ole onrowa olya mpaani-mmo, ohaana okattha malaya awe.

48 “Masi namukuttho arowa empa eyo, oweha wiira nlepa nno khinimwarenle empa eyo nuumala otthikela orepokariwa, owo ohaana ohimya empa eyo okhala yooloka, okhala wiira nlepa nlo noomala-mala. 49 Wiira oreerihe empa eyo, namukuttho onimwaakuxa axipalame anli, ni matera a eseeturu, ni ekuwo yooxeerya ni mutathi oniihaniwa isopo.+ 50 Owo ohaana omwiiva mwaapalame mmosa vasulu va mwaapu wa oloko orina maasi, yaawo arikiwe muro onivira. 51 Nuumala-vo, onookuxa matera a eseeturu, ni mutathi oniihaniwa isopo, ni ekuwo yooxeerya ni mwaapalame ole mukumi. Nto onoomuruweya mwaapalame owo vamosa ni itthu iye sootheene, mphomeni mwa mwaapalame iiviwe vasulu va mwaapu orina maasi arikiwe muro onivira. Nave-tho ohaana otathela ephome eyo ikwaha 7+ ohoolo wa empa eyo. 52 Namukuttho ohaana oreeriha empa eyo ni ephome ya mwaapalame, ni maasi arikiwe muro onivira, ni mwaapalame mukumi, ni matera a eseeturu, ni mutathi oniihaniwa isopo ni ekuwo yooxeerya. 53 Nuumala-vo, namukuttho onrowa omutaphula mwaapalame owo mukumi mutakhwani, ota wa epooma. Siiso, owo onookumiha ohiloka wa empa eyo. Nto empa eyo enrowa okhala yooloka.

54 “Nla nlamulo para makokho, nlepa nri vantarini aahiiso veereruni,+ 55 makokho ari vanlayani,+ aahiiso mpaani,+ 56 wiipa, makhwatta ni malepa,+ 57 wiira namukuttho oweryeke osuwela akhala wiira etthu emosa ti yooloka+ wala ti yoohiloka, ni vakhala wiira mutthu tooloka wala toohiloka. Nla nlamulo na makokho”.+

15 Yehova aahilavula-tho ni Moise ni Aroni, iiraka: 2 “Mwaaleele aisarayeli wiira: ‘Akhala mulopwana orina eretta ya onowa* elopwana* awe, eretta eyo ti yoohiloka.+ 3 Mulopwana owo toohiloka mwaha wa eretta eyo ya onowa. Hata mulopwana owo onowaka aahiiso elopwana awe ettiyanne ene, owo toohiloka.

4 “‘Khula ekhaama onrowa awe wummaathela mulopwana owo onnowa, enrowa okhala yoohiloka. Nave khula opuro onrowa awe okilaathi, onrowa okhala woohiloka. 5 Ole onrowa ovara ekhaama ya mulopwana owo, ohaana okattha malaya awe ni orapa. Owo onrowa okhala oohiloka mpakha vahalaka wiila.+ 6 Ole onrowa okilaathi opuro aakilanthi mulopwana owo onnowa, ohaana okattha malaya awe ni orapa. Owo onrowa okhala oohiloka mpakha vahalaka wiila. 7 Ole onrowa ovara erutthu ya mulopwana onnowa, ohaana okattha malaya awe ni orapa. Onrowa okhala oohiloka mpakha vahalaka wiila. 8 Akhala wiira mulopwana owo onnowa onoomusenela mutthu ooloka, ole oseneliwe ohaana okattha malaya awe ni orapa. Onrowa okhala oohiloka mpakha vahalaka wiila. 9 Mulopwana onnowa akilaathela enama enimweettiha, enama eyo enrowa okhala yoohiloka. 10 Ole onrowa ovara etthu ekilaatheliwe ni mulopwana owo onnowa, onrowa okhala oohiloka mpakha vahalaka wiila. Nave ole onrowa oteexa itthu iyo, ohaana okattha malaya awe ni orapa. Owo onrowa okhala oohiloka mpakha vahalaka wiila. 11 Vakhala wiira ole onnowa+ khonyanwe, nto onanvara mutthu, nto ole ovariwe ohaana okattha malaya awe ni orapa. Owo onrowa okhala oohiloka mpakha vahalaka wiila. 12 Mwaapu wa oloko onrowa awe ovara mulopwana owo onnowa, ohaana opwexiwa. Yakhala etthu ya matera, ehaana orapihiwa.+

13 “Okathi onowa iwo ommala aya, mulopwana owo onookhala ooloka. Nto ohaana okontari mahiku 7 para wiireeriha. Owo ohaana okattha malaya awe ni orapa maasi anvira. Vano, onookhala ooloka.+ 14 Nihiku na neethanu neeraru, ohaana okuxa masiya manli aahiiso ipompa piili mihoro,+ orowe ohoolo wa Yehova, vamukhora va etenta* ya muthukumano, anvahererye namukuttho. 15 Namukuttho onrowa onvaha Muluku axipalame awo. Mwaapalame mmosa onrowa onvaha ntoko yoovaha para oleveleliwa etampi, ni mwaapalame mukina ntoko yoovaha para opahiwa. Namukuttho onrowa omureeriha mulopwana owo wiira oleveleliwe itampi sawe ohoolo wa Yehova, mwaha wa onowa wawe.

16 “‘Akhala wiira mulopwana onooyiiheya ekhalawa* awe, owo ohaana orapa ni onrowa okhala oohiloka* mpakha wiila.+ 17 Owo ohaana okattha nlaya aahiiso khula etthu epakiwe ni esapala emorenle ekhalawa eyo. Itthu iyo, sinrowa okhala soohiloka mpakha vahalaka wiila.

18 “‘Mulopwana ni muthiyana yarupihana ekhuma ekhalawa, awo ahaana orapa, ni anrowa okhala oohiloka mpakha vahalaka wiila.+

19 “‘Akhala wiira muthiyana enooyiiheya ephome awe, owo onrowa okhala oohiloka mpakha mahiku 7,+ mwaha wa okhala mmweerini. Ole onrowa omukwata muthiyana owo, onrowa okhala oohiloka mpakha vahalaka wiila.+ 20 Khula etthu muthiyana owo onrowa awe wummaathela aahiiso okilaathela ori ene mmweerini, enrowa okhala yoohiloka.+ 21 Ole onrowa okwata ekhaama ya muthiyana owo, ohaana okattha malaya awe ni orapa. Nave onrowa okhala oohiloka mpakha nsuwa okela. 22 Ole onrowa okwata khula etthu enrowa okilaatheliwa ni muthiyana owo, ohaana okattha malaya awe ni orapa. Nave onrowa okhala oohiloka mpakha vahalaka wiila. 23 Muthiyana owo akilaathela ekhaama aahiiso etthu ekina, ole onrowa okwata etthu eyo onrowa okhala oohiloka mpakha nsuwa okela.+ 24 Akhala wiira mulopwana onnirupa ni muthiyana owo,+ nto ottonyeriwa ni ephome awe, mulopwana owo onrowa okhala oohiloka mpakha mahiku 7. Nave khula ekhaama onrowa awe orupela mulopwana owo, enrowa okhala yoohiloka.

25 “‘Akhala wiira ephome ya muthiyana enniyiiheya mahiku manceene,+ ohikhanle okathi yoole onikhala awe mmweerini,+ aahiiso akhala wiira enniyiiheya ovikana mahiku onikhala awe mmweerini, owo onrowa okhala oohiloka mahiku ootheene eniyiiheya aya, siisaale ntoko mahiku onikhala awe mmweerini. 26 Khula ekhaama onimmaathela awe mahiku eniyiiheya aya ephome awe, enrowa okhala yoohiloka, siisaale ntoko ekhaama onimmaathela awe mahiku onikhala awe mmweerini.+ Nave, khula etthu enikilaathela awe, enrowa okhala yoohiloka, ntoko siisaale siniiraneya aya akhala mmweerini. 27 Ole onikwata itthu iyo, onrowa okhala oohiloka. Ohaana okattha malaya awe ni orapa. Owo onrowa okhala oohiloka mpakha vahalaka wiila.+

28 “‘Masi akhala wiira ephome awe yoomaala, owo ohaana okontari mahiku 7, okhuma nihiku nenne emanle aya oyiiheya. Nuumala-vo, onrowa okhala ooloka.+ 29 Nihiku na neethanu neeraru, muthiyana owo ohaana okuxa masiya manli aahiiso ipompa piili mihoro,+ omuroihele namukuttho, vamukhora va etenta ya muthukumano.+ 30 Namukuttho ononvaha mwaapalame mmosa wiira okhale yoovaha para oleveleliwa etampi, nto mwaapalame mukina wiira okhale yoovaha para opahiwa. Owo onrowa omureeriha muthiyana owo ohoolo wa Yehova, wiira oleveleliwe itampi sawe, mwaha wa ephome awe yaayiiheya, yeeyo yaamwiiriha okhala oohiloka.+

31 “‘Nyuwo muhaana waakhaliherya aisarayeli wiira akhale ooloka. Siiso awo khanrowa okhwa mwaha woohonona etapernaakulu aka, yeeyo eri eriyari aya.+

32 “‘Nla ti nikhanle nlamulo para mulopwana onnowa, ni mulopwana onikhala oohiloka mwaha wa ekhalawa awe enikhuma,+ 33 ni muthiyana onikhala oohiloka mwaha wookhala mmweerini,+ ni mulopwana oninowa, aahiiso muthiyana ephome awe ehinimaala oyiiheya,+ ni mulopwana onirupa ni muthiyana ohilonke’”.

16 Nuumala anamwane anli a Aroni okhwaasa, mwaha wa omwaattamela Yehova voohikhalela, Yehova+ aahilavula ni Moise. 2 Yehova aahimuleela Moise wiira: “Mmuleele muulupale anyu Aroni, wiira ohiroweke khula okathi oniphavela awe ohoolo wa etampa ya nivuku, nenno nri nipuro noowaarya+ ottuli wa ekortiina.+ Iira siiso onimookhwa,+ okhala wiira kinookhumelela vasulu va etampa eyo,+ muneekuni.+

3 “Okathi Aroni onikela awe nipuro noowaarya, ohaana oruuha itthu iya: epooyi emosa yaamukhaani ntoko yoovaha para oleveleliwa etampi,+ ni epwittipwitthi emosa yoolopwana ntoko yoovaha para opahiwa.+ 4 Owo ohaana owara nlaya+ na onamukuttho noorakama na eliinyu, ni onwara kaputtula*+ a eliinyu wiira okhuneeleke erutthu awe. Nave ohaana otthukwelela muyuununi mwawe musako+ wa eliinyu, ni owara mmuru mwawe nleeso+ na eliinyu. Soowara+ iyo ti soowaarya. Ohaana orapa+ ni owara itthu iyo.

5 “Nloko na Isarayeli+ nihaana onvaha Aroni ipuri piili soolopwana saamukhaani, ntoko yoovaha para oleveleliwa etampi ni epwittipwitthi emosa ntoko yoovaha para opahiwa.

6 “Aroni onrowa ovaha epooyi eruuhale awe wiira oleveleliwe etampi awe+ ni sileveleliwe itampi sa amusi awe.

7 “Vano onrowa okuxa ipuri iye piili eemexe ohoolo wa Yehova, vamukhora va etenta* ya muthukumano. 8 Aroni onrowa othanla ipuri iyo piili, emosa para Yehova, ekina para Azazeli.* 9 Aroni onoovaha epuri yoolopwana ethanliwe+ para Yehova, wiira ekhale yoovaha para oleveleliwa etampi. 10 Masi epuri ethanliwe para Azazeli, ehaana oruuhiwa ekumi ohoolo wa Yehova, wiira yoomoleliwe wa Azazeli woothakoni,+ wiira atthu aleveleliwe itampi saya.

11 “Aroni onooroiha valtaari epooyi yaamukhaani oruuhale awe, wiira oleveleliwe etampi awe ni sileveleliwe itampi sa amusi awe. Nuumala-vo, onimwiiva epooyi eyo ya yoovaha para oleveleliwa itampi sawe.+

12 “Nuumala-vo, onookuxa eparatho+ yoosareya makhala a mooro anikhuma valtaari,+ yaawo ari ohoolo wa Yehova, ni onoohavula makuphi manli a nsenso nooxiliwa noowunkhela,*+ oroihe ottuli wa ekortiina+ ya Nipuro Noowaaryexa. 13 Nave-tho, onoohela nsenso* vasulu va makhala awo a mooro ohoolo wa Yehova.+ Nto mwiixi wa nsenso onookhuneela etampa+ ya Nivuku na Onamoona,+ wiira ohikhwe.

14 “Onookuxa ephome+ vakhaani ya epooyi eyo, otathele ni ekatha awe ohoolo wa etampa, mpantta onikhuma nsuwa. Onootathela ephome vakhaani ni ekatha awe ikwaha 7 ohoolo wa etampa.+

15 “Nuumala-vo, onoohita epuri eyo yoolopwana ya yoovaha wiira atthu+ aleveleliwe itampi saya. Nto onooroiha ephome eyo ottuli wa ekortiina+ ya Nipuro Noowaaryexa, iirihe etthu emosa-ru iirinhe awe ni ephome+ ya epooyi. Owo onootathela ephome eyo ohoolo wa etampa.

16 “Aroni ohaana oreeriha Nipuro Noowaaryexa mwaha wa itthu soohiloka sa anamwane a Isarayeli, eyo piiyo, mwaha wa itampi saya+ ni ohiiwelela waya. Nave-tho, onrowa oreeriha etenta ya muthukumano, yeeyo eri eriyari aya, atthu yaawo anipaka itthu soohiloka.

17 “Ohikhale mutthu onrowa okhala mutentani mwa muthukumano, okathi Aroni onrowa awe okela wiira oreerihe nipuro noowaarya, mpakha okathi onikhuma awe. Aroni owo onrowa wiireeriha wiira sileveleliwe itampi sawe ni sa amusi awe,+ ni sileveleliwe itampi sa nloko nootheene na Isarayeli.+

18 “Onrowa okhuma orowe valtaari,+ yoowo ori ohoolo wa Yehova, wiira omureerihe altaari owo. Onookuxa ephome vakhaani ya epooyi ni ephome vakhaani ya epuri eyo, ohele manyaka ootheene a valtaari. 19 Nave-tho, onootathela ephome vakhaani valtaari ni ekatha awe ikwaha 7, wiira omureerihe altaari owo, mwaha wa itthu soohiloka yaapaka aya aisarayeli.

20 “Nuumala oreeriha+ nipuro noowaarya, ni oreeriha etenta ya muthukumano ni omureeriha altaari,+ owo ohaana oroiha epuri+ yoolopwana ekumi ohoolo wa Muluku. 21 Aroni onimwiixaatherya matata awe oomanli vamuru va epuri eyo ekumi, ohimye soovonya sootheene sa aisarayeli, ni soowiira saya sootheene sootakhala, ni itampi saya sootheene. Vano onoopweha itthu iyo vamuru va epuri+ ele, oroihe woothakoni, onvahereryaka mulopwana othanliwe opaka eyo. 22 Epuri eyo enookuxa itampi saya+ erowaneke opuro ohinikhaliwa.+ Nto mulopwana othanliwe onooroiha epuri eyo woothakoni.+

23 “Nuumala-vo, Aroni onoovolowa mutentani mwa muthukumano, orule malaya awe a eliinyu, yaawo aawanre awe okathi aakenle awe nipuro noowaarya, ohiye memmo. 24 Owo ohaana orapa+ nipuro noowaarya ni owara malaya+ awe makina. Nuumala-vo, onookhuma wiira avahe yoovaha para opahiwa+ para mureerelo awe ni yoovaha para opahiwa+ para mureerelo wa atthu. Siiso owo onooleveleliwa itampi sawe, nave atthu+ anooleveleliwa itampi saya. 25 Vano onrowa opaha valtaari ekortuura ya yoovaha para oleveleliwa etampi.

26 “Mulopwana yoole aaroihale epuri wa Azazeli,+ ohaana okattha malaya awe ni orapa. Nuumala-vo, pooti otthikela omuttettheni.

27 “Itthu sootheene saahanle sa epooyi ya yoovaha para oleveleliwa etampi ni epuri ya yoovaha para oleveleliwa etampi, seiyo ephome aya yaaroihiwe nipuro noowaarya wiira aleveleliwe itampi, sinrowa oroihiwa ota wa muttetthe. Nave esapala, enama, ni mavi aya axinama awo, sinrowa opahiwa vaikho.+ 28 Ole aapaha itthu iyo ohaana okattha malaya awe ni orapa. Nuumala-vo, pooti otthikela omuttettheni.

29 “Nihiku na namuloko, mweeri wa neethanu nenli, mwisarayeli aahiiso namurwa, yoowo onikhala eriyari anyu, ohaana wooniherya oriipiwa murima,* ni ohivare muteko.+ Nla nlamulo na mahiku ootheene para nyuwosa. 30 Nihiku nlo, namukuttho onimooreerihani+ wiira muleveleliwe itampi sanyu, ni onoohimya wiira mooloka. Siiso nyuwo munooreerihiwa itampi sanyu sootheene, ohoolo wa Yehova.+ 31 Nihiku nlo ninrowa okhala esaabadu, nihiku noophumurya. Nyuwo muhaana wooniherya oriipiwa murima.+ Nla nlamulo na mahiku ootheene.

32 “Namukuttho yoole oniittheliwa makhura+ ni onithanliwa* wiira okhale namukuttho+ nipuro na apapawe,+ onoovaha para oleveleliwa etampi. Owo onoowara malaya+ a eliinyu, eyo piiyo, malaya+ a onamukuttho. 33 Onooreeriha nipuro noowaarya,+ ni etenta ya muthukumano,+ ni onoomureeriha altaari.+ Nave onimwaareeriha anamukuttho ni atthu ootheene a nloko na Isarayeli.+ 34 Nna nlamulo na mahiku ootheene para nyuwo,+ wiira mwaareeriheke aisarayeli wiira aleveleliwe itampi saya sootheene, ekwaha emosa khula mwaakha”.+

Aroni aahiira siisaale ntoko Yehova aamurumme awe Moise.

17 Yehova aahimuleela-tho Moise, oriki: 2 “Mulavule ni Aroni, ni anaawe, ni aisarayeli ootheene, mwaaleele wiira: ‘Yehova orumme so:

3 “‘“Ohikhale mutthu a nloko na Isarayeli oniiva epooyi aahiiso epwittipwitthi yoolopwana yaamukhaani wala epuri mmuttettheni, aahiiso ota wa muttetthe. 4 Ohiya-vo, ohaana toko oruuha enama eyo vamukhora va etenta* ya muthukumano, wiira onvahe Yehova ohoolo wa etapernaakulu ya Yehova. Akhala wiira onoomwiiva mwaamunama mmuttettheni, aahiiso ota wa muttetthe, mutthu owo onookhalana mulattu. Owo oomwiiva mwaamunama mwa enamuna yoohikhalela, nto ohaana wiiviwa. 5 Tivonto, aisarayeli ahaana omuroihela Yehova inama aniiva aya ota wa muttetthe, anvahererye namukuttho vamukhora va etenta ya muthukumano. Awo ahaana onvaha inama iyo Yehova,+ ntoko mikuttho sa opatthani. 6 Namukuttho onootathela ephome valtaari a Yehova, vamukhora va etenta ya muthukumano. Nave onoopaha ekortuura ntoko yoovaha yoowunkhela enimusivela* Yehova.+ 7 Siiso, atthu awo khanrowa otthikela-tho ovaha mikuttho malaikha ootakhala anlikana ni ipuri,+ yaawo anikokhorela aya.+ Nla nlamulo na mahiku ootheene para nyuwo ni osuulu anyu”’.

8 “Mwaaleele atthu wiira: ‘Akhala mutthu a nloko na Isarayeli, aahiiso namurwa onikhala eriyari anyu, onivaha yoovaha para opahiwa aahiiso mukuttho mukina, 9 nto ohiroiha vamukhora va etenta ya muthukumano wiira onvahe Yehova, ohaana wiiviwa.+

10 “‘Akhala mutthu a nloko na Isarayeli aahiiso namurwa onikhala mmuttettheni mwanyu, onikhuura ephome+ miyo kinoomukhootta mutthu owo ni kinoomwiiva. 11 Okumi wa khula yoopattuxiwa ori mphomeni.+ Nto miyo kihoovahani ephome eyo wiira nvaheke valtaari,+ wiira muleveleliwe itampi sanyu, okhala wiira ephome teniiriha oleveleliwa itampi sanyu,+ mwaha wa okumi ori mphomeni memmo. 12 Tivonto kaalenle aka aisarayeli wiira: “Ohikhale mutthu onikhuura ephome. Hata namurwa onikhala mmuttettheni mwanyu,+ ohikhuure ephome”.+

13 “‘Akhala wiira mwisarayeli aahiiso namurwa onikhala mmuttettheni mwanyu, onnixaya khivara enama ya mutakhwani aahiiso khunvara mwaapalame onikhuuriwa, ohaana oyiiha ephome+ ya etthu evanre awe, ni okhuneela ni etthaya. 14 Okumi wa khula yoopattuxiwa ti ephome aya, okhala wiira okumi ori mphomeni. Tivonto kaalenle aka aisarayeli wiira: “Muhikhuure ephome ya khula yoopattuxiwa, okhala wiira okumi wa khula yoopattuxiwa ori mphomeni mwaya. Mutthu onrowa okhuura, ohaana wiiviwa”.+ 15 Akhala mwisarayeli aahiiso namurwa, onikhuura enama yoowiikhwela aahiiso yiiviwe ni enama ya mutakhwani,+ mutthu owo ohaana okattha malaya awe ni orapa. Onrowa okhala oohiloka* mpakha nsuwa okela.+ Nuumala-vo, onooloka. 16 Masi vakhala wiira mutthu owo khonrowa okattha malaya awe ni khonrowa orapa, onimwaakhula mwaha wa etthu yootakhala opanke awe’”.+

18 Yehova aahilavula-tho ni Moise, iiraka: 2 “Mwaaleele aisarayeli wiira: ‘Miyo ka Yehova, Muluku anyu.+ 3 Muhiireke ntoko aniira aya atthu a wExiitu, weiwo mwaakhala anyu. Nave muhivareke itthu anivara aya akanaani, weiwo kinooroihaakani.+ Muhitthareke malamulo aya. 4 Muhaana weemererya maphukelo aka ni wiiwelela malamulo aka, ni mweetteleke malamulo awo.+ Miyo ka Yehova, Muluku anyu. 5 Muhaana wiiwelela malamulo aka ni weemererya maphukelo aka. Mutthu yoole oniiwelela, onookhala mukumi mwaha wa yaawo.+ Miyo ka Yehova.

6 “‘Ohikhale mulopwana onrowa orupihana ni mmusi awe.+ Miyo ka Yehova. 7 Muhirupihane ni paapa anyu, ni muhirupihane ni maama anyu. Awo ti amaminyu, muhirupihane naawo.

8 “‘Muhimurupihe mwaarawe paapa anyu.+ Munoomuulihiha muru paapa anyu.

9 “‘Muhimurupihe murokorinyu, okhale mwaana a paapa anyu, aahiiso mwaana a maama anyu, pooti oyariwe ene etthoko yeeyo aahiiso ohiyariwe etthoko yeeyo.+

10 “‘Muhimurupihe mwaana mwaamuthiyana a mwaninyu mwaamulopwana, aahiiso mwaana mwaamuthiyana a mwaninyu mwaamuthiyana, okhala wiira eyo enoowuulihihani muru.

11 “‘Muhimurupihe mwaana mwaamuthiyana a mwaarawe paapa anyu, yoowo oyariwe ni paapa anyu, okhala wiira murokorinyu.

12 “‘Muhimurupihe murokorawe paapa anyu. Owo orina ephome emosa-ru ni paapa anyu.+

13 “‘Muhimurupihe muulupale aya amaminyu aahiiso muhima aya, okhala wiira arina ephome emosa-ru.

14 “‘Muhimuulihihe muru muulupale aya apapinyu aahiiso muhima aya mwaha woomurupiha mwaarawe. Owo titiya anyu.+

15 “‘Muhimurupihe mwaarawe mwaninyu.+ Owo mwaarawe mwaninyu, muhirupihane nuuwo.

16 “‘Muhimurupihe mwaarawe muulupale anyu, aahiiso mwaarawe muhima anyu,+ okhala wiira eyo yaarowa omuulihiha muru.

17 “‘Muhimurupihe muthiyana ni mwanawe.+ Muhimukuxe mwaana mwaamuthiyana a mwanawe mwaamulopwana ni muhimukuxe mwaana mwaamuthiyana a mwanawe mwaamuthiyana wiira mmurupihe. Awo amusi. Eyo etthu yoowuuliha muru.

18 “‘Muhimwaatteye+ mwaarinyu ni muulupale awe aahiiso muhima awe. Nave muhimurupihe muthiyana owo, mwaarinyu nlelo ori ene mukumi.

19 “‘Muhimurupihe+ muthiyana mahiku onikhala awe oohiloka, mwaha wookhala mmweerini.

20 “‘Muhimurupihe mwaarawe mulopwana mukhwiinyu. Eyo enoowiirihani okhala oohiloka.+

21 “‘Muhinvahererye mwaninyu hata mmosa wiira opakiwe mukuttho para Moloki.+ Mwiira siiso,+ munoonanariha nsina na Muluku anyu. Miyo ka Yehova.

22 “‘Muhimurupihe mulopwana mukhwiinyu, ntoko mulopwana onimurupiha awe muthiyana.+ Eyo etthu yootepexa onanara.

23 “‘Mulopwana ohimurupihe mwaamunama. Eyo enoomwiiriha okhala oohiloka.* Nnakhala muthiyana ohirupihiwe ni mwaamunama.+ Eyo ennivirikanya ephattu.

24 “‘Muhiinanarihe mwaha wa itthu iya, maana ti seiya siwiirinhe atthu a maloko kiniwoomola aka ohoolo wanyu, okhala oohiloka.+ 25 Atthu a elapo eyo tootakhala. Miyo kinimwaahukhumu mwaha wa miteko saya sootakhala. Tivonto, atthu awo animoomoliwa elapo aya.+ 26 Masi nyuwosa, eyo piiyo, mwisarayeli aahiiso namurwa onikhala mmuttettheni mwanyu,+ muhaana wiiwelela malamulo aka ni weemererya maphukelo aka.+ Nave muhiireke itthu iyo sootakhala, nnakhala emosa. 27 Atthu yaakhala elapo ela muhinatthi orwa,+ yaaniira itthu iya sootheene sootakhala. Tivonto elapo ela yoonanarihiwa. 28 Nto khamunrowa woomoliwa mulaponi-mmo mwaha woonanariha elapo eyo, ntoko anoomoliwa aya maloko yaakhala memmo nyuwo muhinatthi orwa. 29 Akhala mutthu onipaka itthu iya sootakhala, mutthu owo ohaana wiiviwa. 30 Muhaana weettela nivarihano nahu, muhipakaka soolema soohiloka, seiyo saapakiwa muhinatthi ophiya.+ Siiso, khamunrowa wiinanariha mwaha wa itthu iyo. Miyo ka Yehova, Muluku anyu’”.

19 Yehova aahitthikela-tho olavula ni Moise, oriki: 2 “Mwaaleele atthu a nloko na Isarayeli wiira: ‘Mukhaleke oowaarya, okhala wiira miyo Yehova, Muluku anyu, koowaarya.+

3 “‘Khula mutthu ohaana waattittimiha amamawe, apapawe+ ni ohaana otthara nlamulo naka na esaabadu.+ Miyo ka Yehova, Muluku anyu. 4 Muhaakokhoreleke amuluku eethiru,+ aahiiso muhiipakele amuluku a eyuuma.+ Miyo ka Yehova, Muluku anyu.

5 “‘Akhala wiira muninvaha Yehova+ mukuttho wa opatthani, muhaana ovaha mukuttho owo mwa enamuna Muluku oneemererya awe.+ 6 Mukuttho owo ohaana okhuuriwa nihiku nenlo onivahiwa awe, ni mmeeloni mwaya. Masi enama ya mukuttho owo enrowa ophiya nihiku na neeraru, ehaana opahiwa vaikho.+ 7 Akhala wiira mpantta mmosa wa enama eyo ya mukuttho wa opatthani enookhuuriwa nihiku na neeraru, eyo etthu yoohiloka. Nto mukuttho owo khonrowa weemereriwa. 8 Mutthu yoole onikhuura, onoovahiwa ehukhumu mwaha wa etthu yoohiloka opanke awe. Owo khorumenle saana etthu yoowaarya yaavahiwa Yehova. Mutthu owo ohaana wiiviwa.

9 “‘Okathi munihepha anyu ipyo sa mmatta mwanyu, muhikumiheke ipyo sootheene siri mukerekhere mwa ematta eyo. Nnakhala muhittotteke makala anrowa ohala.+ 10 Nave-tho, mmatta mwanyu mwa ewuuva muhithukumanyeke mihokorokho sihanle, nnakhala muhittotteke iye simonre. Muhaana omuhiyerya mulipa-oohaawa+ ni namurwa. Miyo ka Yehova, Muluku anyu.

11 “‘Muhiiyeke,+ muhiwokeke,+ muhootothaneke mukina ni mukhwaawe. 12 Muhilapheke mahala ene, muromolaka nsina naka.+ Mwiira siiso, munooveeha nsina na Muluku anyu. Miyo ka Yehova. 13 Muhimoototheke mutthu,+ nnakhala muhiiyeke.+ Muhipiseke omuliva namuteko anyu mpakha mmeeloni mwaya.+

14 “‘Muhimulaphe mutthu ohiniiwa aahiiso muhihele etthu ohoolo wa mutthu ohinoona.+ Muhaana omoova Muluku anyu.+ Miyo ka Yehova.

15 “‘Mphukeke mulattu ni exariya. Muhimmoreleke ikharari mulipa-oohaawa, mwaha wookhala mulipa-oohaawa paahi. Aahiiso muhinvaheke erasau thaaciri.+ Mumphukeleke mukhwiinyu ni exariya.

16 “‘Muhimwara-mwaryeke itthu soowoothiwa munlokoni mwanyu.+ Muhipake etthu yaarowa omukumiherya maxakha mukhwiinyu.+ Miyo ka Yehova.

17 “‘Muhimunyokheke munninyu vamurimani vanyu.+ Ohiya-vo, mmuttaruxeke munninyu owo+ wiira muhikhalane mulattu, ntoko owo.

18 “‘Muhiwunleleke ikuhu+ atthu a nloko nanyu, nnakhala muhipweheke vamurimani vanyu etthu yootakhala awiirenlyaayani. Mumphenteke mukhwiinyu ntoko muniiphenta anyu.+ Miyo ka Yehova.

19 “‘Muhaana wiiwelela malamulo aka: Muhitakaaheke inama piili sa vate sa mixovo soovirikana, wiira siyarihane. Mmatta mwanyu, muhaaleke ipyo sa mithinto miili+ soovirikana. Muhiwareke malaya apakiwe ni maliinya a mithinto miili soovirikana* atakaaheriwe vamosa.+

20 “‘Akhala wiira mulopwana onimurupiha muthiyana, yoowo ori epottha ni onrowa otheliwa ni mulopwana mukina, masi muthiyana owo khoopoliwe aahiiso khokhanle ootaphuwa, awosa ahaana ovahiwa ehukhumu. Masi atthu awo ahiiviwe, okhala wiira muthiyana owo nlelo khaataphuliwe. 21 Mulopwana owo ohaana omuroihela Yehova epwittipwitthi yoolopwana, ntoko yoovaha mwaha wa okhalana mulattu,+ ohoolo wa etenta* ya muthukumano. 22 Namukuttho onrowa onvaha Yehova epwittipwitthi eyo, ntoko yoovaha mwaha wa okhalana mulattu, wiira mutthu owo oleveleliwe etampi ovanre awe. Siiso, mutthu owo onooleveleliwa etampi ovanre awe.

23 “‘Okathi onikela anyu elapo kinrowa aka woovahani, nto mwaala miri siniima mihokorokho sinilyiwa, muhilye mihokorokho saya iyaakha tthaaru soopacerya. Mooneke okhala soohiloka ni sinikhoottihiwa. 24 Masi eyaakha ya neexexe, mihokorokho sootheene sa miri iyo sinrowa okhala sooreerihiwa. Nyuwo munrowa onvahaka Yehova+ mutteeliwe ene murima. 25 Nto eyaakha ya neethanu, nyuwo pooti olya mihokorokho sa miri iyo, wiira muncererye itthu sinihepha anyu. Miyo ka Yehova, Muluku anyu.

26 “‘Muhikhuureke etthu eri ene ni ephome+ aya.

“‘Muhaaxeryeke ehako aahiiso opaka maxintta.+

27 “‘Muhimettheke* ikharari siri mukerekhere mwa muru anyu, aahiiso muhimettheke mukerekhere mwa ereru+ anyu mpakha omaliha.

28 “‘Muhithikileke erutthu anyu mwaha wa mutthu okhwiiye.+ Nnakhala muhipomphweke. Miyo ka Yehova.

29 “‘Muhinanarihe nsina na mwaninyu mwaamuthiyana, mmukhalihaka namararuwa.+ Mwiira siiso, elapo enoonanarihiwa ni anamararuwa, nave enoosareya atthu arina mweettelo woohiloka.+

30 “‘Mweetteleke nlamulo naka na esaabadu,+ ni muttittimiheke* nipuro naka noowaarya. Miyo ka Yehova.

31 “‘Muhaakohereryeke anahako,+ nnakhala ale anihimya itthu sinrowa wiiraneya ohoolo,+ wiira muhiinanarihe. Miyo ka Yehova, Muluku anyu.

32 “‘Mweemeleke+ ohoolo wa mutthu oowuuluvala,* nave mmuttittimiheke mutthu oowuuluvala.+ Muhaana omoova Muluku anyu.+ Miyo ka Yehova.

33 “‘Akhala namurwa onikhala elapo anyu, muhimuhaaxeke.+ 34 Namurwa onikhala elapo anyu, muhaana omuthokoreryaka ntoko mutthu a mulaponi mwanyu.+ Muhaana omphentaka ntoko muniiphenta anyu, okhala wiira ni nyuwo-tho mwaari anamurwa elapo ya wExiitu.+ Miyo ka Yehova, Muluku anyu.

35 “‘Okathi muniphima anyu erakamelo, olemela, aahiiso munnuwelo wa etthu,+ muhirumeeleke miphimo sihikhanle seekeekhai. 36 Okathi muniphima anyu etthu murumeeleke miphimo seekeekhai, ni maluku a epalansa eekeekhai, ni eefa* eekeekhai ni ehiini* yeekeekhai.+ Miyo ka Yehova, Muluku anyu, yoowo ookuminheni elapo ya wExiitu. 37 Tivonto, nyuwo muhaana wiiwelela ni weettela malamulo aka+ ootheene ni weemererya maphukelo aka ootheene. Miyo ka Yehova’”.

20 Yehova aahilavula-tho ni Moise, iiraka: 2 “Mwaaleele aisarayeli wiira: ‘Khula mwisarayeli aahiiso namurwa onikhala wIsarayeli, yoowo oninvaha mwanawe wiira okhale mukuttho para Moloki, ohaana wiiviwa.+ Atthu a mmuttettheni mwawe, ahaana onvonyakasa maluku mpakha okhwa. 3 Miyo kinoomukhootta mutthu owo, ni kinoomwiiva, okhala wiira onvaha mwanawe wiira okhale mukuttho para Moloki. Nave oonanariha nipuro naka noowaarya+ ni ooveeha nsina naka noowaarya. 4 Akhala wiira atthu a muttetthe owo anninweha mutthu owo onvahaka Moloki anaawe, anakhala wiira khiyoonale etthu, ni khohimwiiva,+ 5 miyo kinoomukhootta mutthu owo ni emusi awe.+ Kinoomwiiva mutthu owo, vamosa ni atthu ootheene animukokhorelana awe* Moloki.

6 “‘Mutthu yoole onikhala oohiroromeleya* mwaha wa waakoha anahako+ ni ale anihimya itthu sinrowa wiiraneya ohoolo,+ miyo kinoomukhootta ni kinoomwiiva.+

7 “‘Muhaana wiireeriha ni okhala oowaarya,+ okhala wiira miyo ka Yehova, Muluku anyu. 8 Nave muhaana wiiwelela malamulo aka ni weettela.+ Miyo ka Yehova, yoowo onooreerihani.+

9 “‘Akhala mutthu onimulapha* paapa awe aahiiso maama awe, mutthu owo ohaana wiiviwa.+ Okhala wiira oomulapha paapa awe aahiiso maama awe, mutthu owo torina mulattu.

10 “‘Vano ehukhumu enivahiwa mulopwana oniraruwa ni mwaara aaneene tiila: Mulopwana oniraruwa ni mwaara aaneene ohaana wiiviwa. Mulopwana owo ni muthiyana owo,+ ahaana wiiviwa. 11 Mulopwana yoole onimurupiha mwaara a paapa awe, onnimuulihiha+ muru paapa awe. Oowanli aya, eyo piiyo, mulopwana owo ni muthiyana owo, yiiviwe. Atthu awo tarina mulattu. 12 Akhala mulopwana onimurupiha mwaara a mwanawe, oowanli aya ahaana wiiviwa. Awo aavirikanya ephattu. Atthu awo tarina mulattu.+

13 “‘Akhala wiira mulopwana onimurupiha mulopwana mukhwaawe,* oowanli aya aapaka etthu yootepa onanara.+ Awo ahaana wiiviwa. Atthu awo tarina mulattu.

14 “‘Akhala mulopwana onimurupiha muthiyana vamosa ni maama awe muthiyana owo, eyo etthu yoowuuliha muru.+ Mulopwana owo ni athiyana awo ahaana opahiwa,+ wiira etthu eyo yoonanara ehitthikele opakiwa.

15 “‘Akhala mulopwana onimurupiha mwaamunama, owo ohaana wiiviwa. Nave mwaamunama owo ohaana wiiviwa.+ 16 Akhala muthiyana onimwaattamela mwaamunama ophavelaka wiira orupihiwe ni mwaamunama owo,+ muthiyana owo ni mwaamunama owo, ahaana wiiviwa. Mulopwana owo ni muthiyana owo yakhwa, owo mulattu aya.

17 “‘Akhala mulopwana onimurupiha murokorawe, eyo piiyo, mwaana mwaamuthiyana a paapa awe, aahiiso mwaana mwaamuthiyana a maama awe, eyo etthu yoonanara.+ Awo ahaana wiiviwa yooniwaka ni atthu ootheene. Mulopwana owo oomuulihiha muru murokorawe. Owo ohaana waakhula mwaha wa etthu yootakhala epanke awe.

18 “‘Akhala mulopwana onimurupiha muthiyana ori ene mmweerini, oowanli aya ahooniherya wiira khanoona ephome+ okhala etthu yoowaarya. Awo ahaana wiiviwa.

19 “‘Muhimurupihe muulupale awe aahiiso muhima awe maama anyu, wala murokorawe paapa anyu. Mwiira siiso, munoomuulihiha muru+ mmusi anyu owo murina anyu ephome emosa-ru. Oowanli aya ahaana waakhula mwaha wa etthu yootakhala apanke aya. 20 Mulopwana onimurupiha mwaarawe tiiyu awe, onnimuulihiha muru+ tiiyu awe. Oowanli aya ahaana waakhula mwaha wa etampi aya. Ahaana wiiviwa ahinatthi omuyara mwaana. 21 Akhala wiira mulopwana onimurupiha mwaara a muulupale awe aahiiso a muhima awe, eyo etthu yoonanara.+ Owo oomuulihiha muru munnawe. Oowanli aya ahaana wiiviwa ahinatthi omuyara mwaana.

22 “‘Muhaana wiiwelela malamulo aka ni weemererya+ maphukelo aka.+ Mwiira siiso, nyuwo khamunrowa woomoliwa+ elapo kinooroihaakani wiira mwakhaleke. 23 Muheetteleke malamulo aneettela aya maloko kinoomola aka ohoolo wanyu.+ Awo annipaka itthu iya sootheene, nto miyo kinnaanyokha atthu awo.+ 24 Tivonto koohimenryaakani wiira: “Nyuwo munookuxa elapo aya. Nto miyo kinimoovahani elapo eyo wiira ekhale yawinyu. Eyo elapo yoowaatta eleeti ni oravo.+ Miyo ka Yehova, Muluku anyu. Ti miyo koothanlaleni eriyari ya maloko makina”.+ 25 Nyuwo muhaana ohiyaniha enama yooloka ni enama yoohiloka, ni omuhiyaniha mwaapalame oohiloka ni ooloka.+ Muhiinanarihe mwaha wa mwaamunama aahiiso mwaapalame, wala khula yoopattuxiwa eniipurula vathi, seiyo koohimenryaakani wiira ti soohiloka.+ 26 Muhaana okhala oowaarya para miyo, okhala wiira miyo Yehova, koowaarya.+ Nave kihoothanlani, koovalaanyani ni maloko makina, wiira mukhale awaka.+

27 “‘Mulopwana aahiiso muthiyana ori nahako aahiiso onihimya itthu sinrowa wiiraneya muhoolo, ohaana wiiviwa.+ Owo ohaana ovonyiwa maluku mpakha okhwa. Mutthu owo torina mulattu’”.

21 Yehova aahimuleela Moise oriki: “Mulavule ni anamukuttho, eyo piiyo, anamwane a Aroni, mwaaleele wiira: ‘Ohikhale namukuttho onrowa wiinanariha mwaha wa mutthu okhwiiye a munlokoni mwawe.+ 2 Masi owo pooti wiinanariha mwaha wa mmusi awe orina awe ephome emosa-ru, ntoko maama awe, paapa awe, mwanawe mwaamulopwana, mwanawe mwaamuthiyana, ni muulupale awe aahiiso muhima awe. 3 Nave pooti wiinanariha mwaha wa murokorawe, vakhala wiira murokorawe owo khonarupe ni mulopwana, ni onikhala vakhiviru vawe, nave khothelinwe. 4 Masi owo ohiinanarihe mwaha wa muthiyana otheliwe ni mulopwana a nloko nawe. 5 Anamukuttho ahimettheke mputu,+ aahiiso ahimettheke ereru aya mukerekhere, nnakhala wiipopha.+ 6 Awo ahaana okhala oowaarya para Muluku aya.+ Nave ahinanariheke nsina na Muluku aya,+ okhala wiira anninvaha Yehova mikuttho soopahiwa, eyo piiyo, yoolya enivahiwa Muluku aya. Tivo, ahaana okhala oowaarya.+ 7 Ahimuthele muthiyana namararuwa,*+ yoowo onanarihiwe. Nnakhala ahimuthele muthiyana omwalaniwe ni iyawe,+ okhala wiira namukuttho toowaarya para Muluku awe. 8 Mmooneke namukuttho okhala oowaarya,+ okhala wiira ti yoowo onivaha eyoolya ya Muluku anyu. Owo ohaana okhala oowaarya para nyuwo, okhala wiira miyo, Yehova, kiniwiirihani okhala oowaarya, nave koowaarya.+

9 “‘Akhala wiira mwaana mwaamuthiyana a namukuttho onniinanariha mwaha wooraruwa, owo onninanariha nsina na paapa awe. Nto ohaana opahiwa.+

10 “‘Eriyari ya anamukuttho, namukuttho muulupale yoowo iittheliwe+ makhura ni okhalihiwe namukuttho* wiira owareke malaya+ a onamukuttho, ohihiyeke ikharari sawe sihilokiheriwe aahiiso ohikhereke malaya awe.+ 11 Owo ohimwaattamele mutthu okhwiiye.+ Hata ari ene apapawe aahiiso amamawe, owo ohiinanarihe. 12 Ohikhume nipuro noowaarya, ni ohinanarihe nipuro nno noowaarya na Muluku awe,+ maana ookhalana esinaale* enooniherya wiira ohiivahererya wa Muluku awe,+ eyo piiyo, ohiittheliwa makhura. Miyo ka Yehova.

13 “‘Namukuttho ohaana omuthela muthiyana ohitonko orupana mulopwana.+ 14 Ohimuthele muthiyana naamukhweli, muthiyana omwalaniwe, muthiyana ohononiwe, aahiiso muthiyana namararuwa. Masi ohaana omuthela muthiyana a munlokoni mwawe ohitonko orupa ni mulopwana. 15 Ohinanarihe nloko nawe,+ okhala wiira miyo ka Yehova. Ti miyo kinimukhaliha oowaarya’”.

16 Yehova aahilavula-tho ni Moise, oriki: 17 Mmuleele Aroni wiira: ‘Ohikhale mulopwana oorakala a nloko nanyu, okhanle oovaha yoolya ya Muluku, okhuma olelo-va orowa ohoolo. 18 Mulopwana orakanle khoneemiheriwa waattamela valtaari: mulopwana ohinoona aahiiso onituthunya, oorakala owiitho* aahiiso orakamme mwetto mmosa wala moono mmosa. 19 Nnakhala oohorokonyeya nnawu aahiiso ntata, 20 hata orakanle ettuli, aahiiso ori anawu,* oorakala niitho, orina ithuku, aahiiso mathawi-thawi, aahiiso ehononeiye elopwana awe.+ 21 Ohikhale mulopwana oorakala a nihimo na namukuttho Aroni, okhanle oowaattamela valtaari wiira onvahe Yehova mikuttho soopahiwa. Nto ohaattamele valtaari wiira ovahe eyoolya ya Muluku awe, okhala wiira mutthu owo toorakala. 22 Mwa itthu soowaaryexa,+ ni itthu soowaarya,+ owo pooti olya eyoolya enivahiwa Muluku awe. 23 Masi, ohaattamele ekortiina,+ nnakhala ohimwaattamele altaari,+ okhala wiira toorakala. Nave ohinanarihe nipuro naka noowaarya,+ okhala wiira miyo ka Yehova. Ti yoomi kiniwiiriha okhala oowaarya’”.+

24 Vano, Moise aahimuleela Aroni ni anaawe ni aisarayeli ootheene.

22 Yehova aahitthikela-tho omuleela Moise wiira: 2 “Mmuleele Aroni ni anaawe wiira yiikaasoopeke okathi anikhapelela aya* itthu soowaarya, seiyo aisarayeli anireeriha aya+ ni anikivaha aya. Yaahiire siiso, anoonanariha nsina naka.+ Miyo ka Yehova. 3 Mwaaleele wiira: “Okhuma olelo-va orowa ohoolo, ohikhale mutthu oohiloka a osuulu anyu, onrowa waattamela itthu soowaarya, seiyo aisarayeli anireeriha aya para Yehova. Mutthu yoole onrowa opaka eyo, onimwiiviwa.+ Miyo ka Yehova. 4 Ohikhale mutthu a osuulu wa Aroni okhanle oolya itthu sireerihiwe para Muluku, mutthu owo ohinatthi oreerihiwa.+ Mutthu owo onookhala oohiloka akhala wiira ookhalana makokho,*+ onninowa,+ ni oomukwata mutthu iinanarinhe mwaha wa mutthu okhwiiye,+ ni oniyiiheya+ ekhalawa* awe. 5 Nnakhala ohikhale mutthu onivara yoopattuxiwa yaamukhaani yoohiloka+ aahiiso oninvara mutthu okhanle oohiloka+ mwaha wa khula etthu. 6 Mutthu onivara itthu iyo, onrowa okhala oohiloka mpakha nsuwa okela. Ohilye itthu sooreerihiwa para Muluku. Nave, ohaana orapa.+ 7 Nsuwa nakela vale, owo onookhala ooloka. Nuumala-vo, pooti olya itthu sikina sooreerihiwa para Muluku, okhala wiira eyo eyoolya awe.+ 8 Nave-tho, ohikhuure enama yoowiikhwela aahiiso yiiviwe ni inama sa mutakhwani. Mutthu owo iira siiso, onookhala oohiloka.+ Miyo ka Yehova.

9 “‘Awo ahaana wiiwelela etthu kaarumme aka, wiira ahipake etampi mwaha woohiiwelela. Yaahiire siiso, animookhwa mwaha woonanariha itthu soowaarya. Miyo ka Yehova. Ti miyo kiniwiiriha okhala oowaarya.

10 “‘Ohikhale mutthu oheemereriwe* okhanle oolya itthu sireerihiwe+ para Muluku. Ohikhale namurwa ori muletto vatthokoni va namukuttho, nnakhala namuteko oniliviwa, okhanle oolya itthu sireerihiwe para Muluku. 11 Masi akhala wiira namukuttho oothuma epottha ni musurukhu awe, epottha eyo pooti olya itthu iyo. Ipottha siniyariwa vatthokoni vawe, nave-tho pooti olya eyoolya eyo.+ 12 Akhala wiira mwaana mwaamuthiyana a namukuttho ootheliwa ni mutthu ohikhanle namukuttho, owo ohilye itthu sooreerihiwa sivahiwe para Muluku. 13 Akhala wiira mwaana mwaamuthiyana a namukuttho ookhweliwa iyawe aahiiso oomwalaniwa, nave khorina mwaana, nto onatthikela vatthokoni va apapawe, weiwo aakhala awe ori ene mwali, owo pooti olya yoolya+ ya apapawe. Masi ohikhale mutthu oheemereriwe* onrowa olya itthu iyo.

14 Akhala mutthu onilya itthu sooreerihiwa ohilakenle, owo ohaana onvaha namukuttho+ itthu iyo, ni wuncererya vakhaani.* 15 Tivonto, anamukuttho ahinanarihe itthu sooreerihiwa aisarayeli aninvaha aya Yehova.+ 16 Yiira siiso, atthu pooti ovahiwa ehukhumu mwaha wa olya itthu sireerihiwe. Miyo ka Yehova. Ti yoomi kiniwiiriha okhala oowaarya’”.

17 Yehova aahilavula-tho ni Moise, iiraka: 18 “Mulavule ni Aroni ni anaawe ni aisarayeli ootheene, mwaaleele wiira: ‘Okathi mwisarayeli aahiiso namurwa onikhala wIsarayeli, oninvaha awe Yehova yoovaha para opahiwa+ wiira omutaphule natiri awe aahiiso ovahe etthu voohikhanyereriwa,+ 19 owo ohaana ovaha epooyi yoolopwana+ yoohiwereiwa, ni epwittipwitthi yoolopwana yaamukhaani ehiniwereiwa, aahiiso epuri yoolopwana ehiniwereiwa, wiira eemereriwe ni Muluku. 20 Muhivahe inama soorakala,+ okhala wiira Muluku khonrowa oweemereryani.

21 “‘Akhala mutthu oninvaha Yehova mukuttho wa opatthani+ wiira omutaphule natiri aahiiso ntoko yoovaha yoohikhanyereriwa, mukuttho owo ohaana okhala wa epooyi yoohiwereiwa aahiiso epwittipwitthi wala epuri yoohiwereiwa, wiira eemereriwe ni Muluku. Enama eyo enrowa awe ovaha ehirakale nnakhala vakhaani. 22 Ohinvahe mwaamunama ohinoona, ohorokonyonwe, ovulanle, orina ovele, orina ithuku, aahiiso mathekeneke. Muhinvahe inama iyo Yehova, aahiiso muhinvahe Yehova inama iyo valtaari. 23 Nyuwo pooti ovaha epooyi, aahiiso epwittipwitthi erina moono aahiiso mwetto woorakama wala wookhuveyexa, ntoko yoovaha yoohikhanyereriwa. Masi enama eyo khenrowa waakheliwa ntoko yoovaha para omutaphula natiri. 24 Muhinvahe Yehova mwaamunama ohononeyale elopwana awe, aahiiso ephweeyale, aahiiso evenxiwe wala ekwasiwe. Mmuttettheni mwanyu, muhaavaheke axinama siisa. 25 Nave muhinvahe Muluku anyu* inama siisa sinruuhiwa ni anamurwa, okhala wiira inama iyo ti soorakala ni soohiloka. Mwavaha inama iyo, khasinrowa weemereriwa ni Muluku’”.

26 Yehova aahilavula-tho ni Moise, iiraka: 27 “Okathi enitotholiwa aya epooyi aahiiso epwittipwitthi yoolopwana wala epuri, eyo ehaana okhala ni maama aya mpakha mahiku 7.+ Masi okhuma nihiku na neethanu neeraru orowa ohoolo, eyo enneemereriwa ovahiwa ntoko yoovaha, eyo piiyo, yoovaha yoopahiwa enivahiwa Yehova. 28 Enama eyo yakhala epooyi aahiiso epwittipwitthi, muhiive vamosa ni mwanaya nihiku nimosa-ru.+

29 “Akhala wiira muninvaha mukuttho Yehova,+ wiira mooniherye oxukhurela, muhaana ovaha mukuttho owo mwa enamuna Muluku oneemererya awe. 30 Enama eyo ehaana okhuuriwa nihiku nenno mutthu onivaha awe. Ehisukiwe mpakha mmeeloni mwaya.+ Miyo ka Yehova.

31 “Muhaana wiiwelela sooruma saka ni weettela.+ Miyo ka Yehova. 32 Muhinanarihe nsina naka noowaarya,+ wiira aisarayeli+ akooneke okhala oowaarya. Miyo ka Yehova. Ti miyo kiniwiirihani okhala oowaarya,+ 33 ni kookuminheni elapo ya wExiitu wiira kooniherye wiira ka Muluku anyu.+ Miyo ka Yehova”.

23 Yehova aahilavula-tho ni Moise, iiraka: 2 “Mulavule ni aisarayeli, mwaaleele wiira: ‘Ifesta+ sa Yehova mukhanle anyu ootthapelaka,*+ ti akonkereesu para Muluku. Ifesta saka tiiya:

3 “‘Muhaana ovara muteko mahiku mathanu namosa. Masi nihiku na neethanu nenli, ti esaabadu para ophumurya,+ eyo piiyo, konkereesu para Muluku. Muhivare nnakhala muteko mmosa. Khula opuro onrowa anyu omaka,+ eyo enrowa okhala esaabadu para Yehova.

4 “‘Ifesta sa Yehova, eyo piiyo, akonkereesu a Muluku munrowa anyu waatthapelaka okathi othanliwe, taala: 5 Nihiku 14 na mweeri+ woopacerya, onrowa okhala Paasikha+ para Yehova, nuumala nsuwa okela.*

6 “‘Nihiku 15 na mweeri yoowo, enoopacerya Efesta ya Iphaawu Soohiheliwa Eferemento para Yehova.+ Muhaana okhuura iphaawu soohiheliwa eferemento+ mahiku 7. 7 Nihiku noopacerya muhaana ompaka konkereesu+ para Muluku. Muhivare muteko woolipa, nnakhala vakhaani. 8 Masi mahiku 7 muhaana onvaha Yehova, yoovaha para opahiwa. Nto nihiku na neethanu nenli, onrowa okhala konkereesu para Muluku. Muhivare muteko woolipa, nnakhala vakhaani’”.

9 Yehova aahilavula-tho ni Moise, iiraka: 10 “Mulavule ni aisarayeli, mwaaleele wiira: ‘Mwakela elapo kinrowa aka woovahani, nto mwahepha ipyo sanyu, mmuroihele namukuttho+ nivisi nimosa na mihokorokho soopacerya+ munrowa anyu ohepha. 11 Namukuttho onrowa weettiha nivisi nno ohoolo wa Yehova, oroihaka ohoolo ni ottuli wiira nyuwo mweemereriwe. Nuuvira esaabadu, namukuttho ohaana weettiha nivisi nlo. 12 Nihiku ninrowa aya weettihiwa nivisi nlo, nyuwo muhaana ovaha epwittipwitthi emosa yoolopwana, ni yoohiwereiwa, ya mwaakha mmosa. Eyo ehaana ovahiwa Yehova ntoko yoovaha para opahiwa. 13 Okathi munivaha anyu epwittipwitthi eyo, nvaheke vamosa ni yoovaha ya ipyo, eyo piiyo, iliituru ixexe nnimeya* sa otthu* wooreerexa otakaahiwe ni makhura, ntoko yoovaha yoopahiwa enivahiwa Yehova, yoowunkhela enimusivela.* Nto yoovaha eniwuriwa munrowa anyu ovaha ni epwittipwitthi eyo, ehaana okhala ya eliituru emosa* ya eviinyu. 14 Muhikhuure ephaawu, nnakhala ipyo soowaarikiwa, aahiiso ipyo sihemphwale niinaano, mpakha nihiku ninrowa anyu omuroihela Muluku anyu yoovaha anyu. Khula opuro onrowa anyu okhalaka, nna nlamulo na mahiku ootheene para nyuwo ni osuulu anyu wootheene.

15 “‘Nihiku ninttharelana nuumala esaabadu, nenno munrowa anyu oruuha nivisi na yoovaha eneettihiwa,+ muhaana okontari isaabadu 7 mpaceryaka nihiku nenlo. Isumana iyo sihaana okhala soomalela. 16 Munrowa okontari mahiku 50,+ mpakha nihiku nuumala esaabadu ya neethanu nenli. Nuumala-vo, muhaana onvaha Yehova+ yoovaha ya ipyo sihemphwale niinaano. 17 Muruuheke owannyu iphaawu piili, wiira sikhale yoovaha eneettihiwa. Iphaawu iyo sihaana opakiwa sirumeeliwaka iliituru ixexe nnimeya,* sa otthu wooreerexa. Sihaana wooxiwa siheliwe ene eferemento.+ Iyo ipyo soopacerya ohemphwa sinivahiwa Yehova.+ 18 Nave okathi munivaha anyu iphaawu, nvahe ipwittipwitthi 7 soolopwana, soohiwereiwa, sa eyaakha emosa, ni epooyi emosa yaamukhaani ni ipwittipwitthi soolopwana piili.+ Inama iyo vamosa ni yoovaha ya ipyo ni soovaha siniwuriwa, enrowa okhala yoovaha yoopahiwa enivahiwa Yehova, yoowunkhela ni enimusivela* Yehova. 19 Nvahe-tho epuri emosa yaamukhaani ntoko yoovaha+ para oleveleliwa etampi, ni ipwittipwitthi piili soolopwana, sa eyaakha emosa, ntoko mukuttho wa opatthani.+ 20 Namukuttho onimweettiha ipwittipwitthi iyo piili soolopwana, oroihaka ohoolo ni ottuli, vamosa ni iphaawu saapakiwe ni ipyo soopacerya ohemphwa. Iyo sinrowa okhala yoovaha eneettihiwa ohoolo wa Yehova. Itthu iyo sihaana okhala sooreerihiwa para Yehova, seiyo saavahiwa namukuttho.+ 21 Nihiku nlo nyuwo munrowa omutthapelaka+ konkereesu a Muluku. Muhivare muteko woolipa, nnakhala vakhaani. Khula opuro onrowa anyu okhalaka, nna nlamulo na mahiku ootheene para nyuwo ni osuulu anyu wootheene.

22 “‘Okathi munihepha anyu mmatta mwanyu, muhihepheke ipyo siri mukerekhere mpakha omaliha. Nave muhittotteke mihokorokho sinimora okathi onihepha+ anyu. Muhaana waahiyerya alipa-oohaawa+ ni anamurwa+ anikhala mmuttettheni mwanyu. Miyo ka Yehova, Muluku anyu’”.

23 Yehova aahimuleela-tho Moise, oriki: 24 “Mwaaleele aisarayeli wiira: ‘Nihiku noopacerya na mweeri wa neethanu nenli, muhaana ophumurya miteko sanyu sootheene. Nihiku nno ninrowa olaleiwa ni nlope+ wiira muupuxeriwe wiira nihiku na konkereesu a Muluku. 25 Muhivare muteko woolipa. Nave munvahe Yehova yoovaha para opahiwa’”.

26 Yehova aahilavula-tho ni Moise, oriki: 27 “Masi nihiku na namuloko na mweeri wa neethanu nenli, ti Nihiku Noovaha Mukuttho Para Oleveleliwa Itampi.*+ Muhaana ompaka konkereesu para Muluku, wooniherya oriipiwa murima,*+ ni onvaha Yehova yoovaha para opahiwa. 28 Muhivare muteko nihiku nlo, okhala wiira nlo nihiku ninvahiwa mikuttho para oleveleliwa itampi. Ti nihiku munivekela anyu oleveleliwa itampi+ ohoolo wa Yehova Muluku anyu. 29 Mutthu ohinrowa wooniherya oriipiwa murima* nihiku nlo, ohaana wiiviwa.+ 30 Nave kinoomwiiva mutthu yoole onrowa ovara muteko nihiku nlo. 31 Muhivare muteko. Khula opuro onrowa anyu okhalaka, nna nlamulo na mahiku ootheene para nyuwo ni osuulu anyu wootheene. 32 Eyo esaabadu yoophumurya para nyuwo. Nihiku na neethanu neexexe na mweeri owo vahalaka wiila, muhaana wooniherya oriipiwa murima.+ Muhaana opacerya otthapela esaabadu vahalaka wiila, mpakha nihiku nikina vahalaka wiila”.

33 Yehova nlelo aahilavula ni Moise, oriki: 34 “Mwaaleele aisarayeli wiira: ‘Nihiku 15 na mweeri yoola wa neethanu nenli, enrowa okhala Efesta ya Maxaxa* para Yehova.+ Efesta eyo enrowa oviriha mahiku 7. 35 Nihiku noopacerya ohaana opakiwa konkereesu para Muluku. Nave muhivare muteko woolipa. 36 Mahiku 7, muhaana oruuha yoovaha yoopahiwa enivahiwa Yehova. Vano nihiku na neethanu neeraru, muhaana ompaka konkereesu+ para Muluku, nave muhaana oruuha yoovaha yoopahiwa enivahiwa Yehova. Owo muthukumano muulupale. Muhivare muteko woolipa.

37 “‘Iya ifesta+ sa Yehova, oorummyaaweni wiira mutthapeleke. Ifesta iya ti akonkereesu+ a Muluku, yaawo munrowa anyu onvahaka Yehova ntoko soovaha iya sinipahiwa:+ yoovaha para opahiwa, ni yoovaha ya ipyo,+ ni soovaha siniwuriwa,+ ntoko enivekeliwa aya khula nihiku. 38 Mikuttho iya sinincererya mikuttho muninvaha anyu Yehova esaabadu,+ nave sinincererya soovaha sanyu,+ ni soovaha sanyu para omutaphula natiri,+ ni itthu munivaha anyu voohikhanyereriwa.+ Itthu iya ti seiye munirummwa anyu onvaha Yehova. 39 Masi nihiku 15 na mweeri wa neethanu nenli, nuumala othukumanya ipyo sa mmatta mwanyu, muhaana opaka efesta ela ya Yehova. Efesta eyo enrowa oviriha mahiku 7.+ Nihiku noopacerya ninrowa okhala nihiku noophumurya, nave nihiku na neethanu neeraru, ninrowa okhala nihiku noophumurya.+ 40 Nihiku noopacerya, muhaana okuxa mihokorokho sa miri suulupale, ni makukhu a mikole,+ ni iritta sa miri sirina makukhu, ni miri sininnuwa vanxepani. Nto nyuwo muhaana otteeliwaka murima+ ohoolo wa Yehova Muluku anyu, mpakha mahiku 7.+ 41 Khula mwaakha+ muhaana oviriha mahiku 7 mpakaka efesta eyo para Yehova. Muhaana opaka efesta eyo mweeri wa neethanu nenli. Nla nlamulo na mahiku ootheene para maloko anyu ootheene. 42 Muhaana oviriha mahiku 7+ mukhalaka mmaxaxani. Aisarayeli ootheene ahaana okhala mmaxaxani. 43 Siiso, maloko anrowa okhumelela ohoolo, anoosuwela+ wiira kaahiwiiriha aisarayeli okhala mmaxaxani, okathi kaakumihaka elapo ya wExiitu.+ Miyo ka Yehova, Muluku anyu’”.

44 Siiso, Moise aahaasuweliha aisarayeli ifesta sa Yehova.

24 Yehova aahitthikela-tho olavula ni Moise, onamuleela wiira: 2 “Mwaarume aisarayeli wiira yooruuheleni makhura ooreerexa para ixamaniiya, wiira sipatteke okathi wootheene.+ 3 Mutentani* mwa muthukumano, ota wa Nipuro Noowaaryexa,* waattamela Nivuku na Onamoona, Aroni torina muritti wa oweha akhala wiira ixamaniiya soopattihiwa ohoolo wa Yehova, okhuma ohiyu mpakha voosiisu. Yooruma ela ti ya mahiku ootheene, para maloko ootheene a Isarayeli. 4 Okathi wootheene Aroni ohaana okhapelela ohoolo wa Yehova ixamaniiya+ iyo siri vamuthukoni va eweero yooreerexa.

5 “Mukuxe otthu* wooreerexa, mooxe iphaawu 12, seiyo sipakiwe ntoko anela. Khula ephaawu ehaana opakiwa ni iliituru ixexe nnimeya* sa otthu owo. 6 Mpwehe iphaawu iyo ohoolo wa Yehova,+ vasulu vameesa a eweero yooreerexa. Mpwehe mapuro manli. Khula nipuro muthataanyeke iphaawu 6.+ 7 Khula opuro ori iphaawu, muhele nsenso nootteela nooreerexa.* Nsenso nlo ninrowa othoonyeryaka yoovaha+ ya iphaawu. Enrowa okhala yoovaha enipahiwa para Yehova. 8 Khula esaabadu, owo ohaana opweha iphaawu iyo ohoolo wa Yehova.+ Nla nivarihano na mahiku ootheene kinipaka aka ni aisarayeli. 9 Iphaawu iyo sinrowa okhala sa Aroni ni anaawe.+ Nave awo anrowa okhuuraka nipuro noowaarya,+ okhala wiira eyo eyoolya yooreerihiwa para anamukuttho, yeeyo enikumihiwa wa mikuttho soopahiwa onivahiwa Yehova. Nlo nlamulo na mahiku ootheene”.

10 Nloko na Isarayeli aahikhala mwaana mmosa mwaamulopwana, aayariwe ni muthiyana mwisarayeli, masi apapawe yaari mwexiitu.+ Nto mwaana ole a muthiyana mwisarayeli aahipacerya owana ni mulopwana mmosa mwisarayeli mmuttettheni. 11 Nto mwaana ole a muthiyana mwisarayeli aahipacerya oveeha nsina* na Muluku, ni omuruwana* Muluku.+ Tivo aahiroihiwa wa Moise.+ Maama awe mwaana ole aihaniwa Xelomithi. Owo aari mwaana a mwaamuthiyana a Diibiri, a nihimo na Dani. 12 Mwaana ole aahitthukweliwa, mpakha okathi Yehova aarowa awe waasuweliha etthu aathanlale awe opaka.+

13 Vano, Yehova aahimuleela Moise, wiira: 14 “Mmukumiherye ota wa muttetthe mutthu ole oveehale nsina naka. Nto atthu ootheene amwiiwale, ahaana omwiixaatherya matata aya vamuru vawe. Nuumala-vo, nloko nootheene nihaana onvonyakasa maluku.+ 15 Nave mwaaleele aisarayeli, wiira: “Akhala mutthu onimuruwana Muluku, owo onimwaakhula mwaha wa etampi awe. 16 Tivo mutthu oniveeha nsina na Yehova ohaana wiiviwa.+ Nloko nootheene nihaana onvonyakasa maluku. Ole oniveeha nsina na Muluku ohaana wiiviwa, okhale namurwa onikhala mmuttettheni mwanyu aahiiso mwisarayeli.

17 “‘Akhala mutthu onimwiiva mutthu mukina, owo ohaana wiiviwa.+ 18 Ole onimwiiva mwaamunama a vate a mutthu mukina, ohaana omuliverya mwaamunama owo. Okumi ohaana oliveriwa ni okumi. 19 Akhala mutthu oninvulaliha mukhwaawe, nave owo ohaana wiirihiwa etthu emosa-ru.+ 20 Oninta nikhuva, nuuwo intiwe nikhuva, niitho nliviwe ni niitho, niino nliviwe ni niino. Mutthu owo ohaana wiirihiwa etthu emosa-ru omwiirihale awe mukhwaawe.+ 21 Mutthu oniiva enama ya mutthu mukina, ohaana oliva.+ Masi ole onimwiiva mutthu, ohaana wiiviwa.+

22 “‘Nihaana orumeeliwa nlamulo nimosa-ru para namurwa onikhala eriyari anyu,+ aahiiso para mwisarayeli oyariwe elapo yeela, okhala wiira miyo ka Yehova, Muluku anyu”’.

23 Vano, Moise aahaaleela aisarayeli, nto awo yaahimukumiherya ota wa muttetthe mutthu ole aaruwanne nsina na Muluku, anvonyakasa maluku.+ Siiso, aisarayeli yaahiira siisaale ntoko Yehova aamurumme awe Moise.

25 Yehova aahilavula-tho ni Moise omwaako Sinayi, iiraka: 2 “Mulavule ni aisarayeli, mwaaleele wiira: ‘Okathi munrowa anyu okela elapo kinrowa aka woovahani,+ muhilime elapo eyo, okhala wiira enrowa okhala esaabadu para Yehova.+ 3 Iyaakha thanu namosa muhaana waala mmatta mwanyu ni okwaserya miri sanyu sa ewuuva. Nave muhaana ohepha itthu muruwenrye anyu.+ 4 Masi eyaakha ya neethanu nenli, etthaya ehaana omumulihiwa. Eyo esaabadu para Yehova. Muhaale mmatta mwanyu, aahiiso muhikwaserye miri sanyu sa ewuuva. 5 Muhihephe mihokorokho siimale ni ipyo saamonre okathi waahemphwa aya, nave muhirukule iwuuva sa miri sahaakwaseriwe. Ehaana okhala eyaakha emosa etthaya enrowa aya omumulihiwa. 6 Masi mihokorokho siniima eyaakha ya esaabadu, pooti olyiwa. Tivonto, nyuwo ni ipottha sanyu soolopwana ni ipottha sanyu soothiyana, namuteko anyu oniliviwa, ni anamurwa anikhala eriyari anyu, pooti olya. 7 Nave-tho, axinama a vate, ni axinama a mutakhwani ari mulaponi mwanyu, pooti olya. Itthu sootheene sinimela mulaponi-mmo, pooti olyiwa.

8 “‘Mukontari ikwaha 7 sa iyaakha 7 sa esaabadu. Nto iyaakha iyo sa esaabadu, sinrowa okhala iyaakha 49. 9 Vano nihiku na namuloko na mweeri wa neethanu nenli, nyuwo muhaana orumiha nlope voowiiwanyeya. Nihiku ninvahiwa mukuttho para oleveleliwa itampi,+ nyuwo muhaana orumiha nlope wiira niiwanyeye mulaponi mwanyu mootheene. 10 Mureerihe eyaakha ya namuloko mithanu, ni mulaleye mulaponi mootheene wiira atthu+ aataphuwa. Eyo enrowa okhala eyaakha ya yubileyo para nyuwo. Nave khula mutthu onootthikela mathala awe* ni onootthikela wa amusi awe.+ 11 Eyaakha ya namuloko mithanu, enrowa okhala eyaakha ya yubileyo para nyuwo. Muhaale aahiiso muhihephe ipyo sinnunwe mekhaya-ru wa iye sahaahemphwale. Nnakhala muhuurule iwuuva+ sa miri sahaakwaseriwe. 12 Eyo eyaakha ya yubileyo. Ehaana okhala yoowaarya para nyuwo. Nyuwo pooti olya paahi itthu simenle mekhaya-ru+ mulaponi-mmo.

13 “‘Mwaakha owo wa yubileyo, khula mutthu ohaana otthikela mmathalani+ mwawe. 14 Mwathuma etthu ya mukhwiinyu, aahiiso ootumiheryani etthu awe, muhiiyeryaneke.+ 15 Okathi munithuma anyu ematta ya mukhwiinyu, muhaana okontari iyaakha sivinre nuumala yubileyo. Mwaneene ematta ohaana ohimya eperesu owehaka iyaakha sihanle para etthaya eyo oruwerya.+ 16 Akhala wiira sinihala iyaakha sinceene, owo ohaana wuncererya eperesu. Masi akhala wiira sinihala iyaakha vakhaani, owo ohaana ovukula eperesu, okhala wiira onootumiheryani ottharaka iyaakha ematta eyo enrowa aya oruwerya. 17 Ohikhale mutthu onimwiiyerya mukhwaawe.+ Muhaana omoova Muluku+ anyu, okhala wiira miyo ka Yehova, Muluku+ anyu. 18 Mwaiwelela malamulo aka ni mweemererya maphukelo aka, nyuwo munookhala elapo+ eyo, muhoovaka etthu. 19 Elapo enooruwerya mihokorokho saya,+ nto nyuwo munimoolya mpakha woophiyeryani ni munrowa okhalaka muhoovaka etthu.+

20 “‘Masi akhala wiira munikoha muriki: “Exeeni ninkela ahu olyaaka eyaakha ya neethanu nenli, akhala wiira khininrowa waala nnakhala ohepha?”+ 21 Mwaakha wa neethanu namosa, miyo kinooreeliha etthaya anyu. Nto eyo, enooruwerya mihokorokho sinceene siniphiyerya olyiwa iyaakha tthaaru.+ 22 Mwaakha wa neethanu neeraru, nyuwo munimwaala. Masi nlelo munrowa olyaaka mihokorokho sa eyaakha ya neethanu namosa mpakha eyaakha ya neethanu neexexe. Nyuwo munrowa olyaaka mihokorokho iyo, mpakha ohemphwa mihokorokho sa niinaano.

23 “‘Etthaya ti yawaka. Tivonto, eyo ehitumiheriweke mutthu mukina wiira ekhale yawawe okathi wootheene,+ okhala wiira para miyo,+ nyuwo mwa anamurwa ni aletto elapo ela.+ 24 Mulaponi mootheene munrowa anyu okhalaka, muhaana waavaha atthu etireitu ya woopola mathala aya.

25 “‘Akhala wiira munninyu toohaawa, onapirisari otumiha mathala awe, mmusi awe ohaana orowa woopola mathala awo otuminhe awe.+ 26 Akhala wiira khorina mmusi okhanle oowoopola para yena, masi owo khiphwanya musurukhu okhanle awe oowoopolana, 27 owo ohaana okontari iyaakha sivinre nuumala otumiha, vano onvaheke mulipa-oothuma musurukhu onilikanela iyaakha sihanle mpakha yubileyo. Nto pooti otthikela ematta awe.+

28 “‘Masi akhala wiira khorina manera wiira oopole, ohaana omuhiyerya mutthu owo othumme mpakha eyaakha ya yubileyo.+ Ematta eyo onoottikiheriwa eyaakha ya yubileyo. Nto onootthikela ematta awe.+

29 “‘Vano akhala mutthu onitumiha empa awe eri muhina mwa epooma yootekeleliwa ni exiri, owo ookhalana etireitu yoowoopola+ empa eyo mpakha wuumalani wa mwaakha, okhuma vaavale otuminha awe. Etireitu awe, ti ya mwaakha ntero. 30 Masi akhala wiira empa eyo khenoopoliwa muhina mwa eyaakha emosa, empa eyo eri muhina mwa epooma etekeleliwe ni exiri, enrowa okhala yawawe mulipa-oothuma mpakha osuulu awe onrowa okhumelela muhoolo. Khivaniweryaneya woopola, eyaakha ya yubileyo. 31 Masi ipa siri mittetthe sihitekeleliwe ni ixiri, sihaana othokoreriwaka ntoko imatta. Empa eyo nlelo pooti woopoliwa, nave mwaakha wa yubileyo ehaana ottikihiwa.

32 “‘Alevi anoowerya woopola ipa saya siri mpooma mwaya.+ Awo anoowerya woopola okathi wootheene. 33 Akhala wiira empa ya mulevi kheniwerya woopoliwa, empa eyo ya mulevi etumihiwe musitati, ehaana ottikihiwa eyaakha ya yubileyo,+ okhala wiira ipa siri musitati mwa alevi ti sawaya yaawo wIsarayeli.+ 34 Masi itakhwa saalya inama,+ seiyo sinirukurerya isitati sa alevi, sihitumihiweke, okhala wiira iyo ti sawaya okathi wootheene.

35 “‘Akhala wiira mukhwiinyu, toohaawa ni khoniwerya wiikhapelela, muhaana omukhapelela+ wiira okhaleke mukumi, ntoko mwaarowa anyu omukhapelela namurwa.+ 36 Muhimuttotteleke muraarelo mukhwiinyu.+ Mmooveke Muluku anyu.+ Siiso munninyu onookhalaka mukumi. 37 Muhimoolihe musurukhu munninyu mphavelaka exuuru+ aahiiso muhimutumiherye yoolya mphavelaka eluukuru. 38 Miyo ka Yehova, Muluku anyu. Ti yoomi kookuminheni elapo ya wExiitu,+ wiira koovaheeni elapo ya oKanaani, ni wiira kooniherye wiira ka Muluku anyu.+

39 “‘Akhala wiira munninyu onikhala vakhiviru vanyu toohaawa, nto onoovekelani wiira mmuthume wiira okhale epottha anyu,+ muhimukhanyererye ovara muteko ntoko epottha.+ 40 Muhaana omuthokorerya ntoko namuteko oniliviwa+ aahiiso ntoko namurwa. Owo ohaana woovarelani muteko mpakha mwaakha wa yubileyo. 41 Nuumala-vo, owo ni anaawe* anookhuma vate vanyu, otthikeleke weemusini wawe. Owo onootthikela imatta sa amuhavinre awe.+ 42 Awo ipottha saka, seiyo kikuminhe aka elapo ya wExiitu.+ Ahiitumiheke ntoko sinitumihiwa aya epottha. 43 Muhihaaxeke epottha eyo,+ nyuwo muhaana omoova Muluku anyu.+ 44 Epottha anyu yoolopwana ni epottha anyu yoothiyana, ehaana okhuma maloko mwaattamanne anyu. Wa maloko awo nyuwo pooti othuma epottha yoolopwana aahiiso epottha yoothiyana. 45 Nave-tho, pooti waathuma anamwane axilopwana a anamurya anikhala ni nyuwo,+ eyo piiyo, amusi aya aniyariwa mulaponi mwanyu. Nyuwo pooti waathuma wiira akhale ipottha sanyu. 46 Nyuwo pooti waahiyerya aniinyu atthu awo, wiira akhale ipottha sa aniinyu mahiku ootheene. Nyuwo pooti waakhaliha atthu awo anamuteko anyu, masi muhimuhaaxeke mwisarayeli mukhwiinyu.+

47 “‘Akhala wiira namurwa onikhala mmuttettheni mwanyu toothaaciri, nave munninyu onikhala vakhivuru vawe toohaawa, nto munninyu mwisarayeli onapirisari wiitumiha wiia okhale epottha ya namurwa owo, aahiiso okhala epottha ya mmusi awe namurwa owo, 48 owo nlelo onookhalana etireitu ya woopoliwa nuumala wiitumiha. Munnawe mmosa-mosa pooti omoopola.+ 49 Tiiyu* awe aahiiso mwaana a tiiyu awe pooti omoopola. Nave-tho, mmusi awe mukina pooti omoopola.

“‘Aahiiso, akhala wiira mutthu owo iituminhe onoothaaciri, owo pooti wiixoopola mmansawe.+ 50 Nto mutthu owo ohaana wiiwanana nuule omuthumme, wiira ekontari iyaakha okhuma okathi iitumihale awe, mpakha mwaakha wa yubileyo.+ Vano musurukhu aaliviwe ohaana olikanaka ni nummeru na iyaakha.+ Esisapo ya muteko ovanre awe mahiku awo ootheene, ehaana ovarihanaka ni musurukhu onaakhela awe namuteko oniliviwa.+ 51 Akhala wiira nlelo sinnihala iyaakha sinceene, owo ohaana oliva esisapo enivarihana ni iyaakha sihanle. 52 Masi akhala wiira sinihala iyaakha vakhaani wiira ephiye eyaakha ya yubileyo, owo ohaana wiirela ikontha ni oliva esisapo ya woopoliwa enivarihana ni iyaakha sihanle. 53 Nto khula eyaakha owo ohaana onvarela muteko ole omuthumme, ntoko namuteko oniliviwa. Nyuwo muhimuhiye mutthu ole omuthumme omuhaaxaka munninyu.+ 54 Masi akhala wiira khoniwerya wiixoopola mwa inamuna iyo, owo onimoopowa eyaakha ya yubileyo.+ Nave-tho, anaawe* animoopowa.

55 “‘Aisarayeli ipottha saka. Awo ipottha saka kikuminhe aka elapo ya wExiitu.+ Miyo ka Yehova, Muluku anyu.

26 “‘Muhiipakele amuluku eethiru,+ nnakhala muhiipakele elatarato+ aahiiso muhiipakele nripu ninkokhoreliwa, nnakhala muheemexe nluku+ mulaponi mwanyu mphavelaka okokhorela nluku nlo.+ Miyo ka Yehova, Muluku anyu. 2 Muhaana otthara nlamulo naka na isaabadu ni muttittimiheke* nipuro naka noowaarya. Miyo ka Yehova.

3 “‘Akhala wiira khamunihiya weettela malamulo aka ni wiiwelela sooruma saka,+ 4 kinimoovahani epula okathi aya,+ ni elapo enooruwerya,+ nave miri sinimwiima mihokorokho saya. 5 Okathi oneepetthiwa ipyo onoorowaka mpakha okathi onirukuliwa ewuuva. Nave okathi onirukuliwa ewuuva onoorowaka mpakha okathi onaaliwa ipyo. Nyuwo munrowa olyaaka eyoolya anyu mpakha woophiyeryani, ni munrowa okhalaka mulaponi mwanyu+ muhoovaka etthu. 6 Kinookhaliha murettele mulaponi,+ nto nyuwo munimummaathiki muhimoovaka mutthu.+ Kinoomaliha inama sa mutakhwani sootakhala mulaponi-mmo, nave awanani anyu khanrowa otuphela mulaponi mwanyu. 7 Nyuwo munoowoomola awanani anyu, nave munimwaaxintta ni espaata.* 8 Atthu anyu athanu anoowoomola atthu 100, vano atthu anyu 100 anoowoomola atthu 10.000. Nyuwo munimwaaxintta awanani anyu ni espaata.*+

9 “‘Kinimooreerelani murima, nave kinimoovahani osuulu woowaatta.+ Nkinrowa ohiya nivarihano kipanke aka ni nyuwo.+ 10 Mweekeekhai munrowa olyaaka ipyo saaruweriwe mwaakha ovinre, nave munrowa opirisariki oriha ipyo iyo sa khalai wiira mphwanye opuro woopweha ipyo sa niinaano. 11 Kinoopweha etapernaakulu aka eriyari anyu,+ nave nkinrowa wookhoottani. 12 Kinrowa okhalaka ni nyuwo ni kinrowa okhala Muluku anyu.+ Nave nyuwo munrowa okhala atthu aka.+ 13 Miyo ka Yehova, Muluku anyu. Ti yoomi kookumihaleni elapo ya wExiitu, wiira muhikhale-tho ipottha saya. Koowoopolani mwaahaaxiwa anyu, kiwiirihani weetta ntoko atthu ootaphuwa.

14 “‘Masi, akhala wiira khamunikiwiriyana aahiiso khamuniiwelela sooruma saka sootheene,+ 15 nave mwakhootta malamulo aka,+ ni mwathanya maphukelo aka mpakha ohiiwelela sooruma saka sootheene, ni mwahonona nivarihano naka,+ 16 miyo kinoowiirihani itthu iya: kinimoohukhumuni kooxankihakani, kinimookumiheryani elapaha ni efeepere.* Maitho anyu khanrowa woonaka saana, nave ikuru sanyu sinimoomalelakani. Munrowa waalaka ipyo sanyu mahala ene, okhala wiira awanani anyu tanrowa olyaaka ipyo iyo.+ 17 Miyo kinimookhoottani, nave awanani anyu+ animooxinttani. Ale anoonyokhani animoohaaxani.+ Nave munootthyawaka ohikhanle mutthu oniwoomolani.+

18 “‘Akhala wiira itthu iyo sinimookhumelelani, nlelo muhinakiiwelela, kinimoohaaxani ikwaha 7 ovikana iye soopacerya, mwaha wa itampi sanyu. 19 Kinoomaliha wiixinnuwiha wanyu ni kinootthukwa+ erimu anyu wiira ehirupeke epula,* ni kinimwiiriha etthaya anyu ohiruwerya.* 20 Munrowa wiikukhumulaka mahala ene, okhala wiira etthaya anyu khenrowa oruweryaka,+ nave miri sanyu khasinrowa wiimaka mihokorokho.

21 “‘Masi mwathipelela okivirikanya ni mwakhootta okiwiriyana, kinimoohaaxani ikwaha 7 ovikana iye soopacerya, mwaha wa itampi sanyu. 22 Kinimwaaruma axinama+ wiira yaakhuure aniinyu+ ni akhuure inama sanyu sa vate. Nave munrowa ohala atthu vakhaani, ni iphiro sanyu sinrowa oviriwaka ni atthu vakhaani.+

23 “‘Akhala wiira itthu iya sinimookhumelelani, nlelo muhinattharuwa,+ ni munathipelela okivirikanya, 24 ni miyo-tho kinimoovirikanyani. Nave-tho, kinomoohaaxani ikwaha 7 ovikana iye soopacerya, mwaha wa itampi sanyu. 25 Kinoowiiriha awanani anyu wootuphelani wiira yoohukhumuni, mwaha wa ohonona nivarihano naka.+ Mwathukumana mpooma mwanyu, kinimooruuhelani iretta,+ ni munooxinttiwa ni awanani anyu.+ 26 Okathi kinrowa aka ovukula vanceene eyoolya anyu,+ athiyana 10 animooxaka ephaawu efornu emosa, ni anoophimaka ephaawu eyo, yoovahekeni epetaaso yaamukhaani.+ Nyuwo munookhuuraka masi khamunrowa ovonaka.+

27 “‘Akhala wiira itthu iya sinimookhumelelani, nlelo muhinakiiwelela, ni munathipelela okivirikanya, 28 miyo kinootepa woovirikanyani,+ nave-tho, kinimoohaaxani ikwaha 7 ovikana iye soopacerya, mwaha wa itampi sanyu. 29 Nto munookhuuraka mirutthu sa aniinyu axilopwana ni aniinyu axithiyana.+ 30 Kinoohonona mapuro munaakokhorela anyu amuluku+ anyu eethiru,* kinimwaapwexakasa altaari anyu a nsenso.* Nto mirutthu sanyu kinimuukela vasulu va amuluku anyu eethiru oonanara*+ ni ahirina okumi, kinimookhoottani mwaha woowi munnikinanara.+ 31 Kinoopwexakasa ipooma sanyu+ ni kinoopwexakasa mapuro anyu oowaarya, nto wunkhela wa mikuttho sanyu khonrowa okisivelaka.* 32 Miyo kinoohonona elapo ela,+ nto awanani anyu anrowa okhalaka memmo, anrowa owehaka atikinihiwe ene.+ 33 Kinimoomwara-mwaryani mulaponi+ ni kinoowiiriha awanani anyu owana ni nyuwo ni espaata.*+ Elapo anyu khenrowa okhaliwaka,+ ni ipooma sanyu sinoohononiwa.

34 “‘Mahiku ootheene etthaya ehinrowa aya okhaliwaka, eyo enooliverya isaabadu saya. Okathi owo munrowa wiiraka mukhalaka elapo ya awanani anyu. Tivonto, etthaya enoomumula, ni enooliverya isaabadu saya.+ 35 Mahiku ootheene ehinrowa aya okhaliwa, eyo enoomumula, okhala wiira khimwaahiyale wiira emumule okathi mwaakhala anyu memmo.

36 “‘Vano ale anrowa woopowa,+ kinoosariha oxanka vamurimani vaya mulaponi mwa awanani aya. Awo anootthyawa mwaha wa onyakula wa nikukhu ninvava. Nave, anootthyawa akhalaka ntoko anitthyawa ekhotto ni anoomora.+ 37 Awo anoomoroxana, ntoko mutthu onitthyawa ekhotto, nnaamwi ohikhanle oniwoomola. Nyuwo khamunrowa waawerya awanani anyu.+ 38 Anceene a nyuwo animookhwa mulaponi mwa maloko makina.+ Nyuwo munimookhwa elapo ya awanani anyu. 39 Ale anrowa ohala, anoohaawa mulaponi mwa awanani anyu,+ mwaha wa itampi saya. Nave anoohaawa, mwaha wa itampi sa axitiithi aya.+ 40 Nto awo anoohimya itampi saya+ ni itampi sa axitiithi aya, vamosa ni ohiroromeleya wa axitiithi aya. Nave animweemererya wiira khiyaaroromeleyale, mwaha wookivirikanya miyo.+ 41 Siiso-tho, miyo kaahaavirikanya+ kaaroihaka elapo ya awanani aya.+

“‘Nto khanrowa wuumiha murima aya ni animwiiyeviha.+ Nave, animweemererya oliverya itampi saya. 42 Kinimuupuwela nivarihano naka ni Yakobe,+ nivarihano naka ni Isaakhi,+ ni nivarihano naka ni Abrahamu.+ Nkinrowa oliyala elapo kooleihenryaakani woovahani. 43 Okathi ahinrowa aya okhala, elapo enooliverya isaabadu saya+ ni khenrowa okhaliwaka naawo. Awo anooliverya itampi saya, okhala wiira aakhootta maphukelo aka ni aathanya malamulo aka.+ 44 Hata vari siiso, okathi anrowa aya okhalaka elapo ya awanani aya, miyo nkinrowa waakhootta voomalela+ nnakhala waanyanyala mpakha waapwetexa, mwaha woowi eyo yaamuhonona nivarihano+ kipanke aka naawo. Miyo ka Yehova, Muluku aya. 45 Mwaha wa atthu awo, miyo kinimuupuwela nivarihano kipanke aka ni amuhavinre aya,+ yaawo kaakuminhe aka elapo ya wExiitu, yooniwaka ni maloko ootheene,+ wiira kooniherye wiira ka Muluku aya. Miyo ka Yehova”’.

46 Iya sooruma, ni maphukelo, ni malamulo yaawo Yehova aavanhe awe anamwane a Isarayeli omwaako Sinayi, omurumeelaka Moise.+

27 Yehova aahilavula-tho ni Moise, oriki: 2 “Mulavule ni aisarayeli, mwaaleele wiira: ‘Akhala mutthu onimmana natiri,+ ohimyaka wiira ononvaha Yehova, 3 esisapo enivekeliwa para mutthu mmosa, ohaana ovaha ixeekele 50 sa eparatha, para mulopwana orina iyaakha sinikhuma 20 mpakha 60. Ixeekele iyo sihaana otthariwaka exeekele* enirumeeliwa nipuro noowaarya. 4 Masi vakhala wiira onimuliverya muthiyana, esisapo enivekeliwa enrowa okhala ya ixeekele 30. 5 Akhala wiira mutthu owo oniliveriwa orina iyaakha sinikhuma thanu mpakha 20, esisapo enivekeliwa para mulopwana enrowa okhala ya ixeekele 20. Masi esisapo enivekeliwa para muthiyana enrowa okhala ya ixeekele 10. 6 Vano vakhala wiira mutthu owo orina mweeri mmosa mpakha iyaakha ithanu, esisapo enivekeliwa para mulopwana enrowa okhala ya ixeekele ithanu sa eparatha. Masi esisapo enivekeliwa para muthiyana, enrowa okhala ya ixeekele tthaaru sa eparatha.

7 “‘Masi vakhala wiira mutthu owo orina iyaakha 60 orowa ohoolo, esisapo enivekeliwa enrowa okhala ya ixeekele 15 para mulopwana. Nto esisapo enivekeliwa para muthiyana, enrowa okhala ya ixeekele 10. 8 Masi, vakhala wiira mutthu owo tootepa ohaawa vahiniwerya awe oliva musurukhu onivekeliwa,+ ohaana orowa weemela ohoolo wa namukuttho. Vano, namukuttho owo onoomuleela esisapo onikela awe oliva. Namukuttho onooweha esisapo mutthu ole ommanne natiri oniwerya awe oliva.+

9 “‘Akhala mutthu onimmana natiri wiira ononvaha Yehova mwaamunama ooloka, mwaamunama owo onrowa okhala ooreerihiwa para Yehova. 10 Ohituruke aahiiso ohiranttelihe enama yooreera ni enama yoohireera, wala enama yoohireera ni enama yooreera. Masi vakhala wiira onoomurantteliha mwaamunama mmosa ni mwaamunama mukina, nto enama eyo erantteliwe vamosa ni ele eranttelihiwe aya, sinrowa okhala sooreerihiwa para Muluku. 11 Vakhala wiira enama eyo ti yoohiloka,+ vahinreerela aya ovahiwa Yehova ntoko mukuttho, mutthu owo onivaha, ohaana weemexa enama eyo ohoolo wa namukuttho. 12 Vano namukuttho onoohimya esisapo ya enama eyo, owehaka vakhala wiira enama eyo ti yooreera, aahiiso yoohireera. Nto esisapo namukuttho onrowa awe ohimya, enrowa okhala yeeyo. 13 Masi vakhala wiira mutthu owo onoophavela woopola enama eyo, owo ohaana oliva esisapo ehimmwale ya enama eyo, ni wuncererya epantte ya neethanu ya esisapo eyo.+

14 “‘Akhala mutthu onireeriha empa awe wiira ekhale ntoko etthu yooreerihiwa para Yehova, namukuttho onoohimya esisapo ya empa eyo, owehaka vakhala wiira ti yooreera aahiiso ti yoohireera. Nto esisapo namukuttho onrowa awe ohimya, enrowa okhala yeeyo.+ 15 Masi vakhala wiira mutthu owo oreerinhe empa awe onniphavela woopola empa eyo, ohaana oliva musurukhu ohimmwale wa empa eyo, ni wuncererya epantte ya neethanu ya esisapo eyo. Nuumala-vo, empa eyo enrowa okhala yawawe.

16 “‘Akhala mutthu onireeriha mpantta mmosa wa ematta awe wiira onvahe Yehova, esisapo ya ematta eyo ehaana ohimmwa owehiwaka mwaattelo wa ipyo simpirisari waaliwa mmatta-mmo. Nto esisapo ya ehoomeri* emosa ya ipyo sa isevaata, enrowa okhala ixeekele 50 sa eparatha. 17 Vakhala wiira ematta eyo ereerihiwe eyaakha ya yubileyo,+ esisapo ele ehimmwale, khenrowa oturukiwa. 18 Masi vakhala wiira ematta eyo ereerihiwe nuuvira eyaakha ya yubileyo, namukuttho ohaana ohimya eperesu ekina yaamukhaani,+ okontariki iyaakha sinihala mpakha ophiya eyaakha ekina ya yubileyo. 19 Masi vakhala wiira mutthu owo oreerinhe ematta awe onniphavela woopola ematta eyo, ohaana oliva musurukhu ohimmwale wa ematta eyo, ni wuncererya epantte ya neethanu ya esisapo eyo. Nuumala-vo, ematta eyo enootthikela okhala yawawe. 20 Nto vakhala wiira owo khonoopola ematta eyo, vano eyo etumiheriwa mutthu mukina, nto kheniweryaneya-tho woopoliwa. 21 Eyaakha ya yubileyo, ematta eyo ehaana ovahereriwa Yehova. Enrowa okhala ematta yooreerihiwa ni enrowa okhala ya anamukuttho.+

22 “‘Akhala wiira mutthu onnireeriha para Yehova ematta othumme awe, masi ematta eyo khohiyeriwe ni amuhavinre awe,+ 23 namukuttho onoomuleela esisapo ya ematta eyo, okontariki iyaakha sinihala mpakha ophiya eyaakha ya yubileyo. Mutthu owo ohaana okumiha musurukhu owo nihiku nenlo.+ Musurukhu owo ti wooreerihiwa para Yehova. 24 Eyaakha ya yubileyo, ematta eyo enoomutthikela mwaaneene yoole aatuminhe.+

25 “‘Esisapo yootheene ehaana ophimmwa etthariwaka exeekele ya nipuro noowaarya. Exeekele emosa, ehaana okhala ikheera* 20.

26 “‘Ohikhale mutthu onrowa oreeriha enama yoopacerya ototholiwa para Yehova,+ okhala wiira inama soopacerya ototholiwa ti sawawe, ekhale epooyi aahiiso epwittipwitthi, ti sawawe Yehova.+ 27 Akhala wiira enama eyo yoopacerya ototholiwa ti yoohiloka, nto onoopola ovahaka esisapo enivekeliwa, owo ohaana ovaha esisapo ya mwaamunama owo ni wuncererya epantte ya neethanu ya esisapo eyo.+ Masi akhala wiira mwaamunama owo khonrowa woopoliwa, ohaana otumihiwa evahiwaka esisapo yaavekeliwa.

28 “‘Akhala wiira mutthu mmosa onnimukuxa mutthu mukina aahiiso onnikuxa enama awe wala ematta awe, onanvaha Yehova para mahiku ootheene,* itthu iyo sihitumihiwe aahiiso sihoopoliwe. Khula etthu enivahiwa Yehova+ ti yoowaaryexa. 29 Nave-tho, mutthu yoole olamuliwe opwetexiwa, ohoopoliwe.+ Mutthu owo ohaana wiiviwa.+

30 “‘Khula mpantta wa namuloko+ wa elapo, eyo piiyo, ipyo sa mmatta aahiiso mihokorokho sa miri, ti sawawe Yehova. Eyo etthu yooreerihiwa para Yehova. 31 Akhala wiira mutthu oniphavela woopola mpantta wa namuloko wa etthu eyo, owo ohaana ovaha esisapo ya etthu eyo, ni wuncerereya epantte ya neethanu ya esisapo eyo. 32 Muhaana onvaha Yehova mpantta wa namuloko wa epooyi, wa epwittipwitthi, ni wa epuri. Nto wiira mpake eyo, okathi munikontari anyu inama sanyu,* muhaana othanla enama emosa para Muluku, yeeyo enrowa ophiyeriha nummeru 10. 33 Owo ohivarerye akhala wiira enama eyo ti yooloka aahiiso ti yoohiloka, nnakhala ohituruke. Masi eererya oturuka, inama iyo soopiili, eyo piiyo, ele erantteliwe ni ele eranttelihiwe aya, sihaana oreerihiwa.+ Enama eyo khivaniweryaneya woopoliwa.

34 Iya sooruma seiyo Yehova anvanhe awe Moise, vamwaako Sinayi,+ wiira aaleele aisarayeli.