NSIPO NA SALOMOONI
1 Nsipo nootepa oreera na Salomooni,+ tinla:
2 “Mukivahe epeexo, mukivahe epeexo ni eyano anyu,
Okhala wiira okiphenta wanyu ti wootepaxa osiva, ovikana eviinyu.+
3 Wunkhela wa eperfuume anyu ti wootepa oreera.+
Nsina nanyu, ninlikana ni makhura oowunkhela amwarexiwe.+
Tivonto imwali sinisiveliwa aya ni nyuwo.
4 Mukikuxe,* nrowe ntthyawe.
Nrowe ntthyawe, okhala wiira mwene ookiroiha ekwartu awe!
Nrowe nihakalaleke hoothe.
Nrowe nlavule sa okiphenta wanyu, weiwo ori wootepa osiva ovikana eviinyu.
Tivonto awo* anisiveliwa aya ni nyuwo.
5 Nyuwo anamwane axithiyana a oYerusalemu, miyo ka mutthu ooriipa, masi ka mutthu oophwaneliwa,
Ntoko itenta sa oKedari,+ ntoko ikuwo sa etenta*+ ya Salomooni.
6 Muhikiwehe oriipa,
Okhala wiira nsuwa ti nikipanhe.
Axirokoraka, aananariwa ni miyo;
Awo aakiruma okhapelela imatta sa ewuuva,
Masi miyo nkiwenrye okhapelela ematta aka ya ewuuva.
7 Nyuwo kinoophentaakani vanceene, mukileele,
Munilyiha vai inama sanyu?+
Munimumuliha vai inama sanyu, othana eriyari?
Xeeni kaarowa aka weetta eriyari ya inama sa apatthani anyu,
Ntoko muthiyana okhuneeliwe owiitho wawe ni eveewu?”
8 “Nyuwo ootepexa ophwaneliwa waavikana axithiyana akina,
Akhala wiira khamunisuwela, mutthareke munvira aya inama,
Nave mukuxe ipuri sanyu, wiira mwalyiheke waattamela itenta sa amakampusi”.
9 “Nyuwo kinoophentaakani, miyo kinoolikanyihani ni ekhavalo yooreera, eriyari ya ikaaro sa Farawo.+
10 Owiitho wanyu, ti woophwaneliwa mwaha wa itthu nwanre anyu,*
Vamosa ni ikolaare sooreerexa siri muxikoni mwanyu.
11 Hiyo nnimoopakelani itthu soophwaneliha* sa eweero,
Vamosa ni itthu soophwaneliha sa eparatha”.
13 Ole onimphenta aka, kinimulikanyiha ni murupa mwaamukhaani, oheliwe makhura oowunkhela saana aniihaniwa miira,+
Yoowo kinimukuxa aka ohiyu wootheene vapeeto vaka.
14 Ole onimphenta aka, onlikana ni mwiri woowunkhela,+
Yoowo ori eriyari ya imatta sa ewuuva sa wEni-Gedi”.+
15 “Nyuwo muthiyana kinoophentaakani, khamureere oreera.
Nyuwo mootepa oreera. Maitho anyu, anlikana ni maitho a ipompa”.*+
16 “Nyuwo kinoophentaakani, mootepa oreera ni moophwaneliwa.+
Malaxi ooripelela, tari ekhaama ahu.
17 Iviika sa empa ahu sipakiwe* ni mwiri wa eseeturu
Ni mwiri wa xuniiperu.
2 “Masi miyo ka efilori ya mutakhwani,* eri mukerekhere mwa ephareya,
Efilori pure opuro woowaataleya”.+
2 “Ntoko efilori eri eriyari ya miiwa,
Siiso-tho, tori awe ole onimphenta aka eriyari ya aximwali”.
3 “Ntoko mwiri wa masa ori eriyari ya miri sa mutakhwani,
Ti siiso siri awe ole onimphenta aka eriyari ya amiravo.
Kinniphavela vanceene okilaathi vamuuttutthini vawe,
Nave muhokorokho awe ti woonaya vanlumini vaka.
4 Owo aahikiroiha nipuro na efesta,*
Nave ootheene yaanoona wiira aanikiphenta.
5 Mukivahe ewuuva yoowuuma ni masa;+
Wiira mukikurunuxe murima ni mukivahe ikuru,
Okhala wiira kihanle okhwa mwaha wa osiveliwa.
6 Ntata nawe noothiyana, nri vamuru vaka,
Nave ntata nawe noolopwana, ninnikikhupaarela.+
7 Nyuwo anamwane axithiyana a oYerusalemu,
Kinnoolaphihani mwaha wa oreera wa anaahe+ ni itthove siri mutakhwani:
Muheererye okiiriha ophavela, nnakhala okiiriha osiveliwa, ohinatthi ophiya okathi aya.+
8 Kinniiwa nsu na ole onimphenta aka!
Mwiiwe! Owo onnoorwa,
Onirwa owelaka mmiyaakoni, otupha-tuphaka mmattumuxani.
9 Ole onimphenta aka onlikana ni naahe, onlikana ni mwaaxaana a etthove.+
Ori vale, ottuli wa exiri ahu,
Owehaka vaxanelani,
Othurumelaka vareetini.
10 Ole onimphenta aka onnikileela wiira:
‘Nyuwo kinoophentaakani, nvenye,
Nyuwo muthiyana ooreera, nrowe.
11 Mooneke! Eyiita yoovira.*
Epula yoomwarya, ni yoorowa.
12 Sookhumelela ifilori mmathalani,+
Woophiya okathi+ woowuntakela iritta sa ewuuva,
Nave onniiwanyeya wiipa wa masiya mmathalani mwahu.+
13 Soottokottha mihokorokho soopacerya sa ifiiku;+
Miri sa ewuuva sihaaleya ni sinninkhela.
Nyuwo muthiyana ooreera kinoophentaakani, nvenye, murwe.
Nyuwo kinoophentaakani, nrowe.
14 Nyuwo munlikana ni epompa, enikhuma mukhukuni,+
Yiipinthe oneri wa mwaako,
Mukihiye kooweheeni ni kiiwe nsu nanyu,+
Okhala wiira nsu nanyu ti nooreera, nave nyuwo ti moophwaneliwa’”.+
15 “Mwaavare akhwatte,
Akhwatte acikhaani, yaawo anihonona imatta sa ewuuva,
Okhala wiira imatta sahu sa ewuuva sihaaleya ithutu”.
16 “Ole onimphenta aka tawaka, nave miyo kaawawe.+
Owo onilyiha inama+ eriyari ya ifilori.+
17 Ehinatthi woopa epheyo ni ohinatthi olakaseya muuttutthi,
Nyuwo kinoophentaakani, mutthike moowaakuveya.
Mulapuwe miyaako sinnivalaanya, ntoko naahe+ aahiiso mwaaxaana a etthove.+
3 “Ohiyu, koomwaavya vakhaamani vaka,
Ole kinimphenta aka.+
Koomwaavya, masi nkimphwannye.+
2 Miyo kinoovenya wiira keetteette opooma;
Mustaraatani ni mapuro oowaatta atthu,
Kinoomwaavya ole kinimphenta aka.
Koomwaavya, masi nkimphwannye.
3 Alipa-oowehaweha, yaawo yeetteetta mpooma yaahikiphwanya.+ Kaahaakoha wiira:
‘Monweha ole kinimphenta aka?’
4 Kaavikanaka-ru alipa-oowehaweha ale,
Kaahimphwanya ole kinimphenta aka.
5 Nyuwo anamwane axithiyana a oYerusalemu,
Kinnoolaphihani mwaha wa oreera wa anaahe ni itthove siri mutakhwani:
Muheererye okiiriha ophavela, nnakhala okiiriha osiveliwa, ohinatthi ophiya okathi aya”.+
6 “Exeeni ela enirwa ekhumaka woothakoni, enlikana ni meeku a mwiixi?
Exeeni ela eninkhela makhura aniihaniwa miira ni nsenso nootteela?*
Yeeyo erina mithinto sootheene sa eperfuume, sa mulipa a nakoso?”+
7 “Moone! Eyo ekhatera yooreera* ya Salomooni.
Aakhala anakhotto 60 a Isarayeli,+
Arukurenrye ekhatera eyo.
8 Ootheene aya aakuxa espaata,*
Ahiixuttihiwa owana ekhotto,
Khula mmosa ookuxa espaata awe muyuununi mwawe,
Wiira omukhapelele mwene mwaha wa itthu soowoopiha, ohiyu”.
10 Ipilaari saya, owo opanke ni eparatha,
Opuro onikilaathi awe,
Opakiwe ni ekuwo ya ekoore violeeta,
Muhina mwaya, anamwane axithiyana a oYerusalemu,
Aareeriha ni itthu sinooniherya ophenta”.
11 “Nyuwo anamwane axithiyana a oSiyoni,
Murwe munwehe mwene Salomooni,
Owanre ene ekhara ya ifilori, epakiwe ni maama awe,+
Nihiku na ekasamento awe,
Nihiku nenlo ohireere awe otteeliwa murima”.
4 “Nyuwo muthiyana kinoophentaakani, khamureere oreera.
Nyuwo mootepa oreera.
Maitho anyu, anlikana ni maitho a ipompa,* muhina mwa eveewu ekhuneelaniwe anyu.
Ikharari sanyu, sinlikana ni nikoto na ipuri soothiyana,
Seiyo sinikhuruwa miyaako sa oXileyaadi.+
2 Maino anyu, anlikana ni nikoto na ipwittipwitthi simetthiwe niinaano,
Seiyo sinikhuma mmaasini ntoko siroorapihiwa,
Sootheene sinaatothola axaana anli-anli,
Nave khiivo ehikhanle ni ekhwaaya.
3 Iyano sanyu, sinlikana ni nliinya nooxeerya,
Nave moolumo anyu, tooreera.
Owiitho wanyu, okhuneeliwe ni* eveewu,
Onlikana ni mpantta mmosa wa muhokorokho oniihaniwa roma.
4 Exiko anyu,+ enlikana ni empa yoorakamela osulu ya Davidi,+
Etekiwe ni maluku oothataanyiwa saana,
Vaavo anithomeiwa aya makula a wiixaakihana* 1.000.
Makula ootheene a wiixaakihana a anakhotto ootupa.+
5 Mapele anyu, anlikana ni axaana anli a naahe,
Axaana anli a naahe+ atotholinwe ekwaha emosa-ru,
Yaawo anilya eriyari ya ifilori”.
6 “Ehinatthi woopa epheyo ni muuttutthi ohinatthi olakaseya,
Kinoorowa omwaako ori mwiri woowunkhela oniihaniwa miira,*
8 Nyuwo noiva aka, nikhume vasulu va oLiibano,
Nikhume vasulu va oLiibano.+
Nikhume vasulu va wAmana,
Vasulu va oSeniri, vasulu va oHermoni,+
Mukhukuni mwa akharamu, miyaako sa ahavara.
9 Nyuwo noiva aka kinimphenta aka, mookivara murima,+
Mookivara murima ni okiweha wanyu ni niitho nimosa,
Ni nluku noowaarya nri vakolaarini ewanre anyu.
10 Nyuwo noiva aka kinoophentaakani, moolumo anyu oophenta,+ khareere oreera!
Moolumo anyu oophenta, tootepa oreera ovikana eviinyu,+
Nave wunkhela wa eperfuume anyu, ti wootepa oreera ovikana iperfuume sikina!+
11 Noiva aka, iyano sanyu sinnittonya oravo* wooreera,+
Nlumi nanyu, ninlikana ni oravo ni eleeti,+
Nave wunkhela wa ikuwo sanyu, onlikana ni wunkhela wa etakhwa ya oLiibano.
12 Nyuwo kinoophentaakani, noiva aka, munlikana ni exarti etekeleliwe,
Exarti etekeleliwe, ni ehime* ekhuneeliwe.
13 Nyuwo munlikana ni miri siri muxarti,
Seiyo iritta saya* sisareyale mihokorokho siniihaniwa roma, ni mihokorokho sootepa oreera, ni miri soowunkhela,
14 Narto*+ ni nxafarawu, muhali*+ woonaya ni ekanela,+
Vamosa ni mithinto sootheene sa miri sa nsenso nootteela, miira ni alowe,*+
Ni iperfuume sootheene sootepa oreera.+
15 Nyuwo mwa ehime eri muxarti,
Ehime ya maasi ooreera, a miro sinikhuma oLiibano.+
16 Nyuwo epheyo ya onorti, nvenye;
Nyuwo epheyo ya osuuli, murwe.
Moopeke muxarti mwaka,
Wiira emwareeleke eperfuume anyu”.
“Ole onimphenta aka okeleke muxarti mwawe,
Olyeeke mihokorokho sawe sootepa oreera”.
5 “Nyuwo kinoophentaakani, noiva aka,+
Kookela muxarti mwaka.
Koottotta miira* ni mwiri woowunkhela.+
Kihoolya nihepepe naka na oravo;
Koowurya eviinyu aka ni eleeti aka”.+
“Nyuwo apatthani, mulyeeke!
Nwuryeke ni muhapaliweke ni moolumo oophenta!”+
2 “Miyo kaamurupa, masi murima aka khiwaarumpe.+
Kaahiiwa nsu na ole kinimphenta aka okiihanaka, oriki:
‘Nyuwo kinoophentaakani, nyuwo kinoophentaakani, mukihulele,
Nyuwo mwa epompa aka, muhirina etthu yoonanara!*
Okame woonaaniha muru aka!
Ikharari saka soosareya okame wa ohiyu’.+
3 Miyo koorula nlaya naka.
Kiireke kihaana owara-tho?
Koorapiha inawu saka.
Kiireke kihaana onanariha-tho?
4 Ole onimphenta aka, ooviriha ntata nawe mwiithe ori vamukhora,
Nto murima aka waahipacerya othukumela mwaha wa yoowo.
5 Miyo koovenya wiira kamuhulele mukhora ole onimphenta aka;
Matata aka yaattonya miira,
Nave ikatha saka saattonya makhura a miira,
Attonyeryaka vafexaturani.
6 Kaahimuhulela ole onimphenta aka,
Masi nkamphwannye, iira oronwe ene.
Okhala wiira aahirowa,* miyo kaahixanka.
Kaahimwaavya, masi nkamphwannye.+
Kaahimwiihana, masi owo khaakaakhunle.
7 Alipa-oowehaweha yeetteetta mpooma, yaahikiphwanya.
Awo yaahikimana, akivulaliha.
Alipa-oowehaweha ixiri, yaahikaakha eveewu aka.
8 Nyuwo anamwane axithiyana a oYerusalemu, kinnoolaphihani:
Mwamphwanya ole onimphenta aka,
Mmuleele wiira miyo kinniwereiwa mwaha wa omphenta”.
9 “Nyuwo muthiyana ootepa oreera waavikana axithiyana akina,
Exeeni orina awe ole onimphenta anyu, waavikana alopwana akina?
Ole onimphenta anyu, orina exeeni waavikana alopwana akina,
Yeeyo eniwiirihani onilaphihaka siisa?”
10 “Ole onimphenta aka, tooreera ni ta ikuru;
Owo onnaavikana alopwana 10.000.
11 Muru awe ti wooreera ntoko eweero, eweero yooreerihiwa saana.
Ikharari sawe, sinniveveleya ntoko makukhu a mukole,*
Ti sooriipa ntoko nakhuku.
12 Maitho awe, anlikana ni ipompa siri waattamela maasi anivira,
Seiyo sinirapa eleeti,
Siphumuryaka mukerekhere mwa ntthiya noowaatta maasi.*
13 Owiitho wawe, onlikana ni exarti yaaliwe miri soowunkhela.+
Miyaako siri malaxi oowunkhela.
Eyano awe enlikana ni ifilori. Eyano eyo enittonya makhura a miira.+
14 Matata awe, anlikana ni eweero, areerihiwe ni maluku aniihaniwa krisoolito.
Erukulu awe, enlikana ni maino a etthepo ooreerihiwa, ephwanelihiwe ni maluku aniihaniwa safira.
15 Inawu sawe, sinlikana ni ipilaari sa maluku aniihaniwa maarmore sipwehiwe iyeemexeryo sa eweero yootepa oreera.
Owo tooreera ntoko elapo ya oLiibano. Mukhalelo awe onlikana ni miri sa eseeturu.+
16 Eyano awe ti yoonaya ntoko oravo.
Owo tootepa oreera.
Nyuwo anamwane axithiyana a oYerusalemu, ola tuule onikisivela,+ tuule onimphenta aka”.
6 “Nyuwo muthiyana ootepa oreera waavikana athiyana ootheene,
Oronwe vai ole onimphenta anyu?
Ole onimphenta anyu, oronwe ephiro xeeni?
Nrowe namwaavye”.
2 “Ole kinimphenta aka oronwe oxarti wawe,
Opuro saaliwe miri soowunkhela,
Wiira alyihe inama weiwo,
Ni arukule ifilori.+
3 Miyo kaawawe ole onimphenta aka,
Nave, ole onimphenta aka, tawaka.+
Owo onilyiha inama eriyari ya ifilori”.+
4 “Nyuwo kinoophentaakani,+ ti mootepa oreera ntoko oTirsa,*+
Ti mootepa oreera ntoko oYerusalemu,+
Nyuwo ti moovuwa, ntoko anakhotto arukurenrye ipantera saya.+
5 Muhuluxe maitho anyu,+
Okhala wiira annikivara murima.
Ikharari sanyu, sinlikana ni nikoto na ipuri soothiyana,
Seiyo sinikhuruwa miyaako sa oXileyaadi.+
6 Maino anyu, anlikana ni nikoto na ipwittipwitthi,
Seiyo sinikhuma mmaasini ntoko siroorapihiwa,
Sootheene sinitothola piili ekwaha emosa-ru,
Nave khiivo ehikhanle ni ekhwaaya.
7 Owiitho wanyu okhuneeliwe ni* eveewu,
Onlikana ni mpantta mmosa wa muhokorokho oniitthaniwa roma.
8 Hata akhalaka mapwiyamwene 60,
Athiyana akina* 80,
Ni imwali sihinikontareya,+
9 Mmosa paahi, tokhanle epompa aka,+ ohirina etthu yoonanara.*
Owo tootepa ophentiwa ni amamawe.
Owo paahi toyariwe ni amamawe.
Anamwane axithiyana anninweha ni anamuhimya okhala oohakalala;
Mapwiyamwene ni axithiyana akina, annimuttottopela.
10 ‘Muthiyana xeeni ola, onaarya* ntoko nivoroxa,*
Ooreera ntoko mweeri,
Oowaarya ntoko nsuwa,
Oovuwa ntoko anakhotto arukurenrye ipantera saya?’”+
11 “Kaahirowa oxarti, weiwo siri aya miri+ siniima mihokorokho sinlikana ni koroxo,*
Wiira kawehe etthu yinnunwe oxepani,
Wiira kawehe akhala wiira mwiri wa ewuuva woophuwela,
Nave akhala wiira miri siniihaniwa roma sihaaleya.
12 Kihinatthi osuwela etthu yaarowa wiiraneya,
Yoophavela aka yaahikiiriha orowa,
Waari ikaaro sa makhulupale a atthu aka”.
13 “Mutthike, mutthike, nyuwo muthiyana a oXulaami!
Mutthike, mutthike,
Nimphavela woowehani-tho!”
“Xeeni muniphavela anyu onweha-tho muthiyana a oXulaami?”+
“Owo onlikana ni ikurupu piili sa atthu aniina!”*
7 “Inawu sanyu, khasireere oreera musantaalyani mwanyu,
Nyuwo mwaana mwaamuthiyana oottittimiheya!
Itara sanyu, sinlikana ni itthu soophwaneliha,
Seiyo sipakiwe ni mulipa-oorattela saana muteko awe.
2 Mutekhu anyu, onlikana ni ekaalisi,
Yeeyo ehinimala eviinyu yoowunkhela.
Erukulu anyu, enlikana ni etiriku yoowuukeliwa,
Erukureriwe ni ifilori.
3 Mapele anyu, anlikana ni axaana anli a naahe,
Axaana anli a naahe+ atotholiwe ekwaha emosa-ru.
4 Exiko anyu,+ enlikana ni empa yoorakamela osulu epakiwe ni maino a etthepo,+
Maitho anyu,+ anlikana ni maasi a oHexeboni,+
Yaawo yaattamenle vamukhora va oBati-Rabimi.
Ephula anyu, enlikana ni empa yoorakamela osulu ya oLiibano,
Yeeyo eniweha oDamaasiko.
5 Muru anyu, onlikana ni mwaako Karmelo,+
Nave ikharari sanyu,*+ sinlikana ni maliinya a ikoore violeeta.+
Miyo mwene, koovareya murima* ni ikharari sanyu sooreera ni soorakama.
6 Nyuwo emwali kiniphenta aka, khamureere oreera,
Nyuwo mootepa oreera, ovikana itthu sootheene sooreera!
7 Oreera wanyu, onlikana ni mwiri wa mukole,
Nave mapele anyu, anlikana ni maphara a muhokorokho wa taamara.+
8 Miyo koohimya wiira: ‘Kinoowela mmukoleni,
Wiira kirukule mihokorokho saya’.
Mapele anyu, alikaneke ni maphara a ewuuva,
Nave wunkhela wa eyano* anyu, olikaneke ni masa,
9 Nave eyano anyu, elikaneke ni eviinyu yootepa oreera”.
“Eviinyu eyo, emukhooweleke ole onimphenta aka,
Ntoko eviinyu enikhoowela vayanoni, ni eniwiiriha atthu orupa.
10 Miyo kaawawe ole onimphenta aka,+
Nave owo onnisiveliwa ni miyo.
12 Nivenye voosiisu, nrowe imatta sa ewuuva,
Wiira nawehe miri sa ewuuva saaphunwe ene,*
Ifilori saathapulunwe ene,+
Nave nawehe akhala wiira miri siniihaniwa roma sihaaleya.+
Weiwo, kinoowooniheryani woophentani waka.+
13 Mihokorokho*+ sinnimwara-mwarya wunkhela waya;
Mikhora sahu, sookhala mithinto sootheene sa mihokorokho sooreera.+
Mihokorokho sa niinaano vamosa ni sa khalai,
Koosukenryaakani nyuwo kinoophentaakani.
8 “Vaakhanle wiira mwa murokoraka,
Yoowo aamwale mapele a amaama,
Miyo koophwanyani ota iwe, kaamoovahani epeexo.+
Nto khuuvo aarowa okiphukela.
Kaamoovahani eviinyu yoowunkhela wiira nwuryeke,
Ni suumu ooriirya a mihokorokho siniihaniwa roma.
3 Ntata nawe noothiyana, naarowa okhala vamuru vaka,
Nave ntata nawe noolopwana, naarowa okikhupaarela.+
4 Nyuwo anamwane axithiyana a oYerusalemu, kinnoolaphihani:
Muheererye okiiriha ophavela, nnakhala okiiriha osiveliwa, ohinatthi ophiya okathi aya”.+
5 “Muthiyana xeeni ole onirwa okhumaka woothakoni,
Omuhamenle ene ole onimphenta awe?”
“Miyo kihoovenxani vathi va mwiri wa masa.
Vaavo maama anyu oorupanlyaaweni.
Nave vaavo oonale awe owereya okathi ooyaraaweni.
6 Mukihele vamurimani vanyu ntoko anela,*
Ntoko anela ori mukathani mwanyu,
Okhala wiira ophenta ti woowerya ntoko okhwa,+
Nave ororomeleya ti woothipelela ntoko Mahiye.*
Ophenta iwo onlikana ni malumi a mooro onipatta, malumi a mooro wa Yah.*+
Mutthu eerenrye othuma niphento, ovahaka mireerelo sawe sootheene,
Atthu yaamukhootta mireerelo iyo”.*
8 “Murokorihu nlelo mwaamukhaani,+
Nave khokhumme mapele.
Ninrowa omwiirela exeeni murokorihu,
Nihiku onrowa awe ophavela otheliwa?”
9 “Akhala wiira owo exiri,
Nnooteka vasulu vawe, empa ya eparatha yoorakamela osulu,
Masi akhala wiira owo mukhora,
Nnonwalela ni ethaapwa ya eseeturu”.
10 “Miyo ka exiri,
Nave mapele aka anlikana ni ipa soorakamela osulu.
Nto, owo onikiweha ntoko mutthu,
Oniphwanya murettele.
11 Salomooni aahikhalana ematta ya ewuuva+ oBayali-Hamoni.
Owo aahaaroromela ale yaaweherya ematta eyo.
Khula mmosa a atthu awo, aaniruuha musurukhu 1.000 wa eparatha, wiira oliverye mihokorokho sa mmatta-mmo.
12 Miyo kookhalana ematta aka ya ewuuva, eyo ti yawaka paahi.
Musurukhu 1.000 wa eparatha, taawinyu nyuwo Salomooni,
Nave musurukhu 200, tawaya ale aniweherya mihokorokho sa mmatta-mmo”.
13 “Nyuwo munikhala muxarti,+
Apatthani aka aniphavela wiiwa nsu nanyu.
Ni miyo-tho kinniphavela wiiwa”.+
14 “Nyuwo kinoophentaakani, mwaakuveke,
Nave mutthyaweke ntoko naahe,+
Aahiiso ntoko mwaaxaana a etthove,
Ori miyaako sa miri soowunkhela”.
Eheeperi, “Mukikakhele ori anyu”.
Eyo piiyo, “aximwali”.
Aahiiso, “eheema”.
Aahiiso, woonasa wene: “eriyari ya ikharari sanyu sootthaviwa”.
Aahiiso, “ipirinku”.
Eheeperi, “Makhura oowunkhela”.
Aahiiso, “ikhuntta”.
Aahiiso, “empa ahu yuulupale epakiwe”.
Eheeperi, “nxafarawu”.
Eheeperi, “empa ya eviinyu”.
Aahiiso, “Okathi wa epula woovira”.
Aahiiso, “erupani yootteela”.
Eyo piiyo, ekhatera ekhuneeliwe, enirumeeliwa para okuxiwa mutthu oottittimiheya.
Aahiiso, “xoowa”.
Eyo piiyo, ekhatera ekhuneeliwe, enirumeeliwa para okuxiwa mutthu oottittimiheya.
Aahiiso, “ikhuntta”.
Aahiiso, “Malaku anyu akhuneeliwe ni”.
Aahiiso, “iskuutu”.
Nwehe Moolumo Ootthokiheriwa.
Aahiiso, “erupani yootteela”.
Aahiiso, “enuyi”.
Aahiiso, “epuusu”.
Aahiiso, woonasa wene: “erutthu anyu”.
Narto, mwiri woowunkhela saana.
Enihimmwa enamuna ya muhali woowunkhela.
Aahiiso, “eloyi”. Nsina na mwiri woowunkhela, yoowo eperfuume awe yaarumeeliwa khalai.
Nwehe Moolumo Ootthokiheriwa.
Nave-tho, pooti ohimmwaka oreera wa weerutthuni.
Aahiiso, woonasa wene: “Miyo kaahikhulumuwa okathi aalavunle awe”.
Aahiiso, woonasa wene: “anlikana ni maphara a taamara”.
Aahiiso, woonasa wene: “mukerekhere mwa ntthiya”.
Aahiiso, “Epooma Yooreera”.
Aahiiso, “Malaku anyu akhuneeliwe ni”.
Nwehe Moolumo Ootthokiheriwa ani: “Athiyana akina”.
Nave-tho, pooti ohimmwaka oreera wa weerutthuni.
Eheeperi, “oniweha vathi”.
Ti etheneeri enipacerya okhuma oxaka.
Muthinto mmosa wa mwiri, oninnuwa wIsarayeli, yoowo oniima mihokorokho sinlikana ni koroxo.
Aahiiso, “wiina wa Mahanayimi”.
Eheeperi, “muru anyu”.
Aahiiso, “kootthukweya”.
Eheeperi, “ephula”.
Aahiiso, “saaleyale ene”.
Athiyana annoolya muhokorokho wa mwiri ola, mwaha woowi anuupuwela wiira yalya vale onimwaakhaliherya oyara.
Owo aari anela, atthu yaamurumeela aya ntoko ekarimpu.
Nwehe Moolumo Ootthokiheriwa.
“Yah” ti enamuna yookhuveya ya nsina na Yehova.
Aahiiso, woonasa wene: “owo”.