Ovaanela onnaakhaliherya anamuyari wiiraana ni anaaya
ANAMUYARI
5 Ovaanela
ELE ENTAPHULELA AYA
Ovaanela wooloka onikhumelela vaavo namuyari ni anaawe anihimya aya muupuwelo aya ni soophavela saya.
XEENI VANIREERELA AYA?
Pooti okhala vooxankiha ovaanela ni aniinyu amiravo. Woonasa wene iyaakha sivinre, vaanikhweya osuwela ele aniinyu yuupuwela aya. Masi vano, khamuniwerya osuwela eri vamurimani vaya, munimwaaweha paahi. Ikwaha sikina pooti wira munneererya, osuwela enuupuwela aya, masi khivaniweryaneya. Akhala wira ti siiso, muhaana ovaanela ni aniinyu.
ETTHU YOOPAKA
Mwiimananiheke ovaanela ni aniinyu khula okathi aniphavela aya. Hata ikwaha sikina aphavelaka olavula ni nyuwo okathi ohinreerela, mwiimananiheke.
“Okathi mukina nyuwo pooti ophavelaka waapwapwela aniinyu muriki: Vano muniphavela anyu olavula ni miyo? Kiira naari hoothe nihiku notheene? Masi, niireke vannireerela waapwapwela anamwane yaaphavelaka olavula ni hiyo? Khuuvo namuyari oniphavela opaka eyo”.—Lisa.
“Nnaamwi okisivelaka orupa, masi ikwaha sinceene okathi wooreerela ovaanela saana ni anaaka amiravo, onikhala ohiyu eriyari”.—Herbert.
ELE BIIBILIYA ONIHIMYA AWE: “Ahikhale omphavela oreriwa wawe, nto aphaveleke sinaphwanyiha oreriwa akhw’awe”.—1 aKorinto 10:24.
Mwaawiriyaneke ni ephoole. Paapa mmosa ohimmye so: “Ikwaha sikina anaaka yaalavulaka, miyo kinuupuwela itthu sikina. Nto awo annoona wira nkiniwiriyana saana ele enihimya aya!”
Akhala wira eyo enniiraneya ni nyuwo, mmuttipiheke TV, selulaari ni itthu sikina okathi munivaanela anyu ni aniinyu. Nwiriyaneke saana ele mwaninyu onihimya awe, ni nvaheke efaita muupuwelo awe, hata moonaka wira khahiyo etthu yuulupale.
“Nihaana owooniherya aniihu wira ninnivaha efaita miyuupuwelo saya. Yoona wira khinnaacala, khanrowa-tho ophavelaka onileela mixankiho saya wala anrowa ophavela miruku sa atthu akina”.—Maranda.
“Muhaakuveke onanariwa, hata moonaka wira muupuwelo awe kholonke”.—Anthony.
ELE BIIBILIYA ONIHIMYA AWE: “Mphaveleke wiwa orattene”.—Luka 8:18.
Muttotteleke mureerelo khula okathi. Ikwaha sikina, anamwane onnaakhweela olavula ni anamuyari aya ahiwehanaka owiitho.
“Ninnittottela mureerelo okathi onipasiyari ahu mukaaroni. Okhala wira ninnaattamelana, nto vannikhweya ovaanela oratteene”.—Nicole.
Okathi wa yoolya, ti okathi mukina wooreerela ovaanela.
“Okathi wa xantari, khula mmosa onnihimya etthu yoohiloka ni yooloka emwiiranenle nihiku nle. Eyo ennikhaliherya wiiraana ni osuwela muxankiho wa khula mutthu ni okhaliheryana”.—Robin.
ELE BIIBILIYA ONIHIMYA AWE: “Khula mutthu ohana wakuvela owiriyana, masi apiseke olavula”.—Yakobo 1:19.