8 Ntakiheryo

ELE ENTAPHULELA AYA

Anamuyari anivaha ntakiheryo nooloka, taale anivara ele aniixuttiha aya. Mwa ntakiheryo, nyuwo pooti omwiiriha mwaninyu ohikupali enihimya anyu, akhala wira okathi onirwa awe mutthu owannyu, munnimuleela mwaninyu waakhula so: “Mwaaleele wira nkikhanle”.

“Anamunceene waalema ohimya wira: ‘Mwiireke ele enihimya aka, ohiya ele enipaka aka’. Masi yoolema eyo khenaakhaliherya anamwane. Anamwane anoolikana ni nxotte, awo anniwerya onuula khula etthu enihimya ahu ni opaka, nto awo anniweha akhala wira ntakiheryo nahu khaninvarihana ni ele eniwiixuttiha ahu”.​—David.

ELE BIIBILIYA ONIHIMYA AWE: “Nyuwo munlaleya wira: “Muhiyeké”, muniyerya-ní?”.​—aRoma 2:21.

XEENI VANIREERELA AYA?

Anamwane ni amiravo waasivela waatakiha anamuyari aya, vamosa ni apatthani aya. Eyo enitaphulela wira nyuwo mookhalana muritti muulupale wa waalakiherya aniinyu, mwaavahaka ntakiheryo nooloka.

“Ikwaha sikina hiyo pooti omuleela mwaana etthu emosaru ikwaha sinceene, masi nlelo khiyaikoha vakhala wira ohiiwa, masi navonyaru ekwaha emosa paahi opaka ele enimwiixuttiha ahu, owo khonrowa oniiwelelaka. Anamwane annivaha ephoole khula etthu enipaka ahu, hata noonaka wira khaniweha”.​—Nicole.

ELE BIIBILIYA ONIHIMYA AWE: “Ankhili ankhuma wa Muluku . . . kharina mirima mili”.​—Yakobo 3:17.

ETTHU YOOPAKA

Nweheke ntakiheryo munivaha anyu. Matthekulelo xeeni anoosivelani? Munimukhapelela sai ole othelanne anyu ni aniinyu? Apatthani inyu ta mukhalelo xeeni? Niireke munnipaka itthu nwuupuwelaka akina? Niire so, muniphavela wira aniinyu akhale ntoko nyuwo yannuwa vale?

“Miyo ni iyaka khinnaakhanyererya aniihu okhala atthu hiyo aneene nihikhanle ahu”.​—Christine.

Nvekeleke musammaha mwattheka. Aniinyu aasuwela wira mwa mutthu oohimalela. Nto okathi onihimya anyu wira “mukilevelele” munvekelaka ole othelanne anyu wala mwaninyu, awo animwiixutta okhala oororomeleya ni oowiiyeviha.

“Aniihu ahaana oniiwa nihimyaka soovonya sahu ni nivekelaka musammaha. Naahiire siiso, awo ananvitha soovonya saya”.​—Robin.