Mwaha 32

Ihukhumu 10

NKAWEHANI ilatarato iyo. Khuta emosaa enooniherya ehukhumu yeeyo Yehova yaaruuhalya awe wEjiitu. Mu elatarato yoopacerya nyuwo munoowerya omoona Aroni omanaka Muroo Nilo ni ttootto awe. Vaavo viiralya awe siiso, maasi a muroo yaahithatuwa ephomee. Ihopa saahikhwa, nto muroo aahipacerya wunkha.

Moottharelana, Yehova aahiiriha wi akhumele anaphulu mMuroo Nilo. Awo yaahikhala mapuro otheene—vanooxiwa ephaawu, mmakhalakoni, mu ikhaama sa atthu—mapuro otheene. Vaavo anaphulu vaakhwiiya aya, atthu a wEjiitu yahaathukumanya mmattumuxa maalupale, nto elapo yaankha anaphulu.

Nuumala vo Aroni aahimana etthaya ni ttootto awe, nto ntthupi naahithatuwa apwilimwithi. Ala arii axikokho acikhaani anvava yaawo aniluma. Apwilimwithi yaari ehukhumu ya neeraru mu elapo ya wEjiitu.

Ihukhumu sikina soohalela saahaaxale atthu a wEjiitu paahi, ohiya anaIsarayeli. Ehukhumu ya neexexe yaari aphuure aalupale yaawo yaakenle mpaani mwa atthu otheene a wEjiitu. Ehukhumu ya neethanu yaatuphenle inamaa. Inyompe sinceene ni ipwittipwitthi ni ipurii sa atthu a wEjiitu saahikhwa.

Moottharelana, Moise ni Aroni yaahikuxa ettuurwa vakhaani ni yaahivonyerya musuluu. Ela yaahikumiherya makhwatta oowereya wa atthu ni inamaa. Ela yaari ehukhumu ya neethanu na mmosaa.

Vattuli vaya Moise aahittukhulela ntata nawe musuluu, nto Yehova aahirumiha etari ni maralala. Ala yaari maralala ootakhalexa yaawo yahaatonko okhala wEjiitu.

Ehukhumu ya neethanu na tthaaru yaari muttitthi wa nasope. Khonakhale-tho siiso aahiiso khonatthikele okhala nasope oowaatta siiso. Owo aahilya khuta etthu yahaahononiwe ni maralala.

Ehukhumu ya neethanu na xexe yaari epiphi. Mmahiku mararuu epiphi yuulupale yaahikhuneela elapo, masi opuro yoowo waakhala aya anaIsarayeli waari wookokola.

Wanikisa waya, Muluku aahaaleela atthu awe wira yoottowiherye muxerexere mwa mikhora saya ephomee ya mwaapuri aahiiso ya mwaapwittipwitthi. Nlaikha na Muluku naahivira-vira wEjiitu. Vaavo nlaikha noonalya aya ephomee, khinaamwiivale mutthu mu empa ele. Masi ipa sotheene seiyo sihaakhanle ephomee muxerexere mwa mikhora, nlaikha na Muluku naahiwiiva anamwane oopaceriwa a atthu ni inamaa. Ela yaari ehukhumu ya 10.

Vattuli va ehukhumu ela yookiserya, Farawoo aahaaleela anaIsarayeli wira akhumeke. Atthu a Muluku yaari oolikana wira akhumee, nto ohiyu yoole awo yaahipacerya mukwaha aya wookhuma wEjiitu.

Okhuma ikapitulu 7 mpakha 12.