Mwaha 33

Olapuwa Ephareya Yooxeerya

NKAWEHANI eniiraneya! Owo Moise ni ttootto awe omuttukhulenle ene vasuluu va Ephareya Yooxeerya. Ale arina awe mpantta ole yooponwe arii anaIsarayeli. Masi Farawoo ni anakhotto awe otheene animiryeya mphareya. Nrowee noone moota siiranen’ya aya ela.

Ntoko siixuntte ahu, Farawoo aahaaleela anaIsarayeli wira akhumee wEjiitu nuumala Muluku oruuha ehukhumu ya 10 wa atthu a wEjiitu. Yaahikhuma aIsarayeli alopwana oophiyeryaka 600.000, ni athiyana ni anamwane anceene. Nave-tho, nuumuru nuulupale na atthu akina, yaawo yaamukupanli Yehova, yaahikhuma ni anaIsarayeli. Otheene aya yaahikuxa ipwittipwitthi, ipurii ni inyompe saya.

Ahinatthi okhumasa, anaIsarayeli yaahaavekela atthu a wEjiitu ikuwo ni itthu soopakiwa ni eweero ni eparatha. Atthu a wEjiitu yaari oowoova vanceene, mwaha wa ehukhumu yookiserya yaarweelale. Siiso awo yaahiwunnya anaIsarayeli etthu eri yotheene yaavenka aya.

Vattuli va mahiku vakhaani anaIsarayeli yaahiphiya va Ephareya Yooxeerya. Vale awo yaahimumula. Mu okathi yoowo, Farawoo ni atthu awe yaahipacerya wiikhupanyerya okhala wira yaahiweemererya anaIsarayeli orowa. ‘Noohiya sirowaka ipottha sahu!’ awo yaahihimya.

Siiso Farawoo aahirukunuxa mupuwelelo awe ekwaha ekina-tho. Mowaakuveya aahilokiherya ekaaro awe ya ekhotto ni anakhotto awe. Nuumala vo aahipacerya waatthimakela anaIsarayeli ni ikaaro 600 sa vameekh’aya, vamosaa ni ikaaro sotheene sikina sa wEjiitu.

Vaavo anaIsarayeli vaamoonalya aya Farawoo ni anakhotto awe arwaasaka ottuli waya, yaahoova vanceenexa. Khivaakhanle moota wootthyawa. Mpantta mmosaa yaari Ephareya Yooxeerya, nto mpantta ola mukina yaarwa atthu a wEjiitu. Masi Yehova aahikuha neeku eriyari ya atthu awe ni atthu a wEjiitu. Siiso atthu a wEjiitu khiyaawerya owoona anaIsarayeli wira yaatuphele.

Nto Yehova aahimuleela Moise wira omuttukhulele ttootto awe vasuluu va Ephareya Yooxeerya. Vaavo vaapanke awe ela, Yehova aahiiriha woopa epheyo yuulupale ya onikhuma nsuwa. Maasi a ephareya yaahikawanyeya, nto maasi ala yaaheemela nno ni nno.

Nuumala vo anaIsarayeli yaahipacerya weetta mphareya mu etthaya yowuuma. Waahivira okathi munceene wira imilyau sa atthu ni inamaa saya sotheene sivire mowoopowa mphareya sirowaka mpantta mukina. Wanikisa waya atthu a wEjiitu yaahiwerya waaweha vasyaa-tho anaIsarayeli. Ipottha saya saamutthyawa! Siiso awo yaahikela mphareya atthimakelaka ipottha.

Vaavo vaapanke aya ela, Muluku aahiiriha wi mattheko a ikaaro saya amoreke. Atthu a wEjiitu yaahoova vanceenexa nto yaahipacerya okhuwela yiiraka: ‘Yehova onnaawanela anaIsarayeli onivirikanyaka hiyo. Nrowee nikhume va!’ Masi vaahipisa vanceene.

Nto tivonto Yehova vaamuhimenrya awe Moise wira omuttukhulele ttootto awe vasuluu va Ephareya Yooxeerya, ntoko soonalya anyu valataratoni. Nto vaavo Moise vaapanke awe ela, ixirii sa maasi saahipacerya okumana ni waamirya atthu a wEjiitu ni ikaaro saya. Anakhotto otheene yaatthara anaIsarayeli yaahikela mphareya. Nto khuuvo mmosaa a atthu a wEjiitu aahanle ori mukumi!

Moota saarya aya oohakalala atthu otheene a Muluku mwaha wa woopoliwa! Alopwana yaahiipa nsipo na omuxukhurela Yehova, ariki: ‘Yehova oophwanya oxintta woovuwa. Owo ohaavonyerya mphareya anakhavalo ni ikhavalo saya.’ Murokorawe Moise Miryamu aahikuxa ekoma awe, ni athiyana otheene yaahimutthara ni ikoma saya. Nto vaavo yiinaaya moohakalala, awo yaaniipa nsipo nimosaru niipiwa ni alopwana ariki: ‘Yehova oophwanya oxintta woovuwa. Owo ohaavonyerya mphareya anakhavalo ni ikhavalo saya.’

Okhuma ikapitulu 12 mpakha 15.