Omwene Waahikawanyiwa

Okathi Salomoni aamukokhorela awe Yehova, aIsarayeli yaanikhalana murettele. Salomoni aahaathela athiyana anceene a ilapo sikina, nto axaarawe awo yaakokhorela amuluku eethiru. Vakhaani-vakhaani, murima wa Salomoni waahihapuxiwa nave aahipacerya okokhorela ilatarato. Yehova aahinanariwa ni aahimuleela so: ‘Emusi anyu enimwaakhiwa omwene wa wIsarayeli ni omwene owo onookawanyiwa ipantte piili. Epantte yuulupale kinonvaha murumeyi anyu, vano mwaninyu onrowa olamulelaka epantte yaamukhaani paahi’.

Yehova aahooniherya yoothanla awe mwa enamuna ekina. Nihiku nimosa murumeyi mmosa a Salomoni aitthaniwa Yerobowamu aahikumana ni profeta Ahiya. Profeta owo aahikhera nlaya nawe ipantte 12 ni khuhimya so: ‘Yehova onoowaakha omwene wa wIsarayeli amusi awe Salomoni ni onookawanya ipantte piili. Mukuxe mahimo 10 maana nyuwo munrowa okhala mwene a mahimo awo’. Vaavo mwene Salomoni aasuwenle awe mwaha owo aahiphavela omwiiva Yerobowamu! Yerobowamu aahitthyawela wEjiitu. Nuuvira okathi Salomoni aahikhwa, nto mwanawe, Robowamu aahiheliwa emwene. Yerobowamu aahoona wira aahaana otthikela wIsarayeli.

Makhulupale a wIsarayeli yaahimuleela Robowamu wira: ‘Mwaaweettihaka saana atthu ala, anoowiiwelelakani’. Masi amiravo yeettana awe Robowamu yaahimuleela so: ‘Mutepe waahaaxa ni waakhanyererya ovara miteko soovila!’ Robowamu aahitthara miruku aavahiwe awe ni amiravo ale. Owo aahitepa waahaaxa atthu nto awo yaahimurukunuwela. Awo yaahimuthanla Yerobowamu okhala mwene a mahimo 10, yaawo muhoolo mwaya yaasuweliwe okhala omwene wa Isarayeli. Mahimo makina manli yaawo yaasuweliwa okhala omwene wa oYuda, yaahivikaniha omwiiwelela Robowamu. Nto mahimo 12 a wIsarayeli yaahikawanyiwa.

Yerobowamu khaaphavela wira atthu awe eroweke okokhorela oYerusalemu, weiwo waalamuleliwa ni mwene Robowamu. Munnisuwela nthowa naya? Nthowa noowi Yerobowamu aatthokelela wira atthu ale yammurukunuwela ni yaammukhaliherya Robowamu. Vano aahaapaka axinyompe anli a eweero, ni aahaaleela atthu awe wira: ‘OYerusalemu orakamawo, mukokhoreleke vaava. Atthu yaahipacerya waakokhorela amwaanyompe ale a eweero ni yaahimuhiya Yehova.