Awo Khiyuuramme Ohoolo wa Elatarato

Ovinre ene okathi nuumala Mwene Nabukhodonosori oloherya elatarato, aahipakiha elatarato awe yuulupale ya eweero. Owo aaheemexa nipuro nowaataleya na oDura. Nto aahaathukumanya makhulupale a mulaponi, vamosa ni Xadraki, Mexaki, ni Abedi-Nego ohoolo wa elatarato eyo. Mwene aahihimya wira: ‘Okathi onrowa anyu wiiwa erumaka malope, axittaattha, ni mapetta, muhaana wuurama ohoolo wa elatarato! Mwaahitthune, munooriheliwa naananoru munlittini na mooro’. Niireke aHeeberi ale araru yaarowa okokhorela elatarato ele, aahiiso yaarowa omukokhorela Yehova paahi?

Nuumala-vo, mwene aahiruma wira soopiwe ikaruma sa masipo. Atthu otheene yaahikokhora ohoolo wa elatarato ele, masi Xadraki, Mexaki ni Abedi-Nego khiyaakokhonre. Atthu akina yaahaaweha ni yaahimuleela mwene wira: ‘AHeeberi ale araru annikhootta okokhorela elatarato anyu’. Nabukhodonosori aahiruma oroweliwa amiravo ale ni aahaaleela wira: ‘Vano kinimoovahani ekwaha yanenli wira mukokhorele elatarato ela. Mwaahitthune, kinimoorihelani munlittini na mooro. Khuuvo muluku oniwerya owaakiheryani mmatatani mwaka’. Awo yaahimwaakhula wira: ‘Hata munivekelaka-tho hiyo khaninwiiwelelani. Muluku ahu onoowerya onoopola. Masi hata ahinoopolaka, nyuwo mwene musuwelexe wira hiyo khaninkokhorela elatarato’.

Vano Nabukhodonosori aahitepa onanariwa. Nto aahaaleela anamuteko awe wira: ‘Haya nvihihe nlitti na mooro ikwaha 7 ovikana mahiku makina!’ Nuumala-vo, aahaaruma anakhotto awe wira: ‘Mwaatthuke alopwana awo araru ni mwaarihele mmooroni!’ Nlitti na mooro naahiviha vanceene mpakha owiiva anakhotto ale yaahunle. AHeeberi ale araru yaahimorela eriyari ya mooro. Okathi Nabukhodonosori aathurumenle awe munlittini mme, aahiwoona alopwana 4 yeettaka vamooroni masi khiyaapaheya. Owo aahoova vanceene ni aahaakoha arumeyi awe wira: ‘Hiyo khinaarihenle alopwana araru vamooroni? Masi miyo kinniwoona alopwana axexe. Aneexexe onlikana ni nlaikha!’

Nabukhodonosori aahaattamela nlitti nlo ni aahikhuwela ahimyaka so: ‘Mukhumelase ota nno, nyuwo arumeyi a Muluku a wiirimu!’ Atthu otheene yaahitikiniheya vaavo yanweha aya Xadraki, Mexaki, ni Abedi-Nego akhumaka vamooroni ehaakhumelenle etthu yootakhala. Irutthu saya, ikharari saya ni ikuwo saya khisaapantte mooro, hata awo khiyankha mwiixi.

Nabukhodonosori aahihimya so: ‘Attottopeliwe Muluku a Xadraki, Mexaki, ni Abedi-Nego. Muluku owo ooruma nlaikha nawe khuwoopola. Khuuvo onilikana ni owo’.

Moolikanasa ni aHeeberi ale araru, niireke munniphavela okhala oororomeleya wa Yehova hata sookhumelelakani mixankiho?