Iprofesia Sinnooniherya Wira Biibiliya Tekeekhai
‘Apwiya Muluku anyu àmaliherya molumo othene sahimyalyaya, . . .khanivo nulumo nihimalelihiwe, nnákhala nimosa’.—YOXUWA 23:14.
BIIBILIYA ONIVIRIKANA SAI NI ILIIVURU SIKINA? Itthu saahimmwa ni ihako sa khalai wala oraakulu, khisatthokiheya wala ororomeleya, etthu emosaru eyo enniireya ni ihako sa mahiku ala. Atthu aniloherya wala ohimya sa muhoolo, anniwerya opaka eyo nuumala woona itthu siniiraneya vano. Masi, vannaarikela ohimya vahinatthi etthu enrowa wiiraneya iyaakha sinceene muhoolo. Nto iprofesia sa Biibiliya sinihimya itthu sootthokiheya, nave sotheene sinniiraneya hata itthu sipacenrye ‘khalai olaleiwa sihinatthi okhumelela’.—Yesaya 46:10.
MWA NTAKIHERYO: Eseekulu 6 A.E.C., Daniyeli aahoonihiwa moolohani moota Gresia aarowa awe oxintta mowaakuveya omwene wa Medo-Persia. Aahoonihiwa-tho wira mwene oGresia omalakaru ‘okhala mulupalexa’ omwene awe ‘wamunteya’. Nto tani aarowa okela opuro awe? Daniyeli onilepa so: ‘omwene owo onokawanyeya okhale omwene mixexe: vano khunrowa okhala wowerya ntoko omwene owo wopajerya’.—Daniyeli 8:5-8, 20-22.
ELE ENIHIMYA AYA ALIPA OOLEPA SOWIIRANEYA: Nuumala iyaakha 200 Daniyeli ohimmye ene, Alexandre Muulupale aahikhala mwene oGresia. Eriyari ya iyaakha 10, Alexandre aahixintta omwene Muulupale wa Medo-Persia, khincererya mittetthe sa omwene awe, okhuma oGresia mpakha muro Indo (vano elapo ya Paquistão). Masi, mootutuxerya Alexandre aahikhwa orineene iyaakha 32. Wanikisa waya, ekhotto yaawaniwe wIpsos Asia Menor yaahikawanya omwene muulupale wa Alexandre. Ahooleli axexe yaawaninhe ekhotto ele yaahikawana ipantte sa Omwene ole wa Alexandre. Masi khuuvo hata mmosa wa ahooleli ale axexe aalikana ni owerya wa Alexandre.
MUNOONELA SAI? Niireke yookhala eliivuru ekina enihimya itthu vahinatthi moota owo khiiraneya tthiri? Wala niireke eyo enooniherya wira tthiri Biibiliya khonlikana ni iliivuru sikina!
[Eponto yuulupale epaaxina 4]
“Biibiliya ookhalana iprofesia . . . Sinceene, nto khivanweryaneya sotheene iyo wiiraneya mekhaya paahi”.—A LAWYER EXAMINES THE BIBLE, ELEMPWE NI IRWIN H. LINTON
[Masu a elatarato epaaxina 4]
© Robert Harding Picture Library/SuperStock