‘Ekumi Yohimala Ti Ela’

“Vano, ekumi yohimala t’ila: wosuwelani nyuwo, mukhanle Muluku mmosáru èkekhai, n’omusuwela Yesu Kristu, yowo omurummyanyu”.​—YOHANI 17:3.

OSUWELA onnoopola ekumi. Nouhou mwaana a miyeeri 10 aahiphwanya oretta, nto amamawe yaawo anivara muteko hospitaali ya oNiger yaahisuwela etthu yoopaka. Maama ole, aahitakaaha esuukhiri, maakha ni maasi ooloka, khunwuriha. Moovarihana ni UNICEF, “osuwela etthu yooreerela opaka ni waakuvela orowa hospitaali, waahoopola ekumi ya mwaana ole”.

Moolikanasa, osuwela masu a Biibiliya onnoopola ekumi. Moise, mulipa-oolepa eliivuru yoopacerya onihimya so: “Tthiri molumo ala khahiyo molumo òthanyeya: yawo t’ikumi anyu. Yala pahi t’antthuna wokhalihani mahiku manjene”. (Otumererya 32:47) Niireke Biibiliya onniwerya tthiri wuncererya mahiku ahu? Onikhaliherya sai ekumi ahu?

Myaha mithanu sivinre sa erevista ela, sihooniherya wira Biibiliya khonlikana ni eliivuru ekina. Iprofesia sawe ti soororomeleya, itthu sinihimya awe ti sekeekhai, nave sinnivarihana ni siensia. Iliivuru sa Biibiliya ti sowiiraana, ni sinnivaha miruku sooloka. Itthu iyo sinnimwiiriha Biibiliya ovirikana ni iliivuru sikina. Okhala wira Biibiliya onnihimya sa ekumi yoohimala, khamunoona okhala vooreerela omutokosa saana?

Ninnoovekelani omusoma Biibiliya, wira moone moota osuwela wekeekhai onrowa aya woophwanyihani murettele ni ohakalala vano ni muhoolo. Anamoona a Yehova anniphavela wookhaliheryani omwiiwexexa saana Biibiliya.

[Ekaaxa/Elatarato epaaxina 9]

Tthiri Biibiliya mekhawe paahi, tonaakhula makoho maalupale anipaka ahu, ntoko ala:

• Nikhalenleni valaponi-va?

• Xeeni ohaawa osaren’ya aya mulaponi?

• Niireke ale anaaphenta ahu akhwiiye aakhalana nlipelelo?

Munoophwanya moota Biibiliya onaakhula awe makoho ala muliivuruni ekumiheriwe ni Anamoona a Yehova. Biibiliya Oniixuttiha ExeenI Tthiri?