Onnivareleya Muteko Mahiku Ala
‘Masu anyu ti muthuko onikettiha, onimwalela ephiro enviraka’.—ESALIMO 119:105.
BIIBILIYA ONIVIRIKANA SAI NI ILIIVURU SIKINA? Iliivuru sinci pooti wooniwaka oreera, masi vannirika ophwanya-mo miruku sootepexa oloka onvikana Biibiliya. Iliivuru sa malakiheryo a mahiku ala, sinivekela olokiheriwa khuta okathi. Masi Biibiliya onihimya so “sothene silempwe khalayi, silepeliwe wira nixuttihiwe”.—aRoma 15:4.
MWA NTAKIHERYO: Hata ohikhanle eliivuru ya malakiheryo a ekumi, Biibiliya onnivaha malakiheryo a moota wookhalana ekumi saana. Mwa ntakiheryo owo onihimya so: “Murima womàla okumi w’erutthu”. (Miruku 14:30) Onnihimya-tho wira: “Mutthu onìsupuwelela pahi, onnìkhalela mmansawe: mwatthuna onvaha miruku, onnoviruwelani”. (Miruku 18:1) Biibiliya onihimya wira: “Mulipa òvaha onoreriwa onvikana mulipa òvahiwa”.—Miteko 20:35.
ELE ENIHIMYA AYA ALIPA OOTOKOSA ITTHU: Okhala mutthu oowiimaaliha, oopatthaneya ni ovaha, onnikhaliherya okhalana ekumi yooloka. Eliivuru The Journal of the American Medical Association, eni: “Mutthu oowaakuva onyema ni oowali vanceene, okumi awe khonlipa-lipa, owo pooti okhwa mwaha wa oretta wa murima, onvikana mutthu oowiimaaliha”. Yootokosa epakiwe wAustralia iyaakha 10, enihimya wira atthu owunnuwela arina “apatthani ooloka ni oororomeleya”, waaniheryasa ti atthu ahinaakuva okhwa. Eyaakha ya 2008, atthu anitokosa itthu elapo ya oCanada ni Estados Unidos yaahimmye so: “Waakhaliherya akina orumeelaka musurukhu awe onniphwanyiha ohakalala, moovirikana ni olya musurukhu mekhawe”.
MUNOONELA SAI? Niireke mwaarowa ororomela, miruku sa ekumi sinikhuma muliivuruni elempwale khalaixa erina iyaakha sowiiraka 2.000? Wala niireke eyo enooniherya wira tthiri Biibiliya khonlikana ni iliivuru sikina!
[Eponto yuulupale epaaxina 8]
“Miyo kinoona wira Biibiliya ookhalana oowerya . . . mwaha wa malakiheryo awe ooloka aniloola ekumi”.—HOWARD KELLY, M.D., FOUNDING FACULTY MEMBER OF THE JOHNS HOPKINS UNIVERSITY SCHOOL OF MEDICINE