Iliivuru Sa Biibiliya Ti Sowiiraana

Eprofesia ‘khetonko okumihiwa n’utthuna w’atthu masi atthu ale, yalavunle ni nsina na Muluku, yanettihiwa ni eroho yowarya’.​—2 PEDRU 1:21.

BIIBILIYA ONIVIRIKANA SAI NI ILIIVURU SIKINA? Iliivuru silempwe okathi waalempwa Biibiliya, ikwaha sinceene sinnivirikana ohimya waya myaha. Iliivuru silempwale ni atthu oovirikana, opuro woovirikana, ni okathi woovirikana, ovila wiiraana. Nto, Biibiliya onihimya wira iliivuru sawe sotheene 66, Mwaneene ori mmosa, masi sotheene ti sowiiraana.​—2 Timótheyo 3:16.

MWA NTAKIHERYO: Moise, makampusi a eseekulu 16 , A.E.C, aahilepa muliivuruni yoopacerya ya Biibiliya wira, waamukhala ‘osùlu’ waarowa owoopola apinaatamu. Eliivuru eyo yaahihimya wira osuulu owo waarowa okhuma emusi ya Abrahamu, Isakhi ni Yakobe. (Maphattuwelo 3:15; 22:17, 18; 26:24; 28:14) Nuuvira iyaakha 500, profeta Natani aahihimya wira osuulu owo waarowa okhuma emusi ya omwene wa Davidi. (2 Samuweli 7:12) Nuuvira iyaakha 1.000, murummwa Paulo aahitthokiherya wira osuulu owo, ti Yesu ni ekrupu ya atthareli awe oothanliwa. (aRoma 1:1-4; aGalasia 3:16, 29) Nto, wanikisa wa eseekulu yoopacerya,  E.C., eliivuru yookiserya ya Biibiliya yaahihimya wira ale yiirela mpantta osuulu owo, yaarowa omulaleya Yesu valaponi wira owo oohihimuxiwa khurowa wiirimu, ni onrowa olamulela naawo iyaakha 1.000. Atthu awo athanliwe ntoko osuulu, anrowa ompwetexa Diabo ni owoopola apinaatamu.​—Wisupulula 12:17; 20:6-10.

ELE ENIHIMYA AYA ALE ANIMUTOKOSA BIIBILIYA: Nuumala otokosa iliivuru 66 sa Biibiliya, Louis Gaussen, aahitikiniheya khuhimya so: “ovarihana waya iliivuru iya silempwale etthu yowiiraka 1.500 ni alipa-oolepa oovirikana, . . . enooniherya wira awo yaarina yoolakela emosa, etthokiheryaka oratteene voohimya sa woopola wa Mwaana a Muluku, hata yahaasuwela ele yaarowa wiiraneya”.​—Theopneusty—The Plenary Inspiration of the Holy Scriptures.

MUNOONELA SAI? Niireke vannikhweya eliivuru emalinhe iyaakha 1.500 elempwaka ni atthu oowiiraka 40 oovirikana okhala yoovarihana ni yoororomeleya? Wala niireke eyo enooniherya wira tthiri Biibiliya khonlikana ni iliivuru sikina!

[Eponto yuulupale epaaxina 7]

“Iliivuru iya satakaahiwa, sinikhala eliivuru emosa . . . Khiivo eliivuru ya niinano enlikana wala omwaattamela Biibiliya, owo ori mekhawe paahi”.​—THE PROBLEM OF THE OLD TESTAMENT, ELEMPWE NI JAMES ORR