Tekeekhai Voohimya Sa Siensia
‘Kiholepelani ikano sosareya miruku ni osuwela, wira nwerye wixuttiha ekekhai yothene’.—MIRUKU 22:20, 21.
BIIBILIYA ONIVIRIKANA SAI NI ILIIVURU SIKINA? Iliivuru sinceene sa khalai saanooniherya muupuwelelo woohifai ni wowoopiha, yoowo siensia a vano onooniherya awe okhala ethiru. Hata mahiku ala, ale anilepa iliivuru ahaana olokiherya ele yaalempe aya khalai wira elikaneleke ni itthu sisuweliwe niinano. Masi Biibiliya onihimya wira uupuxeriwe ni Mpattuxa, tivonto Nuulumo nawe vaniphwanela aya ‘okhala mahiku othene’.—1 Pedru 1:25.
MWA NTAKIHERYO: Nlamulo na Moise nanaaruma anaIsarayeli wira ethipeleke mavi vathi ‘ota wa maxaxa’. (Otumererya 23:12, 13) Akhala wira yaahinvara mwaamunama wala mutthu ookhwa, anaIsarayeli yahaana onyawa. (Onamukuttho 11:27, 28; Mothakoni 19:14-16) Okhuma okathi ole anamakuttula (anamaretta) yanvalaanyiwa ni atthu akumi, mpakha okathi wa ovareriwa saana wira yooniwe akhala wira khiyaarowa waaraviha akina.—Onamukuttho 13:1-8.
ELE ENIHIMMWA VANO NI ALE ANISOMA MOOTA WOLOOLA IRETTA: Okhapelela saana ikokhola, onyawa, ni waavalaanya aretta onnivikaniha okhala enamuna enikhaliherya omala-maliha iretta. Akhala wira khivakhanle isintina wala ilatrina sipakiwe saana, nikhuuru na Centros de Controle e Prevenção de Doenças, EUA, (CCPD) nintumererya so: “Orakamelana waya opuro woonya ni opuro ori maasi ovikaneke imeturu 30, nto mavi awo athipeliweke vathi”. Organização Mundial de Saúde onihimya so: Akhala wira atthu annithipela saana mavi, awo onoowerya ovukula oretta wowooporari etthu yowiiraka 36 pursento. Iyaakha sihinivikana 200 sivinre, Mameediko manceene yahoonela wira awo yanaaraviha iretta aretta akina, mwaha woohinyawa nuumala ovara murutthu. Nto CCPD nlelo onihimya wira onyawa ‘ti etthu enikhaliherya ohaaraviha iretta akina’. Sai voohimya sa waavalaanya anamakuttula wala ale arina eretta ekina? Niinaano-va, erevista ekina ehimmye so: “Ekhumelelakaru ekwerere, waavalaanya aretta pooti okhala etthu enitthuneya wira ekwerere eyo ehimwareele mmuttettheni”.
MUNOONELA SAI? Niireke vanniweryaneya eliivuru ekina yowaarya ya khalai ovarihana saana ni siensia a vano? Wala niireke eyo enooniherya wira tthiri Biibiliya khonlikana ni iliivuru sikina!
[Eponto yuulupale epaaxina 6]
“Khuuvo ohinikuxeya murima ni Biibiliya voohimya sa mweettelo wooratta okathi wa Moise”.—MANUAL OF TROPICAL MEDICINE, ELEMPWE NI DRS. ALDO CASTELLANI NI ALBERT J. CHALMERS