Mweetteke Saana Ntoko Atthu A Omwene Wa Muluku!

‘Mwetteke sana, ntoko mutthu elapo yeyo’.​—AFIL. 1:27.

MUNNIWERYA WAAKHULA?

Tani anikhala atthu a Omwene wa Muluku?

Nipake exeeni wira niixutte: nttaava, sowiiraneya ni malamulo a Omwene owo?

Atthu a Omwene anooniherya sai wiiwelela malamulo a Muluku?

1, 2. Xeeni miruku sa Paulo saarina aya yootaphulela yuulupale wa maKristau oFilipi?

MURUMMWA Paulo ahaatumererya anna a muloko woFilipi ‘wettaka sana ntoko simphwanelelaya ehapari yorera’. (Mmusome aFilipi 1:27.) Moolumo a eKriki yaarumeeliwe ni Paulo oowi: “Mwetteke sana” pooti otaphuleliwa-tho so: “Mweettelo anyu okhaleke ntoko mutthu a elapo yeeyo”. Masu ala yaahikhalana efaita yuulupale wa muloko ole woFilipi. Nthowa xeeni? Vanikhala ntoko wira atthu yaakhala esidade ya oFilipi, yooniwa okhala ntoko atthu ooRoma. Atthu oFilipi vamosa ni atthu akina yaakhala ilapo sa Olamulelo woRoma yaanivaha efaita yuulupale, ohimmwa okhala muRoma.

² Eyo yaaniwiiriha maKristau oFilipi, woonaka wira yahikhalana eparakha yuulupale. Tivonto murummwa Paulo aahiwuupuxerya maKristau oFilipi wira elapo aya eri “wirimu”. (aFilipi. 3:20) Awo khahiyo yaari atthu a omwene wa apinaatamu, masi atthu a Omwene wa Muluku. Ntoko siisaale saakhapeleliwa aya saana mwaha wookhala atthu ooRoma, Omwene wa Muluku waarowa-tho waakhapelela.​—aÉf. 2:19-22.

3. (a) Tani arina eparakha ya okhala atthu a Omwene? (b) Itthu kavi sinrowa ahu othokorerya?

³ Masu oolipiha a Paulo oowi: ‘mwetteke sana ntoko atthu a elapo yeyo’, wanipacerya anivareleya muteko wa maKristau anrowa olamulela ni Kristu wiirimu. (aFil. 3:20) Ohiya-vo, annivareleya-tho muteko wa ale anrowa olamuleliwaka valaponi ni Omwene wa Muluku. Nthowa xeeni? Mwaha woowi maKristau otheene owiivahererya arina Mwene mmosa, Yehova, nave otheene aneettela malamulo mamosaru. (aÉf. 4:4-6) Olelo va anamunceene anniimananiha wira yeemereriwe okhala atthu a elapo yoovuwa. Eyo ehaana oniirihaka ovahaka efaita yuulupale okhala wahu atthu a Omwene wa Muluku! Wira ninnuuherye oxukhurela eparakha erina ahu, niwehe olikana orivo, itthu sinivekeliwa wira mutthu eemereriwe ni kuvernu aapinaatamu okhala a elapo yeeyo, ni ele enivekeliwa wira okhale mutthu a Omwene wa Muluku. Ninrowa othokorerya itthu tthaaru sinivekeliwa ahu opaka, wira nikhale atthu a Omwene wa Muluku.

ITTHU SINIVEKELIWA WIRA MUTTHU OKHALE A ELAPO YEEYO

4. Exeeni ekhanle nttaava nootteela, nto ‘ninlavula’ sai nttaava nno?

⁴ Wiixutta nttaava. Malamulo a ikuvernu sikina aniruma wira namurwa yoole oniphavela okhala mutthu a elapo yeeyo, ohaana wiixutta nttaava na elapo eyo. Pooti mutthu aakhuleliwe ene okhala a elapo yeeyo, owo ahaana ovikaniha olimalela saana nttaava na elapo eyo. Mutthu owo pooti waakuva wiixutta moota woolavula nttaava nno, masi pooti ovira okathi munceene wira alimalele oromola saana khuta moolumo a nttaava nlo. Moolikanasa, soovekela sa Omwene wa Muluku siniruma wira atthu awo yiixutte elavulelo esya yeeyo Biibiliya onihimya awe okhala ‘iyano sorera’, eyo piiyo, nttaava nootteela. (Mmusome Sofoniya 3:9) Nttaava xeeni nnihimmwa-va? Anihimmwa masu ekeekhai a Muluku ni anatiri awe ari mBiibiliyani. Ninnilavula ‘nttaava nooloka’ vaavo vaneettela ahu malamulo a Muluku. Atthu a Omwene wa Muluku pooti mowaakuveya oxutta itthu soopacerya sa Biibiliya, nto khubatiziwa. Masi, hata nuumala obatiziwa, awo ahaana wiimananihaka ‘olavulaka’ saana nttaava nooreera. Moota xeeni? Khula mmosa a hiyo, ohaana oweha itthu xeeni nniixutta ahu mBiibiliyani akhala wira ninneettela.

5. Xeeni vanitthuneya ahu wiimananiha wiixutta sowiiraneya sa nikhuuru nootthokiheya na Yehova?

⁵ Osuwela sowiiraneya sa elapo eyo. Ikuvernu sikina sa apinaatamu wira namurwa eemereriwe okhala a elapo yeeyo, onnitumereriwa osuwela itthu sikina sa kuvernu siiranen’ye elapo eyo. Moolikanasa, yaale aniphavela okhala atthu a Omwene ahaana wiixutta saana itthu sa Omwene wa Muluku. Moone ntakiheryo na anamwane a Kore yaawo yaavara muteko mpaani mwa Muluku wIsarayeli. Awosa yaanisiveliwa vanceene okhala nipuro nookokhorela oYerusalemu weiwo yaalavula aya sowiiraneya sa nloko nne. Etthu yaasivela khahiyo waari oreera wa maluku wala alukamasa a empa eyo, masi waari mwaha wa okhala opuro woomulompa Yehova. Yerusalemu waari ‘muttetthe wa Mwene mulupalexa’ Yehova, opuro yoowo aakokhoreliwa awe. Nave waari opuro wiixuttiwa aya Malamulo a Yehova. Amutakihaka Muluku oreera murima, Mwene aakhala oYerusalemu taalamulela atthu a Muluku. (Musome Esalimo 48:2, 3, 10, 13, 14.) Nto niireke ninnaatakiha atthu awo wira nisomeke itthu siniiraneya mmulokiheryoni mwa Yehova? Akhala wira munniixutta sowiiraneya sinci sa nikhuuru nootthokiheya na Muluku ni moota Yehova onaakhaliherya awe atthu awe, nto munoosuwela saana Omwene wa Muluku. Ohiya-vo, ophavela wanyu olaleya ihapari sooreera sa Omwene onrowa wunnuwa.​—Yer. 9:24; Luka 4:43.

6. Xeeni Muluku onniruma awe wiixutta ni wiiwelela malakiheryo ni malamulo awe?

⁶ Osuwela ni weettela malamulo. Ikuvernu sa apinaatamu sintumererya wira khula mutthu onikhala elapo eyo ohaana osuwela ni weettela malamulo a elapo eyo. Eyo etthu yooloka, tivonto, Yehova oniphavela wira nihaana wiixutta ni wiiwelela malamulo ni malakiheryo awe wira nikhale atthu a Omwene awe. (Yes. 2:3; Yoh. 15:10; 1 Yoh 5:3) Malamulo aapinaatamu annirukunuxiwa, masi malamulo a Yehova ‘torera’ ni toomalela khanrukunuxiwa. (Esal. 19:7) Niireke wira ninnihakalala osoma Nuulumo na Muluku? (Esal. 1:1, 2) Wira niixutte malamulo a Muluku nihaana osomaka. Wira mutthu osuwele etthu ohaana wiixutta mmensawe.

ATTHU A OMWENE ANNIPHENTA MALAMULO A MULUKU

7. Mweettelo xeeni anikhalana aya atthu a Omwene wa Muluku?

⁷ Okhala atthu a Omwene, khahiyo osuwela malamulo awe paahi, masi nihaana wiiwelela ni murima wotheene malamulo a Muluku. Atthu anceene anilamuleliwa ni ekuvernu ya apinaatamu anihimya wira anneemererya malamulo a elapo anikhala aya. Masi okathi ahinsiveliwa aya wala ahiniwehiwa aya, awo khaniiwelela malamulo awo. Ikwaha sinceene, awo aniphavela ‘wasiveliha atthu’ ale anilamulela paahi. (aKol. 3:22) Atthu a Omwene wa Muluku mweettelo aya ti wootepexa oloka. Moohakalala ninnimwiiwelela Muluku pooti nihooniwaka ni atthu akina. Mwaha wa xeeni? Mwaha wa omphenta Muluku mwaneene malamulo.​—Yes. 33:22; Mmusome Luka 10:27.

8, 9. Munrowa osuwela sai akhala wira munniphenta tthiri malamulo a Muluku?

⁸ Munrowa osuwela sai akhala wira munniphenta tthiri malamulo a Muluku? Mutokoseke moota onikhala anyu, mwavahiwa miruku voohimya sa itthu siniira anyu sinoosivelani, mwa ntakiheryo: mawarelo ni moota wowiitthokiha. Muhinatthi okhala mutthu a Omwene, waaniheryasa mawarelo anyu yaakhala oohiicalela ni yaaniwiiriha atthu akina osiveliwa ni nyuwo. Vaavo omphenta wanyu Muluku wunnuwa aya, mwahiixutta moota wowiiwariha onimuttittimiha Yehova. (1 Tim. 2:9, 10; 1 Ped. 3:3, 4) Pooti woonaka wira vano munniiwariha saana. Masi, mwaarowa woonela sai, vaakhanle wira mutokweene ohohimeeryani wira iwarelo sanyu sinniwuulihiha muru anna anci mmulokoni? Niireke mwaarowa okhootta miruku iyo, ni othipelela ele eniphavela anyu? Etthu yuulupale ya nlamulo na Omwene wa Muluku ori omutakiha Kristu. (1 Ped. 2:21) Voohimya sa ntakiheryo na Yesu, murummwa Paulo ohimmye so: “khula mutthu aphaveleke omusiveliha mukhw’awe mwa itthu sorera, wira amukhomalihe wamini. Kristu mwanene khaphavenle samusivela”. (aRom. 15:2, 3) Wira okumiherye murettele mmulokoni, muKristau ooloka onniimananiha opaka itthu wira ahaakhumulihe akina.​—aRom. 14:19-21.

⁹ Nkahaya muthokorerye voohimya sa moonelo ahu enoka ni ekasamento. Yaale ahikhanle atthu a Omwene wa Muluku, anneemererya wira mutthu aphavela vale pooti orupihana alopwanaru wala athiyanaru, oweha epornografia; oraruwa ni omwalana. Atthu a Omwene wa Muluku aahiya mweettelo woohileeleya, ni mweettelo wa otthara murima aya paahi. Nnaamwi maKristau akina khalai yaarina mweettelo woohiloka, masi vano anneettela sooruma sa Muluku voohimya sa enoka ni ekasamento, nto annoona okhala yoovaha enikhuma wa Muluku. Ale aneemererya malamulo a Yehova ni murima wotheene eneettela saana, annivaha efaita malamulo awo, masi ale arina mweettelo wa onamuttompe khanikhala atthu a Omwene owo. (1 aKor. 6:9-11) Masi, ninnisuwela-tho wira murima olavilavi. (Yer. 17:9) Nto atthu a Omwene annihakalala yaalopoliwaka wira evikaniheke weetta saana.

ATTHU A OMWENE ANNIIWELELA SOOLOPOLA

10, 11. Soolopola xeeni sinikumiheriwa ni Omwene wa Muluku, nto nyuwo munoonela sai?

¹⁰ Ikuvernu sa apinaatamu ikwaha sikina sinnaalopola atthu voohimya sa soolya ni murette woohiloka. Masi khahiyo wira soolya wala khula murette ti woohiloka. Nto, akhala wira murette wala yoolya yookhalana etthu yoowoopiha, kuvernu onnaalopola atthu wira ehilye murette owo wala yoolya eyo. Eguvernu yaahaalopole, enooniherya wira khenaathokorerya saana atthu aya. Moolikanasa, Omwene wa Muluku onnaalopola vanceene atthu aya voohimya sa moota woosyaka mweettelo woohiloka ni itthu sikina. Mahiku ala Internet ennaakhaliherya atthu ovaanela, osoma ni otthekula. Nikhuuru nootthokiheya na Muluku ninnivara miteko sinceene nirumeelaka Internet. Masi aWeb site anceene annikumiherya mweettelo woohiloka ni ohonona mikhalelo sa omunepani. Iweb site seiye sinooniherya epornografia, tisoowoopiha wa atthu yaale aniphavela wataana ni Muluku ntoko atthu a Omwene. Ovinyerya khalai, murumeyi oororomeleya onninlopola wira nisyakeke isite iyo sa Internet. Ninnixukhurela malopolo awo anilipiha waamini wahu!

¹¹ Mahiku ala sookhala-tho isite sikina sa Internet soovuwa sinireerela ahu orumeela, nakhalana ephoole yuulupale. Masi isite iya siniihaniwa redes sociais sa Web site, sinoowerya-tho ohonona mweettelo wooloka. Maana sinnimwiiriha mutthu okhalana apatthani oohiloka. (1 aKor. 15:33) Hiyo pooti wiikoha akhala wira mulokiheryo wa Muluku wookhalana malakiheryo voohimya sa isite iyo isya. Niireke munnisoma iliivuru sinikumiheriwa ni murumeyi oororomeleya seiyo sinihimya moota woosyaka iweb site sa redes sociais? Tthiri waarowa okhala othoiwa miruku otthukula isaite iyo mutthu ohinatthi osoma masu oopaceriha!a Opaka eyo onlikana ni olya murette woowereya, mutthu ohinatthi osoma malakiheryo ene.

12. Nthowa xeeni oryaaya mweettelo woololo ohiiwelela olopoliwa?

¹² Yaale ahiniiwelela soolopola sa murumeyi oororomeleya, anniikumiherya maxakha ni waahaaxa amusi aya. Atthu akina annivikaniha owehaka epornografia, wala oraruwa nto khiyaiwoka wira Yehova khaniweha eniira aya. Tthiri ololo muulupale wuupuwela wira ninniwerya wiipithiha mweettelo ahu ohoolo wa Yehova! (Mir. 15:3; Mmusome aHéberi 4:13.) Muluku oniphavela waakhaliherya atthu awo, tivonto onnaaruma arumeyi awe oororomeleya wira yaakhaliherye ale atthenke. (aGal. 6:1) Ntoko siisaale ekuvernu ya apinaatamu enimukhootta aya mutthu okhala a elapo yeeyo, mwaha wa miteko sawe sootakhala, nave Yehova onnaakhootta ale anithipelela omutthekela.b (1 aKor. 5:11-13) Masi, Yehova toomoriwa ikharari. Ale anittharuwa ni orukunuxa mweettelo aya, pooti otthikela wataana ni Yehova khiyakhala atthu a Omwene awe. (2 aKor. 2:5-8) Tthiri eri eparakha yuulupale omurumeela Mwene owo oophenta!

ATTHU A OMWENE ANNIVAHA EFAITA WIIXUTTIHIWA

13. Atthu a Omwene wa Muluku anooniherya sai wira annivaha efaita osomihiwa?

¹³ Ikuvernu sa apinaatamu sinniimananiha vanceene wira yaasomiheke atthu aya. Annipaka ixikola siniwiixuttiha atthu osoma ni olepa ni moota woovara miteko saana. Atthu a Omwene wa Muluku, annixukhurela ixikola iyo sa mulaponi ni anniimananiha wiixutta osoma ni olepa wira eweryeke ophwanya muteko. Masi awo annivaha efaita yuulupalexa wiixuttihiwa wuulupale anivahiwa aya ni Omwene wa Muluku. Masi, mmulokoni wa eKristau, atthu anniixutta-tho osoma ni olepa. Anamuyari annitumereriwa wira esomeke nto anaaya ewiriyaneke. Khula mweeri murumeyi oororomeleya onnipaka ipaaxina sinci sa irevista Owehaweha ni Despertai! seiyo sinimutthokiherya Biibiliya. Akhala wira munnisoma khula nihiku ipaaxina siniwerya anyu sa irevista iyo, munoosuwelaka itthu sinceene siniixuttihiwa ni Omwene wa Muluku.

14. (a) Wiixuttihiwa xeeni onivahiwa ahu? (b) Malakiheryo xeeni a Omulompa Muluku Vatthokoni anirumeela anyu?

¹⁴ Khuta esumana atthu a Omwene wa Muluku anniixuttihiwa mmithukumano sa mmulokoni. Mwa ntakiheryo, Exikola ya Orummwa wa Muluku, yeeyo evirinhe iyaakha 60 yiiriwaka olumwenku wotheene, ehaakhaliherya ale anisomihiwa Biibiliya orumeela saana Nuulumo na Muluku. Niireke muhiilepiha exikola ela? Mahiku ala murumeyi oororomela onnitumererya imusi Omulompa Muluku Vatthokoni. Tthiri omulompa Muluku vatthokoni onnilipiha emusi. Nto niireke munnirumeela soolakiherya iyo siri muliivuruni mwahu?c

15. Eparakha xeeni yuulupalexa erina ahu?

¹⁵ Atthu a ekuvernu ya apinaatamu annikhaliherya ekuvernu aya okathi wa myaha sa epoliitika, pooti miteko iyo sivekelaka orowa khuta etthoko. Nto mmukhalelo wuulupalexa, atthu a Omwene wa Muluku annikhaliherya vanceene Omwene owo, elaleeryaka khula empa wala mphironi. Tthiri, ntoko niiwale ahu, mwa yoosoma yoopacerya, erevista Owehaweha enlaleya Omwene wa Yehova, teri erevista yootepa waatta okaiwa waya olumwenku wotheene. Eparakha yuulupalexa erina ahu, ti owiixuttiha akina masu a Omwene wa Muluku. Munniluttuweliwa ovara muteko ola woolaleerya?​—Math. 28:19, 20.

16. Munrowa wooniherya sai okhala mutthu ooloka a Omwene wa Muluku?

¹⁶ Moohipisa Omwene wa Muluku tonrowa okhala ekuvernu enrowa olamulelaka elapo yotheene. Ekuvernu eyo khahiyo paahi enrowa okhapelelaka itthu somunepani, masi-tho sa werutthuni. Niireke wira nyuwo munookhala mutthu ooloka a Omwene wa Muluku? Nto ola okathi wowooniherya tthiri wira mwa mutthu saana. Itthu sotheene sinipaka anyu khuta nihiku, mpakeke wira munvuwihe Yehova, nave wira mooniherye okhala mutthu ooloka a Omwene wa Muluku.​—1 aKor. 10:31.

[Inoota]

[Eponto yuulupale epaaxina 21]

Munniiwelela soolopola sa Biibiliya voohimya sa Internet?

[Elatarato epaaxina 19]

Ntoko aana a Koree, onnoosivelani olompa wekeekhai ni osuwela sowiiraneya saya?

[Elatarato epaaxina 22]

Omulompa wanyu Muluku Vatthokoni, onimwiiraaniha emusi anyu, ni okhala atthu ooloka a Omwene