Mwiimananiheke Okhala Owiiyeviha
‘Tthiri ule ori mwamukhanixa mwa nyuwo othene, yowo t’uri mulupale’.—LUKA 9:48.
MUNNIWERYA OPHWANYA WAAKHULIWA WAYA?
Exeeni enirowa onikhaliherya okhala owiiyeviha?
Inamuna xeeni ole oniiyeviha onikhala awe ‘mulupale’?
Ninrowa wooniherya sai wiiyeviha mukasamentoni, mmulokoni, ni wataana wahu ni atthu?
1, 2. Yoolopola xeeni Yesu aavanhe awe atthareli awe ni nthowa xeeni?
MWAAKHA wa 32 E.C, Yesu aari edistritu ya oGalileya okathi waakhumelenle aya muxankiho. Awiixutti awe yaamunyakulihana ephavelaka omusuwela tani ari muulupale. Mulipa oolepa Evangelyo Luka onihimya so: ‘Awixutti yahikelela ovanyihana t’ani a yawo arowa okhala mulupale. Yesu asuwelaka supuwelaya mmurimani mwaya, ahimukuxa mwanamwane mmosá, ahimwemexa oholo wawe, khwahimerya awixutti awo wira: Ole onimwakhela mwanamwane ola mwa nsina naka, onikakhela miyo. Vano ole onikakhela miyo, onimwakhela ole okirumme. Tthiri ole ori mwamukhanixa mwa nyuwo othene yowo t’uri mulupale’. (Luka 9:46-48) Moopixa murima masi alavulaka moottittimiherya Yesu aahaakhaliherya atthareli awe oweha otthuneya waya wiiyeviha.
2 Niireke wiiyeviha aahimya awe Yesu waari wiiyeviha wa moonelo wa aYuda a eseekulu yoopacerya? Wala waari wiiyeviha wa enamuna ekina? Eliivuru eniihaniwa Theological Dictionary of the New Testament, elavulaka makhalelo a mahihu ale, enihimya so: ‘Khula mwaha waathokoreriwa, nto nikoho naamakela opakiwa naari nla: Tani aari mukhulupale, nto moovarihana ni ovuwa wa khula mutthu, okhala mukhulupale yaari etthu yaatepa ovahiwa efaita.’ Yesu aatumererya atthareli awe wira moonelo aya ovirikaneke ni atthu ale.
3. (a) Ontaphulelani okhala oowiiyeviha, nto xeeni vanixankiha aya wiiyeviha? (b) Makoho xeeni anikhumelela voohimya sa okhala owiiyeviha?
3 Nuulumo na eKriki noowi: ‘wiyeviha’ nintaphulela mutthu yoole onisuwela wira khaniwerya opaka itthu sotheene, owiimaaliha, ohinoona wira tootepa okhala a faita waavikana akina, ni oohitepa ovuwa. Yesu aahimuruuha mwaana ole wira owooniherya atthareli awe otthuneya waya okhala oowiiyeviha ni oowiimaaliha. Yoolopola ele ennivareleya muteko olelo-va wa maKristau ekeekhai ntoko ale a eseekulu yoopacerya. Hiyo pooti woona oxankiha okhala oowiiyeviha mwa inamuna sikina. Makhalelo oopinaatamu pooti oniiriha ophavelaka ovuwa ni wiixinnuuha. Mukhalelo woophavela ohihala ottuli wa elapo ela enikhala ahu, pooti oniiriha okhala a nrima, owali, ni owiiriha akina opaka itthu sinnisivela. Exeeni enrowa onikhaliherya okhala oowiiyeviha? Vaniweryaneya sai mutthu oowiiyeviha okhala muulupale? Inamuna xeeni mookumini mwahu ninreerela ahu wiimananiha wiiyeviha?
“OTHAJIRI WA MULUKU N’ANKHILI AWE N’USUWELA WAWE TI WULUPALE’!
4, 5. Exeeni enrowa onikhaliherya okhala oowiiyeviha? Muhimye ntakiheryo.
4 Muthinto mmosa wa ophavela wiiyeviha ori oweha moota Yehova oryaawe mukhulupale moovirikana ni hiyo. Tthiri ‘khavo onsuwela miruku sawe’. (Yes. 40:28) Alavulaka mikhalelo sa Yehova, murummwa Paulo aahilepa wira: ‘Othajiri wa Muluku n’ankhili awe n’usuwela wawe ti wulupale. Hiyo khaninwerya otaphulela mupuwelo awe, nnákhala osuwela iphiro sawe’. (aRom. 11:33) Ekeekhai wira osuwela wa apinaatamu ohincerereya okhuma vaavale Paulo olempe awe masu ala iyaakha 2.000 sivinre ottuli; masi ekeekhai ya masu ala khevirikanne. Nnaamwi niryeene oosomexa wala oosuwela itthu, nihaana wiiyeviha nisuwelaka wira sookhala miteko ni malakiheryo ahinimala a Yehova anitthuneya ahu oxutta.
5 Osuwela wira miruku ni ankhili a Muluku khanimala, waahimukhaliherya Leoa okhala owiiyeviha. Aryeene mwammiravo, Leo aanisiveliwa vanceene osoma itthu sa siensia. Nto aphavelaka osuwela vanceene mukhalelo wa ephattuwelo ya elapo, aahirowa omusoma astrofísica; (osoma nsuwa, mweeri itheneeri ni itthu sikina). Nto khupacerya woona etthu emosa yuulupale. Owo onihimya so: “Kitthokelelaka itthu saasoma aka, Kaahiweha wira sowiixuttiha sa siensia khasiniwerya osuwela oratteene moota olumwenku okhumelenle aya. Nto kaahihiya omusoma astrofísica, kinasoma malamulo wala idireto”. Nuuvira okathi, Leo aahikhala procurador Distrital, muhoolo mwaya aahikhala mulipa oophuka milattu. Mowaakuveya owo ni amwaarawe, yaahimusoma Biibiliya ni Anamoona a Yehova; khusiveliwa ni ekeekhai mpakha wiivahererya okhala arumeyi a Muluku. Nnaamwi aari mutthu oosomexa, nto exeeni yaamukhalihenrye Leo okhala owiiyeviha? Moohihoverya owo onaakhula so: “Mwaha wa woona wira hata mutthu osuwelaka itthu sinci, nlelo khasireere itthu sinireerela osuwela ni wiixuttihiwa voohimya sa Yehova”.
6, 7. (a) Ntakiheryo xeeni nuulupale Yehova onivaha awe na wiiyeviha? (b) Moota xeeni wiiyeviha wa Muluku ‘onimwiinuwiha’ aya mutthu?
6 Etthu ekina ennikhaliherya wiiyeviha mwaha woowi Yehova toowiiyeviha. Muupuweleke ela: ‘ninvara vamosá muteko’ ni Muluku. (1 aKor. 3:9) Nkahaya muupuwele! Yehova Muluku yoowo okhulupale awe ohinimala onninivuwiha onivahaka eparakha ya orummwa wira nilaleye ihapari sa omwene nirumeelaka Nuulumo nawe, Biibiliya. Nnaamwi Yehova aryeene mulipa oniiriha omela mmiso nnaala ahu ni okhuwari wira wunnuweke, owo onninivaha opuro woottitimiheya mwaha wookhala apatthani awe a muteko. (1 aKor. 3:6, 7) Nla khahiyo ntakiheryo nootepa wunnuwa na wiiyeviha wa Muluku? Tthiri, ntakiheryo na wiiyeviha na Yehova, nihaana onlipihaka wira niixutte okhala owiiyeviha.
7 Ntakiheryo nowiiyeviha na Muluku naahimukhaliherya vanceene nasalimo Davidi. Owo aahimwiipela Yehova ariki: ‘Nyuwo, Apwiya, munnikivaha ikuru, munnikijaliha, munnikilipiha’. (2 Sam. 22:36) Mowiiyeviha Davidi ahinvaha Yehova okhulupale aarina awe wIsarayeli, maana Muluku aanimukhapelela wala aaniiyeviha wira amuthokorerye. (Esal. 113:5-7) Niireke wookhala ovirikana ni hiyo? Voohimya sa mikhalelo, osuwela opaka itthu, miteko soothanleliwa, etthu xeeni mwaakhenle anyu ‘nihivahiwe ahu’ ni Yehova? (1 aKor. 4:7) Mutthu yoole oniiyeviha, tonikhala ‘mulupale’ mwaha woowi onnivahiwa efaita ntoko murumeyi a Yehova. (Luka 9:48) Nkahaya noone moota siniireya aya.
‘OLE ORI MUKHANI WA NYUWO, TORI MULUPALE’
8. Wiiyeviha onnikhaliherya sai mmuloko wa Yehova?
8 Wiiyeviha teri etthu yooloka wira nihakalaleke ni miteko sa mulokiheryo wa Muluku wira nikhaliheryeke miteko sa muloko. Nkahaya moone ntakiheryo na Petra, mwaamwali yoowo oyariwe ni emusi ari Anamoona a Yehova. Aphavela opaka itthu saamusivela owo paahi, Petra aahihiya wataana ni muloko weeKristau. Nuuvira iyaakha, aahitthikela-tho mmulokoni. Vano owo onnihakalala wiirela mpantta mulokiheryo wa Yehova, ni onnisiveliwa okhaliherya miteko sa mmulokoni. Nto vano onoonela sai? Owo onihimya so: “Nto vano kiri tthiri owaani; mikhalelo miili saakithonwe waari osuwela saana wiiyeviha ni weemererya wira nkinsuwela itthu sotheene”.
9. Mutthu oowiiyeviha onoonela sai yoolya ya omunepani onaakhela awe, nto efaita xeeni mutthu owo orina awe?
9 Mutthu oowiiyeviha onnixukhurela soovaha sa Yehova ohela muhina itthu somunepani. Atthu awo annisiveliwa omusoma Biibiliya, erevista Owehaweha ni Despertai!, ni iliivuru sikina sa eKristau. Ntoko arumeyi anceene a Yehova akina oororomeleya, awo ahaana yoolema ya osoma khula eliivuru ehinatthi osuka opuro anipweha aya iliivuru saya. Nailipihaka okhala owiiyeviha orweela mwa osoma iliivuru sinimutthokiherya Biibiliya, nnoowerya wunnuwa momunepani, nave Yehova onoonirumeela saana mmuteko awe.—aHéb. 5:13, 14.
10. Ninrowa wooniherya sai wiiyeviha mmulokoni?
10 Nave yoole ori oowiiyeviha, onnikhala ‘mulupale’ mwa enamuna ekina. Khula muloko annikhala anna aniphwanelela othanliwa ni malakiheryo a munepa wootteela wa Yehova wira awo erumeeleke ntoko axitokweene. Awo anikhapelela mithukumano sa mmulokoni, olaleerya, ni waakhapelela anna ntoko amakampusi. Nooniherya wiiyeviha vaavo nniiwelela ahu malakiheryo, eyo enokumiherya ohakalala, murettele, ni wataana mmulokoni. (Mmusome aHéberi 13:7, 17.) Akhala wira nyuwo mwa mutokweene a mmulokoni wala murummwa oorumeela, khamunoona oreerela waya okhala oowiiyeviha ni omuxukhurelaka Yehova mwaha wa muteko onoovahaaweni moororomeleya?
11, 12. Exeeni enrowa oniiriha okhala a faita mmulokiheryo wa Yehova, nto xeeni eyo erya aya vootthuneya?
11 Ole oniiyeviha tori ‘mulupale’ wala a faita mmulokiheryoni mwa Yehova okhala wira wiiyeviha wawe onnimukhweeherya okhala murumeyi ooloka a Muluku. Yesu ahaatumererya atthareli awe okhala oowiiyeviha mwaha woowi akina yaanikhalana munepa woowiixunnuuha yoowo onooneya vano. Yoolepa ya Luka 9: 46 enihimya so: ‘Awixutti yahikelela ovanyihana t’ani a yawo arowa okhala mulupale’. Niireke vanniloka opaceryaka wuupuwela wira hiyo nootepa oloka, wala na akhulupale waavikana akina? Atthu a mulaponi toowiixunnuha, ni waakhalela nrima akhwaaya. Nto hiyo nisyake makhalelo awo, masi nikhaleke oowiiyeviha. Akhala wira ninniiyeviha, khiyapaka yootthuna ya Yehova, ninrowa waalipihaka ni waahakalaliha annihu ni axirokorihu mmulokoni.
12 Yootumererya ya Yesu okhala oowiiyeviha, tthiri ti yookhaliherya saana. Nto khinnaakhulela wira ti vooloka wiimananiha wira niiyeviheke mmikhalelo sotheene? Nrowe niwehe inamuna tthaaru sa wiiyeviha.
MWIIMANANIHE OKHALA OWIIYEVIHA
13, 14. Moota xeeni mulopwana wala muthiyana onkela awe wiiyeviha, nto eyo enilipiha sai ekasamento?
13 Mukasamentoni. Atthu anceene olelo-va, anithokorerya soophavela saya paahi, mpakha ohonona idireitu sa atthu akina. Nto ole oniiyeviha oneettihiwa ni malakiheryo yaale Paulo annitumererya awe okhalana. Aalepelaka anna ooRoma aariye so: ‘Vano niphaveleke itthu sinniphwanyiha murettele ni sinnilipiherya wamini wahu’. (aRom. 14:19) Mutthu owiiyeviha onnikhalana murettele ni atthu otheene, vanceenexa nuule othelanne awe.
14 Nrowe vano nithokorerye inamuna sa otthekula. Ale athelanne pooti ovirikana soophavela saya voohimya sa moota wootthekula. Waaniheryasa mulopwana pooti omusivelaka okilaathi owaani khiyasoma iliivuru okathi wootthekula. Nto muthiyana pooti omusivelaka orowa weetta, waaxukurya apatthani ni olya. Masi, akhala wira mulopwana ole onnithokorerya yoophavela ya amwaarawe, ohiya soophavela sawe paahi, eyo enoomwiiriha muthiyana owo omuttittimihaka vanceene iyawe. Nave-tho, akhala wira muthiyana owo khanithipelela soophavela sawe paahi, owo onrowa ophentiwaka vanceene ni aiyawe. Ekasamento ennilipa saana akhala wira othene aya toowiiyeviha.—Mmusome aFilipi 2:1-4.
15, 16. Mweettelo xeeni Davidi onittittimiherya awe muSalimo 131, nto hiyo neetteleke sai miruku iyo mmulokoni?
15 Mmulokoni. Atthu anceene mulaponi, anikhala aphavelaka wiihakalaliha paahi. Nto awo khaniwerya owehererya, ni khanipixa murima. Okhala oowiiyeviha, onniniiriha onwehereryaka Yehova. (Musome Esalimo 131:1-3.) Onwehererya Yehova mowiiyeviha, onnikumiherya mareeliho, murettele ni ohakalala. Ti etthu yaamwiiriha Davidi waatumererya anaIsarayeli akhwaawe wira enwehereryeke Yehova Muluku moopixa murima!
16 Nave nyuwo mwanwehereryaka moowiiyeviha Yehova, munoophwanya mareeliho. (Esal. 42:6) Waaniheryasa nyuwo muniphavela ‘muteko worera’, wira ‘mwettiheke’ muloko. (1 Tim. 3:1-7) Nto nyuwo, muhaana wiimananiha vaniwerya anyu wira munepa wootteela wookhaliheryeni okhalana mikhalelo sinireerela wa ole oniphavela okhala mutokweene a mmulokoni. Ankhi akhala wira munnipisa ophwanya iparakha iyo moovirikana ni akina ahinipisa? Ole oowiiyeviha onrowa owehereryaka moopixa murima, avikanihaka omurumeela Yehova wa khula muteko onivahiwa awe.
17, 18. (a) Mareeliho xeeni aniphwanya ahu naalevelelaka ni waattittimiha akhwiihu? (b) Mweettelo xeeni onitumereriwa ni Miruku 6:1-5?
17 Wataana wahu ni atthu akina. Atthu anceene waavila wira: Xontte mukilevelele Masi, arumeyi a Muluku anniiyeviha vaavo aneemererya aya soovonya saya khiyavekela oleveleliwa. Nave awo annilevelelana soottheka saya. Tthiri, wiixinnuuha onnikumiherya okawanyeya; masi olevelelana, onnikumiherya murettele mmulokoni.
18 Okathi mukina, vannitthuneya wiiyeviha nivekaka musammaha wa mutthu mukina, akhala wira yookhala etthu enniiriha ohiiwanana, wala akhala wira khaninwerya okathi yoole opaka etthu yaphavela ahu. Nnaamwi oweryaka ovekela nikhaliheryo wa mutthu mukina, muKristau owiiyeviha onnikupali wira khaniwerya opaka itthu sotheene, ni wira onnivonya.—Musome Miruku 6:1-5.
19. Xeeni otheene ahu nintthuneya ahu oxukhurelaka miruku sa Biibiliya voohimya sa wiiyeviha?
19 Tthiri ninnixukhurela Soolempwa seiyo sinnitumererya wira niiyeveiheke! Nnaamwi ikwaha sikina varowaka onixankiha wiiyeviha, wuupuwelela wataana wahu ni Mpattuxa ni ovaha efaita wiiyeviha wawe onoonikhaliherya wunnuuherya mukhalelo wooloka. Opaka eyo enooniiriha okhala arumeyi a Yehova arina efaita yuulupale. Nto otheene ahu niimananihe okhala owiiyeviha.
[Enoota]
a Masina aaturukiwa.
[Elatarato epaaxina 19]
Yehova onninttittimiha mwaha wa eparakha ennivaha awe ya olaleya ihapari sooreera
[Elatarato epaaxina 22]
Inamuna xeeni sikhanle anyu owooniherya wiiyeviha?