Mukhale Mukhatoni Mwa Yehova Wira Mwaakiheriwe

Yehova ‘onokhumelela wira owane ni maloko, ntoko sawanalya awe khalayi’.​—ZAK. 14:3.

MUNNIWERYA OTTHOKIHERYA?

Onitaphulela exeeni ‘oparuwa wa mwako oliveira’?

‘Ekhato yulupale’ enithoonyerya exeeni, nto ninrowa owerya sai okhala mukhatoni mmo?

“Màsi makumi” anithoonyerya exeeni ni tani anrowa ottottela mureererelo owurya?

1, 2. Ekhotto xeeni yekeekhai eri ohoolo wahu, nto etthu xeeni ehinitthuneya aya opaka arumeyi a Muluku?

NIHIKU 30 na Outubro 1938, atthu anceene wEstados Unidos yaaniwiriyana eprograma ya radio yowaasivela atthu anceene, yeeyo yaahimya myaha sootheiha. Eprograma ya ohiyu ole, yaahimya ihantisi soopakeleliwa sa siensia saalempwale muliivuruni The War of the Worlds. Nto atthu awo khupacerya olaleya muraadioni ahimyaka wira aakhala axiitthu akhuruwenle vathi akhumaka oplaneta Marte, axitthu awo aniphavela opahula ni onyaanya elapo yotheene. Nnaamwi vaahimmwale wira eprograma ele ya raadio waari otthekula paahi, anamunceene yanwiriyana raadio, yuupuwela wira ele yaahimmwa yaari ekeekhai, nto yaahoova vaalupale. Akina yaahipaka etthu wira yiikhapelele ehiphwanyiwe ni axiitthu ale.

² Olelo-va, yookhala ekhotto yowoopiha yekeekhai eri ohoolo wahu. Masi atthu khanicalela. Biibiliya, nuulumo nowuupuxeriwa ni Muluku, aahihimya vahinatthi, sa ekhotto eyo, okhala ekeekhai, ohiya ntoko ehantisi yoopakeleliwa ni siensia. Ekhotto eyo ti Harmagedoni, eyo piiyo, ekhotto ya Muluku enrowa awe opwetexa mukhalelo ola wa itthu soohiloka. (Wis. 16:14-16) Okathi wa ekhotto eyo arumeyi a Muluku valaponi khanrowa owana wira yiixaakihe ni awanani anikhuma eplaneta ekina. Hata vari siiso, awo anotikinihiwa nuuxanka mwaha wa itthu soowuumiha owanoni ni sowoopiha sinrowa wiiraneya mwaha wa ikuru sa Muluku.

3. Eprofesia xeeni enrowa ahu othokorerya, nto xeeni eryaaya yootthuneya?

³ Eprofesia elempwale mBiibiliyani ni eliivuru ya Zakariya, ekapitulu 14, ennivarihana saana ni ekhotto ya Harmagedoni. Nnaamwi elempwaleene iyaakha 2.500 sivinre, eprofesia ela eniira mpantta ikumi sahu. (aRom. 15:4) Itthu sinceene sinihimya aya sinivarihana ni itthu piili; itthu seiye sinaahela muhina atthu a Muluku nuumala otikitheriwa Omwene wa Mesiya, 1914, ni sowiiraneya sinrowa woonaneya muhoolo moohipisa. Mwa eprofesia ela, itthu sinihimmwa sinihela mpuwa ‘okhumelela wa ekhato yulupale’ ni “màsi makumi” anivira. (Zak. 14:4, 8) Ekhato eyo wala nxepa, ti yootepexa otthuneya maana enniwaakiherya ale animukokhorela Yehova. Nto vaavo vaniiwexexa ahu ele maasi makumi enitaphulela aya wa hiyo, ninrowa woonaka otthuneya waya; ohiya wiirela mpantta paahi, masi-tho ophavelaka owurya maasi awo. Wira nittottele mureerelo nrowe nivarerye saana eprofesia ela.​—2 Ped. 1:19, 20.

‘NIHIKU NA [YEHOVA]’ NINNIPACERYA

4. (a) ‘Nihiku’ na Yehova nipacenrye silini? (b) Ohinatthi ophiya 1914, exeeni arumeyi a Yehova yaalaleya aya, nto ahooleli eelapo yoonela sai?

⁴ Ekapitulu 14 ya Zakariya enipacerya ni moolumo ani ‘nihiku n’Apwiya [Yehova]’. (Mmusome Zakariya 14:1, 2.) Exeeni ekhanle nihiku na Yehova? Ti ‘nihiku n’Apwiya’ nenlo nipacenrye okathi yoole olamulelo wa mulaponi okhalihiwa aya wa ‘Pwiya ahu ni wa Kristu awe’. (Wis. 1:10; 11:15) Nihiku nlo naapacenrye 1914, okathi waakhumelenle aya Omwene wa oMesiya wiirimu. Iyaakha sinceene ohinatthi 1914, arumeyi a Yehova yaahilaleya wira ‘okathi w’amalapo’ waarowa omala mwaakha wa 1914, ni wira mulaponi saamukhumelela itthu sahaatonko wiiraneya. (Luka 21:24) Vano maloko a mulaponi yaarowa woonela sai? Amahoolela a ipoliitika ni a itiini, annaanyohola ni waalupattha anamalaleerya oothanliwa a nthiti, nto khiyakhootta wiiwelela soolopola sa okathi wooreerela. Mwaha woopaka eyo, amahoolela awo a mulaponi anninveeha Muluku Oniwerya sotheene, okhala wira anamalaleya awo oothanliwa, arummwale ni Muluku ntoko mambaxadore a ‘Yerusalemu a wirimu’, eyo piiyo, Omwene wa Mesiya yoowo oniirela aya mpantta.​—aHéb. 12:22, 28.

5, 6. (a) Exeeni yaalavuliwe vahinatthi maloko yaarowa aya opaka wira ewane ni ‘muttetthe’ ni ‘atthu a muttetthe’ owo? (b) ‘Atthu yahanle’ anitaphulelani?

⁵ Profeta Zakariya, aahihimya vahinatthi ele maloko yaarowa aya opaka, wira: “Muttetthe [Yerusalemu] onokuxiwa”. Muttetthe ola onithoonyerya Omwene woMesiya. Nto maKristau oowoottihiwa ahanle valaponi-va, takhanle ‘atthu a muttetthe owo’. (aFil. 3:20) Okathi wa Ekhotto Yoopacerya ya Olumwenku, anna oottittimiheya eriyari ya epantte ya Mulokiheryo wa Yehova valaponi, ‘yaahikuxiwa’ wala otthukiwa, khuroihiwa mukhatteya wAtlanta, oGeorgia, E.U.A. ‘Ipa sahikwanyuliwa’, eyo piiyo, anna yahaatthenke vamosa ni akina oororomeleya, yaahithokoreriwa moohixariya ni ohooneliwa othunku. Mwaha wookhoottiha okaiwa iliivuru, awanani ale yahiwiiyerya ottittimiheya ni ovuwa waarina aya maKristau oothanliwa, ntoko alaleyi a Omwene wa Muluku.

⁶ Nnaamwi awanani awo ootupa yaanyohola, waavaanyiha ni waalupattha atthu a Muluku, khiyaawenrye omala-maliha okokhorela wekeekhai. Tthiri ‘yahihala atthu’, nihimye so, yaahikhala epantte ya maKristau oowoottihiwa yoonihenrye ororomeleya, nto khukhootta ‘woomoliwa mmuttettheni’.

7. Mweettelo woororomeleya wa arumeyi oowoottihiwa a Yehova, onivaha ntakiheryo xeeni wa arumeyi a mahiku ala?

⁷ Niireke eprofesia ela yiiranen’ye paahi wanikisa wa Ekhotto Yoopacerya ya Olumwenku? Nnaari. Ikwaha sinceene maloko awo yaarowa owana ni maKristau oowoottihiwa ari valaponi, ni maKristau oororomeleya aniphenta yoolipelela aya okhala valaponi. (Wis. 12:17) Tthiri eyo yahiiraneya okathi wa Ekhotto ya Nenli ya Olumwenku. Nto mweettelo woororomeleya wa arumeyi ale oowoottihiwa a Muluku, onnaalipiha arumeyi a mahiku ala, wira evileleke soweeha sotheene sinaakhumelela; ohela mpuwa ovaanyihiwa onikhuma wa amusi ahinaamini, omutekoni, wala wa ale aneettana aya oxikola, yaale anaanyohola mwaha wa waamini waya. (1 Ped. 1:6, 7) Mahiku ala, khuta opuro onikhala aya arumeyi ekeekhai a Muluku, annitepa ‘olipiherya weettela [munepa] mmosa’ nto ‘khaniwoova awanani aya’. (aFil. 1:27, 28) Nto okhala wira elapo ennaanyokha, ti woowi arumeyi a Yehova anrowa aya ophwanya ntthyawelo?​—Yohani 15:17-19.

YEHOVA ‘ONOKUMIHERYA EKHATO YULUPALE’

8. (a) MBiibiliyani myaako sinithoonyerya exeeni? (b) Ankhi ‘Mwako wa oliveira’ onithoonyerya exeeni?

⁸ Okhala wira Yerusalemu, ti ‘muttetthe’ onithoonyerya Yerusalemu a wiirimu, ‘mwaako olivera ori oholo w’oYerusalemu’, ohaana okhala-tho wa nthoonyeryo. Nto onithoonyerya exeeni? Onrowa ‘oparuwa sai eriyari’ wira okhale myaako miili? (Mmusome Zakariya 14:3-5.) Mbiibiliyani mwaako onithoonyerya omwene wala iguvernu. Ohiya-vo, ntthyawelo ni mareeliho otheene anivarihana ni mwaako wa Muluku. (Esal. 72:3; Yes. 25:6, 7) Tivonto, mwaako wa oliveira yoowo Yehova eemenle awe, epantte enikhuma nsuwa ya Yerusalemu a valaponi, onithoonyerya olamulelo wuulupale wa Yehova, owerya wawe waalamulela atthu otheene.

9. Onitaphulela exeeni oparuwa wa ‘mwako oliveira’?

⁹ Nto okawanyeya wa mwaako wa oliveira onitaphulela exeeni? Okawanyeya wa mwaako yoowo ori epantte enikhuma nsuwa wa oYerusalemu, onitaphulela wira Yehova onnitikitherya olamulelo wa nenli, wala olamulelo mukina. Olamulelo ola wa nenli ti Omwene wa Mesiya, oneettihiwa ni Yesu Kristu. Tivonto Yehova vanilavula awe sa myaako miili sinikhumelela nuumala oparuwa ‘mwako oliveira’ yoowo ori wa Yehova. (Zak. 14:4) Tthiri sotheene iyo ti sa Yehova.

10. ‘Ekhato yulupale’ eri eriyari ya myaako enthoonyerya exeeni?

¹⁰ Vaavo mwaako wa nthoonyeryo oniparuwa aya, nimeya khukhala onikela kuusi, nimeya nikina onikhuma kuusi; inawu sa Yehova sinikhala ipantte soopiili sa myaako iyo. Nto ennikhumelela ‘ekhato yulupale’ eri vathi, eriyari ya metto sa Yehova. Ekhato ela enithoonyerya waakiherya wa Yehova, weiwo arumeyi awe onitthyawela aya vathi va olamulelo awe muulupale ni Omwene wa oMesiya wa mwanawe. Yehova khonrowa weemya wira okokhorela wekeekhai omalamalihiwe. Nto oparuwa wala okawanyeya wa mwaako wiiren’ye silini? Wiiren’ye okathi yoole waatikitheriwa aya Omwene wa oMesiya, wanikisa wa Okathi wa Amalapo, 1914. Okathi xeeni waapacenrye aya arumeyi ekeekhai otthyawela mukhatoni mwa nthoonyeryo?

ONNIPHIYA OKATHI WOOTTHYAWELA MUKHATONI!

11, 12. (a) Otthyaweliwa okhatoni wa nthoonyeryo wapacenrye silini? (b) Exeeni enooniherya wira moono wootupa wa Yehova onniwaakiherya atthu awe?

¹¹ Yesu aahaalopola atthareli awe oriki: ‘Maloko othene animonyokhani mwaha wa miyo’. (Math. 24:9) Onyokhiwa iwo waarowa otepa wooneya, okathi wa mahiku ookiserya a mukhalelo ola wa itthu opacenrye 1914. Nnaamwi olupatthiwa wa maKristau oowoottihiwa wiiranen’ye okathi wa Ekhotto Yoopacerya waari wootepexa otakhala, anyokhani ale khiyaawenrye omala-maliha ekrupu yotheene yoororomeleya. Mwaakha wa 1919 awo yaahikhuma mmikhoyini sa Babilonia Muulupale, olamulelo wa itiini sotheene soowoka. (Wis. 11:11, 12)a Owo ti okathi yaapacenrya aya otthyawa erowaka mukhatoni mwa mwaako wa Yehova.

¹² Okhuma mwaakha wa 1919, ekhato ya Muluku ya ntthyawelo ennivikaniha waasuka arumeyi a Muluku mulaponi motheene. Mwa iyaakha sinceene ilapo sikina sinnikhoottiha ovariwa muteko woolaleerya ni okawela iliivuru sinimulavula Biibiliya sa Anamoona a Yehova. Mpakha mahiku ala, sookhala ilapo sinivikaniha okhoottiha muteko owo. Hata atthu a ilapo sikina yeereryaka omala-maliha, awo khanikhala-khala aweryaka omaliha okokhorela wekeekhai! Moono wootupa wa Yehova onrowa owaakiherya.​—Otum. 11:2.

13. Ninrowa owerya sai ohikhuma mukhatoni mowiipitheya mwa Yehova, nto xeeni vano varya aya vootepexa otthuneya opaka eyo?

¹³ Akhala wira ninrowa onvarexexa Yehova, ni olipiherya ekeekhai, owo ni Mwanawe, eyo piiyo, Yesu Kristu anrowa onikhaliherya; nto khiivo etthu wala mutthu, Muluku enrowa awe omuhiya wira ‘onikakhe mmatatani Mwawe’. (Yoh. 10:28, 29) Yehova onninivaha itthu sotheene sinitthuneya wira niweryeke omwiiwelela owo ntoko Namalamulela Muulupalexa a Olumwenku; ni ovikaniha okhala atthu owiiwelela Omwene wa oMesiya. Tivonto varya aya vootepexa otthuneya ohikhuma mukhatoni moowiipitha, maana okathi wa maxakha maalupale anaattamela, ekhato eyo tenrowa waasuka arumeyi ekeekhai.

NOOPHIYA NIHIKU ‘NOWANA’ EKHOTTO

14, 15. Nihiku Muluku onrowa awe ‘owana’ ekhotto ni awanani awe, etthu xeeni enrowa owiiraneela atthu ari ota wa ekhato enaakiherya?

¹⁴ Nto vaavo vanitepa aya waattamela wanikisa wa mukhalelo ola, Satana onrowa otepaka owana ni arumeyi a Yehova. Tivonto vanrowa aya ophiya nihiku na Muluku wira ‘owane’ ekhotto ni anyokhani awe. Yehova onrowa wiiriha maxakha awo anikumiheriwa ni Satana okhala ookiserya. Nihiku nlo, Namalamulela Muulupalexa a Olumwenku, onrowa wooneya saana okhala Nakhotto oovuwexa ovikana okathi wotheene wa nihiku na ekhotto.​—Zak. 14:3.

¹⁵ Nihiku nlo na ekhotto ya Muluku, exeeni enrowa owiiraneela ale ari ota wa ekhato yuulupale yowiipitheya? Atthu awo, khanrowa okhalana waarya wa Muluku wira wamwaleeleke. Nihiku nno ninrwa na ekhotto, “ikhavalo, n’ikamelo n’abùru n’inama sothene siri mmathalani mwaya”, eyo piiyo, ithoonyeryo sa ikaruma sa ekhotto sa maloko awo, khisinrowa ovara muteko. Ikaruma iyo sinrowa wuuma mwaha wootepexa oriirya nto khasinrowa ovareliwa muteko. Yehova onrowa-tho waaruuhela ‘ihasara’. Hata ihasara iyo sirowaka okhala sa nthoonyeryo wala sekeekhai, iyo sinrowa omala-maliha sowoopiha sotheene sootakhala. Nihiku nlo, ‘maitho aya . . . ni malumi aya animuntta’, tthiri awanani awo khanrowa oweryaka woona wala olavula etthu. (Zak. 14:6, 7, 12, 15.) Khiivo epantte hata emosa ya valaponi ehinrowa aya ophiya ekhotto eyo. Masi ale anrowa okhala mpantta wa Satana okathi wa ekhotto eyo anrowa okhala oowaatta. (Wis. 19:19-21) “Mahiku awo” anookhala atthu oowiivakasiwa ni Yehova “mapuro othene a mulaponi”.​—Yer. 25:32, 33.

16. Okhala wira ninnaattamela nihiku na ekhotto ya Muluku, makoho xeeni anitthuneya ahu wuupuwelaka, nto nihaana opaka exeeni?

¹⁶ Okhala wene ekhotto ennikumiherya ohaawa, hata wa alipa ootupa. Eyoolya pooti omala, atthu annipweteiwa itthu saarina aya, annikhala oohasuwa, nto otaphuwa waarina aya onnimala-mala. Akhala wira wooniphwanya ohaawa mmoota owo ninrowa opaka exeeni? Nnoovela-vela nihooneke yoopaka? Niireke waamini onoonimalela mwaha woolupatthiwa? Niireke nnoohiya itthu sinilipelela ahu nto nikhaleke ootepexa oriipiwa murima? Tthiri, okathi wa maxakha maalupale, ti vootepa otthuneya ohihiya waamini ikuru sowoopola sa Yehova ni ovikaniha okhala mukhatoni naakiheriwaka ni Yehova!​—Mmusome Habakuki 3:17, 18.

ANOPHATTUWA “MÀSI MAKUMI”

17, 18. (a) ‘Màsi makumi’ anitaphulela exeeni? (b) ephareya ya onikhuma nsuwa ni ele ya onikela nsuwa enitaphulela exeeni? (c) Nto vaavo vaniweha anyu ohoolo, etthu xeeni elakenle anyu opaka?

¹⁷ Nuumala Harmagedoni, “màsi makumi” anooviraka eyaakha yotheene ekhumaka veehiceni ya Omwene wa oMesiya. “Màsi makumi” anithoonyerya marehereryo a Yehova wira vaweryaneyeke okhalana okumi. Ephareya ya onikhuma nsuwa, enihimmwa Ephareya Yookhwa, nto ephareya ya onikela nsuwa enihimmwa Ephareya ya Mediterrâneo. Iphareya soopiili sinitaphulela atthu. Ephareya Yookhwa ennireerela othoonyeryaka atthu akhwiiye ari mmahiye. Okhala wira Ephareya Mediterrâneo yookhalana itthu sikumi, nto ennithoonyerya saana atthu a ‘muttitthi mulupale’ yoopoliwe okathi wa Harmagedoni. (Mmusome Zakariya 14:8, 9; Wis. 7:9-15) Aayo, ikrupu iya piili sinrowa ottottela muraarelo woopoliwa waya mwa okhwa okumiheriwe ni Adamu akhala wira anoovikaniha owurya maasi a nthoonyeryo wala “muró wa màsi èkumi”.​—Wis. 22:1, 2.

¹⁸ Mwaha wowaakiheriwa ni Yehova, ninrowa woopowa wanikisa wa mukhalelo ola wootakhala wa itthu, ni ovolowa elapo esya ya xariya ya Muluku. Nnaaamwi ninyokhiwaka ni atthu a maloko otheene, nrowe niimananihe ovikaniha okhala atthu oororomeleya a Omwene wa Muluku, nto nitepeke ovikaniha okhala mukhatoni mwa waakiherya mwa Yehova.

[Enoota]

[Elatarato epaaxina 17]

[Elatarato epaaxina 21]

Mwiimananihe wira mukhale mukhatoni mwaakiheriwaka ni Yehova.