Yesu—Tori Muhulelo wa Okumi Woohakalaliha
NIIREKE tthiri Yesu aahikhalana okumi woohakalaliha? Woonasawene aannuwale opuro wahaakhanle itthu sinceene, nave okumi awe wotheene aarina itthu vakhaani sa werutthuni. Tthiri khaarina “nipuro n’omumula”. (Luka 9:57, 58) Hata vaari siiso, aaninyokhiwa, wootheriwa, nto wanikisa waya khwiiviwa ni anyokhani awe.
Nyuwo pooti wuupuwelaka so, ‘eyo khahiyo ti etthu enoona aka okhala okumi woohakalaliha!’ Masi sihaavo itthu sinceene sa okumi wa Yesu sinitthuneya ahu othokorerya. Nrowe nivarerye inamuna xexe sa okumi awe.
1. YESU AAHIKHALANA YOOLAKELA—OPAKA YOOTTHUNA YA MULUKU.
Aahimyale so: “yoly’aka miyo, wettela otthuna wawe ole okirumme”.—Yohani 4:34.
Orweela mwa miteko ni moolumo awe, Yesu aahiphavelasa waakhwaniherya otthuna wa Tiithi awe a wiirimu, Yehova.a Yesu aanoona oreera opaka yootthuna ya Muluku. Tivonto, ntoko sinooneya aya ni yoolepa ehimmwale vasulu-vo, Yesu aahipaka yootthuna ya Muluku, okhala ntoko yoolya. Nrowe nivarerye itthu siiraneya okathi owo aapakale awe yoolikanyiha eyo.
Yesu aahuuluma masu awo okathi wa othana eriyari. (Yohani 4:6) Owo iira eettale ene voosiiso wotheene mittetthe sowaatta myaako sa oSamariya, tivonto owo tthiri aahivoliwa etala. Tthiri awiixutti awe yaahimutumererya ariki: “Pwiya, lyakhani”. (Yohani 4:31) Nto waakhula wa Yesu onooniherya wira tthiri owo aanoona opaka yootthuna ya Muluku, okhala yoolya eninvaha ikuru. Munoonela sai, khanooniherya masu awo wira Yesu aahikhalana okumi woohakalaliha?
2. YESU AANIMPHENTA VANCEENE TIITHI AWE.
Owo aahimyale so: “miyo kinnaphenta Atithi”.—Yohani 14:31.
Yesu aahikhalana ovarihana wuulupale ni Atiithi awe wiirimu. Omphenta wawe Muluku waataphulela waasuweliha atthu Atiithi awe, eyo piiyo, nsina nawe, soolakela sawe, ni mikhalelo sawe. Orweela mwa miteko, masu awe ni mweettelo awe, Yesu aahooniherya saana mikhalelo sa Tiithi awe, tivonto okathi onisoma ahu sa Yesu, vanikhala ntoko wira ninsoma miteko sa Tiithi awe. Mwaha wa eyo, okathi Filipe anvekenle awe Yesu oriki ‘nòniheryeni Atithi’, Yesu aakhunle so: ‘ole okònne miyo owònne Atithi’.—Yohani 14:8, 9.
Yesu aanimphentexa Tiithi awe, mpakha weemya okhwa mwaha woomwiiwelela. (aFilipi 2:7, 8; 1 Yohani 5:3) Ophenta iwo wuulupale waahiiriha okumi wa Yesu okhala wooreera.
3. YESU OHAAPHENTA ATTHU.
Owo aahimyale so: “Khavo onaphenta akhw’awe vajene onvikana ole onleva ekumi awe mwaha w’apatthani awe”.—Yohani 15:13.
Mwaha wa etampi erina ahu yoolipelela ahu ya okumi wa muhoolo ti yoohiloka. Biibiliya onihimya so: “Mutthu mmosá pahi t’oruhale etampi mulaponi; etamp’iyo yoruha okhwa. Siso okhwa ohaphwanya atthu othene, okhala wira atthu othene áttheka”. (aRoma 5:12) Ekhihuru khanniwerya ohuluwa itthu sinikumiheriwa ni etampi, eyo piiyo, okhwa.—aRoma 6:23.
Moohakalaliha, mwaha woophenta Yehova ookumiherya etthu enrowa omala-maliha mixankiho sa apinaatamu. Muluku aahimweemererya Mwanawe oomalela ni oohittheka, yoowo aasuweliwe okhala Yesu, ohaawa ni okhwa, ophavelaka okumiherya yooliverya yaatthuneya wira noopoliwe opottha wa yoottheka ni okhwa. Nto otumereriwaka ni ophenta wa Tiithi awe ni mwaha wa waaphenta apinaatamu, aaheemya ovaha erutthu awe yoomalela yoohittheka mmureerelo ahu. (aRoma 5:6-8) Ophenta iwo woohikhalana nrima waahiiriha okumi wa Yesu okhala wooreera.b
4. YESU AANISUWELA WIRA TIITHI AWE AANIMPHENTA NI AANISIVELIWA NI YENA.
“Ola mwan’aka onimphentexaka, miyo kosiveliwa ni yowo”.—Matheyo 3:17.
Masu awo a Yehova yaakhuma wiirimu, nto aalavunle okathi wa obatiziwa Yesu. Tthiri, mowooneya Yehova aahooniherya omphenta ni osiveliwa wawe Mwana awe, eyo piiyo, Yesu. Nto khanintikhina masu a Yesu oowi: “Atithi annikiphenta”! (Yohani 10:17) Okhala wira aanisuwela wira Atithi awe yaanimphenta ni osiveliwa, moolipa murima, Yesu aahivilela onyokhiwa ni ovaanyihiwa. Hata okathi aarowa awe wiiviwa Yesu khoova etthu. (Yohani 10:18) Wuupuwelela ophenta wa Tiithi awe ni osiveliwa wawe, waahimwiiriha Yesu okhalana okumi wootepexa ohakalaliha.
Tivonto vanihimmwa aya wira Yesu aahikhalana okumi woohakalaliha. Nto wira okumi ahu okhale wooreera makhalelo ahu ahaana wooniheryaka wira ninniixutta itthu sa okumi wa Yesu. Mwaha onittharelana onrowa othokorerya miruku sowiiweha saana, Yesu saavanhe awe atthareli awe, voohimya sa moota wookhala.
[Inoota]
a Yehova ti nsina na Muluku ntoko sinooniheriwa aya mBiibiliyani.
b Wira musuwele efaita ya yowoopola ya okhwa wa Yesu nwehe muru 5 wa eliivuru Biibiliya Oniixuttiha Exeeni Tthiri? ekumiheriwe ni Anamoona a Yehova.
[Elatarato eri ipaaxina 4, 5]