WAAKHULIWA WA MAKOHO VOOHIMYA SA BIIBILIYA

Vanniweryaneya itampi sahu oleveleliwa?

Moovarihana ni Biibiliya, apinaatamu otheene anamattheka. Hiyo noorava mukhalelo woopaka etampi orweela wa mulopwana oopacerya, Adamu. Tivonto ikwaha sikina nimpaka ahu itthu soohiloka ni okathi mukina nnathanana mwaha wa ele epanke ahu. Yesu Kristu, Mwaana a Muluku, ooliverya soottheka sahu okathi okhwiye awe mwaha wa hiyo. Mukuttho awe wowoopola ohiiriha oweryaneya oleveleliwa. Eyo yoovaha enikhuma wa Muluku.​—Mmusome aRoma 3:23, 24.

Atthu akina apanke soottheka suulupale anniikoha akhala wira Muluku onoowerya waalevelela. Moohakalaliha, Nuulumo na Muluku ninnihimya so: “Ephome ya Yesu, Mwan’awe Muluku, enninreriha, ettipihaka sottheka sahu sothene”. (1 Yohani 1:7) Yehova onnilevelela itampi hata seiye suulupale akhala wira nookhalana mukhalelo woottharuwa wooloka.​—Mmusome Yesaya 1:18.

Nipakeke exeeni wira nileveleliwe?

Akhala wira hiyo nimphavela oleveleliwa ni Yehova, vanitthuneya wiixutta voohimya sa owo, osuwela iphiro sawe, malakiheryo awe, ni malamulo awe. (Yohani 17:3) Yehova mooreera murima onnaalevelela atthu anihiya mweettelo aya woohiloka ni anarukunuxa okumi aya.​—Musome Miteko 3:19.

Ophavelasa weemereriwa ni Muluku khahiyo etthu yootepa ovila. Yehova onnisuwela otteettheya wahu. Owo toomoriwa ikharari ni tooreera murima. Niireke ophenta ni oreera wawe murima khoniwiirihani wiixutta voohimya sa mikhalelo sawe ni ophavela omuhakalaliha?​—Musome Esalimo 103:13, 14.

Mwaphavela soohimmwa sikina, nwehe ekapitulu 5 ya eliivuru ela, Biibiliya Oniixuttiha Exeeni Tthiri?, yoolaleiwa ni Anamoona a Yehova

[Elatarato epaaxina 15]

Ophavelasa weemereriwa ni Muluku khahiyo etthu yootepa ovila