Ninttottela Sai Mureerelo Olevelela wa Yehova?

1. Xeeni vanixankiha aya osuwela, ele mutthu oniphavela awe ohimya ni moolumo oowi kihoolevelelani?

“KIHOOLEVELELANI”. Ti vooreera wiiwa moolumo awo, otepexa wene vakhala wiira noolavula etthu yoohiloka aahiiso noomutthekela mutthu owo. Moolumo oowi “kihoolevelelani”, anitaphulela exeeni? Okathi mutthu onilavula awe moolumo ala, woonasa wene, omphavela ohimya wiira ompatthani anyu ni yena nlelo ti woolipa. Aahiiso onihimya wiira khoniphavela-tho olavula mwaha owo okhumelenle, nave ompatthani anyu ni yena woovukuwa. Okathi apinaatamu anihimya aya wiira kihoolevelelani, pooti otaphulelaka itthu sinceene. Nto eyo pooti okhala etthu yooxankiha.

2. Biibiliya onitthokiherya sai olevelela wa Yehova? (Nwehe enoota.)

² Enamuna Yehova onnilevelela awe, ti yoovirikana ni moota hiyo nnaalevelela ahu atthu akina. Khuuvo mutthu mukina oniwerya olevelela ntoko Yehova. Nasalimo aahimmye wiira Yehova ‘onnaalevelela atthu ni murima wootheene, wiira ottittimihiweke’.a (Esal. 130:4) Ekeekhai ti yoowi, Yehova ‘onnilevelela ni murima wootheene’. Yehova paahi tonisuwela ele enitaphulela aya okhala mutthu oolevelela. Aphavelaka wooniherya moota Yehova onilevelela awe, alipa-oomulepa Biibiliya yaanirumeela nuulumo nimosa na eheeperi naavirikana ni nle yaarumeela aya ahimyaka olevelela wa apinaatamu.

3. Olevelela wa Yehova, ovirikanne sai ni moota nnaalevelela ahu atthu akina? (Yesaya 55:​6, 7)

³ Vaavo Yehova onimulevelela awe mutthu, owo onnittipiha etampi ya mutthu owo. Siiso, mutthu owo onoowerya otthikela okhalana waataana wooloka ni Yehova. Ninnimuxukhurela vanceene Yehova mwaha wa onilevelelaka mwa enamuna ela. — Mmusome Yesaya 55:6, 7.

4. Yehova onnikhaliherya sai wiiwexexa ele enitaphulela aya olevelela weekeekhai?

⁴ Tthiri olevelela wa Yehova ti woovirikana ni moota nnaalevelela ahu atthu akina. Nto moota xeeni hiyo ntoko apinaatamu oottheka, ninrowa ahu wiiwexexa olevelela wa Yehova? Yehova onnirumeela malikanyiho wiira niwerye wiiwexexa moota owo onnilevelela awe. Mwaha ola nnoothokorerya malikanyiho awo. Malikanyiho awo, anoonikhaliherya woona wiira okathi ninttharuwa ahu Yehova onnittipiha etampi ahu ni onnineemererya otthikela okhala apatthani awe. Othokorerya malikanyiho awo, anoonikhaliherya otepa omuxukhurela Tiithi ahu oomoriwa ikharari, Yehova.

YEHOVA KHONUUPUWELELA ITAMPI SAHU

5. Exeeni eniiraneya okathi Yehova onnilevelela awe itampi sahu?

⁵ Mbiibiliyani, itampi sahu sinilikanyihiwa ni muritti woolemela. Mwene Davidi olavulaka sa itampi sawe, aahimmye so: “Itampi saka sihuukeleya vamuru vaka; ntoko muritti woolemela, nkiniwerya oteexa”. (Esal. 38:4) Yehova onnimulevelela mutthu onittharuwa itampi sawe. (Esal. 25:18; 32:5) Nuulumo na eheeperi noowi “olevelela”, nintaphulela “ottukhula” aahiiso “oteexa”. Hiyo pooti omulikanyiha Yehova ni mulopwana a ikuru oniteexa itampi sahu onarihela ottaiwene.

6. Yehova onirihela woowi itampi sahu?

⁶ Biibiliya onnirumeela nlikanyiho nikina wiira onikhaliherye oweha moota Yehova oniroiha awe ottaiwene itampi sahu. Esaalimu 103:12 enihimya so: “Ntoko siisaale onikhuma nsuwa orakamelanne aya ni onikela nsuwa, owo onnipweha itampi sahu, ottaiwene ni hiyo”. Onikhuma nsuwa ni onikela nsuwa ti woorakamelana vanceene. Ni moolumo makina, nasaalimo aaphavela ohimya wiira Yehova onnirihela ottaiwene itampi sahu. Eyo entaphulela wiira Yehova onninlevelela moomalela. Nto osuwela eyo enninimaaliha!

7. Okathi ninttharuwa ahu, exeeni Yehova onipaka awe? (Mikeya 7:​18, 19)

⁷ Okathi Yehova oniteexa awe itampi sahu, niireke onihala ovarelenle ene? Nnaari. Mwene Ezekiya, aahimmye so: “Moorihela ottuli wanyu itampi saka sootheene”. (Yes. 38:9, 17, Piipiliya Emakhuwa.) Eyo entaphulela wiira Yehova onnirihela ottaiwene itampi sa mutthu ottharunwe ni khonuupuwela-tho. Ni moolumo makina, mwene Ezekiya aaphavela ohimya so: “Nyuwo moottipiha itampi saka vanakhala ntoko kasitonko wiiraneya”. Biibiliya onnilavula nlikanyiho nikina niri Mikeya 7:18, 19. (Mmusome.) Ni moolumo ala ninniweha wiira Yehova onnirihela itampi sahu mapuro oowiixa a mphareya. Khalai, okathi etthu yaamorela aya mapuro oowiixa a mphareya, khuuvo-tho aawerya ophwanya.

8. Exeeni niixuntte ahu mpakha-va?

⁸ Malikanyiho ala, anniniixuttiha wiira okathi ninttharuwa ahu, Yehova onninrula muritti ahu, eyo piiyo, itampi sahu. Sintoko Davidi ohimmya awe “oohakalala taale aleveleliwe miteko saya sootakhala, ni siliyaliwe itampi saya; Oohakalala tuule Yehova ohinikontari awe etampi awe”. (aRom. 4:7, 8) Tthiri nno tori olevelela weekeekhai!

YEHOVA ONNITTIPIHA ITAMPI SAHU

9. Biibiliya onnikhaliherya sai osuwela moota Yehova onnilevelela awe?

⁹ Yehova onnirumeela nlikanyiho nikina, wiira onikhaliherye wiiwexexa efaita erina aya mukuttho woowoopola. Orumeelaka mukuttho owo, Yehova onnittipiha itampi sa mutthu ottharunwe. Biibiliya, onihimya wiira Yehova onnittipiha ni onnirapiha soottheka sahu. Nto eyo ennimwiiriha mulipa-oottheka, okhalana waataana wooloka ni Yehova. (Esal. 51:7; Yes. 4:4; Yer. 33:8) Yehova onnitthokiherya eyo moota eniiraneya aya, ohimyaka so: “Sottheka sanyu sinakhalaru soxerya ntoko ephome, miyo kinotteliha mpakha olikana ni nxotte. Sinakhalaru sophilivila ntoko ekottokhwa, miyo kinoreriha mpakha olikana n’otthú”. (Yes. 1:18) Tthiri, ti vooxankiha okumiha nlepa nooxeerya aahiiso ekottokhwa epharelenle vakuwoni. Tivo, orumeelaka nlikanyiho nla, Yehova onnilipiherya wiira owo onniwerya omala-maliha itampi sahu, vanakhala wiira khanitonko omutthekela.

10. Nlikanyiho xeeni nikina, Yehova onirumeela awe wiira onikhaliherye wiiwexexa moota onnilevelela awe?

¹⁰ Ntoko niixuntte ahu mwaha ovinre, soottheka sahu sinlikana ni okopha. (Math. 6:12; Luka 11:4) Khula ookathi nimmutthekela ahu Yehova, onlikana ni wuncererya etthu nikomphe ahu. Hiyo khanreere omukophela Yehova! Masi okathi Yehova onnilevelela awe, onnittipiha moomalela itampi sahu ni khonuupuwela-tho itampi iyo. Owo khoninvekela mutthu oliva mwaha wa itampi omulevelenle awe. Ntoko siisaale mutthu okomphe onitteeliwa awe murima mwaha wa oleveleliwa etthu okomphe awe, mwa enamuna emosa-ru hiyo ninnihakalala mwaha wa oleveleliwa ni Yehova!

11. Biibiliya oniphavela ohimya exeeni aalavulaka wiira soottheka sahu sinnittipihiwa? (Miteko 3:19)

¹¹ Ohiya paahi onilevelela etthu nikomphe ahu aahiiso itampi sahu, Yehova onnittipiha itampi iyo. (Musome Miteko 3:19.) Okathi mutthu onnilevelela awe etthu nakomphe ahu, hiyo pooti oweha opuro mutthu owo oriskanri awe. Masi ottipiha etthu, khahiyo oriskari paahi opuro waalempwale. Wiira niiwexexe saana mwaha ola, nihaana wuupuwela wiira itinta saarumeeliwa khalai, saapakiwa ni materiyaale mutthu aawerya awe ottipiha ni maasi etthu yaalempwale. Owo aanirumeela esponxa yoonaanihiwa vakhaani wiira vaweryaneye ottipiha etinta eyo. Nto okathi mutthu aaleveleliwa awe etthu aakomphe awe, eyo yaanimala-mala. Yehova oniira siiso. Okathi onnilevelela awe soottheka sahu, owo onnittipiha moomalela. Tthiri eyo etthu yoohakalaliha! — Esal. 51:9.

12. Exeeni nniixutta ahu ni nlikanyiho na neeku?

¹² Yehova onnirumeela nlikanyiho nikina, ophavelaka wooniherya moota onittipiha awe soottheka sahu. Owo onihimya so: “Kinoomaliha soottheka sanyu ntoko itthapwe ni itampi sanyu ntoko meeku”. (Yes. 44:22, Piipiliya Emakhuwa.) Okathi Yehova onnilevelela awe, vanikhala wiira onikhuneela soottheka sahu ni neeku nuulupale, wiira atthu akina ahiweryeke oweha.

13. Nooneleke sai okathi Yehova onnilevelela awe itampi sahu?

¹³ Malikanyiho ala anniixuttiha exeeni? Anniixuttiha wiira, okathi Yehova onnilevelela awe soottheka sahu, khivanireerela wuupuwelelaka soottheka iyo okumi ahu wootheene. Tthiri mukuttho wa Yesu, woottipiha moomalela itampi sahu. Mwa enamuna ela, vanikhala ntoko wiira khanitonko omutthekela Yehova. Ela ti enamuna Yehova onnilevelela awe okathi ninttharuwa ahu moomalela itampi sahu.

YEHOVA ONNINEEMERERYA OTTHIKELA OKHALA APATTHANI AWE

14. Xeeni ninreerela ahu okupali olevelela wa Yehova? (Nwehe ifootu.)

¹⁴ Okathi Yehova onnilevelela awe, nikupaliki wiira nnoowerya otthikela okhala apatthani awe. Eyo enninikhaliherya ohiivaha nthowa mwaha wa itampi naapanke ahu. Nto nihuupuweleke wiira Yehova khonilevelenle ni wiira onoonihukhumu muhoolo. Yehova khonikhala-khala opakaka eyo. Okathi Yehova onihimya awe wiira oonilevelela, nihaana omukupali. Owo aahimuleela profeta Yeremiya wiira: “Miyo kinimwalevelela sottheka saya: nkinrowa-tho wupuwela itampi saya”. (Yer. 31:34) Murummwa Paulo aahirumeela moolumo mamosa-ru, oriki: “Nkinrowa-tho wuupuwela itampi saya”. (aHeeb. 8:12) Masi eyo enitaphulela exeeni?

15. Moota xeeni Yehova ohinuupuwela awe soottheka sahu?

¹⁵ Mbiibiliyani, nuulumo noowi “wuupuwela”, khonihimmwa paahi mutthu wuupuwela itthu siiraneyale. Masi onihimmwa wuupuwela ni opaka etthu mwaha wa ele yiiraneyale. Mutakhali mmosa aakhomeliwe vakhiviru ni Yesu, aahiveka oriki: “Yesu, mukuupuwele mwaphiya Moomweneni mwanyu”. (Luka 23:​42, 43) Mutakhali ole, khahiyo aaphavela wiira Yesu omuupuwele paahi, masi-tho aaphavela wiira opake etthu okathi ole. Moota Yesu aakhunle awe, yaanooniherya wiira ampaka etthu. Moolikanasa, okathi Yehova onnilevelela awe, owo khonuupuwela-tho etthu nipanke ahu. Nave khonirowa onihukhumu mwaha wa itampi sahu.

16. Biibiliya onnilikanyiha ni exeeni, nto olevelela wa Yehova onniphwanyiha mureerelo xeeni?

¹⁶ Biibiliya onnirumeela nlikanyiho nikina, wiira onikhaliherya wiiwexexa ele enitaphulela aya olevelela weekeekhai. Hiyo niri ntoko “ipottha sa etampi”. Masi okathi Yehova onnilevelela awe, ninnitaphuliwa “okhala ipottha sa etampi”. (aRom. 6:17, 18; Wiis. 1:5) Olevelela wa Yehova, onnintaphula okhala ipottha sa etampi, nto eyo enninihakalaliha vanceene.

17. Moota xeeni olevelela onilikanyihiwa aya ni openuwa? (Yesaya 53:5)

¹⁷ Mmusome Yesaya 53:5. Nlikanyiho nookiserya ninrowa ahu othokorerya ti na mutthu orina eretta ehinivoniwa. Mwaha wa mukuttho woowoopola Yehova okumihenrya awe, hiyo pooti ohimya wiira noopenuxiwa eretta naarina ahu. (1 Ped. 2:24) Ntoko siisale mutthu orina eretta yoowoopiha, onihakalala awe nuumala openuwa, hiyo nave ninnihakalala mwaha woosuwela wiira Yehova oonilevelela soottheka sahu. Eyo eniweryaneya paahi mwaha wa mukuttho woowoopola wa Yesu, yoowo onnikhaliherya okhalana waataana wooloka ni Yehova.

ELE ENITAPHULELA AYA OLEVELELA WA YEHOVA

18. Exeeni nniixutta ahu ni malikanyiho a mbiibiliyani, anooniherya olevelela wa Yehova? (Nwehe ekaaxa eni: “Moota Yehova Onnilevelela Awe”.)

¹⁸ Exeeni nniixutta ahu ni malikanyiho Biibiliya onirumeela awe, olavulaka sa olevelela wa Yehova? Nniixutta wiira vaavo Yehova onnilevelela awe, owo onnittipiha soottheka sahu ni khonuupuwela-tho. Nto mwaha wa yeeyo, nnoowerya okhalana ompatthani wooloka ni Tiithi ahu a wiirimu Yehova. Nave okathi omosa-ru, ninniweha wiira olevelela wa Yehova yoovaha yuulupale para hiyo. Siiso, owo onniwooniherya apinaatamu oottheka ophenta wuulupale ni omoriwa wawe ikharari, nnaamwi ahiphwanelaka. — aRom. 3:24.

19. a) Nnooniherya sai omuxukhuru wahu Muluku? (aRoma 4:8) b) Mwaha onittharelana, ninrowa othokorerya exeeni?

¹⁹ Mmusome aRoma 4:8. Hiyo nihaana omuxukhurela vanceene Muluku ahu Yehova, mwaha woowi onnaalevelela “atthu ni murima wootheene”! (Esal. 130:4) Masi naaphavelaka wiira Yehova onilevelele, nihaana opaka etthu yuulupale. Yesu aahimmye so: “Vakhala wira khamunaalevelela ale anootthekelani, nave Tiithi inyu ori wiirimu, khonoolevelelani”. (Math. 6:​14, 15) Ninniweha wiira hiyo, nihaana otakiha olevelela wuulupale wa Tiithi ahu Yehova. Ninrowa owerya sai opaka eyo? Mwaha onittharelana, nnimwiixutta moota wootakiha olevelela wa Yehova.