Xeeni Ninreerela Ahu Oxukhurela Olevelela wa Yehova?

1-2. Moota xeeni muxankiho ahu onilikana aya ni wa mmiravo onihimmwa ettima 1?

MMUUPUWELE mmiravo mmosa oyariwe etthoko ya atthu oothaaciri. Masi nihiku nimosa ennikhumelela ehasara, nto anamuyari awe annookhwa. Mmiravo owo onnixanka vanceene mwaha wa etthu ele ekhumelenle. Ohiya muxankiho ole paahi wa okhweliwa anamuyari awe, yookhala-tho etthu ekina enimwiiriha otepa oriipiwa murima. Nuumala okhwa anamuyari awe, owo onnisuwela wiira yaahikopha musurukhu munceene. Nto ohiya mmiravo ole ohalana musurukhu anamuyari awe yaarina aya, owo onnilokihiwa musurukhu munceene anamuyari awe yaakomphe aya. Masi mooriipiha murima khoniwerya oliva musurukhu wootheene onivekeliwa awe.

² Muxankiho ahu, onoolikana ni wa mmiravo ole. Anamuyari ahu oopacerya, Adamu ni Eva, yaari atthu oohittheka ni yaakhala mparayiisu. (Maph. 1:27; 2:7-9) Awo yanwerya okhalana okumi wooloka ni woohimala. Masi itthu sootheene saahiturukeya nuumala Adamu ni Eva ottheka. Awo yaahiyeleela eparakha yookhala mparayiisu ni nlipelelo naya na okhala mahiku ootheene valaponi-va. Nto etthu xeeni Adamu ni Eva yaahiyenrye aya anaaya? Biibiliya onihimya so: “Etampi yookela moolumwenkuni mwaha wa mulopwana mmosa [Adamu], nto etampi eyo yooruuha okhwa. Siiso, okhwa ohaaphwanya atthu otheene, okhala wira atthu otheene aattheka”. (aRom. 5:12) Nto Adamu oonihiyerya etampi, yeeyo enikumiherya okhwa. Etampi nihiyeriwe ahu, enilikana ni musurukhu munceene okomphwale nihinwerya ahu oliva. — Esal. 49:8.

3. Xeeni itampi sahu sinilikanyihiwa aya ni ‘okopha’?

³ Yesu aahilikanyiha soottheka sahu ni evaale aahiiso ‘okopha’. (Math. 6:12; Luka 11:4) Okathi nimpaka ahu etampi, vanoolikana ni omukophela Yehova. Nto nihaana oliva mwaha wa etampi eyo nipanke ahu. Vakhala wiira khaninliva, etampi eyo enimala okathi ninkhwa ahu. — aRom. 6:​7, 23.

4. a) Exeeni yaarowa oniiraneela nahaakhaliherinwe? (Esaalimu 49:7-9) b) Mbiibiliyani, nuulumo noowi “etampi”, nintaphulela exeeni? (Nwehe ekaaxa eni: “Etampi”.)

⁴ Niireke vanniweryaneya olokiherya itthu sootheene Adamu ni Eva ahononne aya? Aayo vanniweryaneya, masi apinaatamu mekhaya-ru khaniwerya olokiherya. (Musome Esaalimu 49:​7-9.) Nto nahaakhaliherinwe, khinaarowa olipelela itthu sooreera sinrowa wiiraneya muhoolo ni khinaarowa olipelela ohihimuxiwa. Moohaanyiherya, naamookhwa nihilipelelaka etthu ntoko inama. — Mus. 3:19; 2 Ped. 2:12.

5. Moota xeeni Tiithi ahu oophenta Yehova, onikhalihenrye awe oliverya soottheka sahu?

⁵ Nkahaya nimuupuwele mmiravo nimulavunle ahu ittima sivinre. Exeeni yaarowa wiiraneya, vaakhanle wiira mulopwana mmosa orina musurukhu munceene, ohiivahererya wiira olive musurukhu wootheene waakomphwale? Moohaanyiherya, mmiravo owo aamuxukhurela vanceene ni aamweemererya okhaliheriwa siiso. Mwa enamuna emosa-ru, Tiithi ahu oophenta, onvaha mwanawe wiira oliverye etampi Adamu apanke aya. Yesu olavulaka sa yoovaha eyo, aahimmye so: “Muluku oophentexa olumwenku, mpakha onvaha Mwanawe mmoseene, wira otheene ale anooniherya omwaamini yoowo, ahipwetexiwe, masi akhalane okumi woohimala”. (Yoh. 3:16) Mukuttho wa Yesu, onninivaha eparakha yookhala mahiku ootheene.

6. Exeeni ninrowa ahu othokorerya mwaha ola, ni mwaha wa xeeni?

⁶ Ninrowa ottottela sai mureerelo yoovaha ya Yehova? Nave moota xeeni yoovaha ela ekhanle aya ooliverya itampi sahu? Wiira naakhule makoho ala, nnoothokorerya moolumo oovirikana Biibiliya onirumeela awe ni ele anitaphulela aya. Vaavo nnuupuwelela ahu itthu Yehova opanke awe wiira onlevelele soottheka sahu, ninrowa otepaka omuxukhurela.

YEHOVA ONIPHAVELA WIIRA NIKHALE APATTHANI AWE

7. a) Etthu xeeni ekina Adamu ni Eva apweteiwale aya? b) Mwaha wookhala osuulu wa Adamu ni Eva, etthu xeeni nimpirisari ahu? (aRoma 5:10, 11)

⁷ Ohiya paahi opweteiwa eparakha yookhala mahiku ootheene, Adamu ni Eva yaahipweteiwa ompatthani aya ni Yehova. Woopaceryani, awo yaaniirela mpantta emusi ya Muluku. (Luka 3:38) Masi, vaavo Adamu ni Eva yaahiyale aya omwiiwelela Yehova, owo aahiwoomola mweemusini mwawe ahinatthi waayara anamwane. (Maph. 3:23, 24; 4:1) Khuuvo osuulu wa Adamu, onihela muhina hiyo, aarowa wiirela mpantta emusi ya Muluku. Nto naanipirisari okhaliheriwa wiira niwerye okhala apatthani a Yehova. (Mmusome aRoma 5:​10, 11.) Tivonto naahaana ohiya okhala awanani a Muluku wiira nikhale apatthani awe. Ti voohakalaliha osuwela wiira Yehova topacenrye onaattamela wiira nikhale apatthani awe. Moota xeeni?

MULUKU OOLOKIHERYA ITTHU WIIRA NIKHALE APATTHANI AWE

8. Etthu xeeni Yehova opanke awe wiira nitthikele waataana ni yena?

⁸ Yehova oolokiherya itthu wiira nikhale apatthani awe. Owo oopaka eyo, oliveryaka etthu Adamu apweteiwale aya okumiheryaka etthu ekina erina efaita emosa-ru. ARoma 3:25 onihimya so: “Muluku onvaha Yesu ntoko mukuttho wira nitthikele waataana ni Muluku”.

9. Etthu xeeni Yehova aapanke awe wiira olevelele itampi sa aisarayeli?

⁹ Yehova aahilevelela itampi sa aisarayeli, wiira atthikele okhalana waataana wooloka ni yena. Khula eyaakha, aisarayeli yaanitthapela nihiku na vameekha aya, eyo piiyo, nihiku na ovaha mukuttho wooliverya itampi. Nihiku nlo, namukuttho muulupale, aanivaha mukuttho wa inama wiira sileveleliwe itampi sa aisarayeli. Ekeekhai wiira mikuttho saavahiwa sa inama khisaawerya ottipiha itampi sa atthu moomalela, okhala wiira inama iyo saari saamukhaani nalikanyiha ni apinaatamu. Masi okathi aisarayeli yaattharuwa aya itampi saya ni yanvaha aya mukuttho Yehova aaphavela awe, awo yaanikupali wiira Yehova aamwaalevelela itampi saya ni khaarowa wuupuwela-tho. (aHeeb. 10:​1-4) Okathi aisarayeli yaavaha aya mikuttho sa inama, eyo yaaniwuupuxerya wiira yaari atthu oottheka. Nto wiira itampi saya sileveleliwe moomalela, yaahaana opakiwa etthu yaarina efaita yuulupale.

10. Etthu xeeni Yehova opanke awe wiira itampi sa apinaatamu sileveleliwe moomalela?

¹⁰ Etthu xeeni Yehova opanke awe wiira itampi sa apinaatamu sileveleliwe moomalela? Owo onvahererya Mwanawe amphentexa awe, Yesu, “ekwaha emosa paahi, wira okuxe itampi sa atthu anceene”. (aHeeb. 9:28) Yesu oovaha okumi awe wiira “owoopole atthu anceene”. (Math. 20:28) Masi yoowoopola exeeni?

MUKUTTHO WA YESU WOOLIVERYA ITAMPI

11. a) Moovarihana ni Biibiliya, yoowoopola exeeni? b) Ti pani aarowa owerya oliva eperesu yoowoopola?

¹¹ Biibiliya onihimya wiira Yehova aahiweha wiira vaanipirisari ovaha yoowoopolaa wiira nileveleliwe itampi sahu ni vaweryaneye okhala apatthani awe. Masi mukuttho xeeni waareerela ovahiwa wiira silokiheriwe itthu Adamu ahononne aya? Muhiliyale wiira Adamu ni Eva yaahiyeleela okumi wooloka ni eparakha ya okhala mahiku ootheene. Mwaha waivaavo, waahaana ovahiwa mukuttho waalikana ni ole ohononiwe. (1 Tim. 2:6) Nto wiira vaweryaneye ovahiwa mukuttho owo, waahaana oliveriwa ni mulopwana 1) oohittheka 2) aawerya okhala mahiku ootheene ni 3) aarowa ophavela ovaha okumi awe ntoko mukuttho wiira onoopole. Nto mutthu aarina mikhalelo siisa, taarowa owerya oliverya itthu iye sihononiwe.

12. Xeeni Yesu aareerela awe ovaha yoowoopola?

¹² Xeeni Yesu aareerela awe oliva yoowoopola? Nwehe mathowa mararu. 1) Owo aari oohittheka, eyo piiyo, “khonapake etampi”. (1 Ped. 2:22) 2) Okhala wiira owo anwerya okhala valaponi mahiku ootheene. 3) Yesu aahiivahererya wiira ovahe okumi awe ophavelaka onoopola. (aHeeb. 10:​9, 10) Yesu aari oohittheka ntoko Adamu aari awe ohinatthi ottheka. (1 aKor. 15:45) Nto mwaha wa Yesu okhwa wiira oliverye itampi sahu, vaaweryaneya owo oliverya moomalela itthu sootheene Adamu ahononne aya. (aRom. 5:19) Tivonto, Yesu ookhalihiwa “Adamu ookiserya”. Nto khivanipirisari mutthu mukina wiira orwe oliverye itthu Adamu ahononne aya. Yesu ohookhwa “ekwaha emosa paahi”. — aHeeb. 7:27; 10:12.

13. Ovarihana xeeni okhanle, oleveleliwa itampi ni mukuttho woowoopola?

¹³ Ovarihana xeeni okhanle, oleveleliwa itampi ni mukuttho woowoopola? Muluku aahipaka etthu wiira apinaatamu aleveleliwe itampi ni awerye otthikela waataana ni yena. Masi wiira eyo eweryaneye, waahaana oliviwa mukuttho woowoopola. Nto mukuttho owo, onithoonyerya ephome ya Yesu emwaraxiwe wiira nileveleliwe itampi sahu. — aEef. 1:7; aHeeb. 9:14.

NIHOOPOLIWA ETAMPI NI OKHWA NI NOOKHALIHIWA ANAXARIYA

14. Exeeni ninrowa ahu othokorerya ni mwaha wa xeeni?

¹⁴ Mareeliho xeeni nimphwanya ahu mwaha wa ele Yehova onipakenle awe? Wiira niwerye waakhula nikoho nla, ninrowa othokorerya moolumo manli anirumeeliwa mbiibiliyani, anrowa onikhaliherya wiiwexexa moota ninttottela ahu mureerelo olevelela wa Yehova.

15-16. a) Mbiibiliyani, nuulumo noowi “woopoliwa”, nintaphulela exeeni? b) Nooneleke sai mwaha woosuwela wiira nihoopoliwa etampi ni okhwa?

¹⁵ Mbiibiliyani, nuulumo noowi woopoliwa, nintaphulela mukuttho ovahiwe wiira nileveleliwe itampi sahu. Murummwa Pedru olavulaka sa woopoliwa iwo, aahimmye so: “Nyuwo moosuwela esisapo moopolaniwe anyu, mwaha wa makhalelo anyu oohiloka, yaawo muravihiwe anyu ni amuhavinre anyu. Khamoopoliwe ni itthu sinipweteya, ntoko eweero aahiiso eparatha. Ohiya-vo, moopoliwe ni ephome ya Kristu, erina efaita yuulupale, ntoko ephome ya mwaapwittipwitthi ooloka ni oohirakala”. — 1 Ped. 1:18, 19.

¹⁶ Mwaha wa mukuttho ovahiwe, hiyo nihoopoliwa etampi ni okhwa ni ohaawa wootheene onikumiheriwa ni etampi eyo. (aRom. 5:21) Tthiri ootheene ahu, nihaana omuxukhurela Yehova ni Yesu mwaha woowi Yesu oovaha okumi awe ntoko mukuttho onnoopola. — 1 aKor. 15:22.

17-18. a) Onitaphulela exeeni okhalihiwa anaxariya? b) Eyo ennaafetari sai hiyo?

¹⁷ Biibiliya onnaahimya arumeyi a Yehova okhala anaxariya. Eyo enitaphulela wiira Yehova khonaakhanyererya arumeyi awe oliva mwaha wa itampi anipaka aya. Nave okathi onipaka awe eyo, owo khonihonona exariya awe. Owo onninihimya okhala anaxariya ohiya mwaha woophwanelela. Okathi omosaru, Yehova khoneemererya itampi sahu. Masi vakhala wiira nnimooniherya waamini mukuttho Yesu ovanhe awe, Yehova ori oolikana ene wiira onilevelele soottheka sahu. — aRom. 3:24; aGal. 2:16.

¹⁸ Eyo ennaafetari sai hiyo? Ale athanliwe wiira yalamuleleke ni Yesu wiirimu, aakhalihiwa anaxariya ntoko anamwane a Muluku. (Tito 3:7; 1 Yoh. 3:1) Itampi saya, sooleveleliwa. Nto vanikhala ntoko khanattheke. Mwaha waivaavo, eyo yoowiiriha weemereriwa Moomweneni mwa Muluku. (aRom. 8:​1, 2, 30) Ale arina nlipelelo na okhala valaponi mahiku ootheene, aakhalihiwa anaxariya ntoko apatthani a Muluku. Nave soottheka saya soleveleliwa. (Yak. 2:21-23) Atthu a muttitthi muulupale anrowa woopowa okathi wa Armagedoni, anookhalana eparakha yookhala valaponi ahilipelelaka okhwa. (Yoh. 11:26) “Anaxariya ni ale ahikhanle anaxariya” yaawo akhwiiye, aakhalana nlipelelo na ohihimuxiwa. (Mit. 24:15; Yoh. 5:28, 29) Nuuvira okathi, arumeyi a Yehova oowiiwelela anrowa okhalaka valaponi, anrowa “ophwanya otaphuwa woovuwa wa anamwane a Muluku”. Ninnihakalala vanceene vaavo nnuupuwela ahu wiira muhoolo, ninrowa okhala anamwane oohittheka, a Tiithi ahu, Yehova!

19. Makhalelo ahu aturukeyale sai? (Nwehe ekaaxa eni: “Ele Enitaphulela Aya Para Hiyo”.)

¹⁹ Ekeekhai ti yoowi muxankiho ahu onoolikana ni wa mmiravo ole nimulavunle ahu wanipacerya wa mwaha ola. Mmiravo ole aahiyeleela itthu sootheene anamuyari awe yaarina aya ni aanilokihiwa musurukhu munceene, ahaawerya awe oliva. Masi Yehova oonikhaliherya. Makhalelo ahu aaturukeya mwaha wa mukuttho woowoopola ni mwaha wooleveleliwa soottheka sahu. Omwaamini wahu Yesu Kristu onnineemererya wiira noopoliwe etampi ni okhwa. Nave itampi sahu sinoottipihiwa. Nto okathi Yehova onipaka awe eyo, vanikhala wiira khanitonko omutthekela. Etthu yootepa ohakalaliha, osuwela wiira nnoowerya okhala apatthani a Tiithi ahu oophenta Yehova.

20. Exeeni ninrowa ahu othokorerya mwaha onittharelana?

²⁰ Ninnimuxukhurela vanceene Yehova ni Yesu, vaavo nnuupuwelela ahu itthu sinceene apanke aya para mureerelo ahu. (2 aKor. 5:15) Nahaakhaliweriwe naawo, hiyo khinaarowa olipelelaka etthu! Nto olevelela wa Yehova onitaphulela exeeni para hiyo? Eyo ti etthu ninrowa ahu othokorerya mwaha onittharelana.