YOWIIRANEYA YA MOOKUMINI

Nthowa Naya Okumi Ahu Oryaaya Woohakalala

ELAVULIWE NI PATRICIA SMITH

NUUMALA mwanaka Gary oyariwa mwaakha wa 1958, kaahoona wira yookhala etthu yahaalonke. Nto, saahivira myeeri muloko wira mameediku asuwele eretta aarina awe, nave sihinatthi omala iyaakha thanu sikina, dotore oLondon, aahihimya oretta ene. Kaahiriipiwa murima osuwela wira mwanaka muthiyana Louise, yoowo oyariwe sivinre ene iyaakha 9 nuumala oyariwa Gary aahooniwa wira ookhalana oretta muulupale onvikana Gary.

Moomaaleleya, meediku aahikileela wira: “Aniinyu otheene aakhalana oretta wa síndrome LMBB,a nto nyuwo muhaana olimalela okhala ni oretta owo”. Okathi ole atthu yaasuwela vakhaani sa oretta ole wooyaraniwa. Oretta owo onnoneya ni itthu iya: ohoona, oneneva wootepana, okhalana ikatha wala ilipwi thanu namosa (ipalapatte), opisa wunnuwa wa mwaana, ohiwerya olavula saana, diabetes mellitus, osteoartrite, ni ohiloka wa isyo. Tthiri yaarowa okhala etthu yooxankiha omukhapelela mwanaka. Yootokosa ya niinano, enihimya wira mutthu mmosa wa atthu 125.000 ari oGrã Bretanha, ookhalana síndrome ola, nnaamwi akina ohaatepenle.

YEHOVA ORI “NTTHYAWELO NAHU” NUULUPALE

Nuumala otheliwa, kaahilaleeriwa ni Namoona a Yehova nto mowaakuveya kikupali wira koophwanya ekeekhai. Masi aiyaka khiyaacalenle. Mwaha wa muteko wa aiyaka, ikwaha sinci naanithaamela opuro mukina nto kihinawerya othukumana ni muloko. Hata vari siiso kaahivikaniha omusoma Biibiliya ni onvekela Yehova. Kaahilipiheya osuwela wira ‘[Yehova] ti ntthyawelo na atthu òhaxiwa, onniwakiha okathi woxanka’ ni wira ‘khananyanyala ale animphavela’.​—Esal. 9:10, 11

Gary khaniwerya woona saana, tivonto arineene iyaakha 6 aahiroihiwa exikola yoophwanelela epantte ya ophareya onikhuma epheyo wInglaterra. Khula okathi aanivaanela ni miyo myaha saamuxankiha amurumeelaka telefoni, nto kinawerya omukhaliherya wiiwexexa sooruma suulupale sa mBiibiliyani. Nuuvira iyaakha vakhaani aayariwe awe Louse, miyo kaahiwereiwa mwaha wa esclerose múltipla ni fibromialgia. Exikola yaasoma awe Gary, yaahimuttikiherya owaani okathi aarina awe iyaakha 16. Ohoona wawe waanitepa, nto mwaakha wa 1975 aahilempwa okhala mutthu ohinoona. Eyaakha ya 1977, aiyaka yaahinihiya.

Nuumala orwa Gary moohipisa, naahipacerya ovara miteko sa muloko yoowo waari woophenta, ni kaahibatiziwa 1974. Kaahitepa oxukhuru vaavo mutokweene mmosa aamukhaliherya awe Gary, weettiherya saana mixankiho saakhumelela okathi wa opacerya omiravo awe. Anamoona akina yaanikikhaliherya ni miteko sa vate, nto muhoolo mwaya guvernu aahaathanla Anamoona 5 wira anikhaliheryeke vatthokoni vahu. Tthiri ala yaari mareeliho manceene!

Gary aahivikaniha wunnuwela mwekeekhaini khubatiziwa 1982. Owo aahilakela vamurimani vawe okhala pioneero ookhaliherya. Nuumala-vo, kaahimukhaliherya mmuteko owo wa opioneero, nto kinnivikaniha mwa iyaakha sinceene. Nuuvira okathi, mwanaka aahihakalala vaavo mutokweene a esirkwitu aamukonhe awe wira: “Xeeni muhiilepihaka opioneero wookilaatheya?” Nto ela yaari etthu yoolipiha aawehererya awe, vano 1990 aahikhala pioneero ookilaatheya.

Gary aahilokiheriwa ikwaha piili makhuva a eyuunu awe; ekwaha yoopacerya waari 1999, ya nenli 2008; masi okathi owo, owereiwa wa Louise waahitepa. Owo aayariwe ahoonaka, nave okathi kamonne aka wira ilipwi sawe sihincerereya, kaahisuwela wira ookhalana oretta a síndrome LMBB. Nuumala wiiriwa anaalisi, aahiwehiwa wira ookhalana iretta sinceene mwerutthuni mwawe. Mwa iyaakha sinci, owo aahipakiwa operasau munceene, ohela muhina wooperariwa vathanu isyo sawe. Ntoko Gary, nave Louise ookhalana diabete.

Okhala wira aahisuwela muxankiho wa operasau ole, ohinatthi opacerya wooperariwa Louise ahilavula ni alipa-oowooperari, animuhela anestesia, ni ahooleli a oxipitaali voohimya sa yoothanla awe, ya olooliwa moohiheleliwa ephome. Nto, mwaha wookhumela saana operasau ole, ale yaamooperari yaahilavula saana sa operasau ole.

OKHALA NI OKUMI WOOHAKALALA

Etthoko ahu ennivaha efaita muteko wa omukokhorela Yehova. Sihinathi ophwanyaneya itthu sa eletrônico sa vano, kaanaasomela Biibiliya ni iliivuru anaaka Gary ni Louise. Vano, sookhala iCDs, DVDs, nave pooti owiriyana orweela mwa www.jw.org seiyo sinniiriha owiriyanaka eprograma ya omusoma Biibiliya mwa imaara sinceene; nave ninnaakhula makoho saana okathi onirowa ahu mmithukumano seKristau.

Ikwaha sikina ikomentaario sa Gary sinkhala sooheliwa mmuruni, nto akhalana mwaha, okathi wa Exikola ya Orummwa wa Muluku owo onniwerya olavula oratteene nnaamwi ohoonaka. Owo aahithanliwa okhala murumeyi oorumeela eyaakha ya 1995, nto khula okathi onikhala avaraka muteko Osalau ya Omwene vaavo oniwaakhela awe anna anikela muSalau ni okhaliherya opuro onikhapeleliwa mikrofone.

Anamoona akhwaawe annimukhaliherya Gary muteko woolaleerya axovaka ekarinyu awe okhala wira orina oretta wa artrite. Namoona mmosa onnimukhaliherya omuhoola opuro oniiriha awe soosoma sa Biibiliya. Gary aahimulipiha muKristau mmosa aahiiye olaleerya mwa iyaakha 25. Nto atthu awo otheene annirowa mmithukumanoni sa eKristau.

Nuuphiya iyaakha 9, Louise ahiixuttihiwa ni apiipi awe ottottha wala oxora ikuwo, nave miyo ni mutthu aamukhapelela aahimuxuttiha moota woothikila ikuwo soottottha. Okhala wira vannimusivela ottottha, owo onnipaka ikasako sa anamwane ni anna owunnuwela a mmulokoni. Nave owo onnipaka ikartau arumeelaka ipaphelo saamukhaani sa ekoola ni ifootu. Atthu anaakhela ipaphelo iyo annivaha efaita yuulupale. Nuumala ophiyerya iyaakha sa omiravo, Louise aahipacerya olepa ni maakina. Vano amurumeelaka komputador onilavula, onnivaanela ni apatthani awe amurumeelaka e-mail. Louise aahibatiziwa orineene iyaakha 17. Okathi wa ekampaanya ya olaleerya wa vameekhaaya, ninnihakalala orumeela ntoko mapioneero ookhaliherya nivaraka vamosa. Sintoko Gary, Louise onnuupuwelela soolepa sinlavula sa anatiri oororomeleya a Muluku anrowa wiiraneya valaponi vaavo anrowa aya “otthukuwa maitho àlipa-òhona” nave ‘khavo-tho onkela ohimyaka wira: “Miyo ki muretta”’.​—Yes. 33:24; 35:5.

Ninnixukhurela vanceene wa ikeekhai sa Yehova suupuxeriwe mBiibiliyani! Mirima sahu sinnihakalala mwaha wa okhaliheriwa ni muloko, nto moohikhala nikhaliheryo nno khinaarowa owerya. Vanceenexa mwaha wa nikhaliheryo na Yehova okumi ahu onnihakalala.

[Enoota]

[Elatarato epaaxina 25]

[Eponto yuulupale ya epaaxina 25]

Tthiri ninnixukhurela vanceene wa ikeekhai sa Yehova siri mBiibiliyani!