Nyuwo Axitokweene, Munrowa ‘Walipiha Ale Akhulumunwe’?

Angela,a murokora ohitheliwe orina iyaakha sinikhuma 30. Owo ooxankiheya vakhaani okhala wira onaawehererya axitokweene. Nto axitokweene anrowa omuhimeerya exeeni? Ekeekhai wira oyeleela mithukumano, masi murokora ola khoreere otemwa mwaha woovara muteko nihiku notheene aathokoreryaka atthu owuuluvala. Etthu ekina enitepa awe oxankela, yeeyo enincererya mixankiho sawe sa khula nihiku, owereyasiwa wa maama awe.

Akhanle wira nyuwo munrowa omuxukurya Angela, mwaarowa ‘omulipiha’ sai? (Yer. 31:25) Nto mwaarowa wiilokiherya sai wira oxekurya wanyu okhale woolipiha?

MUUPUWELEKE MAKHALELO AXINNINYU ARINA AYA

Ikwaha sikina, otheene ahu ninnikhumuwa mwaha wa miteko sahu, wala miteko sinivahiwa ahu sa Muluku. Mwa ntakiheryo, profeta Daniyeli, ‘sahimmalela ikuru’, okathi aavahiwe awe etthu ahaawerya awe osuwela saana. (Dan. 8:27) Owo aahikhaliheriwa nuumala oxukuriwa ni nlaikha Gabriyeli. Namihupi ola a Muluku aahimwiiriha Daniyeli osuwela itthu iye, aahimulipiherya wira mavekelo awe yaahiwiriyaniwa ni Yehova, nave aahileeliwa-tho wira nlelo, ‘Muluku ànimphenta wavikana atthu akina’. (Dan. 9:21-23) Okathi mukina, masu othanliwa saana yaalavuliwe ni nlaikha nikina, yaahimulipiha profeta ole aaxankihen’ye.​—Dan. 10:19.

Moolikanasa, muhinatthi omuxukurya muKristau mukhwiinyu yoowo oxankale, nviriheke okathi muupuwelelaka makhalelo awe. Mixankiho xeeni orina awe? Moota xeeni mixankiho iya sinimaliha aya ikuru sawe? Mikhalelo xeeni sooloka orina awe? Munna Richard ori mutokweene ovikana iyaakha 20, onihimya so: “Etthu eniwehexexa aka kaarowaka oxukurya, siri mikhalelo sooloka sa munna wala murokora owo”. Owo onnivikaniha olavula ariki: “Kihaana othokorerya mikhalelo sawe kihinatthi orowa omuxekurya. Nto eyo ennikhweiherya ovaha nikhaliheryo ni omulipiha moovarihana ni makhalelo awe”. Akhala wira munrowa ni mutokweene mukhwiinyu, vanniloka okilaathi wira muthokorerye hoothe mikhalelo sa munna ni murokora owo!

MMUKHWEIHERYE MUNNINYU OLAVULA

Nyuwo munnisuwela wira mutthu olavula myaha sawe, pooti wuuliha muru. Ntakiheryo: Opaka eyo pooti omwiiriha munna owo woona olipa oxekuriwa ni axitokhwene. Nto munrowa omaliha sai muxankiho owo? Muhaana otheyaka vakhaani ni moohakalala, mulavulaka masu animulipiha, nto eyo ennikhaliherya. Michael, munna ori mutokweene ovikana iyaakha 40, owo onnipaceriha waaxekurya wawe axinna ni masu ala: “Moosuwela, eparakha yuulupale axitokweene arina aya, ori waaxukurya anna owannyeya wira yaasuweleke saana. Nto ti etthu kaalipelela aka ophiya nihiku na wooxekuryani nyuwo”.

Nyuwo pooti opaceriha ni nivekelo noolipiha muhinatthi ovaanela. Okathi murummwa Paulo aavekelela awe axinnawe, owo aattittimiheryaka waamini ophenta ni ovilela anna yaarina aya. (1 aTes. 1:2, 3) Mwaha wa olavula mikhalelo sooloka sa anninyu, nto nyuwo munrowa otthokiha murima anyu wira nvaanele saana. Masu anyu pooti okhalana ikuru sikina. Ikwaha sikina ninniliyala itthu sooloka ninvara ahu. Mutokweene oniihaniwa Ray, onihimya so: “Nto okathi mutthu onnuupuxerya awe etthu, eyo enkhala etthu yoolipiha”.

MUNVAHEKE EPARAKHA YOOMUNEPANI

Moolikanasa ni Paulo, nyuwo pooti ‘omukawela yovaha ya [munepa]’, orweela mwa omulakiherya Soolempwa. (aRom. 1:11) Mwa ntakiheryo, munna mmosa oxankihen’ye, pooti okhala oonyoonyiwa, moolikanasa ni nasalimo yoowo ailikanyihale ni ‘murupa onúmihiwa vamwìxini’. (Esal. 119:83, 176) Nuumala otthokiherya moolumo awo, nyuwo muhaana omulipiherya munninyu wira owo kholiyanle malamulo a Muluku.

Moolikanasa, niireke nlikanyiho na muthiyana aamoriwe maluku a musurukhu awe pooti ovariheleya muteko okathi munimuxukurya anyu murokora onitthikela ottuli ni miteko sa mmulokoni? (Luka 15:8-10) Maluku ale a musurukhu a eparatha, pooti yaapakiwe ekolaari erumeeliwaka maluku manceene a musurukhu wa eparatha. Orweela mwa othokorerya ntakiheryo nla, owo onrowa woona wira tthiri ookhalana efaita yuulupale mmulokoni wa eKristau. Nto nuumala othokorerya mwaha owo, muhaana ottittimiherya vanceene wira Yehova onnimutthokorerya murokora owo ntoko epwittipwitthi yaamukhaani.

Ikwaha sinceene, axinnihu annaasivela moolumo a mBiibiliyani. Nto muhiviriheke okathi wotheene musomaka paahi! Nuumala osoma eveersu emosa enivarihana ni mwaha onilavula anyu, muhaana ottittimiherya nuulumo nimosa na eveersu eyo ni onvekela wira akomentari. Mwa ntakiheryo, nuumala omusoma 2 aKorinto 4:16, mutokweene mmosa, onnikoha wira: “Nyuwo mootoko oweha moota Yehova otonko awe woovahani ikuru”? Ovaanela moota ola, onniiriha ‘okhaliheryana’.​—aRom. 1:12.

Nyuwo nave pooti omulipiha owo musomaka yowiiraneya ya mBiibiliyani enilikana ni mukhalelo wa munna wala murokora owo. Mutthu oxankihen’ye, pooti okhaliheriwa ni yowiiraneya ya Hanna wala Epafrodito yaawo yaakhumunwe, masi elipiheriwa wira aakhalana efaita ohoolo wa Muluku. (1 Sam. 1:9-11, 20; aFil. 2:25-30) Nto xeeni muhinithokorerya anyu ntakiheryo nooloka na mBiibiliyani akhala wira vannireerela?

MUKHALANEKE EPHOOLE MOOTA WOOTTHARA MUUPUWELO

Nyuwo munrowa wooniherya omuthokorerya munna wala murokora orweela mwa ovikaniha ovaanela moophwanelela. (Mit. 15:36) Mwaamalihaka ovaanela iwo, nyuwo munrowa woona oloka olepa itthu sinrowa wookhaliheryani olavula okathi woolaleerya. Okathi mutokweene oolimalela Bernard, onikumana awe ni munna wala murokora, yoowo omuxukunrye awe ninaano, mooreerela owo onnimukoha munna owo onvanhe awe miruku ariki: “Munoonela sai, kiireke miruku iye soovara muteko?” Orweela mwa wooniherya waathokorerya, nyuwo munrowa osuwela etthu enireerela olokiherya.

Ti vootepa mahiku ala ariihu, axinnihu otheene, anitthuneya okhapeleliwa, ni ophentiwa. (1 aTes. 5:11) Nto, muhinatthi orowa waaxukurya anna, nviriheke okathi wira mutokose mukhalelo wa axinnanyu. Muhaana onvekelaka Yehova. Muthanleke soolempwa sooreerela. Nuuvira-vo, muhaana othanla masu ‘analipiha ale akhulumunwe’.

[Enoota]

[Elatarato epaaxina 29]

Muhinatthi orowa omuxukurya munna wala murokora, muhaana otokosa makhalelo awe

[Elatarato epaaxina 30]

Axinnihu, vannaasivela othokorerya hoothe soolepa sa mBiibiliyani

[Elatarato epaaxina 31]

Muhaana wooniheryaka saana waathokorerya wanyu