Itthu Siniixutta Ahu Mwa Nivekelo Noolokiheriwa Saana
“Nttottopeliwe nsina nanyu nòvuwa”.—NEH. 9:5.
MUNNIWERYA WAAKHULA?
iItthu xeeni sooreera aIsarayeli yaapanke aya okathi yaathukumanyiwe aya ni maLevita?
Yowiiraneya xeeni enooniherya wira Muluku onnaakhwaniherya yootaphulela ya nsina nawe?
Nniixuttani wa nivekelo na maLevita?
1. Muthukumano xeeni wa atthu a Muluku onrowa ahu othokorerya?
‘MWEMELASE, mmuttottopele [Yehova] Muluku anyu okhuma wopajeryani mpakha mahiku othene’. Masu ala oohakalaliha, yaalavuliwe ni atthu a Muluku a khalai yaathukumanne khupaka nivekelo nowiiraana nenlo nilempwale khalai mBiibiliyani. (Neh. 9:4, 5) Othukumana wiiren’ye oYerusalemu nihiku na 24, mweeri wa neethanu na piili, Tisri, 455 A.E.C. Vaavo vanithokorerya ahu itthu siiranen’ye nihinatthi nihiku nle mwiikoheke so: ‘Etthu xeeni yooreera yiirinhe okathi ole okhala woohakalaliha? Itthu xeeni siniixutta ahu mwa nivekelo nna noolokiheriwa saana?’—Esal. 141:2.
MWEERI A VAMEEKHA AWE
2. Ntakiheryo xeeni nooloka aIsarayeli nivanha aya okathi waathukumanne aya nuumala otthikela oteka ixiri sa Yerusalemu?
2 Mweeri mmosa ohinatthi muthukumano ohimmwale, aYuda yaahimaleliha otthikela oteka ixiri sa Yerusalemu. (Neh. 6:15) Mwa mahiku 52 paahi atthu a Muluku yaahimaliha muteko wooteka, nuumala-vo khupacerya ovaha ephoole makhalelo aya oomunepani. Nto nihiku noopacerya na mweeri musya Tisri, awo yaahithukumana vaniyateni wira anwiriyane okathi Ézira, vamosa ni aLevi akina yaarowa aya osomaka ni otthokiherya Nuulumo na Muluku. (Elatarato 1) Imusi sotheene waahela muhina otheene ‘yawerya owiriyana’, yaaheemela khiyawiriyana ‘okhuma vasisu mpakha othana eriyari’. Tthiri nla ntakiheryo nooloka wa hiyo otheene olelo-va ninwiriyana mithukumano oSalau ya Omwene yooreerihiwa! Masi niireke okathi owo muupuwelo anyu onikhala woohikilaatheya nto khiyapacerya wuupuwela itthu soohitepa otthuneya? Akhala wira eyo enniiraneya thokoreryani tho ntakiheryo na aIsarayeli a khalai yaawo yaavanhe ephoole mpakha murima aya owiiriha wunla mwaha wowoona wira nloko na Muluku notheene naahitthekela nlamulo na Muluku.—Neh. 8:1-9.
3. Yooruma xeeni aIsarayeli yaiwelenle aya?
3 Masi ola khahiyo waari okathi wa ohimyakasa soottheka. Mwaha wookhala nihiku nootthapa aIsarayeli yaahaana ohakalalaka mwaha woomukokhorela Yehova. (Elatarato 2) (Moth. 29:1) Tivonto Nehemiya ahaaleela atthu wira: ‘Muroweke owannyu, mwapeye yolya yorera, mwawurye evinyu anyu yosiva, mwakawele ale ahirina etthu yowapeya. Nla nihiku nulupale nireriheliwe Apwiyanyu, muhiripiwe murima, okhala wira otteliwa murima [wa Yehova] t’unkhala ikuru sanyu’. Moohakalaliha atthu yaahiiwelela, nto nihiku nle naahipakeya okhala ‘notteliwa murima’.—Neh. 8:10-12.
4. Etthu xeeni makhulupale a itthoko yaapanke aya, ni exeeni yoonale aya wira yaahaana opaka voohimya sa eFesta ya maxaxa?
4 Mmeeloni mwaya, makhulupale a itthoko yaahithukumana wira atokose moota nloko notheene naarowa aya wiiwelela saana Nlamulo na Muluku. (Elatarato 3) Nuumala ovarerya soolempwa awo yaahoona wira mweeri wa neethanu na piili, wahaana oheliwa muhina iFesta sa maxaxa saarowa omala nihiku na muthukumano muulupale, okhuma nihiku na 15 mpakha 22 mweeri wa Tisri, tivonto awo yaahipacerya opaka marehereryo. (Elatatrato 4) Okhuma vaavale yaahiiraneya efesta ya maxaxa yuulupale yaavikana mahiku a Yoxuwa ni yaahikumiherya ‘otteliwa murima’ vaalupale. Etthu emosa yuulupale yeeranenye mwa eFesta ela waari osommwa Nlamulo na Muluku ‘khula nihiku’ okhuma nihiku noopacerya mpakha nihiku nookiserya.—Neh. 8:13-18.
NIHIKU NOOHIMYAKASA SOOTTHEKA
5. Exeeni atthu a Muluku yaapanke aya, maLevita ahinatthi opaka nivekelo wa Yehova?
5 Nuuvira mahiku manli waahiphiya okathi woophwanelela ohimyakasa soottheka okhala wira aIsarayeli yaahihiya weettela Nlamulo na Muluku. Nla khahiyo naari nihiku nootthapa. Tthiri aIsarayeli yaahikhootta olya khuwara isaakho, ntoko ethoonyeryo ya wiikhupanyerya waya. Naahitthikeliwa-tho osommwa Nlamulo na Muluku wa atthu otheene etthu yoowiraka iwoora tthaaru vasiisu. Oxekuwa aya atthu otheene, yaahihimyakasa ‘sottheka saya, amukokhorelaka [Yehova] Muluku aya’. (Elatarato 5) Nto maLevi yaahipaka nivekelo noolokiheriwa saana mmureerelo wa atthu otheene. (Elatarato 6)—Neh. 9:1-4.
6. Exeeni yaakhalihenrye maLevita opaka mavekelo oohakalaliha nto eyo enniixuttihani?
6 Tthiri osoma waya woohihiyererya Nlamulo na Muluku waahaakhaliherya maLevita wiilokiherya saana wira apake nivekelo nooreera. Iversikulu 10 soopacerya sinittittimiherya miteko ni mikhalelo sa Yehova. Ipantta sikina sa nivekelo nle, onnittittimiheriwa othunku wa Muluku, aIsarayeli annoona-tho wira khiyareerela wooneliwa othunku ni Muluku. (Neh. 9:19, 27, 28, 31) Naatakihaka maLevita, mavekelo ahu wa Yehova anookhala oohakalaliha ni ooreerela akhala wira khuta nihiku ninnuupuwelela Nuulumo na Muluku khiyeemya wira Yehova olavule ni hiyo nihinatthi opaka mavekelo oorakama.—Esal. 1:1, 2.
7. Etthu xeeni maLevita yanvekenle aya Muluku, nto nniixutta exeeni?
7 Okathi ole etthu yaavekiwe yaari emosa paahi. Eniphwanyaneya mpantta wookiserya wa eversiikulu 32 enihimya so: ‘Vano . . . Muluku ahu, Muluku mulupale, Nyuwo mwá Muluku òwerya ni ‘òwopiha khamunihonona watàna wapakalyanyu, mana mòroromeleya. Vano mutthokelele . . . otakhaliwa wulupale oniphwannye hiyo ni mamwene ahu ni makhulupale ahu n’alipa a mukuttho ni maprofet’ahu naxitith’ihu n’atthu othene a nloko nanyu okhuma okathi wa mamwene wa wAsiria mpakha olelo-va’. Tthiri maLevita aanivaha ntakiheryo nooloka na onvuwiha ni omuxukhurela Yehova nihinatthi onvekela etthu.
OTTOTTOPELA NSINA NOOVUWA NA MULUKU
8, 9. (a) Masu xeeni oowiiyeviha maLevita yaarumenle aya okathi waapacerya aya ovekela? (b) Igrupu xeeni piili sa wiirimu saahimmwale ni maLevita?
8 Nnaamwi mavekelo a maLevita ale yaari oolokiheriwa saana, awo yaari oowiiyeviha okhala wira yaanoona wira masu aya khiyaawerya onvuwiha Yehova moomalela ntoko simphwanela awe. Tivonto vaapacenrye aya nivekelo naya nle yaalattulaka atthu otheene a Muluku wira: ‘Nttottopeliwe nsina nanyu novuwa, [maana] khanniweryaneya ovuwihiwa vophwanela’.—Neh. 9:5.
9 Nivekelo ninnivikaniha ni masu ala: ‘Nyuwo pahi mwa [Yehova] ti nyuwo mpattunxe erimu n’itheneri sothene; ti nyuwo mpattunxe elapo n’itthu sothene siri vathí, ti nyuwo mpattunxe ephareya ni sothene siri memmo. Ti nyuwo munivaha ekumi ni itthu sothene, itheneri sa wirimu sinnùrama sokokhorelakani’. (Neh. 9:6) Aayo Yehova oopattuxa olumwenku wotheene, khupaka itheneeri sinceene. Nave-tho oopattuxa itthu sotheene sinikumiherya mireerelo sinceene valaponi sirina owerya wootikiniha wa okumiherya mikhalelo soovirikana sa okumi, eyo piiyo, itthu siniyarana moovarihana ni muthinto aya. Malaikha ootteela a Muluku yaaniweha itthu iya sotheene nave awo annihimmwa okhala mittitthi sa wiirimu. (1 Mam. 22:19; Yobi 38:4, 7) Mowiiyeviha malaikha annipaka yootthuna ya Muluku vaavo anaakhaliherya aya apinaatamu oottheka ‘anrowa wopowa’. (aHéb. 1:14) Tthiri malaikha owo aanivaha ntakiheryo nooreera, wira nimurumeeleke Yehova, mwa enamuna ya muttitthi wa anakhotto ootthokiheya saana.—1 aKor. 14:33, 40.
10. Exeeni eniixutta ahu sa moota Muluku aamuthokorenrye awe Abrahamu?
10 Moottharelana maLevita annittittimiherya moota Muluku saamuthokorenrye awe Abramu ni Sara, nnaamwi Abrahamu aarina iyaakha 99 iira nlelo ohiyareliwe mwaana. Tivonto Yehova aarukununxe awe nsina khukhala Abrahamu nenlo nintaphulela: ‘tithi a maloko manjene’. (Maph. 17:1-6, 15, 16) Muluku aahimuleiherya-tho wira osuulu awe aarowa waakhela elapo ya oKanani. Apinaatamu annaakuva oliyala ele eleihenrye aya, masi Yehova khoniliyala. Nivekelo na maLevita ninnivikaniha niiraka so: ‘Nyuwo Apwiya Muluku mwahimuthanla Abramu, mwahimukumiha elapo ya wUri oBabilonia khunvaha nsina na Abrahamu. Mwahimphwanya [okhala] ororomeleya oholo wanyu, tivó mwahipatthana ni yowo mmulaiheryaka wira mwarowa onvaha elapo ya oKanani, . . . Nyuwo momaleliha itthu sihimyalyanyu okhala [wira] mwá ekekhai’. (Neh. 9:7, 8) Hiyo-tho nrowe nimutakihe Muluku ahu axariya niimananihaka khuta okathi waakhwaniherya ele ehimmya ahu.—Math. 5:37.
WUUPUWELELA ITTHU YEHOVA AAKHWANIHENRYE AWE
11, 12. Mutthokiherye yootaphulela ya nsina na Yehova, ni moota aakhwanihenrya awe masu awe ni osuulu wa Abrahamu.
11 Nsina na Yehova nintaphulela wira “Owo Onniiriha Okhala”, eyo enitaphulela wira Muluku onoowerya omwaakhwaniherya natiri ori otheene onimpaka awe. Eyo yaahiiraneya mwa enamuna yooreera vaavo Muluku aathokorenrye awe osuulu wa Abrahamu okathi waarya aya ipottha wEgitu. Okathi owo, waakhala ntoko khivaaweryaneya nloko nle otaphuliwa wira navolowe Elapo Yoolaiheriwa. Nto opakaka itthu moohihiyererya, Muluku ahaakwaniherya soolaiherya sawe, khooniherya wira owo mekhawe paahi toniphwanela nsina nlo noottittimiheya.
12 Nivekelo nilempwale ni Nehemiya voohimya sa Yehova niri so: ‘Nyuwo mwahona ohawa w’axitith’ihu wEjitu, mwaha wa okhuwela waya okherekhere wa ephareya [yoxerya]. Nyuwo mwahira ithonyeryo ni sotikiniha vonvirikanya mwene Farawó n’arumeyi awe n’atthu othene a mulaponi mwawe, mana mwanisuwela wira awo yanahaxa axitith’ihu. Siso movuwihiwa mpakha olelo va. Nyuwo mwahihula ephareya oholo waya, axitith’ihu khulapuwa ehinanne inawu. Mwaharihela mowixani mwa màsi ale yalupattha, khwàsamiha mmàsini ntoko maluku’. Nivekelo ninnivikaniha nihimyaka ele Yehova aapanke awe wa atthu awe: ‘An’aya awo yahikela-mo, khukuxa elapo, vano nyuwo mwahavahererya mmatatani mwaya atthu a mulaponi-mo, wira ewirele satthuna aya, mamwene awo n’atthu a mulaponi-mu. Awo yahikuxa mittetthe solipihiwa ni elapo yowunttelana; yahikuxa impa sosareya sorera sa khula enamuna, yahikuxa-tho ihime sithipiwe n’imatta sa miri sa ewuva ni s’olivera ni sa mihokorokho sikina sinjene ni sowatta. Siso yahilya mpakha ovona, yahisareya sorera, khukhala sana mwaha w’orera wanyu murima wulupale’.—Neh. 9:9-11, 24, 25.
13. Yehova aakumihenrye sai mireerelo somunepani wa aIsarayeli, nto awo yoonenle sai?
13 Sihaavo itthu sinci siiranen’ye kamosa-kamosa seiyo Muluku aapanke awe wira aakhwaniherye soolakela sawe. Mwa ntakiheryo, aIsarayeli amalakaru okhuma wEjito, Yehova aahipaka mareheryo mmureerelo aya wa omunepani. Tivonto maLevita yahuupuwela eyo okathi waavekela aya ariki: “Nyuwo mwahikhuruwela vamwako Sinayi, osulu weiwo mwahalavuliha, mwahavaha ikano sa xariya, soruma s’ekekhai, malamulo òloka ni òrera’. (Neh. 9:13) Yehova aheererya owiixuttiha atthu awe wira okathi yaarowa aya ovolowa Elapo Yoolaiheriwa aphwanele okhala atthu yiitthaneliwa nsina nawe, masi awo yaahiliyala itthu sooreera siireliwe aya.—Mmusome Nehemiya 9:16-18.
OTTHUNEYA WAYA YOOLAKA
14, 15. (a) Moota xeeni Yehova aawoonela awe othunku okathi atthu awe yaattheka aya? (b) Nniixuttani wa moota Muluku aathokorenrye awe atthu a nloko nawe noothanliwa?
14 Nivekelo na maLevita naahihimya soottheka piili saapanke aIsarayeli nuumala waakhulela Omwaako Sinayi wira yaamweettelaka malamulo a Muluku. Mwaha waivaavo awo yaaphwanela onyanyaliwa wira akhwe. Masi ale yaavekela yaaninvuwiha Yehova ahimyaka so: ‘ni othunku anyu wulupale khamwanyanyanle mothakoni . . . Mpakha iyakha miloko mixexe mwahavaha solya . . . Khiyahalela etthu. Sowara saya khisathanle, inawu saya khisaìpale’. (Neh. 9:19, 21) Olelo-va Yehova onnikumiherya khula etthu enitthuneya momunepani wira nimurumeeleke moororomeleya. Nto nihikhalakhale nilikanaka ni aIsarayeli ikonto sinceene yaakhwiiye moothakoni mwaha woohiiwelela ni ohikhalana nroromelo. Tthiri itthu iyo sotheene ‘sahilempwa wira sinlopole hiyo, okhala wira omala wa mahiku wonattamela’.—1 aKor. 10:1-11.
15 Mooriipiha murima, nuumala waakhela Elapo aya Yoohiyeriwa aIsarayeli yaahipacerya waatakiha aKanani khiyaakokhorela amuluku oowiiva ni oosiveliwa orupihana woohiloka. Tivonto Yehova aaheemya wira nloko nawe noothanliwa nihaaxiweke ni maloko makina yawaattamenle. Okathi yooniherya aya ottharuwa, owoonelaka othunku, Yehova anaalevelela ni owoopola wa awanani aya. Eyo yaniiraneya “imara sinjene”. (Mmusome Nehemiya 9:26-28, 31.) MaLevita yaahihimyakasa soottheka saya ariki: ‘Mwahavilela iyakha sinjene mwahalopola ni molumo a maprofeta, yawo yalavuliwa ni nsina nanyu, nto khiyàtthunne owiriyana. Tivó nyuwo mwahavahererya mmatatani mw’amalapo’.—Neh. 9:30.
16, 17. (a) Nuumala okhuma weepotthani mikhalelo sa aIsarayeli saavirikanne sai ni okathi amuhavinre aya yaakhenle aya Elapo Yoohiyeriwa? (b) Yoottheka xeeni yaahimmye aya, ni etthu xeeni yaalakenle aya opaka?
16 Hata nuumala okhuma wepotthani, aIsarayeli yaahitthikela mweettelo woohiiwelela. Mwaha wa xeeni? MaLevita yaahivikaniha ovekela ariki: ‘Tivó olelo hiyo ná ipottha mulaponi mwàvahalyanyu axitith’ihu, wira elyeke mihokorokho saya ni apuheke mihakhu saya. Mihokorokho sowatta sa elapo ela sinikuxiwa ni mamwene, yawo munivahaIyanyu wira enihaxe mwaha wa sottheka sahu . . . vano hiyo khanirere ohawa’.—Neh. 9:36, 37.
17 Niireke maLevita yaaphavela ohimya wira Muluku aari oohixariya mwaha wowaahiya ahaaxiwaka? Nnaari! Maana yaahihimya ariki: ‘Nyuwo khamutthenke mwa itthu sothene sinikhumelenle, munírenle exariya pahi, mmaliheryaka sanilaihenryanyu. Hiyo ti notthekenleni’. (Neh. 9:33) Nto nivekelo nla noohikhala nrima, naamalinhe ni masu oolaphela oowi nloko notheene naarowa wiiwelela malamulo a Muluku. (Mmusome Nehemiya 9:38; 10:29) Mwaha waivaavo, aYuda yaari makhulupale oowiiraka 84, yahaasinari edukumento yoolempwa.—Neh. 10:1-27.
18, 19. (a) Etthu xeeni enitthuneya ahu opaka wira noopowe ni okela elapo esya ya Muluku? (b) Etthu xeeni ehintthuneya ahu ohiya ovekela, nto mwaha wa xeeni?
18 Hiyo-tho nihaana olakiwa ni Yehova wira niphwanele okela elapo awe esya ya xariya. Paulo aakonhe so: ‘Mwana xeni ohinittaruxiwa ni tithi awe?’ (aHéb. 12:7) Ninnooniherya wira ninnaakhulela malakiheryo a Muluku, vaavo vanivikaniha ahu moororomeleya ovara muteko awe, ni weemya munepa wootteela onilokiherya. Nto akhala wira noopaka yoottheka yuulupale, nikupaliki wira Yehova onoonilevelela akhala wira noottharuwa ni waakhela yoolaka moowiiyeviha.
19 Moohipisa Yehova onrowa ovuwiha nsina nawe ovikana okathi aawooponle awe aIsarayeli wEjitu. (Ezek. 38:23) Ntoko siirenye aya ni aIsarayeli a khalai yaakhenle Elapo Yoohiyeriwa, nto maKristau otheene aniimananiha okhala anamakokhorela oororomeleya a Yehova, anrowa waakhela okumi elapo ya xariya ya Yehova. (2 Ped. 3:13) Nto nilipelelaka mareeliho awo a muhoolo, nihihiye ovekela wira nitteelihiwe nsina na Muluku. Mwaha onittharelana onrowa othokorerya moota wookhala, moovarihana ni mavekelo ahu wira naakhele mareeliho a Muluku vano, ni mahiku otheene.
[Elatarato epaaxina 21]
[Elatarato epaaxina 22]
1
[Elatarato epaaxina 22]
2
[Elatarato epaaxina 22]
3
[Elatarato epaaxina 23]
4
[Elatarato epaaxina 23]
5
[Elatarato epaaxina 23]
6