Makoho Anipakiwa Ni Ale Anisoma Irevista Sahu

Ti vookhalela opaha murutthu wa muKristau?

▪ Biibiliya khonihimya etthu enooniherya wira opaha murutthu etthu yookhottihiwa.

Sookhala sohimmwa siri mBiibiliyani sinooniherya wira sookhala mirutthu wala makhuva a atthu ookhwa yaapahiwe. (Yox. 7:25; 2 Wah. 34:4, 5) Owehasa wene eyo yaari yoowoniherya yoowi atthu awo khiyaaphwanela ovithiwa ntoko siirihiwa atthu akina. Masi khula okathi onipahiwa awe murutthu khonitaphulela etthu emosaru.

Hiyo nnoowerya woona ovirikana waya yootaphulela ya opahiwa murutthu okathi onirowa ahu othokorerya okhwa wa Mwene Sawuli ni anaawe araru. Atthu awo axexe yaakhwiiye awanaka ni aFilisti. Mmosa wa anamukhwa awo aari Yonathani, mpatthani ni namakhaliherya a Davidi. Anakhotto aIsarayeli yaakhala oYabexi w’oGalaadi vaiwale aya ele yaakhumelenle, awo yaahithukumanya mirutthu iye mixexe, khupaha, nuumala khuthipelaka makhuva ene. Muhoolo mwaya Davidi ahaaxukhurela atthu ale mwaha woopaka eyo.​—1 Sam. 31:2, 8-13; 2 Sam. 2:4-6.

Nlipelelo na alipa okhwa nnihimmwa mBiibiliyani ori ohihimuxiwa, eyo piiyo, Muluku onirowa omuttikiherya ekumi mutthu okhwiiye. Moohicikha etthu akhala wira murutthu wa mutthu onoopahiwa wala nnaari, Yehova ookhalana owerya woomuttikiherya mutthu owo ekumi onvahaka erutthu esya. Aheberi ale araru yaalamuliwe ni Mwene Nabukhodonosori wiiviwa ariheliwaka mulittini mwa mooro, khiyaatthuneya woova makhwelo ale yuupuwelaka wira Muluku khaawerya waahihimuxa. (Dan. 3:16-18) Etthu emosaru yaahiwiiraneela arumeyi a Yehova oororomeleya yaawo yaiviwe ni khupahiwa ni maNazista. Arumeyi anceene a Muluku ahookhwa mwaha wa ikapwitthi suulupale khunyaanyeya mpakha ohihala etathela ya murutthu aya. Hata vari siiso awo anoohihimuxiwa tthiri.​—Wis. 20:13.

Yehova khonitthuneya ottottela itathela sa erutthu ya mutthu ya khalai wira owerye omuhihimuxa. Eyo ennooneya oratteene vaavo Muluku onaahihimuxa awe maKristau oowoottihiwa wira yakhaleke wiirimu. Ntoko siisaale Yesu yoowo “aahihimuxiwe khukhala mutthu omunepani”, maKristau oowoottihiwa annihihimuxiwa khukhala mutthu mmosaru yoole aakhwiiye, masi ni erutthu yomunepani. Awo khanirowana wiirimu ni erutthu aya ya omutthu.​—1 Ped. 3:18; 1 aKor. 15:42-53; 1 Yoh. 3:2.

Nlipelelo na ohihimuxiwa khannilipa ni ele eniirihiwa aya murutthu ahu, masi onilipa ni owerya ni otthuna wa Muluku wira aakhwaniherye yoolaiherya awe. (Mit. 24:15) Hata nihisuwelaka moota Muluku aapanke awe miriira sa waahihimuxa atthu khalai wala muhoolo, etthu eniroromela ahu wira owo onimwaahihimuxa atthu. Nto nivikanihe omuroromela Yehova. Owo ooniroromeliha mwaha wa omuhihimuxa Yesu mokhwani.​—Mit. 17:31; Luka 24:2, 3.

MaKristau animwiira saana akhala wira annittittimiha mweettelo, moonelo ni malamulo a muttetthe onikhala aya voohimya sa murutthu wa mutthu ookhwa. (2 aKor. 6:3, 4) Nto akhala wira murutthu wa mutthu ookhwa onirowa opahiwa wala nnaari eyo yoothanla ya mutthu mwaneene wala amusi awe.