MWAHA WOOPACERYA | XEENI ATTHU OOLOKA SINAAKHUMELELA AYA ITTHU SOOTAKHALA?
Exeeni Muluku Onirowa Awe Opaka Wira Omalihe Otakhala?
Biibiliya onninleela ele Yehova ni Mwanawe, Yesu Kristu, anrowa aya opaka wira amalihe ohaawa onikumiheriwa ni Satana Diabo. Biibiliya onihimya so: “Ti vavo varwiyawe Mwana a Muluku: wira apwetexe miteko sa Satana”. (1 Yohani 3:8) Olumwenku ola wa vano yoowo osaren’ye nrima, onyokhana ni soophavela sootakhala, onirowa opwetexiwa. Yesu ooleiherya wira Satana Diabo yoowo “onruma vathí-va, onimomoliwa”. (Yohani 12:31) Okathi onrowa aya omalihiwa olamulela wa Satana, enookhala elapo esya ya xariya ni ya murettele.—2 Pedru 3:13.
Nto nihimye exeeni sa ale anikhootta orukunuxa muupuwelo aya athipelelaka opaka itthu sootakhala? Muupuwele yooleiherya ela ya Biibiliya eni: “Mutthu òloka onophwanya elapo y’okhala: mutthu àxariya onokhala mulaponi-memmo. Vano atthu òtakhala murima anopwetexiwa: alipa-òttheka anopheliwa mulaponi-mu”. (Miruku 2:21, 22) Atthu ootakhala murima khanrowa-tho okhala. Nto okathi owo, ale oowiiwelela anirowa woopoliwa vakhaani-vakhaani mwa yoottheka eranve aya.—aRoma 6:17, 18; 8:21.
Mwa elapo eyo esya, Muluku onirowa omaliha sai otakhala? Khahiyo wira onirowa omaliha yoovaha ya othanla mootaphuwa ni owiiriha apinaatamu okhala ntoko maakina. Masi, onirowa owiixuttiha iphiro sawe atthu oowiiwelela aakhaliheryaka orukunuxa muupuwelo ni soovara saya soohiloka.
Exeeni Muluku onirowa awe opaka voohimya sa ihasara sinikhumela mootutuxerya? Owo ooleiherya wira moohipisa eguvernu awe, enoopacerya weettiha elapo. Mwene a eguvernu eyo othanliwe ni Muluku, ti Yesu Kristu, yoowo orina owerya wowaapenuxa aretta. (Matheyo 14:14) Nave-tho Yesu ookhalana owerya wooruma ikuru sa ephattu. (Marko 4:35-41) Nto, onoomala ohaawa onikumiheriwa ni ‘okathi ni itthu sootutuxerya’. (Musuweli 9:11, NM) Mwa olamulelo wa Kristu, khasinrowa okhumelaka-tho ihasara.—Miruku 1:33.
Nihimye exeeni wa atthu imilyau sene oohittheka akhwiiye mmakhalelo ootakhala? Ohalaka vakhaani omuttikiherya ekumi mpatthani awe Laazaro, Yesu aahimmye so: “Miyo ki ohihimuwa n’ikumi”. (Yohani 11:25) Tthiri, Yesu ookhalana owerya wowaahihimuxa wala waattikiherya okumi ale akhwiiye!
Akhala wira munnisiveliwa ni muupuwelo wookhala elapo ehinrowa aya waakhumelelaka atthu ooloka itthu sootakhala, xontte mwiixutte voohimya sa Muluku eekeekhai ni yoolakela awe mmusomaka Biibiliya. Anamoona a Yehova a muttetthe anyu anoosiveliwa wookhaliheryani wira mphwanye osuwela iwo. Moohakalala, ninnoolattulani wira mulavulane Anamoona awo wala mwaalepele axineene erevista ela.