BIIBILIYA ONNIRUKUNUXA MIRIMA SA ATTHU

Khuuvo opuro waarowa aka kihimukunxe kapwitthi aka

Elavuliwe ni annunziato lugarà

MWAAKHA OYARIWE AWE: 1958

ELAPO OYARIWE AWE: ITALIA

MWAHA ENE: AARI MUTTHU OOTAKHALA

MWEETTELO AKA WA KHALAI: Kiyariwe oRoma opuro yaakhala atthu oohaawa. Okhala muttetthe owo waari wooxankiha. Nkitonko waasuwela amaama, nave nkiiwanana ni apaapa. Nto kinnunwe mwa makhalelo ale ooxankiha.

Kirina ene iyaakha 10, kaahipacerya wiiya. Kirina ene iyaakha 12, kaahitthyawa owaani mukwaha woopacerya. Ikwaha sinceene, apaapa yaanikirweela opoliisia wira akirowane owaani. Miyo kaamakela waakhulana ni atthu, nto kaari mutthu ootakhala ni kaaninanariwa ni atthu otheene. Okathi kaarina aka iyaakha 14, kaahikhuma owaani ni khuhitthika-tho mwa okathi munceene. Kaahipacerya olya mirette soohapala ni orupa mphironi. Mwaha woohikhalana opuro woorupa, kampaathiki mukaaroni, nto kinarupa memmo mpakha oxaka. Nuumala-vo, kaanaavya opuro waari maasi wira kikuse.

Kaahipakeya nawiiye muulupale; nto kaaniiya itthu sa mmurupani, inupa suulupale ni inupa sa atthu oothaaciri ohiyu. Kaahipacerya osuweliwa ntoko mutthu ootakhala, nto moohipisa kaahilattuliwa wiirela mpantta egrupu ya atthu oomwareya, yaawo yaakiixuttinhe wiiya ibanko. Mwaha wa mukhalelo aka wootakhala, moohipisa kaari mutthu ottittimihiwa a egrupu ele. Khuuvo opuro waarowa aka kihimukunxe kapwitthi aka; tthiri, kaarupa kimpwehale ene muyuununi. Opaka itthu sootakhala, olya mirette soohapala, olavula moolumo oohiloka, ni orupihana woohiloka waahikhala mweettelo aka. Maapoliisia yaanikaavya moohihiyererya. Kaahitthukweliwa ikwaha soovirikana, ni kiviriha iyaakha sinceene mukhatteya ni mapuro makina.

MOOTA BIIBILIYA ORUKUNUNXE AWE OKUMI AKA: Nihiku nimosa nuumala okhuma mukhatteya, kaahirowa waaxukurya amaama akhaani. Nkaasuwela wira awo ni anaaya anli yaari Anamoona a Yehova. Awosa yaahikilattula orowa omuthukumanoni wa Anamoona. Mwaha woophavela waasuwela, miyo kaahirowa. Nuumala ophiya Empa ya Omwene, miyo kahithipelela okilaathi waattamela vamukhora wira kiweryeke waaweha atthu otheene yaakela ni yaakhuma. Veekeekhai, miyo kaamukunxe kapwitthi.

Muthukumano ole waahituruka okumi aka. Kinnuupuwela wira okathi ole kaakhala ntoko kaari eplaneta ekina. Maana atthu ale yaanikilavuliha moohakalala, ni yaanitheya. Nlelo kinnuupuwela nihiku nle moota Anamoona yaakireerenle aya murima. Tthiri ale yaari oovirikana vanceene ni atthu keettana aka!

Kaahipacerya omusoma Biibiliya ni Anamoona. Vaavo kiixutta aka itthu sinceene, kaaniwexexa saana wira kaahaana oturuka moomalela mweettelo aka. Kaahiiwelela yoolepa ya Miruku 13:20 eni: “Onetta n’asuweli onokhala musuweli: onetta n’alolo onophwanya otakhaliwa”. Kaahoona otthuneya waya oheetta ni egrupu ele ya atthu oomwareya. Opaka eyo khahiyo vaari vookhweya, masi kikhaliheriwaka ni Yehova, kaahiwerya oxintta.

Nave-tho kaahireeriha erutthu aka. Nuumala wiimananiha vanceene, kaahihiya ompaha cigarro ni olya mirette soohapala. Kaahithikila ikharari saka soorakama, kaahirula ibrinku, ni kihiya olavula moolumo oohiloka. Mwa ekwaha yoopacerya mookumini mwaka, kaahipacerya ovaha ephoole itthu kaapaka aka.

Nkaatonko osiveliwa osoma iliivuru, nto waari vooxankiha wiiwexexa ni weettela ele yaasoma aka. Masi, vaavo kaimananihaka, kaahipacerya omphenta Yehova. Nto yowuupuxerya ya murima yaahipacerya okixankiha. Ikwaha sinceene kaanikhalana miyuupuwelo soohiloka, kinahoverya akhala wira Yehova aamukilevelela mwa itthu sotheene kaapanke aka. Okathi owo kaahiphwanya nimaaliho vaavo kaasoma aka voohimya sa moota aamulevelenle awe Mwene Davidi nuumala opaka itampi suulupale.​—2 Samuweli 11:1–12:13.

Muxankiho mukina waari waalaleerya atthu khuta empa. (Matheyo 28:19, 20) Kaanoova okumana ni atthu waaniheryasa kaatonko aka waahaaxa! Masi vakhaani-vakhaani kaahixintta woova waka. Kaahiphwanya ohakalala wekeekhai kaakhaliheryaka atthu wiixutta sa oreera murima wa Tiithi ahu a wiirimu, yoowo onilevelela vanceenexa.

MOOTA OTTOTTENLE AKA MUREERELO: Wiixutta voohimya sa Yehova ohoopola ekumi aka! Apatthani aka anceene a khalai ahookhwa wala ari mukhatteya, masi miyo kookhalana ohakalala wekeekhai mookumini mwaka ni nlipelelo noororomeleya muhoolo. Kihiixutta okhala oowiiyeviha, oowiiwelela, ni ohikhala ootakhala. Nto, eyo ennikiiriha okhalana opatthani wooloka ni atthu akina. Nave-tho, kinnihakalala okhalana mwaaraka ooreera Carmen. Hoothe, ninnihakalala vanceene naakhaliheryaka atthu wiixutta voohimya sa Biibiliya.

Nto vano kinivara muteko woororomeleya, nto ikwaha sikina onivarihana ni ibanko, masi khahiyo kiniiya musurukhu, masi kinooreeriha!

[Eponto yuulupale epaaxina 9]

Mwa ekwaha yoopacerya mookumini mwaka, kaahipacerya ovaha ephoole itthu kaapaka aka