Mwaalakeke Sai Aniinyu?

“Miyo kaaniwiriyana mooxankiheya khula ekaaro yaavira. Eyo yaari ekwaha yaneeraru mwanihu Jordan aapisa awe ophiya owaani. Nto kaaniikoha so: ‘Ori woowi? Niireke khokhanle mmaxakhani? Niireke khonsuwela wira hiyo nooxankiheya?’ Okathi aaphiyale awe, kaahanle vakhaani ommana”.​—GEORGE.

“Mwanaka mwaamuthiyana aanikhuwela vanceene, eyo yaahikiiriha oxankiheya. Vaavo kaaronwe aka omoona kamphwanye ovarenle ene muru ni anlaka. Murokorawe a iyaakha 4 aarommana”.​—NICOLE.

“Mwanihu mwaamuthiyana Natalie a iyaakha 6 aalavunle so: ‘Miyo nkimwiiyale munela ola. Kiroomuttotta!’ Nto maitho awe maalupale ni ooripelela yaakhala wira owo aahimya ekeekhai. Okhootta wawe woothipelela waahiniwereya vanceene ni naahinla. Hiyo naanisuwela wira owo aamootha”.​—STEPHEN.

MOHAANIHERYA akhala wira nyuwo mwa namuyari, munniiwexexa masu aromoliwe wanipacerya wa mwaha ola. Niireke okathi munikumana anyu mixankiho, munniikoha akhala wira muhaana omulaka mwaninyu, wala moota xeeni mukhanle anyu oomulaka? Niireke ti vootthekeya omulaka mwaana?

EXEENI ORI OLAKA?

MBiibiliyani nuulumo noowi “olaka” khinintaphulela paahi ovaha ehukhumu. Masi, wanipacerya nintaphulela wiixuttiha, wiiniha nikuruta, ni olakiherya. Nuulumo nlo khaninvarihana ni oveeha wala ohaaxa.​—Miruku 4:1, 2.

Olaka wa anamuyari waaniheryasa ohaana olikanaka ni ophatteya mwiri. Mulipa oniphatteya mwiri onnilokiherya etthaya, maasi, okhuwari mwiri owo, ni waakiherya axiitthu ni ophela malaxi. Vaavo mwiri owo oninnuwa aya, waaniheryasa onnivukula iritta saya wira okhaliherye wunnuwa saana. Nto owo onnisuwela wira orumeela inamuna soovirikana, onoomukhaliherya okhalana mwiri wooloka. Moolikanasa, anamuyari annaakhapelela anaaya mwa inamuna sinceene. Masi, ikwaha sikina awo ahaana waalaka. Eyo enlikanasa ni ovukula iritta sa mwiri, maana opaka eyo pooti olokiherya mikhalelo soohiloka ni waakhaliherya anamwane wira yinnuwe saana. Masi, ovukula iritta sa mwiri ohaana opakiwa ni ephoole, maana mwiri owo pooti ohinnuwa saana. Moolikanasa, olaka wa anamuyari ohaana okhalaka woophenta.

Yehova Muluku, yoowo ori mwaneene Biibiliya, oovaha ntakiheryo nooloka wa anamuyari mmwaha ola. Moota Muluku onaalaka awe arumeyi awe oororomeleya a valaponi ti wooloka ni woohakalaliha; ti maana aya awo aniphenta aya olakiwa nuuwo. (Miruku 12:1) Awo anniiwelela ni ‘weettela yoolaka’. (Miruku 4:13) Nyuwo munoowerya omukhaliherya mwaninyu weemererya yoolaka orweela wa otakiha saana itthu tthaaru sa olaka wa Muluku, eyo piiyo: (1) Ophenta, (2) oreera murima, ni (3) olipiherya.

OLAKA WOOPHENTA

Muluku onilaka moophenta ni mooreerela. Biibiliya onihimya so: “Tthiri Apwiya [Yehova] annapwapwela anaphentaya, ntoko tithi onimuttaruxawe mwan’awe onimphentexawe”. (Miruku 3:12) Masi, Yehova ‘tòmoriwa ikharari ni òvilela, òpisa onanariwa, òrera murima ni òroromeleya’. (Okhuma 34:6) Mwaha woophenta, Yehova khonilaka mooveeha wala moohaaxa. Nave, khonarumeele moolumo oohiloka, ooveeha, wala oonyoholela, yaawo aniwereya ntoko “tukuthi [ekatana] onvulaliha”.​—Miruku 12:18.

Ekeekhai wira anamuyari khaniwerya otakiha saana mukhalelo wa wiihiiha wa Muluku. Ikwaha sikina pooti woonaka wira khivaniweryaneya ovikaniha wooniherya opixa murima, masi okathi owo muupuweleke wira ovaha ehukhumu okathi woonanariwa, ikwaha sinceene ti wootakhala, wootepana, ni khonikumiherya mireerelo. Tthiri ovaha ehukhumu mwaha woonanariwa wala onyoonyiheya paahi khahiyo olaka, masi ori ohisuwela wiihiiha.

Masi, vaavo munilaka anyu moophenta ni wiihiiha, munoophwanya mireerelo. Muthokorerye moota George ni Nicole, anamuyari anli aromoliwe wanipacerya wa mwaha ola, yaaphunke aya myaha saya.

George, onihimya so: “Vaavo mwanihu Jordan aaphiyale awe owaani, miyo ni amwaaraka niira nnanariwe ene vanceene, masi naahikhala oomaaleleya ninwiriyanaka okathi aanitthokiherya awe ele yiiraneyale. Okhala wira vaahiila, nahuupuwela ophuka mwaha ole vaasisu. Nto naahipaka nivekelo hoothe ni khurowa orupa. Mmeeloni mwaya, naahiwerya ophuka mwaha ole nimaalelen’ye ene wira niwerye ovara murima wa mwanihu. Nto owo aahiiwelela malamulo ahu ni khweemererya sookhumelela sa mweettelo awe. Tthiri, ophuka myaha mowaakuveya atthu ananariwe ene, khonikumiherya mireerelo. Nto etthu yoopacerya naapanke ahu, waari onwiriyana; nto noophwanya mireerelo”.

Nicole, onihimya so: “Kaahinyoonyiheya vaavo kanwenhe aka mwanaka ohicalelaka nuumala ommana murokorawe. Ohiya olavulana naananoru, kaahimuruma orowa okwaartu wawe, maana nkaareere onanariwa ni nkaarowa owerya ophuka saana mwaha ole. Okathi mukina, vaavo kaari aka saana kaahimutthokiherya wira otakhala khoneemereriwa, ni kaahimooniherya wira khaareere omooniha owereya murokora awe. Eyo yaahimukhaliherya. Owo aahinvekela muswammaha ni omukupaarela murokorawe”.

Tthiri, olaka wooloka, hata ohelaka muhina ohukhumu, okhaleke wa niphento.

OLAKA WOOREERA MURIMA

Okathi wotheene, Yehova onilaka ‘mwa xariya’. (Yeremiya 30:11; 46:28) Owo onnoona mikhalelo sotheene, ohela muhina iye sihinooneya. Anamuyari anrowa omutakiha sai Yehova? Stephen, oromoliwe wanipacerya wa mwaha ola, onihimya so: “Nnaamwi naaxankihen’ye mwaha wohiiwexexa nthowa naya Natalie aathipelela awe okhootta wira oomwiiya munela, naahiimananiha wuupuwelela sa iyaakha sawe ni mukhalelo awe”.

Iyawe Nicole, Roberto, nave-tho onniimananiha othokorerya mikhalelo sotheene. Okathi anamwane anipaka aya itthu soohiloka, owo onniikoha oriki: ‘Etthu ela anoopacerya, wala etthu enimakela aya opaka? Kiireke mwaana ola orookhulumuwa wala khokhanle saana? Kiireke mweettelo awe ola onithoonyerya etthu ekina-tho yoohiloka?’

Anamuyari ooreera murima annisuwela wira anamwane khahiyo atthu aalupale. Murummwa Paulo aanisuwela ekeekhai eyo vaavo aalempe awe oriki: “Varyaka mwanamwane, kalavula ntoko mwanamwane, kùpuwela ni kavanela ntoko mwanamwane”. (1 aKorinto 13:11) Roberto onihimya so: “Etthu emosa enikikhaliherya ovikaniha wuupuwelela saana ni osyaka otepiha itthu ori wuupuwelela mmansaka ele kaapaka aka okathi kaaryaaka mmiravo”.

Ti vootthuneya wira mukhalane soolipelela sooloka, ni okathi omosaru, ohihiyererya mweettelo wala makhalelo oohiloka. Muupuwelelaka mikhalelo sa aniinyu, itthu aniwerya ya ovara, ni makhalelo makina, nyuwo munoowerya owiixuttiha saana ni mooreera murima.

OLAKA WOOLIPIHERYA

Malakhiya 3:6 onihimya so: “Miyo k’Apwiya [Yehova]: nkinirukunuwa nnákhala ottharuwa”. Arumeyi a Muluku anniroromela ni olipa ni ekeekhai eyo. Nave-tho anamwane annitthuneya olakiwa mooreerela. Akhala wira khamunilipiherya malamulo anyu, waaniheryasa mwaninyu onooxankiheya ni ohisuweleke yoovara.

Muupuwele moolumo a Yesu ani: “Olavula wanyu okhaleke ‘Ayo!’, walá ‘Nnari!’ pahi”. Masu awo annivareleya muteko saana wa anamuyari. (Matheyo 5:37) Muupuwele oratteene muhinatthi ovaha mikano seiyo muhinrowa anyu omaleliha. Akhala wira munimulopola mwaninyu wira apaka etthu yoohiloka munoomuhukhumu, nto muhaana ovara ele ehimmye anyu.

Wa anamuyari ooloka ovaanela ti wootthuneya wira yaalake anamwane moolipiherya. Roberto, onihimya so: “Akhala wira aniihu annoorwa varyaaka akivekelaka wira keemererye etthu amamaya yaakhoottihenrye aya, miyo nkineemererya yoovekela ayasa, ni kinnilipiherya yoothanla ya amwaaraka”. Akhala wira anamuyari khaniiwanana voohimya sa moota woophuka mwaha mmosa, ti vooloka ovaanela opuro mukina ahikhanle anamwane.

OLAKA TI WOOTTHUNEYA

Akhala wira munoomutakiha Yehova mwa waalaka anamwane moophenta, mooreera murima, ni moolipiherya, awo anoottottela mureerelo. Wiimananiha wanyu woophenta waaniheryasa onimwaakhaliherya aniinyu wira ekhale atthu oowunnuwa a miruku ni anipaka saana itthu. Biibiliya oni: “Nwixuttihe amiravo mwettelo worera: anùluvalaru, khanliyala”.​—Miruku 22:6.

[Ekaaxa epaaxina 12]

Olaka Onikhuma mBiibiliyani ti . . .

Woophenta: Olaka wooloka onikumiheriwa ni ophenta, ohiya oviruwa. Vaavo munikumana anyu etthu yooxankiha, muhivare etthu muhinatthi omaaleleya.

Wooreera murima: Mwiimananihe wuupuwelela itthu sotheene siirinhe okhumelela etthu eyo, ohela muhina muupuwelo ni soovara sa anamwane.

Woolipiherya: Akhala wira munimulopola mwaninyu wira apaka etthu yoohiloka munoomuhukhumu, nto muhaana ovara ele ehimmye anyu.