Waakhuliwa Wa Makoho A Mbiibiliyani

Xeeni nintthuneya ahu ovekelaka?

Yehova Muluku oniphavela wira hiyo nimuleeleke mixankiho sahu mootaphuwa. (Luka 18:1-7) Owo onniniiwa, maana onninthokorerya. Okhala wira Tiithi ahu a wiirimu yoowo ori ooreera murima, onninlattula wira ninvekeleke, moohaaniherya hiyo nimphavela waakhulela nlattulo nawe.​—Mmusome aFilipi 4:6.

Nivekelo khahiyo paahi enamuna yoophavela nikhaliheryo. Masi, ovekela onninikhaliherya omwaattamela Muluku. (Esalimo 8:3, 4) Vaavo moohihiyererya nimmuleela ahu Muluku muupuwelo ahu, hiyo ninnilipiha opatthani ahu ni yena.​—Mmusome Yakobo 4:8.

Nivekeleke sai?

Muluku khoniphavela wira nirumeeleke moolumo ooxankiha wala opaka mavekelo oosukiwa mmuru. Nave, khivanitthuneya orumeela makhalelo a vameekhaaya ntoko weemela, okhoroma wala okilaathi. Yehova onninlattula opaka mavekelo anikhuma vamurimani. (Matheyo 6:7) Mwa ntakiheryo, wIsarayeli wa khalai, Hana aahivekela voohimya sa muxankiho a emusi awe. Muhoolo mwaya, vaavo oriipiwa wawe murima waamanle aya nto khuhakalala, owo aahimuxukhurela Yehova Muluku anvekelaka ni murima wotheene.​—Mmusome 1 Samuweli 1:10, 12, 13, 26, 27; 2:1.

Tthiri nookhalana eparakha yuulupale! Hiyo, nnoowerya omwaattamela Mpattuxa ahu nimuleelaka mixankiho sahu. Nave-tho nihaana onvuwiha, omuttottopela ni omuxukhurela mwa itthu onnivaha awe. Veekeekhai, nihaana ovaha efaita eparakha ela nirina ahu.​—Musome Esalimo 145:14-16.

Wira musuwele soohimmwa sikina muwehe muru 17 wa eliivuru ela, yoolaleiwa ni Anamoona a Yehova

Mubaxari va www.jw.org/vmw