Niireke Munniwerya Omoona Muluku Ohinooneya?

“MULUKU [Munepa]”. Nto atthu khaniwerya onweha. (Yohani 4:24) Masi, Biibiliya onnaaromola atthu yaakhala ntoko yaamoona Muluku. (aHéberi 11:27) Moota xeeni? Niireke nyuwo munniwerya tthiri omoona “Muluku ohinòneya”?​—aKolosi 1:15.

Mulikanyiherye mukhalelo ahu ni mutthu ohinoona okhuma oyariwa wawe. Niireke ohoona wawe, onnimukhoottiherya osuwela itthu sotheene siniiraneya molumwenkuni? Nnaari. Mutthu ohinoona, onnisuwela itthu mwa inamuna soovirikana seiyo sinimukhaliherya waasuwela atthu, itthu, ni miteko sikina simwaattamenle. Mulopwana mmosa ohinoona ohimmye so: “Anoona khahiyo maitho, masi muupuwelo wa mutthu”.

Nto, nnaamwi muhiweryaka orumeela maitho anyu wira munwehe Muluku, nyuwo pooti orumeela maitho a ‘murima anyu’ wira munwehe yena. (aÉfeso 1:18) Muthokorerye inamuna 3 mukhanle anyu oomoona Muluku.

‘ONNOONEYA MWAHA WA ITTHU SIPATTUXALE AWE’

Ikwaha sinceene, mutthu ohinoona onniwerya wiiwa ni ovara itthu saana. Eyo ennimukhaliherya osuwela itthu ohiniwerya awe woona. Moolikanasa, nyuwo pooti orumeela mukhalelo anyu wa omutthu wira mutokose itthu sa mulaponi ni osuwela wira Muluku ohinooneya topattuxale itthu iyo. ARoma 1:20, onihimya so: “Tthiri, okhuma vapattuxalyawe Muluku olumwenku, atthu anniwerya osuwela makhalelo ahinòneya a Muluku”.

Mwa ntakiheryo, muupuwelele voohimya sa eplaneta ahu. Elapo khepakiwe wira nikhaleke mwa okathi vakhaani, masi mwa okathi wotheene. Vaavo enniphwanya aya epheyo yooreera, nsuwa, olya muhokorokho woosiva, aahiiso, wiiwa wiipa wa axipalame, hiyo ninnihakalala. Niireke soovaha iyo khasinooniherya wira Mpattuxa ahu tookhapelela, ooreera murima, ni oovaha?

Exeeni muniixutta anyu sa Muluku orweela wa itthu muniweha anyu valaponi? Etthu emosa tiila: erimu ennooniherya owerya wa Muluku. Sootokosa sa niinano sa siensia, sinihimya wira erimu khahiyo paahi enimunnuwa, masi-tho enninnuwa mowaakuveya! Okathi muniweha anyu wiirimu ohiyu, mwiikoheke so: ‘Sinikhuma woowi ikuru siniiriha erimu wira yinnuweke ni weettiha olumwenku?’ Biibiliya onninleela wira Mpattuxa ookhalana “owerya wulupale”. (Yesaya 40:26) Soopattuxiwa sa Muluku sinninooniherya wira Owo “t’òweryaxa” ni “mulupalexa”.​—Yobi 37:23.

“YOWO ORI MW’ATITHI, T’ONISUWELINHE MULUKU”

Maama mmosa onaahuwa anaawe anli axilopwana ahinoona onihimya so: “Olavulana teri etthu yootthuneya vanceene wira awosa yiixutte. Mwaaleeleke itthu sotheene munoona anyu ni muniiwa anyu. Nyuwo muri ntoko maitho aya”. Mwa ntakiheryo, “khuvo otonko omona Muluku”. Masi Mwaana a Muluku, Yesu, ‘yowo ori mw’Atithi, oonisuweliha Muluku’. (Yohani 1:18) Ntoko yoopattuxiwa yoopacerya ya Muluku ni Mwaana mmoseene, Yesu ori ntoko “maitho” ahu wiirimu. Owo tori ekaruma yoolokexa wira nisuwele voohimya sa Muluku ohinooneya.

Muthokorerye itthu vakhaani sinttharelana seiyo Yesu yoowo ovirinhe okathi munceene ni Atithi awe osuwelinhe awe voohimya sa Muluku:

Muluku onnivara muteko moohitemwa. “Atithi aka annivara muteko mahiku othene”.​—Yohani 5:17.

Muluku onnisuwela sootthuna sahu. “Atith’inyu annisuwela simphavelanyu, nyuwo muhinatthi wavekela”.​—Matheyo 6:8.

Muluku onninivaha itthu mooreera murima. “Àtith’inyu ari wirimu . . . annakumiherya nsuwa atthu òtakhala murima vamosá n’ale òrera murima: annarupihela epula anaxariya vamosá n’alipa-òttheka”.​—Matheyo 5:45.

Muluku onninvaha efaita khula mutthu. “Axipalame anli khantumihiwa inota vakhani pahi? Vano, nnákhala mmosá khampweteya, Atith’inyu ehitthunne. Nto nyuwo, hatá ikharari sa mmuruni mwanyu sihalikeliwa sothene. Tivó, muhòveké: nyuwo muhavikana axipalame òwatta”.​—Matheyo 10:29-31.

MUTTHU AAMUTAKIHA MULUKU OHINOONEYA

Atthu ahinoona ikwaha sinceene annisuwela itthu mwa inamuna sinivirikana ni atthu aniwerya woona. Mutthu ohinoona pooti osuwela epiphi, ohiya ntoko opuro wooriipa ohirina muthuko, masi onoona ntoko opuro wooriirya ohirina waarya wa nsuwa. Ntoko mutthu ohinoona moomalela ohiniwerya awe woona muuttutthi wala waarya, hiyo khanniwerya omwiiwexexa Yehova wa mukhalelo ahu paahi. Ti maana aya Yehova omukumihenrya awe mutthu yoowo moomalela owenhe mikhalelo Sawe ni omutthu awe.

Mutthu owo aari Yesu. (aFilipi 2:7) Yesu khahiyo paahi aalavunle sa Tiithi awe, masi-tho ahinooniherya mukhalelo wa Muluku. Murummwa a Yesu iitthaniwa Filipe aahinvekela Yesu iiraka: “Pwiya, nòniheryeni Atithi!” Yesu aahimwaakhula iiraka: “Ole okònne miyo, owònne Atithi”. (Yohani 14:8, 9) Exeeni muniwerya anyu “woona” voohimya sa Tiithi orweela wa miteko sa Yesu?

Yesu aari oophenta, oowiiyeviha, ni ookhweya olavulana. (Matheyo 11:28-30) Mukhalelo awe woopatthaneya waaniwiiriha atthu omwaattamela yena. Yesu aanoona othunku mwaha wa atthu akina, ni anihakalala vaavo atthu awo yaahakalala aya. (Luka 10:17, 21; Yohani 11:32-35) Vaavo munisoma anyu wala owiriyana myaha sa mBiibiliyani voohimya sa Yesu, mwiimananihe orumeela muupuwelo anyu ni mwiirihe sowiiraneya iyo okhala sekeekhai mmuruni mwanyu. Akhala wira munimuupuwela wa moota Yesu aathokorerya awe atthu, nyuwo munoowerya woona saana mikhalelo sooloka sa Muluku ni omwaattamela Yena.

VANNIWERYANEYA OMOONA MULUKU

Olavulaka sa moota mutthu oohoona onisuwela awe itthu sinikhumelela molumwenkuni, muthiyana mmosa aalempe so: “Mutthu ohinoona onnisuwela itthu okhaliheriwaka ni mikhalelo sinceene, ntoko (okhwannyiwa, woona wunkhela, wiiwa, ni itthu sikina), ni onnirumeela itthu iyo wira osuwele itthu siniiraneya”. Moolikanasa, vaavo muniweha anyu soopattuxiwa sa Muluku, osoma itthu Yesu ohimmye awe sa Tiithi awe, ni wuupuwelela moota Yesu oonihenrye awe mikhalelo sa Muluku, munoowerya “omoona” Yehova mmuruni mwanyu. Nto owo onrowa okhala eekeekhai wa nyuwo.

Yobi, yoowo aakhala okathi wa khalai, aahisuwela etthu eyo. Wanipacerya owo aahilavula ‘mòhisuwela’. (Yobi. 42:3) Masi nuumala othokorerya oratteene soopattuxiwa sootikiniha sa Muluku, Yobi aahikuxeya murima khuhimya so: “Mpakha olelo, miyo kanosuwelani kìwaka muhimmwaka pahi: nto vano kihowehani ni maitho ak’ala”.​—Yobi 42:5.

Etthu emosaru pooti wiiraneya ni nyuwo. “Mwàphavelaka Apwiya [Yehova], awo animorwa okumana ni nyuwo”. (1 Wahala 28:9) Anamoona a Yehova anoosiveliwa wookhaliheryani wira mumphavele ni mumphwanye Muluku ohinooneya.

[Eponto yuulupale epaaxina 15]

“Mwàphavelaka Apwiya [Yehova], awo animorwa okumana ni nyuwo”