Naakhaliherye Ale Ahinoona Wiixutta Voohimya sa Yehova
1. Yesu aamorenle sai ikharari alipa yahoona?
1 Yesu iira okhumaka oYerikho. Nto alopwana anli yahoona yaanikhuwela ariki: “Pwiya, . . . munimorele ikharari!” Nnaamwi Yesu aaxankale mwaha woowi okhwa wawe waari vakhiviru, aaheemela khuwiitthana alopwana ale, ni khwaapenuxa. (Math. 20:29-34) Ninrowa omutakiha sai Yesu voohimya sa omoriwa ikharari?
2. Namphwanya mutthu ohinoona, ninrowa omulaleerya sai?
2 Naakhaliheryeke: Akhala wira munnimphwanya mutthu ohinoona, mmuleeleke nsina nanyu ni mwiivahererye omukhaliherya. Woopaceryani, ale ahinoona pooti onihoverya, maana ahaavo atthu anaattottela muraarelo voohiloka. Masi, nakhala oopatthaneya ni omuthokorerya yena, owo pooti ohakalala. Nave, muupuweleke wira sihaavo inamuna soovirikana sa ohoona, nto eyo pooti onikhaliherya osuwela moota woomukhaliherya. Nuumala omukhaliherya, pooti omuleela wira munivara muteko wa olumwenku wotheene wa omwiixuttiha Biibiliya. Mmusomele Esalimo 146:8 wala Yesaya 35:5, 6. Akhala wira onniwerya osoma eBraile, mmukohe aaphavelaka okhalana iliivuru sa eBraile sinrowa omukhaliherya wiixutta itthu sikina sa mBiibiliyani. Nave pooti omukhaliherya ophwanya iliivuru soogaravariwa siri va jw.org. Akhala wira komputadore awe ookhalana eprograma enisoma mowiiweya moolumo oolempwa (screen reader), waaniheryasa owo onoosiveliwa myaha siri va jw.org ni iliivuru sikhanle oobaxariwa ni eformato eniitthaniwa RTF (Formato Rico de Texto).—Muwehe ekaaxa eni “Moota Woomukhaliherya Mutthu Ohinoona”.
3. Ninrowa owaavya sai atthu ahinoona mmuttettheni mwahu?
3 Niwaavyeke Ale Ahinoona: Ikwaha sinceene, khinnaaphwanya atthu ahinoona vaavo ninlaleerya ahu mmawaani, maana anamunceene khonaasivela ovaanela ni atthu ahinaasuwela aya. Nto, nihaana wiimananiha wira ‘niwavyeke’ atthu awo wira naalaleerye. (Math. 10:11) Niireke ookhala mutthu onivarana anyu muteko wala onisomana anyu ohinoona? Mmulaleerye yena. Akhala wira muttetthe anyu yookhala exikola ya atthu ahinoona, nvahererye iliivuru sahu sa eBraile obibilioteka wa exikola eyo. Niireke munnimusuwela mutthu orina mmusi ohinoona? Muttetthe anyu sookhala mitthenkeso sinaakhaliherya atthu ahinoona? Mmutthokiherye mmusi a mutthu owo, wala mutthenkeso owo wira Anamoona a Yehova annaakhaliherya atthu ahinoona, ni annivaha iliivuru sa eBraile wala soogaravariwa. Mmooniherye yooleiherya ya Biibiliya yoowi Muluku moohipisa onoomaliha muxankiho wa ohoona. Pooti omooniherya eviidiyu eri va jw.org, eni: “Sem ela, eu me sentiria perdido”, yeeyo enooniherya yowiiraneya ya mulopwana ahoona aaphwannye mureerelo mwaha wookhalana Biibiliya a eBraile. Nave, omutthokiherya yoolakela ya oxukurya wanyu, pooti wookhaliheryani waaphwanya atthu akina ahinoona.
4. Enniixuttiha exeeni yowiiraneya ya Janet?
4 Janet, murokora ohinoona, onimakela oxukurya inupa sinikhaliwa ni atthu ahinoona ni oomulaleerya mwali mmosa. Janet aapacenrye so: “Yesu aahaapenuxa atthu yahoona wira ooniherye ele onirowa awe opaka muhoolo wa ale ahinoona”. Nuumala omusoma Wisupulula 21:3, 4, Janet aahitthokiherya moota Omwene wa Muluku onirowa aya omaliha ohoona. Muthiyana ole aahimaala vakhaani, nto khuhimya so: “Nkitonko omwiiwa mutthu ohinoona alavulaka masu awo. Anamunceene anikupali wira ohoona oniphwanyiwa mwaha wa ehukhumu mutthu opanke awe wala amuhavinre awe”. Janet aahinvaha enderesu enikhaliherya ophwanya eliivuru Biibiliya Oniixuttiha Exeeni musaiteni mwahu. Vano annisoma ikwaha piili vasumanani.
5. Nnaamwi nihiweryaka waapenuxa atthu ahinoona, waacalela wahu atthu awo onirowa oniphwanyiha mareeliho xeeni?
5 Moovirikana ni Yesu, hiyo khaninwerya waapenuxa atthu ahinoona. Muluku a vathi-va oottiyela miruku sa anamunceene, waahela muhina ale ahinoona mwa werutthuni. Masi nnoowerya waakhaliherya wiiwexexa ekeekhai ya Biibiliya. (2 aKor. 4:4) Yesu aahaapenuxa alopwana ale waattamela oYerikho, maana ‘aahaamorela ikharari’. (Math. 20:34) Namutakiha Yesu, nnookhalana eparakha ya waakhaliherya akina wiixutta voohimya sa Yehova, yoowo onirowa omaliha ohoona mahiku otheene.
[Ekaaxa epaaxina 3]
Moota Woomukhaliherya Mutthu Ohinoona
• Mulavuleke munwehaka, masi moohirunya. Mutthu ohinoona khoniwerya oweha masi owo pooti wiiwa saana.
• Munvarele moono ni mweemye wira owo ovarele moono anyu wira mmukhaliherye weetta. Waaniheryasa owo onirowa omananihaka woottharani vaavo muneetta anyu. Akhala wira munimoona nlitti, mwiri, wala muxankiho mukina, mmuleele.
• Muhoovelele orumeela nuulumo ntoko: “Moone”. Atthu ahinoona annirumeela nuulumo nlo. Awo ‘annoona’ mwa enamuna ekina arumeelaka muupuwelo aya.
• Nvaaneleke opuro woomaaleleya. Mutthu ohinoona khonimusivela okhala opuro woonyakuliwa, maana vannimuxankiha osuwela ele enikhumelela opuro owo.
• Okathi munikhuma anyu opuro owo, mmulaxeryeke. Eyo enoomwiiriha ohinyoonyiheya, maana khonrowa ohala olavulaka mekhawe.
• Mutthu owo aasiveliwaka ekeekhai masi ahinakhala muttetthe anyu, mmalelihe olepa eformulaario Queira Visitar (S-43-T) ni munvahererye sekretaario a muloko anyu.