Awo Yaahiivahererya Vootthuna waya oMicronésia

KATHERINE unnuwale wEstados Unidos ni aahibatiziwa okathi waarina awe iyaakha 16, khukhala Namoona a Yehova. Owo aanikhalela nthiti muteko woolaleerya, masi muttetthe ole owo khaaphwanya atthu yaaphavela owiriyana ihapari sa Omwene. Owo onihimya so: “Kaanisoma sowiiraneya sa atthu yaawo yaavekela wira Muluku aaroihele mutthu wira aakhaliherye omusuwela yoowo. Ikwaha sinceene kaaninlela omphwanya mutthu siisa, masi nkamphwanya”.

Nuumala olaleerya iyaakha sinceene nipuro nimosa, Katherine, aahipacerya wuupuwelaka othaamela nipuro nenle aarowa awe waaphwanya atthu yaaphavela wiiwa ihapari sa Omwene. Masi aanitikinihiwa moota aarowa awe opaka eyo. Okhala wene mukwaha mmosa paahi taakhumale awe vapuwani, etthu yowiiraka isumana piili, nuumala-vo khaaphavela-tho okhuma owaani. Masi yoophavela awe ya ophwanya ohakalala mwaha wa waakhaliherya atthu akina omusuwela Yehova yaanitepa wunnuwa. Nuumala okohererya mapuro manceene yaakhanle awe oothaamela, owo aahilepa epaphelo oroihaka ofiliyaali ya oGuam, nto aahitthokiheriwa saana itthu sareerela osuwela. Mweeri wa Julyo 2007, orineene iyaakha 26, Katherine aahithaamela oSaipan, esisiro emosa ya Oceano Pacífico, orakamela waya waari wa ikiloomu 10.000 okhuma owannyawe. Nuumala othaama itthu xeeni samwiiranenle?

WAAKHULIWA WA MAVEKELO MANLI

Ophiyakaru muloko ole musya, aahimphwanya, muthiyana mmosa iireliwa Doris, yoowo aarina iyaakha sinivikana 40, eemyale omusoma Biibiliya. Nuumala osoma miru miraru soopacerya sa eliivuru Biibiliya Oniixuttiha Exeeni, Katherine aahoona etthu yaamuxankiha. Owo onihimya so “Doris aari mulipa oomusoma Biibiliya ooloka ahaaphavela aka omuyeleela. Miyo nkaatonko wiiriha yoosoma ya Biibiliya yookelela ohoolo ni kaanoona wira Doris aatthuneya osomihiwa ni murokora osuwela itthu okivikana miyo, woonasa wene mutthu orina iyaakha ntoko Doris yoowo”. Katherine aahinvekela Yehova wira omooniherye murokora ooreerela, aarowa awe omuhiyerya yoosoma ele ya Biibiliya. Nto ahuupuwela omuleela Doris wira aarowa osomihiwaka ni mutthu mukina.

Katherine onihimya so “kihinatthi omuleela, Doris aahimyale wira ohaana muxankiho oniphavela awe okileela. Nuumala onwiriyana, kaahimuleela moota Yehova aakikhalihenrye awe ovikana muxankiho mmosaru mweekumini mwaka. Owo aahikixukhurela vanceene”. Nuumala-vo Doris aahimuleela Katherine wira: “Yehova toorummeni wira mukikhaliherye. Nihiku niphiyale anyu-va, kiira kimusommeene Biibiliya aka iwoora sinceene. Miyo kaamunla, kinvekelaka Muluku wira omurumihe mutthu wira okikhaliherye omwiiwexexa Biibiliya. Nto nyuwo khuphiya vatthokoni vaka. Tthiri Yehova ohaakhula mavekelo aka!” Eyo yahimwiiriha Katherine omoroxa maithori okathi aawiriyana awe masu awo oovara murima. Owo onihimya so: “Masu a Doris yaari waakhuliwa wa mavekelo aka. Yehova aahikooniherya wira kaahaana ovikaniha wiiriha yoosoma ele”.

Doris aahibatiziwa mwaakha wa 2010, nto olelo-va owo onniiriha soosoma sinceene sa Biibiliya sawawe. Katherine onihimya so: “Kootepa omuxukhuru Yehova mwaha wowaakhwaniherya yootthuna aka ya omphwanya mutthu ooreera murima wira kimukhaliherye omusuwela Yehova!” Olelo-va, Katharine onirumeela moohakalala ntoko pioneera a vameekhaaya esisiro ya oPacifico oKosrae.

MOOTA WOOXINTTA MIXANKIHO MIRARU

Anna ni arokora anivikana 100 a mapuro manceene (arina munnuwelo onikhuma iyaakha 19 mpakha 79) aarumeela mapuro ari oothowa anamalaleerya oMicronésia. Moonelo wa anamalaleerya ala a nthiti onnihimmwa ni Erica yoowo aathaamenle oGuam mwaakha wa 2006 orineene iyaakha 19. Owo onihimya so: “Ovara muteko muttetthe ola ori atthu oovoliwa ntthona na ekeekhai onnitepa ohakalaliha. Miyo kootepa ohakalala vanceene mwaha wa Yehova okivaha eparakha ela ya muteko ola. Ela ti enamuna ya ekumi yoohakalaliha”! Olelo-va, Erica onnirumeela moohakalala, ntoko pioneera a vameekhaaya muttetthe wa Ebeye isisiro siniitthaniwa Marshall. Masi, orumeela elapo ekina wookhalana mixankiho saya. Vano nrowe nithokorerye mixankiho miraru ni noone moota aniwanana aya ale anithaamela oMicronésia.

Moota atthu sinikhala aya. Nuumala ophiya esisiro ya oPalau mwaakha wa 2007 orineene iyaakha 22, Simon moohipisa aahoona wira aarowa oweryaka ophwanya musurukhu vakhaani voovirikana ni elapo awe wInglaterra. “Kaahaana wiixutta ohithuma khuta etthu yaaphavela aka. Vano kinnisuwela othanla itthu sinirowa aka othuma, kinneetteetta wira kiphwanye itthu soopunttheya. Yahononeya etthu emosa, kinnimananiha omwaavya mutthu oniwerya okikhaliherya olokiha etthu eyo”. Nto owo aawenrye sai oxintta makhalelo awo? Simon onihimya so: “Kaahaana wiixutta othanlela itthu sootthuneya tthiri ni osuwela orumeela musurukhu vakhaani. Nave Yehova aahikikhaliherya imaara sinceene. Iyaakha iya 7 sivinre kirumeelaka muttetthe ole, khiyaakithowa yoolya hata nipuro noorupa”. Tthiri Yehova onnaareeliha atthu yaale anikhweiherya ekumi aya wira ahele Omwene awe nipuro noopacerya mweekumini mwaya.​—Math. 6:32, 33.

Wunkheliwa Owaani. Erica onihimya so: “Miyo ka mutthu oowaataana vanceene ni emusi aka, nto koona wira munkhela waarowa ohonona muteko aka”. Nto owo aapanke exeeni wira oxintte muxankiho owo? “Kihinatthi othaama, kaahisoma myaha sa erevista Owehaweha voohimya sa wunkheliwa owaani. Eyo yaahilokiherya murima aka voohimya sa muxankiho owo. Mwaha mmosa waasomme aka, waalavula sa maama mmosa yoowo aamuhimenrye mwanawe mmosa mwaamuthiyana wira: ‘Yehova onimookhapelelani saana okivikana miyo’. Eyo yaahikilipiha vanceene”. Hannah ni aiyawe, Patrick, anirumela oMajuro isisiro siniitthaniwa Marshall. Hannah aahimaliha muxankiho wa wunkheliwa owaani aakhapelelaka saana anna ni arokora a mmulokoni. Owo onihimya so: “Kinnimuxukhuru Yehova vanceene mwaha wa annihu a olumwenku wotheene okhala wira naawo amusihu. Nahakhanle nikhaliheryo naya anna awo, miyo nkaawerya orowa orumeela mapuro ari oothowa anamalaleerya”.

Moota Woolimalela. Simon onihimya wira “mutthu waphiya elapo ekina khula etthu enikhala yoovirikana. Okathi mukina kaanimananiha ohimya etthu yootheiha masi khuuvo aatheya mwaha woohiwexexa ele yaahimya aka”. Erica onihimya so: “Wuupaceryani koona wira nkaawerya okhala kihiiwananaka saana ni atthu ale, masi wuupuwela etthu yaakiruuhale waahikikhaliherya. Miyo nkithaamenle nno mwaha wothweela, masi mwaha wa muteko wa Yehova”. Owo onimaliha ohimyaka so: “Nuuvira okathi kaahikhalana apatthani anceene ahinaaliyala aka”. Simon aahimananiha wiixutta nttaava na Palauan, nto eyo yaahimukhaliherya ‘watthukulela murima awe’ anna ni arokora a mapuro ale. (2 aKor. 6:13) Wiimananiha wawe wiixutta nttaava nle waahimwiiriha wiiraana ni anna. Aayo, vaavo anna a ilapo soovirikana anivara aya muteko moowiiraana, igrupu soopili sinniphwanya mureerelo wa okhala oohakalala ni wiiraana mmulokoni. Mireerelo xeeni sikina aniphwanya aya ale aniivahererya orowa ovara muteko mapuro ari oothowa anamalaleerya?

‘OHEPHA MIREERELO SINCEENE’

Murummwa Paulo aahimmye so: “ole onàla vanjene, onihepha vanjene siso”. (2 aKor. 9:6) Eponto yuulupale ya masu ala, anihimmwa yaale aninnuuherya muteko aya woolaleerya. Nto mihokorokho xeeni sinceene “anihepha aya” oMicronésia?

Elapo ya oMicronésia, nlelo sookhala iparakha sinceene sa opaceriha soosoma sa Biibiliya, ni mutthu woona ni maitho awe moota atthu awo anivarihela aya muteko ele eniixutta aya munuulumo na Muluku ni wunnuwela omunepani. Patrick ni Hannah, yaahikhalana eparakha ya olaleerya wAngaur, esisiro yaamukhaani enikhaliwa ni atthu 320 paahi. Nuumala olaleerya muttetthe ole myeeri miili, awo yaahimphwanya maama mmosa oohitheliwa. Owo aahaakhulela omusoma Biibiliya moohipisa, aahivarexexa ekeekhai ni aahipaka mirukunuxo sinceene mweekumini mwawe. Hannah onihimya so: “Wuumalani wa khula yoosoma, okathi waakhuma ahu ni bisikaleeta ahu, hiyo naaniwehana mukina ni mukhwaawe, nto khiyahimya so: ‘Ninnooxukhuruni Yehova!’” Hannah onnihimya-tho so: “Kinnisuwela wira Yehova aammukhaliherya muthiyana ole orumeelaka khula enamuna yaarowa omusivela, masi mwaha wa hiyo orowa orumeela nipuro noothowa anamalaleerya, hiyo noowerya omphwanya ni omukhaliherya muthiyana ola onilikana ni epwittipwitthi wira omusuwele Yehova. Ela yowiiraneya yootepexa ohakalaliha mweekumini mwahu!” Erica onihimya so: “Vaavo vanimukhaliherya anyu mutthu omusuwela Yehova, nyuwo munniphwanya ohakalala wuulupale!”

NIIREKE NYUWO MUNOOWERYA WIIRA SIISO?

Mwa ilapo sinceene, annitthuneya anamalaleerya anceene a Omwene. Niireke nyuwo munoowerya okhala mmosa a atthu awo anirowa okhaliherya mapuro awo oothoiwa anamalaleerya? Munvekele Yehova, wira wookhaliheryeni olipiha yootthuna anyu ya wunnuuherya muteko anyu woolaleerya. Mulavule ni axitokweene a mmulokoni mwanyu, mutokweene a esirkwiitu wala ni anna yaale atonko orumeela ilapo siri soothowa anamalaleerya. Mwalikanela wira muthaame, mulepele efiliyaale enikhapelela muttetthe owo oniphavela anyu orowa orumeela, wira mutthokiheriwe saana makhalelo a mapuro awo. Owehasa wene, nyuwo nave munoowerya wiirela mpantta wa ikonto sinceene sa anna ni arokora, amiravo ni oowunnuwela, oothelana ni oohithelana, yaawo yiivaherenrye vootthuna vaya wira alawihe ohakalala onikhumelela mwaha wa ‘ohepha mihokorokho sinceene’.

[Enoota]

Nwehe mwaha oni “Munoowerya ‘Orowa oMasedonia’”?, mu Orummwa Ahu wa Omwene wa Akosto 2011.

[Ekaaxa epaaxina 6]

Enamuna Yoowiiniha Nikuruta

ANAMUNCEENE mwa yaale anithaamela ilapo sikina wira yalaleerye anikhala axitokweene avirinhe iyaakha sinceene akhapelelaka muloko. Moota xeeni anna awo aniwiiniha aya nikuruta atthu ammulokoni?

Richard, yoowo orina iyaakha 65, aahithaama wEstados Unidos orowaka oGuam. Owo onihimya wira waattottopela anna ti etthu yootepexa otthuneya okathi oniwiiniha anyu nikuruta. Richard onnihimya-tho wira: “Enamuna yooloka ya owiiniha nikuruta anna awo ori ovara hoothe muteko woolaleerya. Anna awo anoowerya owoonani ni owiiwani moota muniwiixuttiha anyu atthu akina voohimya sa Yehova. Ohiya-vo ovara muteko hoothe ni anna awo onnikumiherya wiiraana ni ophentana”.

Greg, yoowo orina iyaakha 60, aakhala oSaipan okhuma mwaakha wa 2010. Onihimya so: “Axitokweene athaamenle nno, annimukhaliherya khula munna a mmulokoni. Hiyo noopakana ompatthani ni awo ni ninnittittimihana mukina ni mukhwaawe”. Owo onihimya-tho so: “Hiyo khahiyo tinniwiixuttiha anna a mapuro ala paahi. Hiyo-tho ninniixutta itthu sinceene ni anna awo”.

Mike, yoowo orina iyaakha 60, ni amwaarawe Alice, yaahirumeela muttetthe wa oPacífico iyaakha 20. Moota xeeni munna owo owiininhe awe nikuruta atthu akina? “Orweela mwa ntakiheryo nooloka na otthara malakiheryo a nikhuuru nootthokiheya na Yehova. Nto miyo kaaniimananiha wira ale yaawiiniha aka nikuruta yiiwexexe malakiheryo awo. Miyo kaaniimananiha opaka itthu moovarihana ni ele yaixuttiha aka, okhala oopixa murima, ni waaxukhurela mooreera murima”. Mike onihimya-tho so: “Vakhala wira nyuwo munithaamela elapo ekina, muhiliyale wira sookhala inamuna soovirikana sa ovara muteko mmosaru”.

Nto moota xeeni anna ale ayariwe oMicronésia yoonela aya nikuruta nlo yaavahiwa aya? Joel, yoowo orina iyaakha 21, onikhala oGuam, onihimya so: “Axitokweene ale yaahooniherya wira yaanikiroromela okhala wira yaanikivaha miteko soovirikana wira kaakhaliherye. Eyo yaahikikhaliherya woona wira kookhalana etthu ya efaita ekhanle aka oorumeela mmuteko wa Yehova”. Byron, yoowo orina iyaakha 31, onikhala oSaipan, onihimya so: “Mwaha wa nthiti naya mmuteko woolaleerya ni waaphenta waya atthu a mmulokoni, axitokweene ale aakikhaliherya ovaha efaita itthu somunepani ohiya ophavelasa mihakhu”. Owo onnihimya-tho so: “Tthiri mareeliho manceene okhala ni anna awo okathi ola wotheene”.