MWAHA WOOPACERYA | OMWENE WA MULUKU ONROWA OPAKA EXEENI MMUREERELO ANYU?

Xeeni Vari Aya Vooloka Osuwela Omwene wa Muluku?

Atthu anceene anniroromela Omwene wa Muluku. Awo anitthara ntakiheryo na Yesu, yoowo aawiixuttinhe atthareli awe ovekela so: ‘Omwene anyu orwe; otthuna wanyu wireye vathí-va’.​—Matheyo 6:10.

Masi, nnaamwi atthu anceene aphavelaka osuwela Omwene wa Muluku, anamunceene wa yaale anirowa okerexa khanivaha efaita Omwene ola. Olavulaka sa mwaha ola, mulipa oolepa sowiiraneya oniitthaniwa H.  G.  Wells, onihimya wira Omwene ola onnitthuneya vanci. Ti maana aya Yesu ‘aavaha awe efaita Omwene wa Wiirimu’, masi Omwene ola ‘khonooneliwa vatthu ni ikerexa sinci”.

Moovirikana ni ikerexa iyo, Anamoona a Yehova annivaha efaita Omwene wa Muluku. Moone ela: Erevista ahu yuulupale yeeyo enisoma anyu vano, ennitaphuleliwa mmattaava 220. Nave, khula mweeri ennimpirimiriwa etthu yowiiraka imilyau 46. Eyo enniiriha erevista ela okhala yootepa okaiwa molumwenkuni. Yoolakela xeeni erina aya? Moone muru wa vakaapani yoowo oni: Owehaweha Elaleyaka Omwene wa Yehova.a

Xeeni nniimananiha ahu vanceene olaleya Omwene ola? Mwaha woowi, Omwene wa Muluku tori muru muulupale wa eliivuru yootepa otthuneya molumwenkuni, eyo piiyo, Biibiliya. Masi-tho, ninnikupali wira Omwene ola paahi tonrowa omaliha mixankiho sinaaphwanya apinaatamu olelo-va.

Hiyo ninnimananiha omutakiha Yesu vaavo nnaakhaliherya ahu atthu osuwela Omwene wa Muluku. Yesu aanivaha efaita Omwene ola; ti maana aya aaluttuweliwe awe muteko woolaleerya. (Luka 4:43) Xeeni owo aavaha awe efaita? Nave Omwene owo onrowa opakani mmureerelo anyu? Xontte, musome ipaaxina sinittharelana wira moone moota Biibiliya onaakhula awe.

[Enoota]