MWAHA WA VAKAAPANI | NIIREKE WANIKISA ONNAATTAMELA?

Anamunceene Animoopowa Ankhi Nyuwo?

Biibiliya onnilopola wira wanikisa, enookhumela ehasara. Matheyo 24:21 oni: “Anokhala maxakha malupale, ehinákhumelele okhuma wopajeryani w’olumwenku mpakha vano, nnákhala ahinrowa-tho okhumelela”. Masi Muluku onnileiherya wira anamunceene animoopowa. 1 Yohani 2:17 onihimya so: “Makhalelo ala anomala . . . , [masi] ole onettela otthuna wa Muluku onokhala mahiku othene”.

Nipakeke exeeni wira noopowe ni nakhale “mahiku otheene”? Niireke nihaana othukumanya muhakhu wala itthu sikina sa werutthuni? Nnaari. Miruku sa Biibiliya tiiya: “Vavo vo, itthu sothene sintthunaya ohononeya, mwettelo anyu okhaleke wowi sai? Okhaleke wowaarya ni womwiwelela Muluku, nwehereryaka nihiku n’Apwiya”. (2 Pedru 3:10-12) “Itthu sothene” sinrowa ohononeya sinihela muhina erimu ni elapo, eyo piiyo, anamalamulela a olumwenku ola vamosa ni ale anaathanla, ohiya omuthanla Muluku. Tthiri, othukumanya muhakhu wala itthu sikina sa werutthuni khonrowa onoopola wira nihipwetexiwe.

Tthiri, wira noopowe nihaana omulompaka Yehova Muluku ni wiixutta mweettelo ni miteko sinimuhakalaliha. (Sofoniya 2:3) Nto ohiya waatthara anamunceene ni okhootta ithoonyeryo sinooniherya wira ninkhala wanikisa, nihaana wuupuwelelaka orwa wa nihiku na Yehova. Anamoona a Yehova pooti wookhaliheryani orweela mwa Biibiliya wira musuwele moota wowoopowa voohimya sa nihiku nlo.