WAAKHULIWA WA MAKOHO A MBIIBILIYANI

Munrowa okhala sai namuyari ooloka?

Etthoko yeeyo anamuyari aniphentana aya ni ottittimihana, onnaakhaliherya anamwane wunnuwa saana. (aKolosi 3:14, 19) Anamuyari ooloka, annaaphenta ni waattottopela anaaya, ntoko Yehova Muluku aamuttottopenle awe Mwanawe.​—Mmusome Matheyo 3:17.

Tiithi ahu a wiirimu onnaawiriyana arumeyi awe, ni othokorerya moonelo aya. Nto anamuyari ahaana omutakihaka Muluku ni owiriyana ele anaaya enihimya aya. (Yakobo 1:19) Awo ahaana othokorerya miyuupuwelo sa anaaya, ohela muhina miyuupuwelo soohiloka.​—Musome Mothakoni 11:11, 15.

Munrowa owiixuttiha sai anamwane wira akhale atthu ooloka?

Ntoko anamuyari, nyuwo moovahiwa owerya wa waavaha malamulo aniinyu. (aÉfeso 6:1) Mmutakiheke Muluku. Owo onnaaphenta anaawe vaavo onaaleela awe malamulo awe vamosa ni sookhumelela sa ohimwiiwelela. (Maphattuwelo 3:3) Masi, mohaakhanyererya atthu omwiiwelela, owo onniwiixuttiha moota woophwanya mureerelo mwaha woopaka ele eri yooloka.​—Mmusome Yesaya 48:18, 19.

Mwiimananiheke waakhaliherya ni waaphenta aniinyu. Nto awo anoowiiwelelakani hata muhikhanle opuro yoowo. Siisaale Muluku oniixuttiha awe orweela mwa ntakiheryo, muwiixuttiheke aniinyu wira amphenteke Muluku orweela mwa ntakiheryo nanyu nooloka.​—Musome Otumererya 6:5-7; aÉfeso 4:32; 5:1.

Wira musuwele soohimmwa sikina, muwehe muru 14 wa eliivuru ela, yoolaleiwa ni Anamoona a Yehova

Enniphwanyaneya-tho va www.jw.org/vmw