Niireke Nnoowerya Omuhakalaliha Muluku?

Ikwaha sikina nyuwo munnisoma mBiibiliyani voohimya sa matakiheryo a atthu, nto moolipiherya munahimya so: ‘Nkinwerya waatakiha atthu awo!’ Waaniheryasa munnuupuwela so: “Miyo ka namattheka, ni nkinwerya opaka itthu sooloka okathi wotheene”.

Biibiliya onnimuromola Yobi okhala “mutthu òrera murima ni naxariya”. (Yobi 1:1) Lothi okhala “naxariya”. (2 Pedru 2:8) Nave Davidi okhala yoole aapaka itthu “soloka” vamaithoni va Muluku. (1 Mamwene 14:8) Nrowe nithokorerye okumi wa atthu awo aromoliwe mBiibiliyani. Nnimoona wira (1) awo yaahipaka itthu soohikhalela, (2) ntakiheryo naya pooti oniixuttiha itthu sinceene, ni (3) wira apinaatamu oohimalela anoowerya omuhakalaliha Muluku.

AWO YAAHIPAKA ITTHU SOOHIKHALELA

Yobi saahimphwanya mixankiho sinceene seiyo oona awe ohikhala sa xariya. Owo aahipacerya woonaka wira Muluku khanimuthokorerya mutthu hata yoole onivikaniha omwaamini. (Yobi 9:20-22) Yobi aaniixoona okhala mutthu axariya, nto eyo yaaniwiiriha atthu akina wuupuwelaka wira owo aaniihimya okhala a xariya onvikana Muluku.​—Yobi 32:1, 2; 35:1, 2.

Lothi aahikhootta opaka etthu yooneya okhala yooloka ni yookhweya. Owo aaniriipiwa murima mwaha wa orupihana woohiloka waapakiwa oSodoma ni oGomora, nto “murim’awe worera wanihawa”. (2 Pedru 2:8) Muluku aahihimya wira aarowa opwetexa ipooma iye sootakhala, ni aahinvaha Lothi eparakha ya woopowa ni emusi awe. Nyuwo pooti wuupuwelaka wira Lothi taarowa opacerya otthyawa. Masi okathi owo wooxankiha, Lothi aanipisa. Malaikha yaarummwale wira amoopole Lothi yaahaana onvarela ntata owo ni emusi awe ni waakumiherya ota wa epooma.​—Maphattuwelo 19:15, 16.

Okathi omosa, Davidi aahooniherya wiiroromela ni aahiraruwa ni mwaara aaneene. Aphavelaka ovitha etampi ele, Davidi aahimwiiviha iyawe a muthiyana ole. (2 Samuweli, ekapiitulu 11) Biibiliya onihimya wira “Apwiya yahinanariwa n’itthu sìralyawe Davidi”.​—2 Samuweli 11:27.

Yobi, Lothi, ni Davidi yaahipaka itthu soohikhalela, nave akina yaahipaka itampi suulupale. Masi ntoko sinrowa ahu woonale ahu, awosa yaahiphavela omurumeela Muluku ni murima wotheene. Nto awo yaahittharuwa ni yaahirukunuxa murima aya. Ti maana aya nnaamwi yaatthenke, Biibiliya onaahimya awe okhala alopwana oowaamini.

EXEENI ENIIXUTTA AHU?

Ntoko atthu oohimalela, khaninwerya osyaka itampi. (aRoma 3:23) Masi, napaka etampi nihaana wooniherya ottharuwa ni omananiha olokiherya mweettelo ahu.

Yobi, Lothi ni Davidi yaalokihenrye sai mweettelo aya? Yobi ari mutthu oororomeleya. Nuumala Muluku ovaanela ni yena, Yobi aahilokiherya muupuwelo awe wootthekeya ni khuvekela oleveleliwa mwaha wa ele aalavunle awe. (Yobi 42:6) Moonelo wa Lothi voohimya sa orupihana woohiloka waapakiwa ni atthu oSodoma ni oGomora waanivarihana ni malamulo a Muluku. Masi okathi omosa, owo aahiliyala wira aanitthuneya wiixaakuviha. Masi wanikisa waya, Lothi aahikhuma epooma ele ni khusyaka ehukhumu ya Muluku. Owo aahimwiiwelela Muluku ni khaawehale itthu saahiyale awe ottuli. Nnaamwi Davidi aapanke itampi suulupale amutthekelaka Muluku, owo aahittharuwa vamurimani ni aahivekela omoreliwa ikharari ni Muluku.​—Esalimo 51.

Muluku aanaathokorerya alopwana ale mwa niphento moovarihana ni ele aalipelela awe wa apinaatamu oohimalela. Muluku ‘onnisuwela orattene mùpeliwo ahu: onnisuwela wira hiyo ná ntthupi pahi’. (Esalimo 103:14) Okhala wira Muluku onnisuwela wira khaninwerya ohittheka, nto etthu xeeni onnivekela awe opaka?

NINROWA OMUHAKALALIHA SAI MULUKU?

Miruku Davidi anvanhe awe mwanawe Salomoni, sinnikhaliherya waakhula nikoho nla. Owo aahimmye so: “Vano nyuwo Salomoni, mwan’aka, mmusuwele Muluku a tith’inyu, mmurumeleke ni murima worera”. (1 Wahala 28:9) Murima wooreera ti yoole onimphenta Muluku ni, weettela soovekela sawe. Eyo khentaphulela wira murima owo ti woomalela, masi ti yoole onimurumeela Muluku mwa iyaakha sinceene moororomeleya ni weemya okhaliheriwa. Omphenta Muluku ni ophavela omwiiwelela waahimwiiriha Yobi “òkhotta sotakhala”; Lothi okhala “naxariya”; nave Davidi opaka itthu “soloka pahi vamaithoni” va Muluku. Nnaamwi otheene aya yaapanke itthu soohikhalela, yaahimuhakalaliha Muluku.

Akhala wira ninnikhalana miyuupuwelo soohiloka, olavula etthu yeeyo ennuuliha muru wala opaka etthu yeeyo muhoolo nniikhupanyerya ahu, nilipe murima. Nuupuweleleke matakiheryo niwenhe ahu. Muluku onninisuwela saana ohela muhina murima ahu. Nto owo oniphavela wira nimphenteke, ni wiimananiha omwiiwelela. Akhala wira nnoopaka eyo, nnoororomela wira nnoowerya omuhakalaliha Muluku.

[Eponto yuulupale epaaxina 13]

Muluku ‘onnisuwela orattene mùpeliwo ahu: onnisuwela wira hiyo ná ntthupi pahi’.​—Esalimo 103:14

[Eponto yuulupale epaaxina 14]

Murima woomalela onniiwelela yootthuna ya Muluku, ni onniphavela vanceene omwiiwelela