YOWIIRANEYA YA MWEEKUMINI
Owo Khaatonko Wiikhupanyerya Mwaha wa Soothanla Saapanke Awe Oryeene Mmiravo
Elavuliwe Ni Ilve Apanyuk
IYAAKHA sookiserya sa ekumi awe, haalu aka Nikolai Dubovinsky aahilepa itthu sotheene saamukhumelenle mweekumini mwawe, sooloka ni sooriipiha murima siiraneya okathi aamurumeela awe Yehova, sinceene sikhumelenle okathi União Soviética waakhoottiha awe muteko ahu. Nnaamwi saamukhumelenle mixankiho sinceene, owo aari mutthu oororomeleya ni oohakalala. Ahaalu aNikolai yaamakela ohimya wira yaaniphavela wira itthu iyo sisuweliwe ni amiravo, tivonto vaniphavela aka wooleelani iponto suulupale sa sowiiraneya iyo. Owo aayariwe mwaakha wa 1926, ntthoko nimosa noohakalala naakhala muttetthe wa ota wa oPodvirivka, onikhala oChernivtsi Oblast, wUcrânia.
NIKOLAI ONNITTHOKIHERYA ENAMUNA YAIXUNTTE AWE EKEEKHAI
Nikolai onihimya so: “Nihiku nimosa mwaakha wa 1941, muulupale aka Ivan aahiruuha owaani iliivuru A Harpa de Deus ni The Divine Plan of the Ages (O Plano Divino das Eras), vamosa ni irevista Owehaweha vakhaani ni ifolyeeto soovirikana. Miyo kaahisoma sotheene iyo. Kaahitteeliwa murima mwaha woosuwela wira Satana tonikumiherya mixankiho sotheene mulaponi-mu. Ohiya iliivuru iyo, kaahisoma-tho Ivangelyo nto khoonaka wira kaahiphwanya ekeekhai. Nto kaanaaleela atthu akina ele yaaxutta aka mooluttuweliwa. Okathi waasomaka iliivuru iyo, kaanitepa wiiwexexa ekeekhai ni ophavela waka omurumeela Yehova wahincerereya.
“Kaahisuwela wira itthu iye kaakupali aka saamukikumiherya maxakha. Ole waari okathi wa ekhotto ni miyo nkaaphavela omwiiva mutthu. Moophavela wiilokiherya mwaha wa mixankiho saarowa okikhumelela muhoolo, kaahipacerya ohela mmuruni soolepa sa mBiibiliyani ntoko Matheyo 10:28 ni 26:52. Nto kaahipaka yoolakela yoowi kaarowa okhala oororomeleya wa Yehova mpakha okhwa!
“Mwaakha wa 1944 kaahiphiyeriha iyaakha 18 nto kaahiihaniwa wira kakele etoropa. Ole waari okathi woopacerya kaaryaaka vamosa ni amiravo akina anna, yaarina munnuwelo woovirikana yaathukumanyiwe nipuro naathukumanyiwa atthu yaarowa etoropa. Naahimuleela guvernu wira hiyo khinaarowa okela etoropa. Mwaha woonanariwa, atoropa ale yaahinihasula ahinivahaka yoolya, yahinikhanyererya othipa itrinxeera ahimyaka wira nakhootta yaarowa onoopela. Moohoova naawaakhunle so: ‘Hiyo nri mmatatani mwanyu. Masi khula etthu enrowa anyu oniiriha, hiyo khannirowa ohiya wiiwelela yooruma ya Muluku yoowi “Muhimwivé mutthu”’.—Okhum. 20:13.
“Nuuvira okathi miyo ni anna akina anli, naahiroihiwa oBelarus wira nalimeke imatta ni olokiherya ipa saapwexakasiwe okathi wa ekhotto. Nlelo kinnuupuwela otakhala wa ekhotto mwaha wa itthu sinceene saapwetenxe aya muttetthe wa Minsk. Iphiro saanittiyeleliwa ni miri. Yaanooneya atthu ookhwa oohivithiwa, ikhavalo soowuntta saaniphwanyaneya khula nipuro mphironi ni mutakhwani. Kaahoona ikaaro saahiiwale mphironi, ikaruma sa ekhotto hata matteeke oonyaanyeya. Tthiri kaaniwerya woona sookhumelela sa ohiiwelela yooruma ya Muluku.
“Ekhotto yaahimala mwaakha wa 1945, masi hiyo naahilamuliwa wira niheliwe mukhatteya iyaakha 10 mwaha wa okhootta orowa okhottoni. Iyaakha tthaaru soopacerya, hiyo khinaathukumana ni anna wala khinaasoma iliivuru saaniphwanyiha yoolya ya omunepani. Masi naahiwerya olavulana arokora akina nirumeelaka ipaphelo, nto moohipisa awo yaahivariwa ni yaahilamuliwa otthukiwa iyaakha 25 mapuro yaakhanyereriwa atthu ovara muteko.
“Nto naahitaphuliwa nihimalihenrye okathi ole waahimmwale, mwaakha wa 1950 naahitthikela owaani. Okathi kaaryaaka mukhatteya, amaama ni murokoraka mwaamukhaani Maria, yaahikhala Anamoona a Yehova! Axuulupale aka nlelo khiyaakenle Enamoona, masi yaanimusoma Biibiliya. Okhala wira miyo kaanilaleerya mwa nthiti, makhulupale a União Soviética yaaniphavela okiroiha-tho mukhatteya. Nto anna yaahoolela muteko yaahikivekela vakhala wira kanwerya okhaliherya opaka iliivuru vathi va etthaya. Okathi ole kaarina iyaakha 24.”
MUTEKO WOOPAKA ILIIVURU
“Anamoona okathi ole yaalavula so: ‘Vakhala wira muteko wa Omwene wookhoottihiwa vasulu va etthaya, onrowa ovariwaka vathi va etthaya’. (Mir. 28:28) Okathi ole muteko wa opaka iliivuru waavariwa mwiitiho mapuro oowiipitheya vathi va etthaya. Nipuro naka noopacerya naavara aka muteko yaari ‘ekwaartu’ ya vathi va etthaya vatthokoni va muulupale aka Dmitry. Okathi mukina kaaniviriha isumana piili kihikhumaka nipuro nle. Okathi waattipha aya examaniya yaarumeelaka mwaha wa othowa epheyo, miyo kaanimmaathi mpakha ekwaartu ele okhalana epheyo yaaphiyerya omumula oratteene.
“Nihiku nimosa, munna aavaranaaka muteko aahikikoha wira: “Nikolai, moobatiziwa toko?” Nnaamwi kaavirinhe iyaakha 11 kimurumeelaka Yehova, miyo nkaabatiziwe. Owo aahikitthokiherya itthu sinceene ohiyu ole wotheene, nto kaahibatiziwa kireneene iyaakha 26, varattani. Nuuvira iyaakha tthaaru, kaahivahiwa miritti sikina, khikhala munna a Ekomisau ya Elapo ele. Okathi owo anna ale yahaatthukiwe yaanithanliwa wira yaaranttele ale yaatthukiwa, nto muteko wa Omwene waanirowa vahoolo”.
MIXANKIHO SAAMUKHUMELENLE OVARAKA MUTEKO EMPA YAATEKIWE VATHI VA ETTHAYA
“Muteko wa opaka iliivuru vathi va etthaya waari woovila ovikana okhala mukhatteya! Mwa iyaakha 7, mwaha wa woova ovariwa ni KGB, nkaawerya orowa owiriyana mithukumano sa mmulokoni nto kaanikhapelela makhalelo aka a oomunepani meekhaka. Amusi aka kaaweha paahi okathi yaarwa aya okixukurya. Hata vari siiso, awo yaaniwerya osuwela etthu yaakiiriha okhala vathi va etthaya, nto eyo yaanikilipiha. Mwaha wa oxankiheya waakiphwanya khula nihiku, ikuru saanikimalela vakhaani-vakhaani. Hiyo nahaana okhala oolikanela khula okathi okhala wira khinaasuwela yaarowa onikhumelela. Mwa ntakiheryo, emakaaripi emosa, mapoliisia manli yaahirwa nipuro naakhala aka. Kaahitupha vaxanelani ophiryo wa empa eyo nto kinatthyawela mutakhwani. Nuumala okhumela vanlakani, kaahiiwa etthu yaanyakula eviraka vakhiviru. Moohipisa kaahiiwa oruma wa kapwitthi, nto kisuwela wira kaaphavela woopeliwa! Mutthu mmosa aakoomola aahikhuruwa vakhavaloni vawe onapacerya omoopa kapwitthi awe mpakha ommalela ipaala. Masi owo aahiwerya okoopela vamoononi. Nuumala otthyawa ikiloomo 5 koomoliwaka, kaahiipitha mutakhwani. Muhoolo mwaya, okathi waaphukeliwa aka, kaahiiwa wira awo yaahoopa ipaala 32!
“Okhala wira miyo kaahiviriha iyaakha sinceene kikhalaka vathi va etthaya nto nkaareere wootta. Nto eyo yaahooniherya muteko kaavara aka. Nto kaahipacerya woora nsuwa vanceene. Ovara muteko vathi va etthaya waahikiphwanyiha oretta. Wookhala okathi kaayeleelale aka muthukumano wootthuneya ni anna okhala wira kaakhuma ephome mphulani ni mwaano”.
OTTHUKIWA WA NIKOLAI
“Nihiku na 26 a Janero mwaakha wa 1957, kaahitthikela otthukiwa. Nuuvira myeeri 6 eTribunaali Supremo ya wUcrânia yaahisoma esentensa. Nto yaahilamula wira kaahaana wiiviwa koopeliwaka ni atoropa, masi okhala wira nlamulo nlo naahimalihiwa elapo ele, nto kaahaana oviriha iyaakha 25 mukhatteya. Atthu akina 8 yaarina aka yaahilamuliwa otheene aya oviriha iyaakha 130 akhanyereriwaka ovara muteko. Nto naahirowaniwa nipuro naatthukiwa atthu oMordóvia, nipuro nle yaahikhala Anamoona oowiiraka 500. Naanipaka mithukumano mwa mwiitiho, nithukumanaka igrupu saamukhaani wira nisome Owehaweha. Nuumala othokorerya irevista saakhiwe ahu, kwaarta mmosa aalavunle so: ‘Mwathipelela osoma itthu iya, nyuwo munrowa okhala oolipa ni khuuvo onrowa wooxinttani!’ Hiyo naanivara muteko mwa nthiti, okathi mukina nivikanihaka ele yaavekeliwa ahu wira nivare. Masi muhooleli a nipuro nle aahiikhupanyerya oriki: ‘Hiyo khannoonela efaita muteko onivara anyu nipuro nla. Etthu yaarowa onisivela waari onikhaliherya owana ekhotto’”.
OROROMELEYA WAWE KHIWAAVUKUWA
Nuumala okhuma nipuro naavarihiwa awe muteko wookhanyereriwa mwaakha wa 1967, Nikolai aahikhaliherya opaka miloko wEstónia ni oSt. Petersburg, oRússia. Wanipacerya wa mwaakha wa 1991, esentensa ele ya mwaakha wa 1957 yaahimala-mala mwaha wa wooniwa wira khaapanke etthu yoohiloka. Okathi ole, Anamoona anceene yaahasuliwa ni guvernu yaahitaphuliwa. Mwaakha wa 1996, Nikolai aahithaamela epooma ya Velikiye Luki oPskov Oblast, yoowo waarakamelana ikiloomo soowiiraka 500 ni oSt. Petersburg. Owo aahithuma empa yaamukhaani, nto mwaakha wa 2003 yaahitekiwa Empa ya Omwene mmathalani mwawe. Olelo-va, sookhala miloko miili sinirumeela empa yeele ya Omwene.
Miyo ni aiyaka ninrumeela ofiliyaali ya Anamoona a Yehova oRússia. Mweeri wa Março 2011, sihalaka myeeri vakhaani wira okhwe, Nikolai aahirwa onixukurya ekwaha yookiserya. Masu yaalavunle awe omoroxaka maithori yaahinivara murima, owo aahimmye so: “Itthu sotheene sinnooniherya wira ninkhala okathi onilikana ni nihiku na neethanu nenli na orukureriwa wa Yerikho”. (Yox. 6:15) Owo aarina iyaakha 85. Nnaamwi saamukhumelenle mixankiho sinceene mweekumini mwawe owo aahimya so: “Tthiri murima onnikitteela okhala wira kaahithanla omurumeela Yehova nlelo kiryeene mmiravo! Miyo nkiniikhupanyerya!”
[Eponto yuulupale epaaxina 16]
“Khula nihiku hiyo naanivara muteko moororomeleya, okathi mukina naanivara ovikana iye saavekeliwa ahu”