Irevista Sahu Sinipakiwa Wira Saasiveleke Atthu Anceene
1. Moota xeeni murumeyi oororomeleya ni ankhili onimutakiha awe murummwa Paulo?
1 Murummwa Paulo, aaniilokiherya wira aalaleerye “atthu othene”, nto moolikanasa, murumeyi oororomeleya ni ankhili onnirumeela irevista wira niweryeke waalaleerya atthu a khula muthinto ni anikupali itthu soovirikana. (1 aKor. 9:22, 23) Nto, okathi onikawa ahu irevista A Sentinela ni Despertai! nihaana owuupuwelaka saana atthu anilepeliwa irevista iyo.
2. Atthu xeeni anilepeliwa erevista Despertai!?
2 Despertai!: Erevista ela ennilempwa wira naalaleeryeke atthu ntoko ale Paulo aalalenrye awe “wAthena”. (Mit. 17:22) Atthu awo khiyatthara eKristau, ni khiyaasuwela saana Soolepa. Moolikanasa, ale anilepeliwa Despertai!, khanisuwela saana ele Biibiliya enihimya awe, wala khanimusuwela Biibiliya. Awo khanisuwela etthu voohimya sa sowiixuttiha sa eKristau, akina khanroromela etiini, wala khanisuwela ovareleya wawe muteko Biibiliya. Etthu yuulupale enilepeliwa awe Despertai! tiila, waakupaliha atthu awo wira Muluku ookhala. Nave-tho erevista ela, enilempwa wira yaatumereryeke atthu awo omwaamini Biibiliya ni waakhaliherya osuwela wira Anamoona a Yehova toovirikana ni itiini sotheene.
3. Atthu xeeni anilepeliwa erevista A Sentinela ya atthu otheene, ni eSentinela ya Yowiixutta?
3 A Sentinela: Atthu anilepeliwa erevista A Sentinela ya atthu otheene, annimuttittimiha vakhaani Muluku vamosa ni Biibiliya. Awo annisuwela vakhaani ele Biibiliya oniixuttiha awe, masi khanisuwela saana sowiixuttiha sawe. Nto awo, ari ntoko atthu yaale Paulo aahimmye awe wira ‘annimuttittimiha Muluku’. (Mit. 13:14-16) Nto, erevista A Sentinela ya Yowiixutta, vanceenexa enilepeliwa Anamoona a Yehova. Paulo aahimmye wira ale yaasoma ipaphelo sawe yaahilimalela Soolepa ni osuwela ekeekhai. (1 aKor. 1:1, 2) Moolikanasa, myaha sa eSentinela ya Yowiixutta, anilepeliwa atthu yaale anirwa mmithukumanoni mwahu ni anisuwela moolumo animakela ahu orumeela.
4. Xeeni vanitthuneya ahu osuwelaka saana myaha sa irevista sinivaha ahu naalaleeryaka?
4 Nnaamwi irevista A Sentinela ni Despertai! nivahaka soopiili okathi omosaru, hiyo ninttittimiherya emosa paahi. Tivonto, muhaana osuwelaka saana myaha sa irevista iyo. Mwiira siiso, munoowerya osuwela myaha sinaavara murima ale anaalaleerya anyu.