Mulaleeryeke Moolipa Murima—Mwaha ola onikhuma Anuário de 2013 das Testemunhas de Jeová
Afrika
Epaaxina 49, ittima 1-6
“Mooniherye mBiibiliyani Wira Owo Onimootha”
Janet, pioneera mmosa ookilaatheya a elapo ya oGana, okathi aari awe mukaaroni nto khiyeetta mukwaha woorekama, aahikumiha eliivuru Biibiliya Oniixuttiha Exeeni, khiyasoma. Mulopwana mmosa a ekerexa emosa aahiwela mukaaroni mme nto khupacerya olaleya masu a Muluku, nto nuumala-vo aahaavekela musurukhu atthu yaari mukaaroni wira akhaliherye masu ale yaalaleya awe. Janet aahimukoha so: “Nyuwo mwiirale wira Yesu ni Muluku mutthu mmosaru? Nto ti pani aalavunle ni Yesu okathi aabatiziwe awe?”
Mulopwana ole aakhunle so: “Eyo khuuvo onisuwela”.
Janet aahitthukula muru 4 wa eliivuru Biibiliya Oniixuttiha Exeeni, ahaavekela atthu akina yaari mukaaroni mme wira esome. Janet aahitthokiherya ovirikana okhanle eriyari ya Yesu ni Muluku Oowerya Sotheene, Yehova.
Mulopwana ole aahimyale so: “Nyuwo mwa namaxitta”.
Okathi ene yoowo, atthu yaari mukaaroni yaahimwaakiha murokora ole ahimyaka so: “Mooniherye mBiibiliyani wira owo onimootha, ohikhanle ohimya wira owo namaxitta”. Nto mulopwana ole aahinanariwa vanceene nto khukhuruwa mukaaroni mme moohipisa. Muthiyana mmosa mmiravo aattamanne ni Janet aahihimya so: “Miyo kuupuwela wira Yehova nsina na ekerexa anyu. Nkaasuwela wira Muluku ookhalana nsina, kiiwale okathi mwaalavula anyu ni mulopwana ole”.
Awosa yaahivikaniha ovaanela, nto Janet aahinvekela muthiyana ole nummuru nawe na telefoni ni aahimuleela wira ammulikarela okathi mukina. Okathi muthiyana ole aaphiyale awe owannyawe aahaaleela apiipi awe itthu sotheene siiraneyale. Nto awo yaahitikinihia mwaha wowiixutta wira Muluku nsina nawe ti Yehova. Janet ahaaphavela Anamoona akina wira evikanihe ovaanela ni muthiyana ole vamosa ni apiipi awe. Olelo-va, muthiyana ole ni apiipi awe anneetta osalau.
Ukrania
Epaaxina 69 ettima 1 mpakha epaaxina 70 ettima 2
“Xontte Nvikanihe Okhalana Mweettelo Ola Wooloka”
Murokora mmosa orina iyaakha 15 oniitthaniwa Valya onikhala elapo ya Ukrania aahoona wira profesora awe aanirowa oxikola aawanre ene ikuwo sooriipa ni aaninla. Nuumala osuwela wira profesora ole aarookhweliwa amamawe, Valya aahimmaaliha arumeelaka soolepa sinilavula sa ohihimuxiwa wa alipa ookhwa. Valya ahimukuxa Biibiliya ni ibroxura piili Que Acontece Conosco Quando Morremos?, ni Vaavo Vankhw’awe Ole Oninphenta Anyu; nto aahuupuwela wira nuumala aula, aarowa ovaanela ni profesora ole. Valya aahihimya so: “Okathi kaamulipelela aka profesora ole, kaahixanka vanceene, nto kaahinvekela Yehova wira okikhaliherye”.
Okathi Valya aakenle awe oxikiritooriyu wa profesora, profesora owo aahimukoha so: “Muniphavelani?”
“Karweela woomaalihani, maana kinnoona wira mooriipiwa murima. Iyaakha vakhaani sivirale, kookhweliwa ataata”.
Nto moolumo awo yaahinvara murima profesora ole. Okathi ene yoowo aahinla nto khuhimya wira nnakhala amusi awe wala maprusori akhwaawe khiyaamonenle othunku ntoko mwali ole, ori murokori ihu. Nto Valya aahisoma ni khutthokiherya yoolepa ya Wisupulula 21:3, 4 ni ahinvaha ibroxura. Profesora ole aahihimya so: “Nyuwo khamunlikana ni anaxikola akina”.
Valya aahitthokiherya so: “Miyo kinniimananiha omusoma Biibiliya ni wiiwelela ele enihimya awe, ni kinniwiiwelela anamuyari aka”.
Okhala wira profesora ole aahinvekela iliivuru, okathi mukina Valya ahimuruuhela Biibiliya ni eliivuru Biibiliya Oniixuttiha Exeeni. Profesora aahimuxukhurela-tho khuhimya wira: “Etiini anyu ti yekeekhai, ni nyuwo mookhalana anamuyari ooloka yaawo aniwiixuttihani itthu sooreera. Xontte nvikanihe okhalana mweettelo ola wooloka”.