Nivarexexe Moonelo wa Biibiliya Voohimya sa Naakhwa—Mpantta 1
Okhuma khalai apinaatamu annoona owereya mwaha wookhweliwa. Nave-tho arumeyi a Muluku annoona owereya. Ntoko Yesu, maKristau a ekeekhai annoona othunku ni oriipiwa murima vaavo mpatthani wala mmusi aya onikhwa awe. (Yoh. 11:33, 35) Ovilela vaavo mutthu onikhweliwa awe ti vooxankiha; nto ole okhweliwe onitthuneya omaalihiwa ni okhaliheriwa moophenta. Eyo ti yootepa otthuneya mittetthe seiye atthu anoova aya ethiru ni alipa ookhwa. MaKristau ookhweliwa pooti okhanyereriwa ni amusi oohaamini ni anamwaattamanani wira yiirele mpantta soolema sa naakhwa sihinivarihana ni Biibiliya. Ninrowa owerya sai ovilela oriipiwa murima mwaha wookhweliwa, nihipanke soolema sa naakhwa sihinimusivela Muluku?
2 Musuwele Ekeekhai Voohimya sa Alipa Okhwa: Biibiliya onihimya so: “Atthu akumi annisuwela wira anrowa okhwa, masi alipa-òkhwa khansuwela-tho etthu. . . . Ophenta waya n’unyokha waya ni munkhelo aya womala vamosá n’awo . . . elapo y’alipa-òkhwa [omahiye] khuvo-vo muteko nnákhala osuwela walá otthokelela nnákhala ankhili. Ni ti weiwo ontthunanyu orowa”. (Mus. 9:5, 6, 10; Esal. 146:4) Vaavo mutthu onikhwa awe, khonsuwela-tho etthu. Khoniwerya wuupuwela, olavulasa, ni khoniiwa ele akina anilavula aya wala opaka. Ela ti etthu yuulupale eneettela ahu okathi onikhweliwa ahu.
3 Mukhalane Ephoole ni Sowiixuttiha Sinimootherya Muluku: Ojardim wa Edeni, Yehova aahaaleela Adamu ni Eva wira akhala wira khiyaarowa omwiiwelela, awo ‘yamokhwa’. (Maph. 2:17) Masi, Satana aahimyale wira awo khiyaarowa ‘okhwa’. (Maph. 3:4) Muhoolo mwaya, Satana aahipaceriha wootha wa moota mukina: Owo aahimyale wira alipa ookhwa khaakhwiiye, masi annisuwela etthu ni anikhala mapuro makina ahinooneya. Wootha nno waahinveeha Yehova ni onanariha nsina nawe. Wa arumeyi a Yehova, yookupali yoowi alipa ookhwa nlelo akumi, ni annaakhaliherya wala waahaaxa atthu akumi, etthu yootepexa woopiha ohiya paahi okhala yowiixuttiha yoowootha. Eyo etthu yuulupale Satana onirumeela awe wira owootothe atthu ni wiipithiha ekeekhai ya Biibiliya. Nto otheene animphenta Muluku, ahaana onyokha tthiri wootha iwo! (aRom. 12:9) Ankhi nyuwo?
4 Yehova aahaaruma aIsarayeli wira ahipake yoolema wala niira notheene naavarihana ni sookupali sowootha. (Otum. 18:9-13) Moolikanasa, maKristau a eseekulu yoopacerya yaanisyaka soolema sotheene saavarihana ni wootha. (2 aKor. 6:15-17; Wis. 21:8) Olelo-va, Anamoona a Yehova a maloko otheene, mahimo wala malavulelo, annisyaka soolema sotheene sinivarihana ni yookupali yoowi alipa-ookhwa annisuwela etthu ni anniwerya waakhaliherya wala waahaaxa akumi.
5 Muupuwelele Soolema: Biibiliya onnooniherya wira khahiyo soolema sotheene sa naakhwa ti sootthekeya. Mwa ntakiheryo, ‘murutthu wa Yesu wahiphapiwa n’isanta, khwittheliwa makhura òwùnkhela, ntoko a Yuda salimalenlyaya ovithana’. (Yoh. 19:40) Masi, atthu a Muluku a khalai yaanikhootta soolema sotheene saavarihana ni yookupali yoowi alipa-ookhwa annisuwela etthu. (Onam. 21:5; 19:27, 28; Otum. 14:1, 2) Olelo-va, soolema ni sowiira sinceene molumwenkuni, ohela muhina elapo ahu ya oMoçambique, sinnivarihana ni yookupali ela. Nto nihaana orumeelaka muupuwelo ahu wira niweryeke osuwela ohiyaniha ‘sorera ni sotakhala’. (aHéb. 5:14) Eyo enoonikhaliherya osuwela soolema sinivarihana ni Biibiliya ni iye sihinivarihana. Nto malakiheryo xeeni anrowa onikhaliherya mmwaha ola?
6 Nivarihele Muteko Malakiheryo a Biibiliya: Ale aniphavela weemereriwa ni Muluku ahaataaneke ni atthu ahinaamini. Orweela mwa Biibiliya, Yehova onnilopola so: “Mukhume eriyari aya: mmwalane ni yawo. Muhivaré itthu sa mwikho, wira miyo kiwakheleni”. (2 aKor. 6:14, 17) Nuupuwelelaka yoolepa ela, niikoheke so: ‘Yoolema ela ya naakhwa khenivarihana ni yookupali yoowi minepa sa alipa-ookhwa sinnaakhaliherya wala waahaaxa akumi?’ Akhala wira ennivarihana ni yookupali eyo, nto yoolema eyo ti yoothanyeya ohiya paahi mwaha wookhweliwa. Eyo eniirela mpantta okokhorela wowootha. Opaka eyo waarowa onveeha Yehova, Muluku a ekeekhai.—Mulikanyiherye ni Makhulupale 2:12.
7 Yoolakiherya ya nenli eniphwanyaneya yoolepa ya 1 aKorinto 10:32, yeeyo eni: “Mwetteke vorera, vohatthekihaka nnàkhala aYuda, nnákhala amalapo, hatá [atthu a Muluku, Biblia Solempwa sa Muluku]”. Ninrowa ovarihela sai muteko malakiheryo ala? Anamoona a Yehova annisuweliwa saana wira anniixuttiha ekeekhai ya Biibiliya yoowi: alipa-ookhwa khanisuwela etthu ni khaniwerya waakhaliherya wala waahaaxa akumi. Nto, exeeni yaarowa wiiraneya vaakhanle wira munna wala murokora ohiirela mpantta yoolema ya naakhwa enivarihana ni owoova alipa-ookhwa? Eyo yaarowa waakhumuliha ale anisuwela sookupali ni sowiixuttiha sa Anamoona a Yehova voohimya sa alipa-ookhwa. Yehova onniriipiwa murima waaweha akina akhumuwaka; nave eyo pooti owiiriha atthu oheemya ihapari sa Omwene.—Math. 18:6; Luka 11:52.
8 Musyake Itthu Sootakhala: Okathi atthu oohaamini anipaka aya soolema iyo, ikwaha sinceene khanisuwela wira anitthara okokhorela wowootha. Nave, pooti ohiiwexexa nthowa naya ninkhootta ahu wiirela mpantta soolema soohiloka. Tivonto, ororomeleya wahu mmwaha ola, pooti ohikhala wookhweya, ni pooti weehererya omphenta ni omwaamini wahu Yehova. Masi, hiyo nimphavela okhala “òrera murima ni òhittheka . . . òloka”. (aFil. 2:15) Omphenta wahu Yehova onniniiriha ‘othanya sotakhala, [ni] wira sorera’. (aRom. 12:9) Hiyo ninnisuwela wira ti vootthekeya, wala naamukhala nawoothe, opaka etthu yotheene enivarihana ni yookupali yoowi alipa-ookhwa akumi ni anniwerya waakhaliherya wala waahaaxa atthu akumi. Nuupuwelelaka malakiheryo ala, nrowe niwehe soolema sikina sa naakhwa sinipakiwa mmuttettheni mwahu.
Soolema sa Moota Woosikha Murutthu
9 Orapiha Murutthu: Etthu eniireya tiila: Murutthu onnirapihiwa ohinatthi ovithiwa mwaha wa makhalelo a oratta. (Mit. 9:37) Masi, ti vootthuneya osyaka etthu enivaanyihana ni Biibiliya, wala enivarihana ni muupuwelo woowi ehaavo erooho ehinikhwa, ntoko mwiirelo wa olokiherya ni orapiha murutthu wira okhalane okumi musya ‘elapo ekina’.
10 Mittetthe sikina ehaavo yoolema ya amusi akina otthokiha masikho wira ovithiwe ole okhwiiye. Akhala wira ole okhwiiye aari mutthu owaamini, nihaana wiimananiha wira amusi oohaamini ahikuxe murutthu ni opaka soolema saya sa epagau mwa wiiphiini. Tthiri, munnihu wala murokorihu ole okhwiiye, khaarowa ophavela soolema iyo. Akhala wira amusi oohaamini annithipelela okuxa murutthu moohicikha etthu sa wiimananiha wahu, nihaana okhalana ephoole wira nihiirele mpantta soolema saya. Nave, nnoowerya ohakalala mwaha woosuwela wira amusi awo khiivo etthu ekhanle aya oopaka voohimya sa soolipelela sa muhoolo sa ole okhwiiye. Ole okhwiiye moororomeleya, ori mmuupuweleloni mwa Yehova.
11 Okhunula Ekaxau Wira Atthu Yoone Murutthu: Okhunula ekaxau wala ohikhunula wira ooniwe ole okhwiiye, yoothanla ya mutthu mwaneene. Akhala wira emusi ya eKristau enithanla ohikhunula ekaxau, awo ahipwapweliwe. Masi akhala wira enithanla okhunula ekaxau, nto ahaana okhalana ephoole wira okathi woowehiwa murutthu ehipakiwe etthu yoohiloka wala ohittittimiha sookupali sa eKristau.
12 Mittetthe sikina, atthu aakhalana yoolema ya okumiha murutthu mukaxauni, nto khiyapweha vasulu va ekhaama yooreerihiwa. Akhala wira ole okhwiiye ti muthiyana, waaniheryasa onniwarihiwa ikuwo sootteela sa ekasamento, vamosa ni itthu sinceene soophwaneliha ntoko mikuhu, ebatom ni oreerihiwa owiitho. Nave, ehaavo yoolema ya opakiwa ikamisa, maleeso, ixaveiro, iventuwiinya, ixaavena, ni itthu sikina sirina elatarato ya namukhwa. Itthu iyo sinnipakiwa ni khiyakaweliwa ale akhweliwe. Nave-tho, ilatarato saamukhaani sa ole okhwiiye, sinnikolariwa vakuwoni va atthu arwiiye onaakhwani. Niireke otthara soolema iyo sa olumwenku ti vamiruku? Nnaari. Opaka eyo onooniherya omukokhorela ole okhwiiye.
13 Nnaamwi Biibiliya ohihimyaka soolema sotheene sa naakhwa, ale arina waarya womunepani annisuwela wira wooniherya itthu sirina ahu ‘khonikhuma wa Muluku’, masi onikhuma molumwenkuni. (1 Yoh. 2:15, 16) Otthara soolema iyo, pooti owiiriha ale oohaamini opaka itthu soohiloka moohiphavela ntoko wunla mootepana, orihela musurukhu opuro vari murutthu, obejari ni olavula ohoolo wa murutthu owo ntoko wira owo mukumi, vamosa ni itthu sikina soohiloka. Akhala wira ela enimwiiraneya onaakhwaani wa muKristau, eyo enooveehiha nsina na Yehova ni atthu awe. Moohaaniherya, osyaka oratteene soolema sinipakiwa mmuttettheni mwahu ni atthu ari mweepiphini momunepani, onookumiherya mukhalelo woomaaleleya, woottittimiheya, ni wooreerela wa maKristau eekeekhai.—aÉf. 5:15-17.
14 Ohirupa Ohiyu Wotheene: Yoolema ela ya ohirupa ohiyu wotheene, enipakiwa owannyawe ole okhwiiye wala opuro mukina. Okathi owo, atthu anniviriha ohiyu wotheene ahirupaka alipelelaka murutthu ohinatthi ovithiwa. Ikwaha sinceene, yoolema eyo enipacerya makaaripi ni enavikaniha ohiyu wotheene. Yoolema ela ennivirikana ni oxukurya emusi ekhweliwe okathi wooreerela wira ehakalalihiwe ni olipihiwa amusi aninla. Yoolema ya ohirupa enipakiwa so: Murutthu ohinatthi ovithiwa, onniruuhiwa owaani. Vano-nto atthu khiyathukumana ni khiyaviriha ohiyu wotheene yiipaka, olompa, ni omuttottopela ole okhwiiye. Vannikupaliwa wira opaka eyo onoomwaakiherya ole okhwiiye ni amusi ari akumi voohimya sa minepa sootakhala. Okhala wira yoolema ela ennivarihana oratteene ni yookupali yoowi munepa wa ole okhwiiye nlelo mukumi, nto maKristau eekeekhai annisyaka yoolema eyo ehinivarihana ni Biibiliya. Opaka yoolema ela pooti okhala mwa okathi vakhaani paahi, khiwaarowa ovarihana ni yoolakela ahu ya ‘othanya sotakhala’.—aRom. 12:9.
15 Akhala wira munna wala murokora onimookhwa, nihaana okhalana ephoole wira mweettelo ahu ohikhaleke ntoko wira nookhalana yoolema ya ohirupa ohiyu wotheene. Exeeni akina yaarowa aya wuupuwela, vaakhanle wira Anamoona annithukumana opuro ori murutthu ohiyu ohinatthi ovithiwa murutthu ni khiyamaliha okathi munceene yiipaka ni ovekela? Nnaamwi aphavelaka waamaaliha ale akhweliwe, ahaana ocalelaka yowuupuxerya ya murima ya atthu akina. (1 aKor. 10:23) Niireke opaka eyo, khonaakhumuliha anna akina, yaale anisuwela mapacereryo ni yoolakela ya yoolema yooviriha ohiyu wotheene moohirupa? Wala ale oohaamini khiyaarowa wuupuwela wira Anamoona a Yehova, aakhalana yoolema aya ya ohirupa ohiyu wotheene ntoko itiini sikina? Tthiri, ohaavo okathi mukina wooreerela ovaha onamoona ni waamaaliha ale ariipiwe murima mwaha wookhweliwa. Wuupuwelela malakiheryo ala, ohaana oniiriha osyaka opaka etthu yotheene enilikanasa ni yoolema ya ohirupa ohiyu wotheene. Opaka eyo onimooniherya wira noovirikana ni atthu oohaamini, ni khanimphavela ovara “itthu sa mwikho”.—2 aKor. 6:17; Mal. 3:18.
16 Nto ti vamiruku wiiwelela yoolopola ela eni: “Mulipa-ànkhili onnona yowopiha, anahuluwa: mulolo onnikumana vohupuwela, khutakhaliwa”. (Mir. 22:3) Malakiheryo ala a Biibiliya annivareleya muteko ni yoolema ya ohirupa ohiyu wotheene. Sowiiraneya sinooniherya wira oruuha murutthu owaani masi orowaka ovithiwa mmeeloni mwaya onnikumiherya mixankiho. Nave-tho sinnikhumelela mixankiho sikina akhala wira murutthu owo onniroihiwa vatthokoni va emusi ya atthu oohaamini. Okhala wira amusi ni anamwaattamanani annoona murutthu, awo pooti woona okhala vootthuneya wiipa ni olompa ohiyu wotheene aphavelaka owehaweha murutthu. Ikwaha sinci, atthu awo annipaka yoolema eyo, murutthu ohinatthi ovithiwa. Wira muKristau osyake yoolema eyo akhala wira munna ohookhwa, emusi ya ale owaamini ahaana wuupuwela saana voohimya sa nihiku wala okathi anirowa aya oruuha murutthu vatthokoni va emusi wala opuro mukina. Akhala wira ti vootthuneya oruuha murutthu vatthokoni va mmusi, nto ti va miruku opaka eyo nihiku nenlo ninrowa aya ovithiwa murutthu owo, ohikhanle ohiyu masi orowaka ovithiwa mmeeloni mwaya. Ekeekhai wira ikwaha sikina pooti okhala vooxankiha opaka eyo. Masi opaka marehereryo ooloka ni wiiwanana onookhaliherya vanceene. Napaka eyo, nnoosyaka waakhumuliha akina.—Mir. 22:3.
17 Itthu sikina voohimya sa soolema sikina sa naakhwa, ninrowa othokorerya myeeri sinirwa mwa Orummwa Ahu wa Omwene. Tthiri, soohimmwa iyo sinoonikhaliherya osuwela moota nikhanle ahu ookhalana yowuupuxerya ya murima yooloka ni osyaka waakhumuliha akina vaavo ninvarexexa ahu moonelo wa Biibiliya voohimya sa naakhwa.—1 aKor. 10:32.