Nivarexexe Moonelo wa Biibiliya Voohimya sa Naakhwa​—Mpantta 3

Masikho a muKristau: Toohaattiheriwa Itthu, Ooreerela, ni Oottittimiheya

Atthu ahinisuwela mukhalelo wa alipa-ookhwa anikupali wira opaka masikho maalupale ni orumeela musurukhu munceene, ti vootthuneya wira amuhakalalihe ole okhwiiye ni ohaaveeha amusi. Wa ale oohaamini, wooniherya ‘mihakhu sarinawe’ ole okhwiiye wala sa amusi awe, eri etthu yootthuneya. (1 Yoh. 2:16) Ikwaha sinceene, atthu oohaamini annimananiha opaka masikho wira avikane masikho a imusi sikina. Anamunceene annivaha efaita yoolema ela, nto pooti imusi sikina soohaawa sinnimananiha waavya musurukhu siphavelaka opaka “masikho maalupale” wira yaahakalalihe amusi ni atthu mmuttettheni.

² Masi, atthu a Muluku anniiwexexa wira alipa-ookhwa khanisuwela etthu. Nto ale akhwiiye khanisuwela wira annivuwihiwa ni ottottopeliwa. Nto maKristau a ekeekhai khanipaka masikho aphavelaka wooniherya mihakhu sirina aya. Otakiha soolema iyo, waamooniherya wira waamini wahu kholimpe ni nintakiha olumwenku. (Yoh. 17:16) Nave-tho, opaka eyo waarowa owiiriha akina wuupuwela wira ni hiyo ninniwoova alipa-ookhwa. Nto osuwela wira atthu a muttetthe ahu anniwoova alipa-ookhwa, ohaana oniiriha okhalana ephoole ni wiiwelela miruku sa Biibiliya nipakaka masikho oohattiheriwa itthu ni oottittimiheya. (Mir. 11:2) Ninrowa owerya sai opaka masikho oottittimiheya?

³ Musurukhu wa Masikho: Mittetthe sikina, ohinatthi ovithiwa mutthu, amusi annithukhumana wira avaanele wa moota woophwanya musurukhu wa masikho. Nto, sinnilempwa ipaphelo ni khiyaroihiwa mapuro makina ovekiwaka musurukhu wa nikhaliheryo. Okathi owo, akina annihimya “musurukhu wa masikho” onitthuneya okumihiwa ni khuta mutthu. Nave-tho, onaakhwani annipwehiwa meesa, ikaaxa, ni ephace wira ale arwiiye okhaliherya ariheleke musurukhu mapuro awo. Nto, nooneleke sai soolema iya? MaKristau ekeekhai khaniveka musurukhu mwa enamuna eyo, aphavelaka okhaliheriwa masikho aya.

⁴ Emusi ya eKristau, ehaana osuwela wira yookhalana muritti wa olokiherya musurukhu wa masikho.a Akhala wira emusi eyo ti yoohaawa tthiri, ni kheniwerya oliverya masikho aya, nto amusi akina anoowerya okhaliherya.b (1 Tim. 5:3; munwehe od-T epax. 132, etti. 1) Akhala wira nlelo itthu sikina khasiweryanen’ye, atthu akina wala muloko pooti okhaliherya. (1 Yoh. 3:17, 18) Masi, ti vootthuneya okhalana ephoole. Vaavo amusi oohaamini anivekeliwa aya musurukhu wira akhaliherye, eyo pooti owiiriha wuupuwela wira awo ahaana edireitu yoolavula wa moota masikho awo akhanle aya oolokiheriwa ni opakiwa. Nto pooti okhumelela muxankiho muulupale vaavo muKristau onimananiha awe opaka masikho ahirina soolema sa olumwenku. Masi eyo khenitaphulela wira muKristau ohaana okhootta musurukhu wala etthu ekina vaavo amusi akina aniphavela aya okhaliherya. Masi akhala wira muKristau onoona wira weemererya musurukhu owo wala etthu eyo onoowiiriha amusi oohaamini opaka itthu sinitthuna aya wala ohoolela miteko sikina sa masikho, nto, musurukhu owo pooti okhoottiwa mwa miruku.​—Mir. 27:12.

⁵ Wiiwexexa wahu saana mukhalelo wa alipa-ookhwa ohaana onilipiha murima wira nilokiherye masikho vohitakaaherya soolema sa olumwenku seiyo sinimakela opakiwa ni ale ahinimwiiwexexa Biibiliya. (aÉf. 4:17-19) Nnaamwi nihiphavelaka waakhumuliha atthu akina nipakaka masikho ootepexa okhweya, hiyo khanneemya wira olumwenku onikhanyererye waatakiha ale ari weepiphini yomunepani. (aRom. 12:2) Nuupuweleke wira Yesu aari mulopwana muulupale aatonko okhala. Masi owo aavithiwe mwa enamuna yookhweya ni moottittimiheya. (Yoh. 19:40-42) Nto, ale arina “ankhili a Kristu”, annimananiha opaka etthu emosaru. (1 aKor. 2:15, 16) Tivonto, wira emusi ya eKristau esyake oveka musurukhu wala okopha, ehaana olokiherya mwa miruku masikho oohaatta itthu ni oottittimiheya moovarihana ni ele eniwerya aya.​—Luka 14:28; mulikanyihe ni 2 aKor. 8:12.

⁶ Moota Wooreherya Masikho mMulokoni: Vaavo onikhwa awe mutthu, ihapari iyo waakuva osuweliwa ni atthu anceene. Tivonto, miloko sikina khasintthuneya omuhimya opalkuni naakhwa owo ni mareheryo a masikho; ohikhanle paahi muloko yoowo ole okhwiiye eetta awe. Hata khivanitthuneya oroiha ipaphelo miloko sikina mwaha wa naakhwa owo. Nave-tho, khahiyo vooloka orukunuxa okathi wa mithukumano, wala ohipaka mithukumano; mwaha wa munna wala murokora okhwiiye. Opaceriha miteko sa omunepani, onninikhaliherya okhalana moonelo wooloka voohimya sa naakhwa ni ovikaniha opweha nipuro noopacerya soophavela sa Omwene mookumini mwahu.​—Math. 6:33, 34.

⁷ Vaavo axitokweene a mmulokoni anikupali aya, pooti olavuliwa mwaha wa Biibiliya oSalau wa Omwene, wala amusi yaphavela vale, mwaha owo pooti olavuliwa vatthokoni va ole okhwiiye aahiiso opuro mukina. Mulipa oolavula mwaha yoowo waaniheryasa othanliwe ni emusi ekhweliwe, ohaana orumeela esboço epakiwe ni nikhuuru nootthokiheya na Yehova. Mwaha owo ohaana okhala woomaaliha, woolipiha ni wookhaliherya omunepani. Nto ole othanliwe olavula mwaha, ohaana olavula iponto silempwale musboçuni, nave ohaana osyaka oromola itthu sinivarihana ni sookupali sowootha. Mwa ntakiheryo, masu oowi: ole okhwiiye orimwiiviwa wala okumiheriwe etthu yootakhala ni atthu akina, moolumo awo khanivarihana ni ekeekhai ya Biibiliya. Nave-tho, moolumo awo annikhootta owerya wa Yehova wa owaakiherya arumeyi awe. (Mir. 18:10) Nave, mulipa oolavula mwaha ohaana okhalana ephoole wira ele enihimya awe okathi wa mwaha wala nivekelo, ohikhaleke ntoko wira onilavulana ni ole okhwiiye; maana owo khonisuwela etthu. (Mus. 9:5, 10) Ohiya-vo, vaavo onikhwa awe murumeyi oororomeleya a Yehova, mulipa oolavula mwaha ohaana wuuluula okumi wa munna wala murokora owo voohimya sa waamini wawe. (aHéb. 6:12) Masi, khivaarowa okhala vooloka omweemererya mutthu mukina olavula etthu okathi wa masikho, wala omuttottopela ole okhwiiye: pooti ahinatthi masikho opacerya, okathi woosikha, wala nuuvira masikho.

⁸ Mittetthe sinceene, nuumala okhumelela naakhwa anna a mmulokoni aakhalana yoolema ya othukumana oSalau wa Omwene, wala opuro mukina, nto khiyiipa isipo sa Omwene mwa okathi munceene mpakha opacerya mwaha wa naakhwa nihiku nenlo. Nnaamwi weemereriwaka wiipa isipo wanipacerya ni wanikisa wa mwaha wa naakhwa, masi oviriha okathi munceene yiipaka isipo iyo ohinatthi opacerya mwaha wa naakhwa, eyo yaarowa wooniherya wira nintakiha eKristau Yoowootha. Mwaha wa naakhwa ohaana olavuliwa muhina mwa minutu 30, ni opaceryeke okathi wooreerela. Nave-tho pooti opakiwa wala ohipakiwa nivekelo noopacerya. Ohiya-vo, khivanitthuneya othanliwa munna wira okhale muhooleli a eprograma yoowo onimwiitthana mulipa oolavula mwaha, wala olavula moolumo ookiserya. Masi, akhala wira onoorumeeliwa muhooleli a eprograma, ohaattiheke soolavula ni olavuleke mookwasa. Nto muhooleli owo a eprograma khonitthuneya wuuluula iponto suulupale silavuliwe ni mulipa oolavula mwaha, wala “waaxukhurela” ale arwiiye okhaliherya. Akhala wira amusi anniphavela, vaavo murutthu onivithiwa awe, pooti olavuliwa moolumo oowaakuveya vamosa ni nivekelo wira amaliheriwe masikho. Nave-tho, nimphavela owuupuxerya anna wira khivaneemereriwa wira mutthu oohaamini ohooleleke masikho aahiiso olavula etthu oSalau wa Omwene wala omahiye.​—2 aKor. 6:14-18.

⁹ Okhalana Moonelo Wooloka: Nipakeke exeeni vaavo ninrowa ahu onaakhwani? Nnaamwi niripiwaka murima vanceene, hiyo nimphavela olipihiwa orweela wa Nuulumo na Muluku. Nto ale anirowa onaakhwani wa Namoona a Yehova, ahaana omukuxaka Biibiliya aya. Vaavo nimmutthara ahu mulipa oolavula mwaha okathi onisoma awe soolepa sa Biibiliya, ninnilipiha waamini wahu voohimya sa natiri a muhoolo a ohihimuxiwa wa alipa-ookhwa vaavo ‘ohinrowa aya okhala-tho okhwa’. (Wis. 21:4) Nave-tho, eyo enninivaha eparakha ya waalipiha ale akhweliwe vamosa ni atthu akina. Nto okhalana moonelo wooloka, onoonikhaliherya waamaaliha atthu akina, ni olipiha waamini wahu voohimya sa yoolipelela ya muhoolo vaavo okhwa onrowa aya omala wa mahiku otheene.​—Yes. 25:8.

¹⁰ Anamunceene anuupuwela wira oriipiwa murima wootepana onooniherya omuttittimiha, onvuwiha ni omphenta ole okhwiiye. Mwaha wa yeeyo, atthu akina okathi enihuliwa aya ekaxau, wala okathi onilavuliwa aya mwaha wa naakhwa, aahiiso, omahiye, annipacerya wunla mootepana, wuupuruwa wala omorela vathi, ni olavula ohoolo wa ekaxau ntoko wira ole okhwiiye nlelo mukumi. Nave-tho, akina annivara murutthu, otupha ekaxau, aahiiso ophavela okela mulittini. Nnaamwi okhwa oniriipihaka murima vanceene, masi atthu a Yehova khanooniherya oriipiwa waya murima mootepana. Xeeni? Mwaha woowi hiyo ‘khanintikhina mukhalelo w’alipa-òkhwa’. Nto hiyo ninnisuwela wira ale akhwiiye khanisuwela etthu. Hiyo nookhalana yoolipelela ya ohihimuxiwa. (Yoh. 5:28, 29) Nto sooleiherya iyo sinninlipiha, ni ‘khinniripiwa murima ntoko sinripiwaya atthu akina ahinroromela’.​—1 aTes. 4:13.

Nuumala Ovithiwa Murutthu

¹¹ Nuumala ovithiwa murutthu, nto masikho animalela vaavo. Khiivo-tho etthu ekina enitthuneya ovahiwa ole okhwiiye. Nuumala masikho, ole oniphavela pooti oxukurya emusi ekhweliwe wira evahe nikhaliheryo ni yoomaaliha. Nto okathi owo, onniniiriha wuupuwela wira okumi ahu khonipisa, ni wira ‘nihiku n’okhwa ti norera ovikana nihiku n’oyariwa’. (Mus. 7:1) Nto vanooreera akhala wira ale anirwa oxukurya khanaakhanyererya amusi akhweliwe wira akumihe eyoolya, opuro woorupa, ni itthu sikina. Atthu a Yehova annikupali wira “mulipaòvaha onoreriwa onvikana “mulipa-òvahiwa”. (Mit. 20:35) Nto ti vooloka wuupuwela ele ekhanle ahu oowaavaha ale ariipiwe murima nimurumeelaka Biibiliya ni waavaha nikhaliheryo na werutthuni, ohiya olipelela ovahiwa etthu ntoko eyoolya, eviinyu, otthekula ni itthu sikina. Nakhala ooreera murima ni ohincererya oriipiwa waya murima ale akhweliwe, nnimooniherya ophenta weeKristau ni waacalela akina.​—aGal. 6:2.

¹² Niira na Okhupa Ettuurwa ni Omuupuwelela ole Okhwiiye: Nuumala ovithiwa ole okhwiiye, imusi sikina sinnipaka mareheryo wira epake ele eniitthaniwa “niira na okhupa ettuurwa”. Atthu akina annipaka efesta yomuupuwelela ole okhwiiye (kwaresma) wala efesta ekina, aphavelaka omuupuwelela ni omuttittimiha namukhwa owo. Nto okathi owo ennikhala eyoolya, eviinyu, muusika, ni onnikumihiwa musurukhu munceene. Nnaamwi yoolema ela evirikanaka khuta opuro, ikwaha sinceene yoolema ela enipakiwa nuuvira mahiku 7, 40, wala ovikana-vo, nuumala mutthu okhwa. Anamunceene anuupuwela wira opaka efesta ya okhupa ettuurwa vamosa ni kwaresma ti vootthuneya. Maana anikupali wira munepa wa ole okhwiiye khonirowa woopoliwa akhala wira khasinipakiwa ifesta iyo.

¹³ Olokiherya wala opaka niira na okhupa ettuurwa ni kwaresma, aahiiso efesta ekina nuumala ovithiwa murutthu, onikhala ntoko wira ti okathi wooreerela wira nilipihiwe wala naalipihe ale akhweliwe. Wala akina pooti wuupuwela wira owo okathi woweemererya ale yahaarwiiye nihiku na masikho, wira emulaxerye ole okhwiiye. Akina annipaka ifesta iyo wira yaaxukhurele amusi akhalihenrye masikho. Okhala wira ifesta iyo sinipakiwa nuuvira okathi munceene, nto niireke khasinivarihana ni olumwenku? Aahiiso vaamureerela anna a mmulokoni ni amusi akina olokiherya ifesta iyo?

¹⁴ Nuumala ovithiwa murutthu, anamuyari wala anamwane owunnuwela pooti opaka muthukumano mwaamukhaani wira evaanele voohimya sa itthu sirumeeliwe okathi wa masikho, ni myaha sikina sinivarihana ni naakhwa. Ohiya-vo, nuumala masikho, anna akina pooti waavaha amusi akhweliwe etthu ya werutthuni, mmuupuweloni ni omunepani. Masi, eyo khuta mutthu ohaana opaka mmansawe, moohihela muhina muloko wotheene. Nto exeeni enirowa okhumelela akhala wira emusi emosa yoolokiherya efesta enivarihana ni masikho nto khiyalattula muloko, amusi, ni apatthani? Opaka eyo pooti owiiriha atthu akina wuupuwela wira Anamoona a Yehova annipaka ifesta sa omuupuwelela namukhwa wala kwaresma. Nave-tho, opaka eyo wamwaakhumuliha atthu akina yaawo anisuwela ele Anamoona a Yehova anikupali aya ni wiixuttiha voohimya sa mukhalelo wa alipa-ookhwa. (1 aKor. 10:32) Okhala wira yoolema ya opaka efesta ya okhupa ettuurwa ni kwaresma enivarihana ni minepa sa amuhavinre, nto maKristau a ekeekhai ahaana osyaka itthu sotheene sinivarihana ni ifesta sa omuupuwelela namukhwa. (2 aKor. 6:17) Tthiri, vaavo nimpaka ahu eyo, ninnooniherya wira ‘ninnikhota sotakhala’, ni ophenta ni ovarexexa ele eri yooloka, ni ya xariya. (Esal. 97:10; aRom. 12:9) Nto, otheene ahu nrowe niiwelele ni murima wotheene malakiheryo ooloka yaawo nithokorenrye ahu mmwaha ola. Niira siiso, masikho ahu a eKristau anookhala oohaattiheriwa itthu, ooreerela, ni oottittimiheya yaawo ahirina soolema sa olumwenku.

[Inoota]