Exikola ya Orummwa wa Muluku ya 2015 Enninikhaliherya Wiixuttiha Saana

¹ Nasalimo Davidi aalempe so: “Apwiya! Mwakhele molumo a mwano mwaka: mwakhele mupuwelo wa mmurimani mwaka. Apwiya! Nyuwo mwá mòpoli aka n’ulipa waka”. (Esal. 19:15) Moolikanasa ni Davidi, hiyo nimphavela omuhakalaliha Yehova, maana ninnivaha efaita eparakha ya olavula ekeekhai mmulokoni ni mmutekoni woolaleerya. Yehova onnirumeela Exikola ya Orummwa wa Muluku wira oniixuttihe muteko woolaleerya. Nikuruta nlo ninnipakiwa khula esumana mmilokoni sinivikana 111.000. Nlo ninnaakhaliherya axinna ni arokora a olumwenku wotheene okhala anamalaleerya oophwanelela a ihapari sooreera, aniwerya wiixuttiha moovara murima, mwa nttitimiho ni moolipa murima.​—Mit. 19:8; aKol. 4:6.

² Eprograma ya exikola ya 2015 enirowa okhalana myaha sinikhuma elivrinyu eni: Masu Oopacerya a Nuulumo na Muluku, eliivuru Biibiliya Oniixuttiha Exeeni, ni Omphenta Muluku. Nave, aapakiwa marukunuxo a okathi wa ottittimiheriwa Iponto Suulupale sa Omusoma Biibiliya ni Yoothanleliwa N.° 1. Marukunuxo awo vamosa ni moota sinrowa aya opakiwaka exikola mwaahiyu annithokoreriwa ittima sinittharelana:

³ IPONTO SUULUPALE SA OMUSOMA BIIBILIYA: Munna onirowa othanleliwaka epantte ela, onirowa okhalanaka minutu 2 wira ottittimiherye eponto emosa yoovareleya muteko ya omusoma Biibiliya khuta esumana. Wiilokiherya saana onoomukhaliherya munna owo olavula eponto enitthuneya mmulokoni moovarihana ni okathi ovahiwe awe. Nuumala-vo anna anirowa ovahiwaka minutu 6 ntoko yoolimalela wira avahe ikomentaario muhina mwa isekuntu 30 wala ohiphiya, wira ahimye ele yaasivenle esomme aya mBiibiliyani. Ti vootthuneya wiilokiherya ni wiihiiha wira ikomentaario sahu sihivikaneke isekuntu 30; masi opaka eyo oniirela mpantta wiixuttihiwa wahu. Eyo enoowiiriha anna anceene okomentari.

⁴ YOOTHANLELIWA N.° 1: Okathi wa omusoma Biibiliya woovukuliwa, vano onrowa okhalaka minutu 3 wala ohiphiya, nave iversiikulu soosoma sinrowa okhalaka vakhaani. Ale anithanleliwa osoma epantte ela ahaana wunsayari vanceene asomaka mowiiwanyeya, avahaka ephoole epantte ya osoma saana ni ohikukumela wira yawerye olavula mwa enamuna eniiweya aya saana. Arumeyi otheene a Yehova ahaana wiimananiha osoma saana, okhala wira osoma onniirela mpantta okokhorela wahu. Tthiri ninnihakalala vaavo aniihu anisoma aya saana! Anamuyari annittottopeliwa mwaha wa wiimananiha waya moophenta waakhaliherya anaaya okhala alipa oosoma saana.

⁵ YOOTHANLELIWA N.° 2: Enirowa okhalanaka minutu 5, arokora tanrowa ovahiwaka. Arokora awo ahaana orumeela muru othanleliwa awe. Akhala wira mwaha owo okumihiwe elivirinyu eni: Masu Oopacerya a Nuulumo na Muluku, wala eliivuru Biibiliya Oniixuttiha Exeeni, mpantta owo ohaana olavuliwa moovarihana ni enamuna emosa ya muteko woolaleerya elimaleliwe, ni enivareleya muteko mmuttettheni. Akhala wira okumihiwe eliivuru ‘Omphenta Muluku’, naxikola owo ohaana orumeela mwaha othanleliwa awe, othanla soolepa sooreerela, ni wooniherya moota malakiheryo a Biibiliya anivareleya aya muteko wa maKristau. Soolepa sikina sinivarihana ni muru owo pooti orumeeliwa. Muhooleli a exikola tonimuthanla namakhaliherya a murokora owo.

⁶ YOOTHANLELIWA N.° 3: Enirowa okhalanaka minutu 5, pooti ovahiwa munna wala murokora. Akhala wira avahiwe arokora, awo ahaana olavula mwaha ola attharihelaka malakiheryo a Yoothanleliwa N.° 2. Masi akhala wira munna tothanliwe, ohaana olavula ntoko sinilavuliwa aya mwaha, eemenle ene vaplataforma. Akhala wira mwaha owo okumihiwe eliivuru Biibiliya Oniixuttiha Exeeni, mpantta owo ohaana olavuliwa moovarihana ni enamuna emosa ya muteko woolaleerya, ni enivareleya muteko mmuttettheni. Akhala wira mwaha owo okumihiwe eliivuru ‘Omphenta Muluku’, naxikola owo ohaana orumeelaka muru othanleliwe awe, othanla soolepa sa Biibiliya soosoma, ni wooniherya moota malakiheryo a Biibiliya anivareleya aya muteko wa maKristau.

⁷ Enamuna Esya ya Yoothanleliwa N.° 3 wa Anna: Akhala wira mwaha owo onikhuma elivrinyu Masu Oopacerya a Nuulumo na Muluku, munna owo ohaana olavula ntoko yowooniherya ya emusi emusomaka Biibiliya wala yowooniherya ya muteko woolaleerya. Okhala wene muhooleli a exikola onirowa omuthanlaka namakhaliherya ni esenaario ene. Namakhaliherya owo ohaana okhala munna a emusi awe wala munna mukina a mmulokoni. Nave-tho pooti orumeela soolepa sikina sinivarihana ni mwaha owo. Ikwaha sikina, mutokweene pooti othanliwaka wira opake epantte ela. Axitokweene awo anoomuthanlaka namakhaliherya aya. Moohaaniherya, ela enirowa waakhaliherya anna waaweha axitokweene moota aniwiixuttiha aya atthu a emusi aya wala anna akina.

⁸ OVAHA MIRUKU: Nuumala khula naxikola opaka epantte awe, muhooleli a exikola onrowa orumeelaka minutu 2 wira omuttottopele naxikola owo ni onvaha miruku soolipiha orumeelaka eliivuru Beneficie-se da Escola do Ministério Teocrático. Okathi onrowa awe omwiitthanaka naxikola wira olavule mwaha awe, muhooleli a exikola khonrowa ohimyaka eponto naxikola owo eniixutta awe. Masi, nuumala naxikola owo olavula mwaha awe, muhooleli a exikola ohaana omuttottopela ni ohimya eponto yeeyo naxikola owo yaixutta awe. Ohaana ohimya nthowa naya naxikola owo olavunle awe saana mwaha owo moovarihana ni estudo yaavahiwe awe, wala nthowa naya naxikola owo onitthuneya otthikela wiixutta eponto eyo muhoolo.

⁹ Eformulaario ya miruku ya khula naxikola eniphwanyaneya epaaxina 79 mpakha 81 ya eliivuru Escola do Ministério ya naxikola owo. Nuumala naxikola olavula epantte awe, muhooleli a exikola onirowa olepa itthu sootthuneya muliivuruni mwa naxikola owo. Nto oryeene mekhawe, muhooleli a exikola ohaana omukoha naxikola owo akhala wira oopaka exercício ya estudo yaixutta awe. Miruku sikina sootthuneya, pooti ovahiwa naxikola owo nuumala muthukumano wala okathi mukina. Nikhaliheryo khula naxikola onaakhela awe nihaana wooniwaka ntoko eparakha ya orowa vahoolo wa omunepani.​—1 Tim. 4:15.

¹⁰ Akhala wira naxikola onnivikana okathi ovahiwa awe, muhooleli a exikola wala namakhaliherya ohaana orumiha mwa nttittimiho ekampainya wala etthu ekina eninyakula vakhaani, ophavelaka omooniherya naxikola owo wira okathi awe woomala. Nuumala naxikola woona ethoonyeryo eyo, owo ohaana omaliha efrase yaasoma awe ni okhuma otribuna.​—Nwehe eliivuru Escola do Ministério, epax. 282, etti. 4.

¹¹ Atthu otheene aniphwanelela, annitumereriwa wiilepiha Exikola ya Orummwa wa Muluku. (Nwehe eliivuru Beneficie-se da Escola do Ministério Teocrático, epax. 282, etti. 6.) Malakiheryo anivahiwa exikola ela annaakhaliherya arumeyi Yehova olavula ni wiixuttiha ihapari sooreera sa Omwene moolipiherya, mwa nttittimiho ni moophenta. Moohaaniherya, Yehova onnihakalala mwaha woovuwihiwa ni otheene yaale anittottela mureerelo exikola ela!​—Esal. 148:12, 13; Yes. 50:4.

[Eponto yuulupale epaaxina 5]

Weemya ni weettela miruku onoonikha-liherya orowa vahoolo