Nilokiherye Inamuna Sahu Soolaleerya: Moota Womwaakhula Mutthu Oonanariwa

Otthuneya Waya: Naalaleeryaka, ninnaaphwanya atthu annittittimiha. Masi, Yesu aahihimya wira atthu akina yaarowa oninyokha. (Yoh. 17:14) Tivonto, nihitikhineke vaavo nnaaphwanya ahu atthu oonanariwa. Akhala wira eyo enniiraneya, nihaana waakhulaka mwa enamuna enimuhakalaliha Yehova. (aRom. 12:17-21; 1 Ped. 3:15) Opaka eyo pooti omwiiriha mutthu owo wira ohinanariwe mootepana. Nave-tho, ninninvaha onamoona mutthu owo vamosa ni ale anniweha, ni pooti owiiriha waawiriyana Anamoona mukwaha mukina.​—2 aKor. 6:3.

Moota Womwaakhula Mutthu Owo:

• Mukhaleke oomaaleleya ni oopatthaneya. Eyo pooti okhaliherya wira muxankiho owo ohitepe. Muhuupuweleke wira mutthu owo onanariwe mwaha wa nyuwo. (Mus. 7:9) Pooti wira onyoonyihen’ye mwaha wa mixankiho sawe, wala mphiyale okathi woohikhalela. Hata onanariwaka mwaha wa ihapari sahu, woonasa wene owo oroowokiwa ni atthu akina.​—2 aKor. 4:4.

• Mwaakhuleke mooreerela. (Mir. 15:1) Niireke muronvenxa vaarupa awe? Wala mumphwannye ovaraka miteko sikina? Ekeekhai wira hiyo khininveka muswammaha mwaha woomulaleerya. Masi, pooti onvekela muswammaha mwaha woophiya okathi woohireerela. Niireke onanariwe mwaha wa itthu sowoothiwa siiwale awe? Vaari siiso, pooti ohimya so: “Kinniiwexexa nthowa naya munyoonyihen’ye anyu. Masi, kinoona wira ele yiiwale anyu, etthu yowoothiwa. Pooti wootthokiheryani?” Niireke mutthu owo onivaanyiha sookupali sahu, ntoko okumihiwa wa atthu ahinttharuwa mmulokoni wala oheemererya wahu ephome? Pooti ohimya so: “Kinniiwexexa. Atthu akina aalavula siiso. Xontte, pooti owooniheryani mBiibiliyani-mu nthowa naya ninkupali ahu eyo?”

• Akhala wira khoreere onanariwa, vanooloka okhuma opuro owo voohimananiha omwaakhula etthu. Avekela ohixukuriwa-tho ni Anamoona a Yehova, mmuleele wira ele enivekela awe enoottittimihiwa.

Mweererye Ela Mweeri Yoola:

• Okathi woomulompa Muluku vatthokoni, mwinsayariki moota womwaakhula mutthu oonanariwa okathi woolaleerya.

• Nuumala okhuma vatthokoni, nvaaneleke ni mukhwiinyu wira musuwele akhala wira momwaakhula saana mutthu owo.