Mmukhaliherye Mwaneene Etthoko Wuupuwelela
1. Enamuna xeeni ya olaleerya eri yoovara murima?
1 Enamuna xeeni ya olaleerya eri yoovara murima? Niireke wira ori olavula mookhanyererya, wala omukhaliherya mwaneene etthoko wuupuwelela wira osuwele ekeekhai moohikhanyereriwa? Murummwa Paulo, aahaakhaliherya atthu wuupuwelela vaavo aalavula awe ni aYuda oTesalonika, nto “akina a yawo yahamini”. (Mit. 17:2-4) Ontaphulela exeeni waakhaliherya akina wuupuwelela?
2. Ninrowa omutakiha sai Paulo naalaleyaka ihapari sooreera?
2 Musuweleke Moonelo ni Makhalelo a Mutthu: Omukhaliherya mutthu wuupuwelela, onihela muhina osuwela moonelo wa mutthu onimulaleerya ahu. Okathi Paulo aapacenrye awe ovaanela ni aKriki oohaamini wAreopago, aalavunle itthu seiye yaasuwela aya ni okupali. (Mit. 17:22-31) Nto, vaavo munilokiherya anyu etthu yoorowa ohimya okathi woolaleerya, muhaana wuupuwelelaka itthu sinikupali aya ni sinithanya aya. (1 aKor. 9:19-22) Mwaneene etthoko apaka nikoho, mmananihe wuupuwelela etthu enimwiiriha opakaka nikoho nno, nto murumeele etthu eyo wira mmukhaliherye.
3. Moota xeeni orumeela oratteene makoho onirowa aya onikhaliherya ovaanela saana ni akina?
3 Murumeeleke Makoho Oratteene: Hiyo khanniwerya omuleela mutthu ephiro yootthara, nihisuwenle opuro ene oniphavela awe ophiya. Moolikanasa, khanniwerya omukhaliherya mutthu osuwela ekeekhai, naahisuwele moonelo awe. Yesu ohinatthi ovaanela ni mutthu, aapacerya omukoha wira osuwele moonelo awe. Mwa ntakiheryo, mutthu mukina aahimukoha Yesu wira: “kìreke-ni wira kiphwanyé ekumi yohimala?” Ohinatthi waakhula, Yesu aahiimananiha osuwela moonelo wa mutthu ole. (Luka 10:25-28) Okathi mukina, vaavo Pedru ahaasuwenle awe waakhula, Yesu aahirumeela makoho oratteene wira omukhaliherye Pedru olokiherya muupuwelo awe. (Math. 17:24-26) Tivonto, vaavo mwaneene etthoko onipaka awe nikoho wala okhalana moonelo woohiloka, nirumeeleke makoho wira nimukhaliherye wuupuwelela mmwaha owo.
4. Xeeni vanitthuneya ahu omananihaka omukhaliherya mwaneene etthoko wuupuwelela?
4 Vaavo nimmukhaliherya ahu mwaneene etthoko wuupuwelela, nimmutakiha Yesu yoowo ori Mwiixuttihi Muulupale, vamosa ni anamalaleerya a eseekulu yoopacerya. Nave-tho, ninninvaha nlemeliho ni omuttittimiha mwaneene etthoko. (1 Ped. 3:15) Wira siiso, pooti omwiiriha mwaneene etthoko oneemererya omulaleerya mukwaha mukina.