Nilokiherye Inamuna Sahu Soolaleerya​—Nikawaka Eliivuru Biibiliya Oniixuttiha Exeeni

Otthuneya Waya: Eliivuru Biibiliya Oniixuttiha Exeeni ti ekaruma ahu yuulupale enirumeela ahu wira niixuttihe. Masi, nihinatthi opacerya orumeela wira nimusomihe mutthu, nihaana onvaha toko eliivuru eyo. Tivonto, otheene ahu vanireerela ahu wiimananiha wira niixutte inamuna sooreerela sa okawa eliivuru Biibiliya Oniixuttiha Exeeni okathi onilaleerya ahu. (Mir. 22:29) Sookhala inamuna sinceene sooreerela sa okawa eliivuru eyo, masi khula namalaleerya ohaana orumeela enamuna enoona awe ovareleya muteko.

Moota Woopaka Eyo:

• Npakeke nikoho noovara murima wira mmwiirihe mutthu onilavulana anyu osiveliwa muru mmosa ori muliivuruni. Nyuwo pooti othanla nikoho nimosa nri wanipacerya wa khula muru. Nuumala wiiwa moota mutthu owo onaakhula awe, musomeke yoolepa enoona anyu oreerela nto mmooniheryeke ettima enitthokiherya mwaha owo, vaaweryaneyaka muthokorerye vakhaani mwaha owo ni mutthu owo.

• Enamuna ekina ti omooniherya makoho ari ipaaxina soopacerya sa eliivuru eyo wira mmwiirihe ophavela osuwela moota Biibiliya onaakhula awe makoho awo. Mwa ntakiheryo, nyuwo pooti oromola ehasara ekhumelenle naanano mmuttettheni mmo, nto mmuleeleke wira anamunceene khanisuwela waakhuliwa wa makoho ari epaaxina 3. Wala nyuwo pooti ohimya wira munaaxukurya anamwaattamanani anyu wira mwaasuwelihe nlipelelo nooloka na muhoolo. Nwooniheryeke ifootu siri ipaaxina 4-5 nto mwaakoheke so: “Yooleiherya xeeni yaarowa woosivelani woona yaakhwanelaka?” Yookhala-tho enamuna ela, nyuwo pooti ohimya so, nnaaxukurya atthu moohipisa wira naakhaliherye ophwanya waakhuliwa wa makoho maalupale arina aya. Nuumala-vo mmooniherye mutthu owo makoho ari wanikisa wa epaaxina 6, nto munvekele wira othanle nle nimmusivela wiiwa waakhuliwa waya.

• Murumeele enamuna yooluluwanya ya opaceriha soosoma sa Biibiliya. Nyuwo pooti ohimya so: “Ninwooniherya anamwaattamanani ahu eliivuru ela enikhaliherya omusoma Biibiliya. Nyuwo mootoko woona? [Nwehereryeke waakhuliwa.] Vakhala wira mookhalana okathi vakhaani paahi, kiniphavela owooniheryani moota mukhanle anyu oorumeela eliivuru ela ni Biibiliya anyu”.

Mweererye Ela Mweeri Yoola:

• Mulokiherye enamuna yoolaleerya okathi wa omulompa Muluku vatthokoni vanyu.

• Okathi onilaleerya anyu mwaaleeleke anna akina ele elokihenrya anyu. (Mir. 27:17) Muturukeke enamuna anyu ya olaleerya moona vale wira khenikumiherya mireerelo.